2 Corintios 2 - Dios Iwene

¹ Jau chömöledö, chomukwati̧ chöbalewabobetjö̧ chi̧'yobö chomukwati̧ma waekwinokobe, ökwödönö chösödobetjö̧ chi̧'yokobö chomukwatijatö chömöledö, ichibö yemidanö kwo̧'wo̧ tjo̧achaduwinö ja̧tapji jö̧ba̧lö, belö chichibena kwo̧'wo̧ tjo̧achinadanö.

² Ja̧danö, ju'wibi, ökwödönö kwo̧'wo̧ tjo̧achaduwinö ja̧titjö̧ma, ötjöbi cho̧'wo̧ tjo̧achapji jö̧ba̧lö. Jau chömöledö, ökwödönö edö, cho̧'wo̧ ösöwachibobö jo̧be, jo̧kwaijayonö ökwödönö kwo̧'wo̧duwi tjo̧achinö chöwaeditjö̧ma, ¿dakwö ökwödönö edö cho̧'wo̧ ösöwachibobö chömöledö? Waekwena, sule bakobe do̧'wo̧ tjo̧achadö dö̧jena, kwo̧'wo̧duwi tjo̧achinö chöwaedinobetjö̧.

³ Jau chömöledö, ökwödönö yötawo jö̧ta̧linama, kwialu wȩyudö wetijatö, ökwödökwö ja̧nö cho̧'wo̧ tjo̧achapji jö̧ba̧lö. Jau chömöledö, ökwödöma chösödawö̧ chömöledöja, ja̧danö ökwödönö chedenama, cho̧'wo̧ ösöwachibobö jo̧be, ¿jö̧tö? Jo̧kwaijayonö juluwanö ökwödönö edö chi̧'yinatjö̧ma, ökwödönö jwetebobetjö̧ bakobe do̧'wo̧ tjo̧acho jö̧a̧linena chömöledö, ja̧danö jejenö omukwatö, ökwödönö jwebebö kwialu wetijatö. Jau chömöledö, ökwödönö chöwaisa, yötawi̧ ösödadöja jö̧ba̧lö, ja̧danö jejenö omukwatö jwebebö chiwȩyudijatö, ja̧ edinö jwekekwaduwobö. Jau chömöledö, dediakwawakwa̧ abönö jejenö jwekekwaduwitjö̧ma, dediakwawenama do̧'wo̧ tjo̧achobö jwiakobe. Ja̧danö jobekwö chomukwatobetjö̧ kwialuda wȩyudö wetijatö, dediakwawenama jwaikwöda do̧'wo̧ ösödachibanö dö̧jakobetjö̧.

⁴ Jau chömöledö, chöwaisa, ökwödönö chiwȩyudinama isabenö kwo̧'wo̧ tjo̧achinö ja̧inobe jö̧ba̧lö. Ötjöbi ja̧danö chömöledö, ökwödönö chiwȩyudenama, usula emawö, cho̧'wo̧ tjo̧bekwö, budekwabinö chiwȩyudijatö. Jau chömöledö, chöwaisa, chiwȩyudina edinö, kwo̧'wo̧ tjo̧achinobe jö̧ba̧lö, jo̧kwaijayonö ökwödönö öpöjödöma chiwȩyudinokobe chömöledö. Isabenö ökwödönö pjatatobö chösödobetjö̧ jejenö chiwȩyudijatö chömöledö, ja̧danö inesö ökwödönö chösödi̧ chi̧sebotö jö̧ba̧lö jejenö chiwȩyudijatö. Jau chömöledö, ökwödönö chösödökötjö̧ma, ökwödönö jwetebobö chomukwatökena, jo̧kwaijayonö isabenö ökwödönö chösödobetjö̧ ökwödönö jwetebobö chiwȩyudijatö. Ja̧danö chömöledö, ida̧ökö kwialusöjanö jwetebobetjö̧, ja̧danö ida̧ökö ja̧ edinö jwekekwinaduwobetjö̧, yemidanö dediakwawena jwiinö do̧'wo̧ ösödachibanö dediakwawobö ja̧kobe.

