2 Corintios 4 - Dios Iwene

Diosma ökwödö letiatjö otidinawö̧nö 'da̧batö ujuninobe, inesö otiwa wene yöbawadö badibanö jö̧ba̧lö Pablo yöawina wene

¹ Jau chömöledö, Diosma lȩlö̧jinö edö ja̧ salöi̧ 'yayi̧ wene otiwa jawa wene yödawobö ujuninobe, ¿jö̧tö? Ja̧danö chömöledö, ja̧ wenema isabenö inesö salöi̧ weneobetjö̧, usula demawijayonö, do̧'wo̧ tjo̧bekwöma kadatibokobe chömöledö, isabenö jojodö tja̧ja̧kwobö jo̧be jö̧ba̧lö.

² Jau chömöledö, jojodönö yödawobe, jo̧kwaijayonö sulabenö yöbawadö yötja̧li̧danöma yödawokobe. Ökwödö yöbawö dö̧ji̧ma, okobe jwiinö tabatjö ju̧kwawa̧lakwawa ja̧awa döpöjöda, jejenö ja̧doko jö̧ba̧lö. Jau chömöledö, yödawi̧ tjösödo jö̧ba̧löma omöna yödawokobe, ja̧danö Dios iwene jweinö laebi̧tjö balewö lobö wainöma yödawokobe. Jau chömöledö, jejenö yöbawökönö, Dios öba a'otjö ja̧nö, isabenö wene jweinö laebi̧danö yöbawadösa, yödawi̧ a̧ja̧kwajadö tjomajadenö omukwatö, isabenö wene yöbawadö jö̧ba̧lö tjöwaisakobetjö̧.

³ Jau chömöledö, jweinö öwawinö yödawobe, jo̧kwaijayonö öwawinö yödawijayonö, ju'wedönö öwawökö wenedanö ichejekwena. Baikwö yötawaduwakwö chömöledö: Sule Dios lȩebakwawö̧nöda öwawökö wene jö̧ba̧lö ichejekwobe chömöledö.

⁴ Jau chömöledö, yödawi̧ma isabenö öwawinö yödawobe, jo̧kwaijayonö öpöjödadöma böjȩ jojodö tjösödökwe Awetja omöna yöa̧li̧ tjösödobetjö̧ yödawi̧ tjöpöjödobe chömöledö. Jau chömöledö, wanedö yötawa: Awetjama jobadönö ja̧obe, tjomukwati̧nö yȩa'wo okwa tjö̧ji̧danö tjomukwatobö, otiwa jawa wene dejati̧ tjedapji jö̧ba̧lö. Jau chömöledö, Duluwo̧ Cristoma iteda Abe'do Diosdanö bakwainö jo̧, ja̧danö jojodönö salöinö idejatobö ösödo̧, jo̧banö ösödö tjö̧jibakobetjö̧. Jo̧ba salöinö idejati̧ wene otiwa jawa weneda yödawobe jojodönö chömöledö, jo̧kwaijayonö ja̧ salöinö dejati̧ tjedapji jö̧ba̧lö, Awetjama öpöjödadönö omöna yöa̧lobe.

^5-6 Jau chömöledö, Dios iwene laebi̧danö, böjȩ otidenama yȩa'woda ji̧nobe, ja̧danö jemi ikenama Diosda: Yȩa'wo okwatjö dewi̧ babibi, jö̧ba̧lö weinobe, ¿jö̧tö? Ökwödöbi ja̧danö chömöledö, ökwödöbi ajayinöma yȩa'wo okwa dö̧ji̧danö dö̧jinobe, jo̧kwaijayonö dewi̧ otido̧ Diosma iteda iwenenötjö domajadenö idejatinobe chömöledö, Dios salöinö ujulu, Jesucristo öbatjö dejati̧ ujulu döwaisakobetjö̧. Ja̧danö jejenö i̧sebinobetjö̧, ja̧ weneda yöbawö dö̧jobe. Jau chömöledö, yödawi̧ma ökwödö jawama yödawokobe, Cristo jawada yödawobe, jo̧banö a̧ja̧kwö ökwödöbi ju'wedöbi kwö̧jibaduwobö. Ja̧danö chömöledö, luwedösa jö̧ba̧lö yödawokobe, kwömöayedödanöbedösa jö̧ba̧lö yödawobe, ökwödönö pjadatotö jö̧ba̧lö yödawobetjö̧. Jau chömöledö, yöbawö dö̧ji̧ma, ökwödö demo jö̧ba̧löma yöbawöködösa, ökwödönö pjadatotö jö̧ba̧lö yöbawadösa, ja̧danö jejenö omukwatö yödawobetjö̧, nöinö usula demawijayonö kadatibokobe. Jau chömöledö, salöi̧ wene otiwa jawa wenema isabenö jojodö tja̧ja̧kwobö mikwawi̧ wene, ja̧danö jejenö döwaisobetjö̧, kabatibökönö jwaikwöda yöbawö dö̧jobe.

