2 Corintios 3 - Dios Iwene

Ökwödönö ida̧ökö yöbawö pjatatinobetjö̧, ötjönö kwöwaisaduwo jö̧ka̧laduwobe, isabenö Pabloma jweinö yöbawo̧, ökwödönö pjabatö yöbawo̧ jö̧ba̧lö Pablo iwȩyudina wene

¹ Chömöledö, ötjönö kwöwaisaduwa, belö ötjöda ökwödönö Cristo jawa wene yötawinobetjö̧, ¿jö̧tö? Jau chömöledö, ökwödöma ida̧ökö ötjönö kwöwaisaduwobe, Pabloma isabenö Cristo webawo̧ jö̧ba̧lö, ja̧danö ida̧ökö ötjönö kwöwaisaduwobetjö̧ ökwödönö Cristo webawo̧ chö̧ji̧ labebö lobö chiwȩyudobö jwiobe. Ja̧danö chömöledö, ju'wibi yötawa, ötjöma Cristo webawo̧ chö̧ji̧ laeböja kwetatobö jwiobe, Cristo ömöayo̧ chö̧ji̧ kwöwaisaduwoböma. Jau chömöledö, ju'wedöma, jelobetjö ichajadö kwialusöja kwebatö i̧sebadö, wȩyukwöja edö, jobadönö kwöwaisaduwobö, ja̧danö ju'wedöma ökwödö kwiwȩyudinaduwöja jejenö e'ewadö, jelobe tji̧'yenama, ¿jö̧tö? Jo̧kwaijayonö jejenö ötjöma wȩyukwöja ökwödönö chi̧sebobö jwibo̧sa chömöledö, ida̧ökö kwöwaisaduwökwechobetjö̧, Pabloma Cristo webawo̧ jö̧ba̧lö.

² Isabenö wȩyukwöja ökwödönö chi̧sebobö jwiobe chömöledö. Baikwö wanedö yötawa: Ökwödö Corintio jojodöma ida̧ökö dotidina wȩyukwöjadanö ichejekwadöja chömöledö, ökwödönö edö jojodö tjöwaisakobetjö̧ otiwanö dotidinama. Jau chömöledö, Diosma kwomajadeduwinö ida̧ökö jejenö iwȩyudinobetjö, ju'wi kwialusöja ökwödönö di̧seboböma jwia chömöledö.

³ Jau chömöledö, ökwödöma Cristo iwȩyudinöja kwialusöjadanö ichejekwadöja, ja̧danö wanedö yötawa, ja̧ kwialusöjada di̧sebobedanö ichejekwa, isabenö dotidinama otiwa jö̧ba̧lö. Ja̧ wȩyukwi̧ma, lapisö'i bajalesobunöma wȩyukwokobe chömöledö, Yabalo̧ Dios O̧'wo̧ Luwo̧da wȩyukwobudanö ichejekwo̧ma, kwo̧'wo̧ luwo̧duwinö ö̧jobetjö̧ chömöledö. Ja̧danö ja̧ wȩyukwi̧ma, inawanö wȩyukwokobe chömöledö, Moisésnö iyina inabiyadanöma, jojodö tjomajadenöda wȩyukwobe chömöledö. Jau chömöledö, ökwödö Corintio jojodöda otiwanö otido̧ chö̧ji̧ wȩyukwöjadanöbedöja, Cristonö kwösödaduwi̧ma otiwanö chotidina wene öwaetjöda i̧sebobetjö̧, wȩyukwöja i̧sebi̧danö.

⁴ Jau chömöledö, Cristokwö dötewanö ja̧nö, Diosnö cho̧'wo̧ chöwana̧lobe, isabenö ökwödö Corintio jojodöma Cristonö ösödadöja jö̧ba̧lö, jo̧kwajabetjö̧ otiwanö dotidi̧ma i̧sekwadöja jö̧ba̧lö yöta̧lobe.

⁵ Jo̧kwaijayonö ökwödö dujulunö otiwanö otidadösa jö̧ba̧löma yöta̧lökö chömöledö, Diosda pjaatobetjö̧, otiwanö dotidobe chömöledö.

Jesús jawa wene yödawi̧ wenema, Moisés iwȩyudinatjö bajalekwönönö otiwi̧ wene jö̧ba̧lö Pablo yöawina wene

⁶ Jo̧bada ökwödönö ujuninobe, iteda yöbawö ujunina wene 'yayi̧ wene otidadö badibanö, ja̧danö jo̧bada pjaatobetjö̧, otiwanö yöbawadösa, ökwödöbi, ju'wedöbi isabenö ja̧kwawa kwujuna̧laduwobö. Ja̧danö, yödawi̧ wene, Dios yöbawö ujunina wene 'yayi̧ wenema, Moisés iwȩyudina Dios weina jawamaökö chömöledö, Dios O̧'wo̧ Luwo̧ jawada. Jau chömöledö, Moisés iwȩyudina laebi̧danö jojodö ja̧bö tjö̧jokobetjö̧, lȩekwa jo̧be jobadönö, jo̧kwajabetjö̧ Moisés iwȩyudinama sule wobaleda iyobe, ¿jö̧tö? Jo̧kwaijayonö Dios O̧'wo̧ Luwo̧ma, ja̧kwawa iyo̧.

