2 Corintios 5 - Dios Iwene

Tupakwö mölejȩbe otiwanö dö̧jakwa̧ omukwatö, usula demawijayonö do̧'wo̧ tjo̧bekwöma kadatibokobe jö̧ba̧lö Pablo yöawina wene

¹ Jau chömöledö, döwaisa, babe diteba'oma lekwe jö̧kö'o, baikwö wanedö yötawa: Babe diteba'oma, sule löwötedanö ichejekwa, jo̧kwaijayonö ja̧'o woenama, balekwa'o ba̧kwȩlö̧jatebö ja̧kwa'o dujuna̧lakwedösa ökwödö Jesúsnö ösödadöma. Ja̧danö ja'oma, Diosda otidö iyakwa'o, chömöledö, ja̧danö jojodö tjotidöte löwötedanö ichejekwökakobe, Diosda inesö otiweju otidinejudanö ichejekwakwa'o chömöledö.

² Jau chömöledö baikwö wanedö yötawa: Ina diteba'o böjȩsa'onö ja̧nö, ö̧ö̧ö̧, balekwa'o mölejȩbesa'o 'dudawowe jö̧ba̧lö jwödobedanö ichejekwa,

³ jejenö 'yaya'o balekwa'o dujuna̧lenama, isabenö jwiinö otiwa'o dujuna̧lakobetjö̧. Jau chömöledö, bi'o babe dujuna̧la'o 'yo̧dekwenama, diteba'o jwibadö dö̧jökakwedösa, balekwa'o babe dujuna̧la'otjö bajalekwönönö otiwa'o dujuna̧lakobe.

⁴ Jau chömöledö, ina bi'o böjȩsa'onö dö̧jayi, usula emawö ö̧ö̧ö̧ jö̧ba̧lö jwödobe. Jo̧kwaijayonö, jejenö jwödi̧ma, ö'wö badibobö dösödobetjö̧ jejenö jwödökö chömöledö, bajalekwönönö ji̧ ja̧kwawa dujuna̧lowe jö̧ba̧lö jejenö jwödobe, ja̧danö babe woawasa'oma, ja̧kwawa jawasa'o baibanö balewachowe jö̧ba̧lö jejenö jwödobe.

⁵ Diosda diteba'o otiwa'o ökwödönö iyobö omukwatö ujuninobe chömöledö, ja̧danö jejenö iyakwa̧ wenema ökwödönö yöbawö ujuninobe. Baikwö yötawa Dios ökwödönö yöbawö ujunina wenema chömöledö: Diosma iteda O̧'wo̧ Luwo̧nö ökwödönö iyinobe, isabenö tupakwö kwiteba'o 'yaya'obi chiyakobe jö̧ba̧lö. Ja̧danö chömöledö, Dios O̧'wo̧ Luwo̧nö ida̧ökö dujuna̧lobetjö̧, ju'wibi döwaisobö jo̧be, tupakwöma diteba'o 'yaya'obi dujuna̧lakwedösa jö̧ba̧lö. Jau chömöledö, ja̧ wene yöbawö junö Diosma iteda O̧'wo̧ Luwo̧nö ökwödönö iyinobe.

^6-7 Ja̧danö, Diosma jejenö iteda O̧'wo̧ Luwo̧nö ökwödönö iyinobetjö̧, ba̧kwȩlö̧jatebö do̧'wo̧ tjo̧bekwökönö dö̧jobe chömöledö. Jau chömöledö, ökwödöma dedi̧ jawama omukwatöködösa, Dios yö̧awi̧ ösödö omukwatadösa. Ja̧danö Dios yöawi̧ dösödobetjö̧ baikwö döwaisobe, ina bi'o diteba'onö dö̧jayi, isabenö inesö ditebonöma jö̧ködösa, sule diteba'o böjȩsa'otjö labebajadö Duluwo̧kwö dö̧jenada isabenö ditebonö dö̧jakobe jö̧ba̧lö.

⁸ Ja̧danö, jejenö döwaisobetjö̧, do̧'wo̧ tjo̧ekwokobe, do̧'wo̧ ösöwanö dö̧jobe, isabenö Duluwo̧kwö dö̧jakwedösa jö̧ba̧lö. Jau chömöledö, inesö dösödi̧ma biya̧: Bi'otjö 'da̧bachibö ja̧nö, isabenö ditebobe mölejȩbe Duluwo̧kwö dö̧jo jö̧ba̧lö.

⁹ Jo̧kwajabetjö̧ ina bi'o diteba'onö dö̧jitjö̧böbi, jo̧bakwö dö̧jitjö̧böbi disakwi̧ma bakwainö 'ya̧ chömöledö, Duluwo̧ ösödi̧danö ja̧bö dö̧jobö.

¹⁰ Jau chömöledö, Duluwo̧ ösödi̧danö ja̧dobö disakwobe, döwaisobetjö̧, okobe deinö Cristo ba̧nö yöawelö dö̧jakwedösa, jo̧bada böjȩnö ja̧nö ja̧dina yöawobö, otiwojobö, sulojobö jö̧ba̧lö. Ja̧danö jo̧bada ja̧dina mikwa baibanö iyakwo̧ chömöledö.