⁷ Chömöledö, ökwödöma ja̧ inesö mikwawi̧ wene yöbawadösa, jo̧kwaijayonö juluwöködösa chömöledö, sule letiatjö Dios dadö otidinawö̧sa, ¿jö̧tö? Ja̧danö, ökwödöma juluwöködö dö̧jijayonö, inesö mikwawi̧ Jesús jawa wene yöbawadösa chömöledö. Jau chömöledö, jojodö tjomukwatena, sule juluwadöda mikwawi̧ wene yötjawobö jo̧be jö̧ba̧lö, jo̧kwaijayonö jojodö tjomukwati̧danöma omukwatö̧kö̧ Diosma chömöledö, juluwadönöma webö̧kö̧. Jau chömöledö Diosma ökwödö juluwöködönöda yödawobö ujuninobe, juluwöködöda yötjawitjö̧ma, ötjöda inesö chujulu öwawakobe jö̧ba̧lö.

⁸ Jau chömöledö, ökwödö inesö mikwawi̧ wene yöbawadöma isabenö juluwöködösa, isabenö dujuluwitjö̧ma, usula demawoko jö̧da̧lena, ¿jö̧tö? Jo̧kwaijayonö kabatökönö usula emawadösa chömöledö. Ökwödö yöbawadönö baikwö wanedö yötawa: Döpöjojodö usula demawinö ja̧tji̧ma ökwödönö tjösawö dodotjobedanö ichejekwa, jo̧kwaijayonö doböma lotjokobe ökwödönöma. Ja̧danö ju'wikwenama dakwö ja̧dakwa̧jö jö̧ba̧lö wajwidijayonö, ayö, ökwödöwe jö̧ba̧löma kadatibokobe.

⁹ Ja̧danö, döpöjojodö ökwödönö sulabenö ja̧tjotö jö̧ba̧lö lutja̧lijayonö, ökwödönö le'dediböma lobö̧kö̧ Diosma. Ja̧danö, ökwödönö medinö kwatjijayonö, söbeböma lotjokobe ökwödönö. Jau chömöledö, isabenö juluwöködösa ökwödö letiatjö otikwedöma, jwaikwöda usula emawadösa.

¹⁰ Baikwö wanedö yötawa: Kabatökönö ju'wedö ökwödönö kwabö lotjobö tjisakwobetjö̧, okobe jwiinö yöbawö kwedachi̧ma, Jesús woinama diteba'onö e'ewö kwedatobedanö ichejekwa, ja̧danö jejenö jo̧be, jo̧ba ö̧ji̧bi diteba'otjö öwawakobetjö̧.

¹¹ Jau chömöledö, ökwödöma ina böjȩnö dö̧jayi, Jesús jawa dotidobetjö̧, ba̧kwȩlö̧jatebö labi̧ jawa döbaledobe, ja̧danö kabatökönö wodo jö̧da̧lobedanö ichejekwa. Ja̧danö, jejenö jo̧betjö̧, ökwödö diteba'o woawasa'otjö Jesús jawa ja̧kwawa isabenö ja̧kwawama öwawobe.