⁷ Jau chömöledö, ja̧ Dios yöbawö ujunina wene 'yayi̧ wenema, ja̧kwawa iyobetjö̧ isabenö Moisés iwȩyudinatjö bajalekwönönö otiwobe. Baikwö labebö lobö yötawa: Kwöwaisaduwa chömöledö, damötjö Diosma inabiya iteda wei̧ wȩyukwaba Moisésnö iyinobe, ¿jö̧tö? Ja̧danö, ja̧ wȩyukwaba iyinenama, Dios ujulu salöinö dejatinö i̧sebinobe Diosma, ¿jö̧tö? Ja̧danö, wȩyukwaba inabiya iyenama, Diosma iteda ujulu salöinö dejatinö i̧sebinobetjö̧, inabiya iyajökwe Moisés öbama salöinö dejatinobe, Israel jojodö Moisés öba tjedökenanö, yelösöda nöinö salöiawö̧, ¿jö̧tö? Jau chömöledö, ja̧ salöi̧ tjo̧'omanö dejatökönö tiibinajayonö, Moisés öba tjeda̧loböma jwiinobe, yelösöda salöiawö̧. Chömöledö, ja̧ Dios wei̧ma ja̧kwawama iyinokobe, laebi̧danö ja̧bö tjö̧jokobetjö̧ woawa weneda laebobe, ¿jö̧tö? Isabenö ja̧ wene mikwawinobe chömöledö, Diosda iyinobetjö̧, ja̧danö mikwawobetjö̧, Dios ujulu salöinö dejatinobe. Jo̧kwaijayonö ja̧tjö bajalekwönönö mikwawobe 'yayi̧ wenema chömöledö.

⁸ Ja̧danö chömöledö, 'yayi̧ wene o̧penönö mikwawobema, ajayi wene woawa jawa wene iyö, Dios iteda ujulu salöinö dejatinö i̧sebinatjö̧ma, 'yayi̧ wene, Dios O̧'wo̧ Luwo̧ ja̧i̧ wene iyö, ¿ja̧tjö o̧penönö iteda ujulu salöinö dejatinö i̧sebökenaji̧?

⁹ Jau chömöledö, ja̧ ajayi wene iyenama, Moisésma Diosda ujulu i̧sebinobe, ¿jö̧tö? Ja̧danö chömöledö, Moisés Dios wei̧ yöawenama, jojodö tjö̧jibakwa̧ wene yöawinokobe, sule woawa weneda yöawinobe, ¿jö̧tö? Jau chömöledö, woawa weneda yöawinobe Moisésma, ja̧danö woawa weneda laebijayonö, yayonö Dios dejatinö ujulu i̧sebinobe Moisésma. Ökwödö yödawi̧ma Moisés yöawinatjö bajalekwönönö mikwawi̧ wene chömöledö, ökwödö yödawi̧ wenema, jojodö sulabe jwibadö batjibobö pjaatobetjö̧. Jau chömöledö, ökwödö yödawi̧ wene ösödadönö, Diosma sulabe jwibadö batjibanö pjaatobe, jo̧kwajabetjö̧ isabenö ajayi wene, woawa wenetjö bajalekwönönö mikwawi̧ chömöledö. Jo̧kwajabetjö̧ ¿dakwö kwomukwataduwa chömöledö? Woawa wene yöbawö Moisés Dios ujulu i̧sebinatjö̧ma, ¿ökwödö jojodö tjö̧jibinö pjaatakwa̧ wene yöbawö Dios ujulu di̧sebökenaji̧? Isabenö di̧sebobe chömöledö, Moisés i̧sebinatjö bajalekwönönö öwaetjöda Dios salöinö dejatinö ujulu i̧sebadösa chömöledö.

¹⁰ Jau chömöledö, ja̧ ikena salöinö dejati̧ omukwatö, Moisés ajayinö Dios ujulu i̧sebinama isabenö salöokobedanö ichejekwa, ikena di̧sebi̧da ja̧tjö jwiinö o̧penönö salöobetjö̧.

¹¹ Jau chömöledö, ajayi jawama, lekwema ujuninokobe Diosma, ja̧danö ajayinö salöinö dejatinajayonö, ja'yubeda lekwajabetjö salöinö dejati̧ma tjo̧'omanö tiibinobe. Jo̧kwaijayonö jejenömaökö 'yayi̧ wene Dios yöbawö ujunina wenema chömöledö, ba̧kwȩlö̧jatebö ja̧kobe. Ja̧danö, ajayi jawa salöinatjö̧ma, 'yayi̧ jawama ja̧tjö o̧penönö salöinö dejatena ba̧kwȩlö̧jatebö, ja'yubenöbi tibibökönö.