Cristo midawö woinobetjö̧, Dios ömöledösa jö̧ba̧lö Pablo yöawina wene

¹¹ Jau chömöledö, ökwödöma Duluwo̧nö jweinö omukwatadösa, inesö La'aka Luwo̧, jo̧bada ja̧bö dö̧jina yöawakwo̧ma otiwinojobö sulinojobö jö̧ba̧lö. Ja̧danö, jejenö döwaisobetjö̧, ju'wedönöbi ja̧ wene yöbawadösa, jobadöbi Duluwo̧nö tjösödo jö̧ba̧lö. Ju'wedöma sulabenö yötja̧lena ötjönö, iteda emotö jö̧ba̧lö yöbawo̧ Pabloma jö̧ba̧lö, jo̧kwaijayonö ja̧maökö chömöledö, Dios wei̧danö otiwanö yöbawo̧sa. Jau chömöledö, Diosma ida̧ökö waiso̧ ötjönö, Pabloma otiwanö Dios yöawi̧ otidö yöbawo̧ jö̧ba̧lö, ja̧danö ökwödö Corintio jojodöbi kwomajadeduwinö jejenö kwöwaisaduwobö chösöda chömöledö.

¹² Chöwaisa chömöledö, ökwödöma ida̧ökö waisadöja, otiwanö yöbawo̧ chö̧ji̧ma, jo̧kwajabetjö̧ ökwödö, Aaa, isabenö Pabloma otiwanö yöbawo̧ jö̧ba̧lö kwöwaisachibaduwoböma chiwȩyudökö. Jau chömöledö, ju'wedönö jweinö atadakwawa kwöwaisaduwakobetjö̧ chiwȩyudobe, ja̧danö otiwanö ba̧ja̧dö chiwȩyudobetjö̧, ju'wedö sulabenö ötjönö yötja̧lenama, otiwanö kwatadaduwena, isabenö Dios wei̧danö yöbawo̧ Pabloma jö̧ba̧lö. Jau chömöledö, jobadö ötjönö sulabenö yöbawadöma sule tjedi̧ jawada omukwatadö, sule juluwinö yöbawadöda mikwawadö, sule wamenö otiwadöda mikwawadö jö̧ba̧lö. Jau chömöledö, inesö mikwawi̧ jawa tjomajade jawama omukwatöködö jobadö ötjönö sulabenö yöbawadöma, ja̧danö juluwö̧kö̧danö chichejekwiawö̧, ötjönö sulabenö yötja̧lobe. Jo̧kwaijayonö isabenö otiwanö yötawobe chömöledö, Dios wei̧danö jwaikwöda yötawobetjö̧. Ja̧danö chömöledö, ötjönö sulabenö yötja̧li̧ a̧ja̧kwö, isabenö Pabloma Dios wei̧danö yöbawo̧ jö̧ba̧lö kwatadaduwakobetjö̧, chiwȩyudaduwakwö.

¹³ Jau chömöledö, ju'wedöma ötjönö yötja̧lena, Aaa, Pabloma o̧'wo̧ jwibo̧danö ichejekwo̧ jö̧ba̧lö. Baikwö yötawa: Isabenö cho̧'wo̧ jwibo̧danö chichejekwena, jo̧kwaijayonö Dios weina yötawobetjö̧ jejenö chichejekwena. Jau chömöledö, ja̧bö chö̧ji̧ma biya̧, Dios wei̧danö ja̧bö chö̧jobe, ökwödönö pjatatobö. Jo̧kwajabetjö̧ cho̧'wo̧ jwibo̧danö chichejekwitjö̧bi, jweinö omukwato̧ chichejekwitjö̧bi bakwaiobe chömöledö, ötjönö otiwanö tjomukwatobö chisakwokobetjö̧. Jau chömöledö, ja̧bö chö̧ji̧ma, Dios wei̧ ja̧bö ökwödönö pjatatobö.

¹⁴ Jau chömöledö, ju'wedö ökwödönö tjomukwati̧ma mikwawokobe ökwödönö, tjösödi̧danö ja̧bö dö̧jo jö̧ba̧lö, Cristo ösödi̧da mikwawi̧ma. Jau chömöledö, döwaisa, Cristoma böjȩ jojodönö ösödö, okobe deinö pjaatotö jö̧ba̧lö midawö woinobe jö̧ba̧lö, ¿jö̧tö? Jau chömöledö, dö̧jibinö pjabato̧ Cristoma böjȩ jojodönö pjaatobö ösödo̧, ja̧danö ja̧ ösödi̧ma ja̧bö dö̧jakwa̧ jweebobe chömöledö, jojodönö yödawo jö̧ba̧lö. Jau chömöledö, jo̧banö döwaisobe, okobe deinö pjaatotö jö̧ba̧lö midawö woinobe jö̧ba̧lö, jo̧kwajabetjö̧ Cristo ju'wedönöbi pjaatobö ösödi̧ döwaisobetjö̧ kabatibökönö jojodönö yödawobe. Ja̧danö, ju'wibi chömöledö, okobe deinö jo̧banö ösödadöma, ökwödöbi jo̧bakwö wodinobe, ¿jö̧tö?

