2 Corintios 12 - Dios Iwene

Isabenö Dios i̧sebinökwesa jö̧ba̧lö Pablo yöawina wene

¹ Jau chömöledö, jejenö otiwo̧sa yöta̧lobö chöpöjödijayonö, ju'wedö otiwadösa yötja̧li̧danö yöta̧lobö jo̧be. Jejenö yöa̧lakwawama isabenö pjaatökö ji̧ chömöledö, ja̧danö jejenö yöa̧lakwawa chöpöjöda, jo̧kwaijayonö yayonö jejenö yöta̧lobö jo̧be ökwödönö. Ja̧danö chömöledö, babema chi̧'wi̧di̧danö chedinabi, Duluwo̧ ötjönö i̧sebina jawabi yötawa, Duluwo̧ isabenö otiwanö i̧sebinökwesa jö̧ba̧lö.

² Jau chömöledö, bakwo̧ Cristonö ösödo̧nö chöwaisa, ja̧danö jo̧banö baledina baikwö yötawa. Damötjö, catorce o̧biya jenanö, jo̧bama Dios ö̧jobe mölejȩbe kaekwajinobe. Jejenö kaekwajinama wajwita chömöledö, isabenö atji̧o kaekwajinenaö̧kö̧, sule i̧'wi̧di̧danö kaekwajinenaö̧kö̧, ötjöma wajwita chömöledö, sule Diosda waiso̧.

³ Jau chömöledö, jo̧bama mölejȩbe kaekwajinobe, jo̧kwaijayonö atji̧o kaekwajinojobö, i̧'wi̧dinö kaekwajinojobö jö̧ba̧löma wajwita, Diosda ja̧ waiso̧ma,

⁴ ja̧danö jobe mölejȩbe kabekwajo̧, jobetjö yötja̧li̧ a̧ja̧kwinobe, böjȩnö ju̧kwadö yötja̧lobö jwii̧ jawa a̧ja̧kwinobe chömöledö.

⁵ Jejenö mölejȩbe kabekwajinama ötjödasa chömöledö, ja̧danö jejenö kabekwajö chedinobetjö̧, isabenö Aaa, otiwanö edinasa yöta̧lobö jȩna chömöledö, jo̧kwaijayonö ja̧ jaye jawama, yöba̧lö̧kö̧sa chömöledö, otiwa jö̧ba̧löma. Jau chömöledö, ju'wida, chujulu jwibo̧sa jö̧ba̧löda yöba̧lo̧sa, otiwa jö̧ba̧lö.

^6-7 Chömöledö, isabenö nöinö i̧sebinobe Diosma ötjönöma, jo̧kwajabetjö̧, Aaa, Dios otiwanö i̧sebinökwesa yöta̧litjö̧ma, isabenö weneda yöta̧lena. Jau chömöledö, jejenö yöta̧li̧ a̧ja̧kwö, ju'wedö tjomukwatena, Aaa, wame jawa omukwatadö tji̧'wi̧dinö tjedina jawa omöna yötja̧li̧danö, Pablobi omöna yöba̧lo̧ jö̧ba̧lö. Jo̧kwaijayonö ja̧maökö chömöledö. Isabenö Dios otiwanö i̧sebinökwesa chömöledö, jo̧kwajabetjö̧ jejenö yöta̧lobö chösöditjö̧ma omöna yöta̧lökena, isabenö weneda yöta̧lena chömöledö. Jo̧kwaijayonö jejenö yöba̧lö̧kö̧sa, jojodö ötjönö omukwatö, Aaa, Pabloma inesö Dios i̧sebinökweobetjö̧, da̧ja̧kwonö jö̧ba̧lö tjomukwatapji jö̧ba̧lö. Jau chömöledö, Diosma isabenö otiwanö i̧sebinökwesa ötjönöma, jo̧kwaijayonö ja̧ wene jojodö tjomukwatoböma chöpöjöda. Jau chömöledö ja̧ jawa omukwatökönö, sule tjöba a'otjö chi̧sebi̧ jawada, ja̧danö jobadönö yötawi̧ jawada tjomukwatobö chösöda, Cristo ömöayo̧ chö̧jojobö jö̧ba̧lö. Jau chömöledö, Diosma isabenö nöinö ötjönö i̧sebinobe jojodö ajayinö wajwitjina jawama, ja̧danö ja̧tjö Aaa, otiwo̧sa jö̧ba̧lö chomukwatapji jö̧ba̧lö, ju'wibi nii̧ jawa iyinobe, chiteba'onö ba̧ja̧sö'idanö. Jau chömöledö, Awetjama usula chemawinö ja̧obö ösödinobe, ja̧danö jejenö ösödiökwe, Awetja usula chemawinö ja̧obö weinobe Diosma, ötjöma Aaa, Dios otiwanö i̧sebökwechobetjö̧, otiwo̧sa jö̧ba̧lö chomukwatapji jö̧ba̧lö.

⁸ Ja̧danö chömöledö, wa̧pötakwanö Duluwo̧nö atebijatö, ja̧ nii̧ jawatjö chö̧jibinö pjaatobö.