¹² Jejenö laebobe isabenö wene chömöledö, ja̧danö ja̧ wene isabenö mikwawi̧ wene jö̧ba̧lö dösödobetjö̧, tabakwökönö yöbawö, salöi̧ tojökönö 'yayi̧ wene salöi̧ma öwaetjöda di̧sebobe.

¹³ Jau chömöledö, ökwödöma Moisés salöi̧ otojinadanöma tojöködösa. Kwöwaisaduwa chömöledö, Moisés öba salöinö dejatijayonö, ja'yubenö lekwajabetjö salöi̧ma tjo̧'omanö tiibinobe, ¿jö̧tö? Jau chömöledö, salöi̧ tjo̧'omanö tiibiökwe, Moisésma öba muchekwado̧ öwanawinobe, Israel jojodö salöi̧ tjo̧'omanö tiibobe tjeda̧lapji jö̧ba̧lö. Jejenö salöi̧ tiibi̧ otojinobe Moisésma chömöledö, jo̧kwaijayonö jejenöma tojöködösa. Yödawi̧ wene salöi̧ma tiibokobe chömöledö, ja̧danö ja̧ salöi̧ öwaetjöda i̧sebadösa ökwödöma.

¹⁴ Jobadö Israel jojodönö kwöwaisaduwa chömöledö, Moisésma otiwanö Dios wei̧ jobadönö yöawijayonö, jwaikwöda sulabenö tjomukwatinobe, ¿jö̧tö? Jau chömöledö, baikwö wanedö yötawa: Moisés umuchekwinado̧ma jobadönö tjöekwado̧danö baibinobe ichejekwa, Moisés iwȩyudina tjedenama jweinö tjomukwatinokobetjö̧. Jau chömöledö, babebi ja̧ muchekwado̧ma Israel jojodö tjomukwati̧ tjöekwado̧danö ichejekwa, jweinö tjomukwatökönö, ja̧danö sule bakwo̧ Cristonö ösödenada, ja̧ tjöekwado̧ kalekwö loobedanö jo̧be.

¹⁵ Jau chömöledö, babebi Israel jojodö Moisés iwȩyudina yötja̧li̧ tja̧ja̧kwenama, tjomukwati̧nö tjöekwado̧ jo̧bedanö ichejekwa, jweinö tjomukwatökönö,

¹⁶ ja̧danö sule Duluwo̧nö tjösöditjö̧da, tjöekwado̧ kalekwö loawa jo̧be.

¹⁷ Jau chömöledö, Duluwo̧nö dösödenama, tjöekwado̧ kalebö loobe Duluwo̧ma, iteda salöinö ujulu dedakobetjö̧. Ja̧ Duluwo̧ jö̧ba̧lö yöta̧laja̧ma, Dios O̧'wo̧ Luwo̧nö yöta̧lobe chömöledö, bakwo̧dabedötjobetjö̧. Ja̧danö, baikwö yötawaduwakwö chömöledö: Dios O̧'wo̧ Luwo̧ do̧'wo̧ luwo̧nö ö̧jobetjö̧, tjöekwado̧ jwibadö dö̧jobe. Jau chömöledö, isabenö ja̧ tjöekwado̧ kalekwö loawa jo̧be, ja̧danö Israel jojodöbi tjöekwado̧ kalekwö lotjobö jo̧be, jo̧kwaijayonö Duluwo̧nö tjöpöjödobetjö̧, jwaikwöda tjöekwado̧ muchekwadöda tjö̧jobe.

¹⁸ Jo̧kwaijayonö okobe deinö ökwödö Jesúsnö ösödadöma tjöekwado̧ jwibadösa chömöledö, öwaetjöda Dios dejatinö ujulu edadösa. Jau chömöledö, Duluwo̧ salöinö ujulu edadösa, ja̧danö tjöbadekwawöte öwawinö i̧sebi̧danö ja̧ ujulu i̧sebadösa ju'wedönö, jobadöbi tjedakobetjö̧. Ja̧danö ju'wibi chömöledö, Duluwo̧ salöinö ujulu dedenama, Duluwo̧ Dios O̧'wo̧ Luwo̧ma, Duluwo̧danö ichejekwadö badibanö otido̧, jo̧ba salöinö dejatinö juluwo̧danö bakwainö dichejekwakobetjö̧. Jejenö jo̧be chömöledö, jo̧kwajabetjö̧ yödawi̧ wene 'yayi̧ wenema inesö mikwawi̧ jö̧ba̧lö, ja'yubebi salöi̧ dotojoböma omukwatöködösa. Jau chömöledö, jojodö ja̧ salöi̧ öwawinö tjedakobetjö̧, inesö mikwawi̧ wene 'yayi̧ wenema yöbawadösa.