2 Corintios 11 - Dios Iwene

Pablo otiwanö yöbawo̧sa jö̧ba̧lö yöawina wene

^1-3 Chömöledö, kwöwaisaduwa, ötjöma wame jawa omukwatö̧kö̧sa, otiwo̧sa, juluwo̧sa jö̧ba̧lö, ¿jö̧tö? Ju'wedö ökwödönö yöbawadöma wame jawa omukwatö otiwadösa jö̧ba̧lö yötja̧lijayonö, jejenö la'akatjöda yöba̧lö̧kö̧sa, ¿jö̧tö? Jo̧kwaijayonö, jejenö yöta̧lobö chöpöjödijayonö, ja'yubenö ju'wedö wame jawa omukwatö yötja̧li̧danö yöta̧locha. Jau chömöledö, jejenö yöta̧lobö chöpöjödijayonö, ökwödönö pjatatotö jö̧ba̧lö jejenö yöta̧lakobe, ja̧tjö jweinö kwomukwataduwobö pjatatakobetjö̧. Jo̧kwajabetjö̧ sulabenö yöta̧lijayonö, kwa̧ja̧kwaduwobö atebaduwakwö. Jau chömöledö, jwiinö ökwödönö chösöda, ja̧danö Dios omukwati̧danö ile nibebö chomukwatobe ökwödönö, Cristonöda kwösödaduwo jö̧ba̧lö. Jau chömöledö, wanedö yötawa: Ökwödönö 'da̧batö chujuninobe ichejekwa, bakwo̧ Cristoda iteda ilekwo emakwuju bakibaduwanö, ja̧danö bakwainö sulabe jwibujudanö ökwödönö jo̧banö chi̧sebobö chomukwatobe chömöledö. Jejenö ökwödönö ile nibebö chomukwatijayonö, ökwödönö yetabi chömöledö, ajayinö ji̧nuju Eva omöna yöa̧lakwawa jösödinadanö kwösödaduwapji jö̧ba̧lö. Jau chömöledö, ökwödönö yetabi, a̧ko'da Evanö waisanö omöna yöa̧linadanö, jelo̧ ökwödönöbi omöna yöa̧liawö̧, ökwödöbi bakwainö Cristonö kwösödaduwi̧tjö wainö kwomukwataduwena jö̧ba̧lö.

⁴ Jau chömöledö, isabenö Evadanöbedöja, baikwö yötawa: Okobe jwiinö ju'wedö ökwödönö yötjawi̧ma öpöjödökönö a̧ja̧kwadöja. Ja̧danö, yödawinökwe Jesúsnö jelo̧ wainö yöawitjö̧böbi, sulabenö a̧ja̧kwö ösödadöja. Ja̧danö, Dios O̧'wo̧ Luwo̧nö yödawinökwenö jelo̧ wainö yöawitjö̧böbi, sulabenö a̧ja̧kwö ösödadöja. Ja̧danö, otiwa jawa wene yödawina wene jelo̧ balewö lobö wainö yöawitjö̧böbi sulabenö a̧ja̧kwö ösödadöja chömöledö. Jau chömöledö, okobe deinö jobadö sulabenö yöbawadönö öpöjödöködöja, jo̧kwajabetjö̧ ökwödönö omukwatö yetabobe, Eva omöna yöa̧lakwawa jösödinadanö ökwödöbi omöna yöa̧lakwawa kwösödaduwena jö̧ba̧lö.

⁵ Jau chömöledö, wame jawa omukwatadö yötja̧li̧danö yöta̧locha, ja̧danö jejenö yöta̧lijayonö, isabenö yötawi̧ kwa̧ja̧kwaduwo, isabenö Jesús webawedötjö bo̧chobetjö̧. Jau chömöledö, chedemi ju'wedö Jesús webawedötjö ja'yubebi baikwönönöbö̧kö̧sa, isabenö inesö Jesús webawedö jö̧ba̧lö tjomukwatawö̧tjöbi baikwönönöbö̧kö̧sa, jobadö tjö̧ji̧danö bakwainö jo̧sa chömöledö.

⁶ Ju'wedö ötjönö yötja̧lena, Aaa, Pabloma jojodö tjösödachibanö yöawakwawama otiwanö yöbawö̧kö̧ jö̧ba̧lö, jo̧kwaijayonö baikwö yötawaduwakwö, ju'wedö jojodö tjösödachibanö yöbawadö yötjawi̧danö yötawököjayonö, waisakwawa jawama isabenö waisanö yöbawo̧sa chömöledö, ja̧danö isabenö öwaetjöda i̧sebiachinobe ökwödönö chömöledö, waisakwawa waiso̧ chö̧ji̧ma.

