2 Corintios 13 - Dios Iwene

Pablo bajaleapo yöawina wene

¹ Jau chömöledö, babema yemidanö wa̧pötakwanö baibanö chi̧'yocha kwiteboduwibe, ja̧danö isabenö lȩtebocha ökwödötjö a̧ja̧kwökönö ina sulabenö ja̧badönö. Ja̧danö chömöledö, sulabenö ja̧badönö lȩtebenama, bakwo̧da jelo̧ ja̧ina yöawitjö̧ma juluwanö chösödökena, Dios damötjö weinadanö sule du̧ju̧tajaö̧kö̧, wa̧medukwaö̧kö̧ tjedina jawa jweinö yötjawitjö̧da lȩtebocha.

² Jau chömöledö, belö, dötölatajanö baibanö kwiteboduwibetjö chȩwa̧jenama, jweinö yötawijatö Jesúsnö ösödadötjö sulabenö ja̧badönöbi, ju'wedönöbi baikwö: Yemidanö chichenama ina sulabenö ja̧bö kwö̧jaduwitjö̧ma, lȩtebocha jö̧ba̧lö. Ja̧danö chömöledö, babebi jelobetjö ja̧nö, kwialusöjanö yemidanö jejenö yötawobe chömöledö, ina sulabenö ja̧bö tjö̧jitjö̧ma, lȩtebi̧tjö tjö̧jibökena jö̧ba̧lö.

³ Jau chömöledö, isabenö ötjönötjö Cristo yöawojobö jö̧ba̧lö kwedaduwobö ösödadöja, ja̧danö yötawi̧ kwa̧ja̧kwaduwökötjö̧ma, ökwödönö lȩbebö, öwaetjöda chi̧sebakwo̧sa, Cristoma isabenö ötjönötjö yöbawo̧ jö̧ba̧lö. Jau chömöledö, Cristo ökwödönö lȩebenama, me'dawo̧danöma lȩbebö̧kö̧, iteda ujulu öwaetjöda i̧sebakwo̧.

⁴ Isabenö jo̧banö towisa'onö bȩtjenama, me'dawo̧danö ichejekwinobe chömöledö, jo̧kwaijayonö, babema Diosda ujulunö jo̧ jo̧bama chömöledö. Ötjöbi ja̧danö chömöledö, me'dawo̧danö chichejekwijayonö, ökwödönö lȩtebenama, jo̧bakwö dötewanö ja̧nö Dios ujulunö lȩtebakwo̧sa.

^5-6 Chömöledö, ökwödöda bakwo̧nökwena omukwatakwawö kwedaduwo isabenö Jesúsnö kwösödaduwojobö jö̧ba̧lö. Baikwö isabenö kwösödaduwojobö jö̧ba̧lö kwöwaisaduwobö jo̧be chömöledö, Jesúsma okobe deinö jo̧banö ösödadökwö ö̧jobe, jo̧kwajabetjö̧ isabenö jo̧banö ösödadö kwö̧jaduwitjö̧ma, isabenö ökwödökwöbi ö̧jena. Ja̧danö, Jesúsma ökwödökwö ja̧nö öwaetjöda i̧sebakobe ökwödönö, iteda webawo̧ chö̧ji̧ma chömöledö.

⁷ Chömöledö, Diosnö ateba ökwödönö, otiwanö ja̧köbaduwobö. Jau chömöledö, inesö chösödi̧ma chujulu chi̧sebobömaökö, ökwödö otiwanö ja̧bö kwö̧jaduwoböda inesö chösödi̧ma. Kwöwaisaduwa chömöledö, jobe ichibö ökwödönö lȩtebitjö̧ma chujulu öwaetjöda öwawena, ¿jö̧tö? Ja̧danö jobe ichibö lȩtebökötjö̧ma chujulu öwawökena otiwanöma, ¿jö̧tö? Jejenö omukwatö, Aaa, jobadönö lȩtebobö chösöda, chujulu öwawakobetjö̧ jö̧ba̧lö ¿chomukwatenaji̧? Ja̧maökö chömöledö, chujulu öwawi̧ma mikwawokobe ötjönöma chömöledö, inesö chösödi̧ma ökwödö otiwanö ja̧köbaduwobö. Jau chömöledö, lȩbebökönö chujulu jwibo̧danö chichejekwitjö̧ma otiwa, inesö chösödi̧ma ökwödö otiwanö ja̧bö kwö̧jaduwobö.