¹² Jo̧kwajabetjö̧ ökwödöma ba̧kwȩlö̧jatebö labi̧ jawa baledö wodo jö̧da̧lobe chömöledö, jo̧kwaijayonö ja̧ wodo jö̧da̧li̧ma otiwa jawa baibobe ökwödö Corintio jojodönö chömöledö, ökwödönötjö ökwödöma ba̧kwȩlö̧jatebö ja̧kwawa kwujuna̧laduwobetjö̧. Ja̧danö, jejenö ökwödö ba̧kwȩlö̧jatebö ja̧kwawa kwujuna̧laduwobetjö̧, öpöjödökönö usula emawadösa, otiwa jö̧ba̧lö. Jau chömöledö, isabenö mikwawi̧ wene yöbawö dö̧jobe, jo̧kwaijayonö ökwödö yöbawadöma mikwawöködösa, sule letiatjö otikwedösa. Inesö mikwawi̧ma yödawi̧ weneda chömöledö.

¹³ Jau chömöledö, damötjö Dios iwene wȩyudinama baikwö iwȩyudinobe: Dios yöawi̧ chösödobetjö̧, yöbawo̧sa, jö̧ba̧lö. Ökwödöbi ja̧danö chömöledö, jo̧ba omukwatinadanö omukwatö, ökwödöbi Dios yöawi̧ ösödö yöbawadösa.

¹⁴ Jau chömöledö, döwaisa, Duluwo̧ Jesúsnö woawatjö tjeachajinö ja̧binama, ökwödönöbi Jesúskwö tjedachajinö ja̧akwo̧ jö̧ba̧lö, ja̧danö ökwödönöbi, ökwödö Corintio jojodönöbi ja̧akwo̧, iteda öba a'o dö̧jakobetjö̧. Ja̧ wene ösödö dö̧jobe chömöledö, jo̧kwajabetjö̧ kabatibökönö jwaikwöda yöbawö dö̧jobe.

¹⁵ Jejenö omukwatö, usula demawijayonö kabatibökönö jwaikwöda yöbawö dö̧jobe chömöledö. Jau chömöledö, okobe jwiinö usula demawi̧ma, ökwödönö pjadatotö jö̧ba̧lö usula demawobe, tupakwönönö ba̧jekwadö jojodönö Dios mikwa jwiinö otiwanö iyenama, otiwanö iyo̧ja jö̧ba̧lö ba̧jekwadö Diosnö tjösödakobetjö̧, ja̧danö okobe deinö Diosnö otiwanö tjomukwatakobetjö̧.

^16-17 Babe wene döbaledi̧ma baikwö yötawa chömöledö: Nöinö usula demawijayonö, tupakwö dö̧jakwa̧ omukwatö ja'yubeda usula demawobe ichejekwa chömöledö, ja̧danö tupakwö ba̧kwȩlö̧jatebö otiwanö dö̧jakwa̧ma omukwatö, babe usula demawi̧ma lekwokobe ichejekwa. Ja̧danö chömöledö, usula demawi̧tjö Diosma inesö nöinö ba̧kwȩlö̧jatebö ji̧ salöinö ujulu iyakobe ökwödönö. Jau chömöledö, babe usula demawi̧tjö yelösöda bajalekwönönö, ja̧ salöinö ujulu dujuna̧lakwedösa, ja̧danö jejenöobetjö̧, do̧'wo̧ tjo̧bekwöma kadatibokobe. Jau chömöledö, diteba'o wamesa'o woijayonö, okwa luwo̧ do̧'wo̧ luwo̧ma la'akatjöda wobö̧kö̧, mölekwena kabatökönö tupakwö ujuluwachibanö jo̧ okwa luwo̧ do̧'wo̧ luwo̧ma.

¹⁸ Jau chömöledö, böjȩnö baledi̧ jawa edö omukwatöködösa, dedi̧ jawama chömöledö, ökwödöma dedökö ji̧ jawada omukwatadösa. Jau chömöledö, babe dedi̧ jawama, lekwema jö̧kö̧ ji̧, ja̧danö juluwanö 'dö̧ibakobe, jo̧kwaijayonö dedökö ji̧ jawama ba̧kwȩlö̧jatebö ja̧kobe chömöledö, ja̧danö la'akatjöda 'dö̧ibökakobe. Jo̧kwajabetjö̧, böjȩnö ja̧nö usula demawijayonö, do̧'wo̧ tjo̧bekwöma kadatibokobe chömöledö, isabenö tupakwö otiwakobe jö̧ba̧lö.