⁹ Jo̧kwaijayonö baikwö atadinobe chömöledö: —Jo̧kwada, ja̧tjö kwö̧jibinö pjatatökö Pablo, jo̧kwaijayonö ja̧ nii̧tjö bajalekwönönö mikwa jwiinö lȩlö̧jinö pjatatakwö, ökwö kwujulu jwienama, ötjöda chujulu öwaetjöda öwawobetjö̧— jö̧ba̧lö atadinobe Duluwo̧ma. Ja̧danö, ötjö chujulu jwiena Duluwo̧ ujuluda öwawobetjö̧, ötjöma isabenö cho̧'wo̧ ösöwanö yöta̧lobe, chujulu jwii̧ma otiwa, jö̧ba̧lö, ötjönötjö Cristoma iteda ujulunö otidakobetjö̧.

¹⁰ Jo̧kwajabetjö̧, chujulu jwienabi, ja̧danö ötjönö sulabenö yötja̧lenabi, ja̧danö usula chemawenabi, ja̧danö ju'wedö usula chemawobö ja̧tjenabi, ja̧danö wene chöbaledenabi, cho̧'wo̧ ösöwanö chö̧jobe chömöledö, Cristonö chösödobetjö̧ biya̧ baledo̧sa jö̧ba̧lö. Jau chömöledö, ja̧ jawa cho̧'wo̧ ösöwanö chöbaledobe, jejenö ötjöda chujulu jwienama, isabenö ujulu chujuna̧lobetjö̧.

Isabenö ökwödönö pjabato̧sa jö̧ba̧lö Pablo yöawina wene

¹¹ Chömöledö, isabenö bakwo̧ wame jawa omukwato̧ yöa̧li̧danö yöta̧lajabe chömöledö, jo̧kwaijayonö jejenö yöta̧li̧ma ökwödöda jejenö yöta̧lobö ja̧binadöja chömöledö. Jau chömöledö, ötjöma Jesús ömöayo̧ otiwo̧sa jö̧ba̧lö yötawokonö, ökwödöda yöka̧laduwo jö̧ka̧linaduwobe, Pabloma ju'wedö inesö Jesús webawedödanö bakwainö jo̧, jobadötjö ja'yubebi baikwönönö bö̧kö̧ jö̧ba̧lö yöka̧laduwo jö̧ka̧linaduwobe. Jau chömöledö, ötjöma mikwawö̧kö̧chijayonö, ju'wedö Jesús webawedödanö bakwainö bo̧sa, baikwö yötawa:

¹² Kwö'da̧deduwi chö̧jenama, ¿okobe jwiinö Jesús webawedö tji̧sebi̧ jawa chi̧sebinökiji̧? Isabenö chi̧sebijatö chömöledö, ökwödö kwö̧'da̧deduwinö chö̧jenama, isabenö Jesús webawo̧ jawa öwaetjöda chi̧sebijatö. Cho̧'wo̧ 'dibachibö ja̧nö, okobe jwiinö chi̧sebijatö chömöledö, jojodö edajitjökö jawabi, Dios ujulunö otiwanö otikwabi chi̧sebijatö, isabenö Jesús webawo̧sa jö̧ba̧lö.

¹³ Jau chömöledö, okobe jwiinö ja̧ jawa ju'wedö ko̧ko̧kwö tjö̧baji̧tenia Jesúsnö ösödadö ja̧ ujulu jawa tjedinadanö, ökwödöbi kwedinaduwobe chömöledö, ja'yubebi ji̧bökönö, ja̧danö sule bakwöta jawada wainö ji̧nobe ökwödönö chömöledö, ökwödötjö balada cheminokobetjö̧. Jejenö ökwödötjö balada chemokobetjö̧, ¿ökwödönö sulabenö ja̧tinaji̧? Ökwödönö sulabenöma ja̧tinokobe chömöledö.

¹⁴ Chömöledö, ida̧ökö dötölatajanö kwiteboduwibetjö chȩwa̧ijatö, ja̧danö yemidanö chi̧'yocha kwiteboduwibe. Ja̧danö, babe yemidanö chichibenabi, ökwödötjö balada chemökakobe chömöledö, ökwödö kwujuna̧laduwi̧ chemoböma chisakwokobetjö̧. Jau chömöledö, kwöwaisaduwa, tjemuma, tjabe'dodönö tju̧kwa iyöködö, sule tjabe'dodöda tji̧tji̧mu tju̧kwa iyadö, ¿jö̧tö? Ja̧danö, ötjöma kwabe'doduwidanöchobetjö̧, ökwödötjö chemoböma isakwö̧kö̧sa chömöledö.

¹⁵ Jau chömöledö, ökwödönö pjatatotö jö̧ba̧lö, okobe jwiinö chujuna̧li̧ öpöjödabökönö chiyena, ja̧danö ötjödabi 'dö̧tibajenanö kabatö ökwödönö chiyawena chömöledö, ökwödönö pjatatotö jö̧ba̧lö. Jejenö jwiinö ökwödönö chösödobetjö̧, ¿ötjönö kwöpöjödaduwobö jo̧beji̧ chömöledö? Ja̧maökö.