⁸ Jau chömöledö, otiwanö ja̧bö kwö̧jaduwitjö̧ma, lȩtebökakwo̧sa, isabenö wene a̧ja̧kwadönö lȩtebokobetjö̧, sule a̧ja̧kwöködönöda lȩtebobö jo̧be, isabenö wene tja̧ja̧kwakobetjö̧.

⁹ Isabenö chösödaduwakwö chömöledö, jo̧kwajabetjö̧ kwo̧'wo̧ luwo̧duwinö kwujuluwaduwachibanö kwö̧jaduwitjö̧ma cho̧'wo̧ ösöwachibanö chö̧jobe. Kwöwaisaduwa chömöledö, jobe ichibö ökwödönö lȩtebitjö̧ma chujulu öwaetjöda öwawena, ¿jö̧tö? Ja̧danö, jobe ichibö lȩtebökötjö̧ma chujulu öwawökena otiwanöma, ¿jö̧tö? Jo̧kwaijayonö inesö chösödi̧ma kwujuluwaduwachibanö kwö̧jaduwobö chömöledö, jo̧kwajabetjö̧ jejenö kwujuluwachibaduwitjö̧ma, chujulu i̧sebökönö me'dawo̧danö chichejekwijayonö, cho̧'wo̧ ösöwachibanö jo̧sa. Jau chömöledö, Diosnö atebobe, tupakwö kwöda̧peachaduwobö kwo̧'wo̧ luwo̧duwinö.

¹⁰ Jejenö omukwatö, chi̧'yakwa̧ abönö chiwȩyudobe chömöledö, jobe ichibö ökwödönö lȩtebapji jö̧ba̧lö. Jau chömöledö, Duluwo̧ma isabenö ötjönö ujuninobe, kwuluwo̧duwidanöbo̧ batibobö, ja̧danö jejenö ujuninama, ökwödönö suli̧ chöwaedo jö̧ba̧löma jejenö ujuninokobe chömöledö, kwujuluwachibaduwobö pjatato jö̧ba̧lö ujuninobe.

¹¹ Tjo̧wi̧ta chömöledö, böja kwialusöja katatakwa̧ abönö, baikwö bajaleapo bakwamu jawa yötawiba chömöledö. Kwo̧'wo̧ luwo̧ ösöwachibanö kwö̧jaduwo, ja̧danö sulabenö ja̧bö kwö̧jaduwi̧ jwekekwaduwo, ja̧danö bakwo̧nökwena kwujuluwachibaduwobö pjakatakwawaduwo, ja̧danö kwömöledö Jesúsnö ösödadökwö bakwainö omukwatö kwö̧jaduwo, ja̧danö wene jwiinö kwö̧jaduwo chömöledö. Jau chömöledö, jejenö ja̧bö kwö̧jaduwo, ja̧danö jejenö ja̧bö kwö̧jaduwiökwe isabenö Diosma ökwödökwö ö̧jakwo̧. Jau chömöledö, Diosda dömöledönö ösödabikwawö dö̧jobö pjabato̧ma, ja̧danö dömöledökwö wene jwiinö dö̧jobö pjabato̧ma chömöledö, ja̧danö jo̧bama ökwödökwö ö̧jakwo̧.

¹² Kwömöledö Jesúsnö ösödadönö du̧batö kwösödaduwo, yöne dömöledönö du̧dati̧danö.

^13-14 Okobe deinö bena ju̧kwadö Dios ömöledöma ökwödönö detjawobedanö dokwa atjebobe. Diosnö ateba ökwödönö chömöledö, Duluwo̧ Jesucristo ökwödönö lȩlö̧jinö pjaatakobetjö̧, ja̧danö Dios ökwödönö tupakwö ösödakobetjö̧, ja̧danö Dios O̧'wo̧ Luwo̧ bakobe ökwödökwö ja̧nö, okobe deinö ökwödönö bakobe ösödabikwawö kwö̧jaduwobö pjaatakobetjö̧. Biya̧data