¹⁵ Jau chömöledö, Cristoma okobe deinö pjabatö midawö woinobe, ökwödö jo̧banö ösödadöma, jo̧ba ösödi̧danö ja̧bö dö̧jakobetjö̧. Jau chömöledö, ökwödöda dösödi̧danö ja̧bö dö̧joböma jwiobe, sule dö̧jibobö pjabatö midawö wobina ösödi̧da, midawö wobajo̧ tjebachajina ösödi̧da ja̧bö dö̧jobö jo̧be. Jau chömöledö, jo̧bada ökwödönö ja̧kwawa iyinobetjö̧, jo̧ba ösödi̧da ja̧bö dö̧jaduwo.

¹⁶ Jo̧kwajabetjö̧ chömöledö, jojodönö domukwatenama, böjȩ jojodö wame jawa tjomukwati̧danöma domukwatokobe babema. Jau chömöledö, isabenö ajayinöma jojodö tjomukwati̧danö, wame jawada domukwatijatö, ja̧danö ajayinö Jesúsnö dedenama, wame jawada omukwatö dedijatö, böjȩ jojo jö̧ba̧lö. Jo̧kwaijayonö babema sule wame jawadama omukwatöködösa.

¹⁷ Jau chömöledö, Cristonö ösödadöma ida̧ökö jo̧bakwö wotjinobe, ja̧danö ida̧ökö jo̧bakwö tjetjachajinobe. Jo̧kwajabetjö̧, baikwö jo̧be chömöledö, bakwo̧ Cristokwö dötewanö ö̧jitjö̧ma, Dios 'yayinö otidajökwe baibanö jo̧ jo̧bama. Jau chömöledö, Cristokwö dötewadönöma, damö jawama ida̧ökö 'dö̧ibajinobe, ja̧danö babe dö̧ji̧ma, 'yayinö ja̧kwawa baibinobe. Jo̧kwajabetjö̧ chömöledö, damö jawa ida̧ökö 'dö̧ibajinobetjö̧, tupakwö ja̧ jawa domukwatoböma jwiobe, jwaikwöda 'yayinö ja̧kwawa jawada domukwatobö jo̧be.

¹⁸ Ja̧ 'yayinö otidinawö̧ dö̧ji̧ma, Diosda otidi̧ chömöledö, jo̧bama Cristonötjö ökwödö ajayinö jo̧ba öpöjojodöbinadönö iteda ömöledö badibanö pjaatinobe. Ja̧danö, ja̧damaökö, ju'wibi ökwödönö 'da̧batö ujuninobe Diosma, ju'wedönö ja̧kwawa wene yödawobö. Jau chömöledö, ökwödö Cristonö ösödadöda ja̧kwawa wene yöbawadöma, yödawi̧ a̧ja̧kwö, jobadöbi ösödö Dios ömöledö batjibakobetjö̧.

¹⁹ Jau chömöledö, Diosma ökwödönötjö jojodönö yöawobe, jo̧ba ömöledö batjibobö. Ja̧danö, jojodö Dios ömöledö batjibanö yödawi̧ma biya̧: Diosma Cristonötjö ajayinö iteda öpöjojodö böjȩ jojodönö iteda ömöledö batjibanö pjabato̧, sulabenö ja̧tjina omukwatökönö. Jau chömöledö, Diosma ökwödönö ja̧ wene weinobe, ju'wedönö yödawo jö̧ba̧lö, ajayinö jo̧ba öpöjojodö tjö̧jinajayonö, yödawi̧ ösödö jo̧ba ömöledö batjibakobetjö̧.

²⁰ Jo̧kwajabetjö̧, babema Cristo yöa̧lo jö̧a̧laja̧ma, ökwödönöda weajabe, jo̧ba yöa̧li̧ma ökwödöda jojodönö yödawobö. Jo̧kwajabetjö̧ Cristo yöa̧lo jö̧a̧li̧ma, jojodönö yöbawö dö̧jobe chömöledö. Jau chömöledö, ökwödönötjö Diosma jojodönö budekwödanö a̧deba̧lobe, chömöledö bakibaduwo jö̧ba̧lö. Jau chömöledö, sule yöbawödama yödawokobe, budekwödanö jojodönö yödawobe, Jesúsnö kwösödaduwo jö̧ba̧lö.

²¹ Jau chömöledö, otiwa jawa wenema baikwö laebobe: Cristoma la'akatjöda sulabenö ja̧inököjayonö, Diosma weinobe, ökwödö sulabenö ja̧di̧ma Cristonö baibobö, jo̧bada midawö woobö. Jejenö weinobe chömöledö, ökwödöma Cristokwö dötewanö ja̧nö, Cristonötjö Dios sulabe jwii̧ ökwödöbi dujuna̧lakobetjö̧.