Corintio jojodötjö bakwo̧ sulabenö ja̧binanö Pablo yöawina wene

⁵ Chömöledö, kwöwaisaduwa belö ökwödö do̧'wo̧ tjo̧achadö badibanö baledinama, ¿jö̧tö? Jau chömöledö, kwöwaisaduwa, ökwödötjö bakwo̧ sulabenö ja̧bö ö̧jinobe, ja̧danö jejenö sulabenö ja̧bö ö̧jitjö̧, ökwödönö wȩyudö wetijatö, jo̧banö lȩkebaduwobö, ¿jö̧tö? Jau chömöledö, jo̧bama isabenö sulabenö ja̧inobe, ja̧danö ökwödötjö jo̧obetjö̧, sulabenö ja̧inama, do̧'wo̧ tjo̧achobö ja̧inobe, ¿jö̧tö? Jejenö yöba̧lö, Aaa, ökwödönö jwiinö suli̧ öwaedinobe jö̧ba̧lö yöta̧lökö chömöledö, ötjönö ja'yubenö cho̧'wo̧ tjo̧achobö öwaedinobe, ja̧danö ja̧tjö bajalekwönönö ökwödötjö ju'wedö nöinö tjo̧'wo̧ tjo̧achobö öwaedinobe.

⁶ Ja̧danö, jo̧banö baikwö yötawa: Belö ökwödönö wetijatö, jo̧banö ökwödö Jesúsnö ösödadötjö 'da̧batö kwujunaduwobö, ja̧danö wetinadanö ökwödötjö ba̧jekwadö ida̧ökö jo̧banö lȩkebinaduwobe, ¿jö̧tö? Jo̧kwajabetjö̧ tjo̧wi̧ jo̧banö ida̧ökö lȩkebinaduwobetjö̧, tjo̧wi̧.

⁷ Babe yemidanö jo̧banö kwösödaduwo, sulabenö ja̧ina omukwatökönö, ja̧danö o̧'wo̧ tjo̧achaja̧ ösödachibanö pjakataduwonö, nöinö o̧'wo̧ tjo̧achapji jö̧ba̧lö.

⁸ Jo̧kwajabetjö̧, atebaduwakwö, jo̧banö kwösödaduwi̧ kwi̧sebaduwobö, kwösödaduwi̧ öwaisachibakobetjö̧.

⁹ Jau chömöledö, belö ökwödönö wȩyudö wetijatö, jo̧ba sulabenö ja̧binanö lȩkebaduwobö. Jejenö chiwȩyudenama, weti̧ kwa̧ja̧kwaduwojobö jö̧ba̧lö chiwȩyudijatö, okobe jwiinö weti̧ a̧ja̧kwö ja̧köbaduwojobö jö̧ba̧lö, ja̧danö otiwanö weti̧ a̧ja̧kwö ja̧köbinaduwobe chömöledö.

¹⁰ Ja̧danö, babema ida̧ökö lȩkebinaduwökwenö yemidanö kwösödaduwobö jo̧be, ja̧danö jo̧banö jejenö kwösödaduwenama, ötjöbi jo̧banö chösödobe chömöledö, ja̧ina omukwatökönö. Jau chömöledö, baikwö yötawa: Bakwo̧ sulabenö ja̧ina omukwatökönö chösödobö ji̧tjö̧ma, Cristo öba a'otjö ja̧nö, ja̧ina omukwatökönö jo̧banö ösödo̧sa chömöledö, ökwödönö pjatatotö jö̧ba̧lö omukwatö.

¹¹ Jau chömöledö, kwöwaisaduwa, Awetjama kabatökönö isakwobe, ökwödö Jesúsnö ösödadönö suli̧ öwaedobö, ¿jö̧tö? Jau chömöledö, jejenö isakwo̧, ja̧danö belö sulabenö baledinatjö ökwödönö suli̧ öwaedotö jö̧ba̧lö isakwinobe Awetjama chömöledö. Ja̧danö, jejenö suli̧ öwaedotö jö̧ba̧lö isakwi̧ chöwaisobetjö̧, waisanö ökwödönö wetijatö chömöledö, sulabenö ja̧binanö lȩkebaduwoböbi, lȩbebajadö yemidanö jo̧banö kwösödaduwoböbi. Jau chömöledö, okobe jwiinö ja̧ wetinama, Awetja ökwödönö ujuluwapji jö̧ba̧lö wetijatö.