⁷ Ökwödönö Dios jawa otiwa jawa wene yötawenama, balada abeba̧lökönö mikwa jwiinö yötawijatö, ¿jö̧tö? Jau chömöledö, ötjöda labinö chotidijatö, mikwa jwiinö ökwödönö yötawobö, ja̧danö jejenö mikwa jwiinö yötawinama, baikwö wanedö yötawa: Ötjöda jo̧kwadabo̧danö babibö, ökwödönö mikwawadö bakibaduwanö kabebö chujuninobedanö ichejekwa, ¿jö̧tö? ¿Dakwö kwomukwataduwa chömöledö? jejenö jo̧kwadabo̧danö chotidinobema, ¿sulabenö ja̧tinaji̧? Ja̧maökö chömöledö.

⁸ Jau chömöledö, ökwödönö yöbawö chö̧jinobetjö̧, ökwödö Corintio jojodöda chu̧kwa kwiyaduwobö ji̧nobe, ¿jö̧tö? Jo̧kwaijayonö, ökwödö Corintio jojodönö mikwa jwiinö yötawobö chösödobetjö̧, ökwödötjö emökönö, ju'wedö tjö̧baji̧tenia ko̧ko̧kwö ju̧kwadö Jesúsnö ösödadötjö chönaukwinobedanö ichejekwa, ökwödönö yöbawö chö̧jonö, jobadöda chu̧kwa tjimidinobetjö̧.

⁹ Jau chömöledö, ökwödönö yöbawö chö̧jayi, Jesúsnö ösödadö Macedonia nijitjö ichajadöma ötjönö pjabatö tjichinobe, jo̧kwajabetjö̧ jwiti̧ jawama jobadöda tjiyinobe, ökwödö Corintio jojodötjö chemapji jö̧ba̧lö. Jau chömöledö, jejenö pjatjatinobetjö̧, ökwödökwö chö̧jayi la'akatjöda ja'yubebi ökwödötjö ateba̧lijökötö chömöledö, ja̧danö ju'wibi yötawaduwakwö, la'akatjöda ökwödötjö ateba̧lökakwo̧sa chömöledö.

¹⁰ Jau chömöledö, Chuluwo̧ Cristo öba a'otjö ja̧nö baikwö isabenö yötawaduwakwö: La'akatjöda ökwödö Acaya nijinö ju̧kwadötjö ateba̧lökakwo̧sa chömöledö, jo̧kwajabetjö̧ kabatökönö kwiteboduwitjö yötawakwo̧sa, ökwödötjö abeba̧lö̧kö̧sa jö̧ba̧lö.

¹¹ ¿Dakwö kwomukwataduwa chömöledö? Ökwödönö chöpöjödobetjö̧, ¿ökwödötjö ateba̧lokobeji̧? Ja̧maökö chömöledö, isabenö ökwödönö ösödo̧sa, ja̧danö isabenö Diosma ökwödönö chösödi̧ waiso̧ chömöledö.

^12-13 Ja̧danö, balada abeba̧lökönö ji̧achinadanö chö̧jakwo̧sa chömöledö, ju'wedö yöbawadö tjö̧jöködanö chö̧ji̧ öwawakobetjö̧. Jau chömöledö, ju'wedöma, Awetja ömöayedö tjö̧jijayonö, Cristo webawedödanö ichejekwö ja̧badö, jojodönö omöna yötjawo jö̧ba̧lö. Ja̧danö, jobadöma omöna yöba̧ladö, ökwödöma Pablo otidi̧danö bakwainö otidadösa jö̧ba̧lö. Jo̧kwaijayonö, balada abeba̧lökönö yöbawö chö̧jobetjö̧, jejenö yötja̧loböma jwiena chömöledö, ja̧danö balada abeba̧lö tjö̧jobetjö̧, öwaetjöda öwawakobe, chotidi̧danöma otidöködö jö̧ba̧lö.

