2 Corintios 6 - Dios Iwene

^1-2 Jejenö laebobe otiwa jawa wenema chömöledö, ja̧danö Dioskwö bakobe otidö, budekwödanö abebadösa jojodönö, Dios mikwa jwiinö otiwanö iyö pjaati̧ma kwöpöjödaduwa jö̧ba̧lö. Jau chömöledö, Dios iwene damötjö tjiwȩyudinadanö jo̧be, baikwö laebobe Dios iwene: Ökwödönö pjatatakwa̧ möle baibenama, ökwödönö cha̧ja̧kwijatö, ja̧danö kwö̧jibaduwinö pjatatakwa̧ möle baibenama, ökwödönö pjatatijatö, jö̧ba̧lö laebobe Dios iwene. Jejenö laebobe Dios iwene chömöledö, ja̧danö Dioskwö bakobe otidö yödawobe: Dios ökwödönö pjaatakwa̧ möle jö̧ba̧lö badekwachi̧ma, babe möleda badekwachobe, ja̧danö kwö̧jibaduwinö pjaatakwa̧ möle badekwachi̧ma babe möleda badekwachobe, jo̧kwajabetjö̧ Dios iyi̧ öpöjödökönö, Cristonö kwösödaduwo jö̧ba̧lö yödawobe jojodönö.

Ökwödö ja̧bö dö̧ji̧ma, di̧sebobe, Dios wei̧ jwaikwöda otidadösa jö̧ba̧lö

³ Jau chömöledö, otiwa jawa wene jojodönö yödawobe, Dios otiwanö pjaati̧ tjösödobö. Ja̧danö, isabenö tjösödobö jö̧da̧lobetjö̧, te'ada̧lönö otiwanö ja̧bö dö̧jobe, ja̧bö dö̧ji̧ edö ja'yubebi otiwa jawa wene tjöpöjödapji jö̧ba̧lö. Jau chömöledö, yöbawö dö̧jonö sulabenö ja̧bö dö̧jitjö̧ma, jojodö ökwödönö edö otiwa jawa wene tjöpöjödena, jo̧kwajabetjö̧ te'ada̧lönö ja̧bö dö̧jobe, ökwödönö edö mikwawökö weneda yöba̧ladö jö̧ba̧lö tjöpöjödapji jö̧ba̧lö.

⁴ Jau chömöledö, okobe jwiinö ja̧bö ja̧nö di̧sebobe, isabenö Dios ömöayedösa jö̧ba̧lö. Baikwö yötawa jejenö di̧sebi̧ma chömöledö: Do̧'wo̧ 'dibachibö ja̧nö, nöinö wene baledadösa, ja̧danö ju'wibi usula emawakwawa baledadösa, ja̧danö ju'wibi ökwödönö sulabenö baledi̧ baledadösa.

⁵ Jau chömöledö, ju'wedöma ökwödönö kwakwatjobe, ja̧danö ju'wibi ju'wedöma ökwödönö ka̧lena tjödobe, ja̧danö ju'wibi ba̧jekwadö labidö mebibö tjölabobe ökwödönö. Ja̧danö dime'dawachibenanö dotidobe, ja̧danö ju'wibi yö̧te baledibanö abökönö dö̧jobe, ja̧danö ju'wibi a̧wi̧chi̧ tjödobe.

⁶ Jejenö usula demawijayonö, sulabenö ja̧bökönö dö̧jobe, ja̧danö ju'wibi Dios iyi̧ waisakwawa di̧sebobe, ja̧danö ju'wibi do̧'wo̧ 'dibachibö dösölö̧jinö ja̧bö dö̧jobe chömöledö, isabenö Dios ömöayedösa jö̧ba̧lö. Ja̧danö ju'wibi, Dios O̧'wo̧ Luwo̧ do̧'wo̧ luwo̧nö ö̧ji̧ma i̧sebobe Dios ömöayedö dö̧ji̧ma, ja̧danö ju'wibi isabenö jojodönö ösödabikwawö ja̧nö di̧sebobe, isabenö Dios ömöayedösa jö̧ba̧lö.

⁷ Jau chömöledö, jwaikwöda isabenö wene yödawobe, ja̧danö ju'wibi ökwödönötjö Diosma iteda ujulu i̧sebobe. Ja̧danö guardia jojo kwölötebi, tjöekwapibi kweati̧danö, Dios bakwainö sulabe jwii̧ kwedatobedanö jo̧be chömöledö, döpöjojodönö dujuluwo jö̧ba̧löbi, ökwödönö metjibena tjöbeba̧lö dö̧joböbi.

⁸ Ju'wedö otiwanö ökwödönö tjomukwatonö, ju'wedö sulabenö tjomukwatobe ökwödönö. Ju'wedö ökwödönö sulabedö jö̧ba̧lö yötja̧lonö, ju'wedöma otiwanö ja̧badö jö̧ba̧lö yötja̧lobe ökwödönö. Ju'wedö ökwödönö omöna yöba̧ladö jö̧ba̧lö yötja̧lijayonö, jweinö isabenö weneda yöba̧ladösa.