Troasnö chö̧jenama, Tito deitjö̧ cho̧'wo̧ tjo̧achijatö jö̧ba̧lö Pablo yöawina wene

¹² Chömöledö, isabenö ökwödö Corintio jojodönö ösödo̧sa, ja̧danö ökwödönö omukwato̧sa, chömöledö dakwö ja̧döjö jö̧ba̧lö. Jau chömöledö, belö Troas comunidadbe chichibijatö, jobetjö Cristo jawa otiwa jawa wene yötawobö, ja̧danö Duluwo̧ pjaatobetjö̧, otiwanö jobetjö yötawobö ji̧nobe.

¹³ Jo̧kwaijayonö, döjawo̧ Tito deitjö̧, nöinö cho̧'wo̧ tjo̧achijatö, Titoma daijö, Corintio jojodönö dakwö yöawakwa̧jö jö̧ba̧lö. Jau chömöledö, Titoma kwiteboduwitjö ȩwa̧jo̧, jo̧babi ötjökwö Troasbe ichibakwo̧ jö̧ba̧lö chomukwatijayonö, deinobe. Jo̧kwajabetjö̧ jobetjö labebö, Macedoniabe chi̧'yijatö jo̧banö isakwö, ökwödönö yöawakwa̧ cha̧ja̧kwakobetjö̧.

Otiwa jawa wene yödawobö Dios 'da̧batö ujuninawö̧sa jö̧ba̧lö Pablo yöawina wene

¹⁴ Jau chömöledö, ökwödönö cha̧ja̧kwokobetjö̧ cho̧'wo̧ tjo̧achijatö. Jo̧kwaijayonö, cho̧'wo̧ tjo̧achijayonö, Diosma otiwanö pjaatinobe chömöledö, ja̧danö jo̧banö chösödobe, ba̧kwȩlö̧jatebö ujuluwobetjö̧. Ja̧danö wanedö yötawa: Guardia la'aka luwo̧danö, Diosma ökwödönö öbibö Cristo jawa wene öpöjödadönö dujuluwobö pjabato̧, ja̧danö ökwödönötjö böjȩ bakwameachibanö jojodö Cristo jawa wene tjöwaisobö pjabato̧.

¹⁵ Jau chömöledö, Diosma ökwödönö ujuninobe ökwödönötjö böjȩ jojodö ja̧kwawa wene tjöwaiso jö̧ba̧lö. Ja̧danö wanedö yötawa: Ökwödö Cristo jawa wene yöbawadöma, Cristo Diosnö iyawa söinö omewi̧ iyawadanö ichejekwadösa, ja̧danö wanedö yötawa: Cristo jawa wene yödawenama, ja̧ söinö omewi̧ 'dö̧batadö böjȩ jojodöma, tjö̧jibakwedötjöbi, Dios lȩebakwawö̧tjöbi.

¹⁶ Ja̧danö, Dios lȩebakwawö̧ 'dö̧tjatemima, woinö omewi̧danö 'dö̧ekwi̧, ja̧danö yödawi̧ tjöpöjödobe. Jo̧kwaijayonö tjö̧jibakwedönöma wainö 'dö̧ekwi̧nö jo̧be, ja̧kwawa söinö omewi̧danö 'dö̧ekwi̧, ja̧danö yödawi̧ tjösödobe. Ja̧ otikwama waiya chömöledö, ¿dakwö otiwanö dotidoböjö?

¹⁷ Ju'wedö sulabenö yöbawö tjotidi̧danö dotiditjö̧ma, waekwena chömöledö. Jobadö sulabenö yöbawadöma idöda balada tjemotö jö̧ba̧lö yötjawobe chömöledö, jo̧kwaijayonö jejenöma yöbawöködösa ökwödöma. Jau chömöledö, jojodö wetjököwö̧sa, Ökwödöma Diosda weawö̧sa, Cristoda ömöayedösa, ja̧danö jo̧bada öba a'otjö jweinö obökönö yöbawadösa. Ja̧danö chömöledö, jejenö wei̧danö yödawiökwe, Diosma otiwanö pjabato̧, ja̧danö ökwödönötjö böjȩ bakwameachibanö jojodönö pjaatobe.