¹⁶ Jau chömöledö, ökwödötjö ju'wedöma yöka̧laduwena, Pabloma ökwödönötjö eminokobe baladama itedada, jo̧kwaijayonö doma'apekwönö ditea emotö jö̧ba̧lö omöna yöa̧linobe Pabloma jö̧ba̧lö.

¹⁷ Jejenö yöba̧ladönö baikwö chatadobe chömöledö: ¿Dakwö jejenö ja̧tinada chömöledö? Jelo̧ ökwödönö yöawobö wetinökweda, ¿ökwödötjö eminaji̧?

¹⁸ Belö ötjökwö kwebachajiabo̧ Titonö kwiteboduwibe i̧'yobö atebijatö, ja̧danö jelo̧ döjawo̧nö jo̧bakwö wetijatö, ¿jö̧tö? Jo̧ba Titoda ¿ökwödönötjö iteda eminaji̧? Eminokobe chömöledö, jo̧bama ötjö chomukwati̧danö bakwainö omukwatö, ötjö ja̧bö chö̧ji̧danö bakwainö jo̧babi ja̧bö ö̧jinobe, ¿jö̧tö?

¹⁹ Chömöledö, ökwödötjö ju'wedö tjomukwatena, Aaa, okobe jwiinö böja Pablo iwȩyudi̧ma, sule jo̧banö otiwanö domukwatobö iwȩyudajena. Jo̧kwadabo̧ ö̧jijayonö, jo̧banö otiwanö domukwatobö iwȩyudajena, jo̧kwadabo̧ ö̧ji̧ döwaisachibapji jö̧ba̧lö tjomukwatena. Jejenö tjomukwatijayonö, ja̧maökö chömöledö. Cristoma isabenö ötjönö 'da̧batö ujuninobe ökwödönö pjatatobö chömöledö, ja̧danö Cristo yötawobö wei̧danö Dios öba a'otjö ja̧nö ökwödönö yötawajabe chömöledö. Ja̧danö ju'wibi yötawa chömöledö, okobe jwiinö yötawi̧ma, ötjönö otiwanö kwomukwataduwoböma yötawokobe, sule kwujuluwachibaduwobö yötawobe chösödawö̧ chömöledö.

²⁰ Jau chömöledö, kwujuluwaduwachibanö yöbawö chiwȩyudobe ökwödönö yetabobetjö̧, ayö, chömöledö Corintio jojodönö tjo̧'wo̧ luwo̧nö me'dawadö ja̧nö sulabenö ja̧bö tjö̧jena jö̧ba̧lö. Jau chömöledö, ökwödönö yetabi, kwiteboduwibe chichibenama, ökwödönö chedapji jö̧ba̧lö chöpöjödinö sulabenö ja̧badönö, ja̧danö jejenö sulabenö ja̧köbaduwitjö̧, kwöpöjödaduwinö ökwödönö lȩtebapji jö̧ba̧lö. Jau chömöledö, yetabi, jobe chichibenama, jwöjwöbakwawö kwö̧jaduwena jö̧ba̧lö, ja̧danö ö'wiabinö kwedaduwena jö̧ba̧lö, ja̧danö dameakwabinö kwö̧jaduwena jö̧ba̧lö, ja̧danö a̧'dȩlanö kwö̧jaduwena jö̧ba̧lö, ja̧danö sulabenö ju'wedönö yöka̧laduwena jö̧ba̧lö, ja̧danö ju'wedö tjoma'apekwö yöka̧laduwena jö̧ba̧lö, ja̧danö Aaa, otiwadösa jö̧ba̧lö kwomukwataduwena jö̧ba̧lö, ja̧danö jaliwanö ja̧bö kwö̧jaduwena jö̧ba̧lö yetabobe chömöledö.

²¹ Ja̧danö ju'wibi yebabinö chomukwatobe chömöledö, yemidanö kwiteboduwibe chichibenama, Dios ömöledö otiwanö ja̧bö tjö̧ji̧danö ina ja̧bökönö kwö̧jaduwiökwe, Diosma kwö'da̧deduwitjö tabakwö chö̧jobö ja̧ena, ja̧danö ökwödönö cho̧'wo̧ tjo̧achena, ajayi sulabenö ja̧köbinaduwa ina kakatibaduwokobetjö̧. Jau chömöledö, yebabinö chomukwatobe ökwödönö, ina tji̧lȩkwa̧muböködökwö ja̧awa katjatibinökena jö̧ba̧lö, tji̧lȩkwa̧muböködönö ösödinö omukwatakwawabi, ju'wi 'da̧'da̧bakwawö ja̧kwawa jawa tjösödi̧bi jö̧ba̧lö. Jejenö omukwatö ökwödönö pjabatö chiwȩyudajabe, kwujuluwaduwachibanö pjabatö chömöledö, kwiteboduwibe ichibö ökwödönö lȩtebapji jö̧ba̧lö.