⁹ Ju'wedö bidöma wajwidawö̧, wajwibadöena jö̧ba̧lö tjomukwatijayonö, böjȩ bakwameachibanö Dios ömöledö ökwödönö tjöwaisobe, Dios iwene yöbawadö jö̧ba̧lö. Jau chömöledö, ju'wedöma Aaa, wotjakwedö jö̧ba̧lö yötja̧lijayonö, ina yaba̧ladösa chömöledö, ja̧danö luwedö ökwödönö lȩbebö kwakwatjijayonö, kwabö lotjököwö̧sa,

¹⁰ ja̧danö do̧'wo̧ tjo̧achijayonö, do̧'wo̧ luwo̧ ösöwachibanö ja̧dösa. Jau chömöledö, böjȩ jawatjö usulasedösa, jo̧kwaijayonö ju'wedönö nöinö juna̧ladö batjibanö tjo̧'wo̧ luwo̧ jawa iyadösa, ja̧danö jwibadödanö dichejekwijayonö, isabenö mikwawi̧ jawa okobe jwiinö juna̧ladösa. Jau chömöledö, ju'wedö ökwödönö Dios ömöayedöböködö jö̧ba̧lö yötja̧lijayonö, ja̧bö dö̧ji̧ma öwaetjöda i̧sebobe Dios ömöayedö dö̧ji̧ma.

Ökwödönö dösödi̧danö, balekwa mikwa ökwödönö kwösödaduwo jö̧ba̧lö Pablo yöawina wene

¹¹ Chösödawö̧ chömöledö Corintio jojodö, jweinö ökwödönö yödawajabe chömöledö, isabenö ökwödönö dösöda, yöne dömöledö jö̧ba̧lö.

¹² Chömöledö, ökwödö Corintio jojodönö ösödöma kadatibokobe chömöledö, jo̧kwaijayonö ökwödöda ökwödönö ösödö kabatibadöja,

¹³ jo̧kwajabetjö̧ chi̧tji̧munö yöta̧li̧danö yöta̧laduwakwö chömöledö, ökwödönö dösödi̧danö balekwa mikwa kwösödaduwo ökwödönöbi jö̧ba̧lö.

Bakobe Jesúsnö öpöjödadökwö babibökönaduwi jö̧ba̧lö Pablo yöawina wene

¹⁴ Chömöledö, ökwödö Cristonö ösödadöma, Cristonö öpöjödadökwö bakobe bakibaduwoko, baikwö yötawa: Sulabe jwii̧ma, suli̧kwö ¿bakobe pjabacha̧lö jenaji̧? Ja̧danö, dewinö dejati̧ma, yȩi̧kwö ¿bakobe pjabacha̧lö jenaji̧?

¹⁵ Ja̧danö Cristoma, Awetja omukwati̧danö ¿bakobe omukwatenaji̧? Dios yöawi̧ ösödakwawama, Dios yöawi̧ öpöjödakwawakwö ¿bakobe pjabacha̧lö jenaji̧?

¹⁶ Diosnö ösödakwawejutjö, Diosböködö o̧'wo̧ jawa tjösödobö ¿Diosma weenaji̧? Kwöwaisaduwa chömöledö, jejenömaökö, ¿jö̧tö? Jau chömöledö, isabenö Cristonö öpöjödadökwö bakibaduwoko, ökwödö Cristonö ösödadöda 'yaba̧lo̧ Dios ejubedö dö̧jobetjö̧. Jau chömöledö, isabenö Dios eju babibinadösa, Dios iwene laebi̧danö. Baikwö laebobe Dios iwene chömöledö Dios yöawinama: Ötjöma ötjö chömöledö tjo̧'wo̧ luwo̧nö chö̧jakwo̧sa, ja̧danö jobadö tjö'da̧de kwetachocha, ja̧danö ötjöma jobadö tjuluwo̧ Dios chö̧jakwo̧sa, ja̧danö jobadöma ötjö chömöledö tjö̧jakwedö, jö̧ba̧lö laebobe.

¹⁷ Jo̧kwajabetjö̧ Dios wei̧danö ja̧dobö jo̧be chömöledö, baikwö laebobe Dios iwene: Duluwo̧ wei̧ma baikwö laebobe: ötjönö öpöjödadö tjö'da̧detjö labebaduwi, ja̧danö jobadötjö 'da̧bachibaduwi. Jobadö tjujuna̧li̧ suli̧ jawa mabökönaduwi, ja̧danö ökwödönö chösödocha,

¹⁸ ja̧danö ökwödö kwabe'doduwi chö̧jakwo̧sa, ja̧danö chi̧tji̧mu ömadöbi, chi̧tji̧mu ya̧döbi kwö̧jaduwakwedöja, jö̧ba̧lö laebobe Dios iwene, okobe jwiinö juluwo̧ Duluwo̧ yöbawö ujunina wenema.