^14-15 Jau chömöledö, jobadöma tjuluwo̧ Awetja ja̧i̧danö bakwainö ja̧badö, baikwö labebö lobö yöta̧la: Awetjama Dios weökwe ángeldanö ichejekwo̧ baibanö ja̧bo̧, ¿jö̧tö? Jau chömöledö, bitema sulabo̧ jö̧ba̧lö tjöwaisapji jö̧ba̧lö, ángeldanö ichejekwo̧ baibanö ja̧bo̧ Awetjama. ¿Dakwö kwomukwataduwa chömöledö? Tjuluwo̧ Awetja jejenö ja̧itjö̧ma, Awetja ömöayedöbi ¿tjuluwo̧ ja̧i̧danö ja̧tjökenaji̧? Isabenö tjuluwo̧ ja̧i̧danö bakwainö ja̧badö chömöledö, Awetja ömöayedötjijayonö, waapjima yöbawöködö Awetja ömöayedösa jö̧ba̧lö. Jau chömöledö, tjuluwo̧ sulabenö ja̧i̧danö, jobadöbi sulabe jwibo̧ Duluwo̧ ömöayedödanö tjichejekwobö ja̧badö chömöledö, ökwödönö omöna yötja̧lobö. Isabenö jejenö Dios ömöayedödanö tjichejekwobö ja̧badö chömöledö, jo̧kwaijayonö Diosma jobadönö waiso̧, ja̧danö bajaliyanö ja̧tji̧ mikwa baibanö lȩebakwo̧ chömöledö.

Pablo usula emawina wene

¹⁶ Chömöledö, ju'wedö yötja̧li̧danö yöta̧locha, wame jawa omukwatadö yötja̧li̧danö yöta̧locha, jo̧kwaijayonö ötjönö kwomukwataduwoko, Aaa, Pabloma wame jawada omukwato̧ jö̧ba̧lö. Jejenö kwomukwataduwoko jö̧ta̧lijayonö, ina wame jawa omukwato̧ jö̧ba̧lö kwomukwataduwena, jo̧kwaijayonö jejenö kwomukwataduwijayonö, yayonö yöta̧li̧ kwa̧ja̧kwaduwo chömöledö, ötjöbi otiwo̧sa jö̧ba̧lö yöta̧lonö.

^17-18 Babe wame jawa omukwatadö yötja̧li̧danö yöta̧lakwa̧ma, Duluwo̧ yöawi̧maökö chömöledö, sule ju'wedö ba̧jekwadö böjȩnö ja̧nö ja̧tji̧ jawa omukwatö otiwadösa jö̧ba̧lö yötja̧li̧danö, ötjöbi wame jawa omukwatö otiwo̧sa jö̧ba̧lö yöta̧la chömöledö.

¹⁹ Jejenö yöta̧locha chömöledö, ökwödöma wame jawa omukwatadönö a̧ja̧kwadö kwö̧jaduwobetjö̧. Jau chömöledö, ökwödöma waisanö omukwatadösa jö̧ba̧ladöja, jo̧kwaijayonö wajwibö wame jawa omukwatadönö ösödadöja, waisanö yöbawadö jö̧ba̧lö.

²⁰ Jau chömöledö, bakwo̧ ökwödönö jo̧ba ömöayedödanö bakibaduwanö ja̧itjö̧bi, jo̧banö ösödadöja, ja̧danö kwujuna̧laduwi̧ önaukwitjö̧bi jo̧banö ösödadöja, ja̧danö bakwo̧ ökwödönötjö iteda emotö jö̧ba̧lö ja̧itjö̧bi, jo̧banö ösödadöja, ja̧danö bakwo̧ Aaa, ökwödönötjö bajalekwönönö jo̧sa jö̧ba̧lö omukwatitjö̧bi, jo̧banö ösödadöja, ja̧danö bakwo̧ ökwödönö sulabedöja jö̧ba̧lö sulabenö yöawitjö̧bi, jo̧banö ösödadöja.

²¹ Jejenö ökwödönö sulabenö ja̧badönö ösödadöja chömöledö, ja̧danö jobadö ja̧tji̧danö ja̧awa isabenö otiwitjö̧ma, tabakwö yöta̧lo jö̧ta̧lena, jobadötjö baikwönönöbo̧sa jö̧ba̧lö. Jau chömöledö, jobadö ja̧tji̧danö isabenö otiwitjö̧ma, otiwanö yöbawo̧ chö̧joböma jwitena, ötjöma jejenö ökwödönö sulabenö ja̧tobö jwitobetjö̧, ja̧danö sulabenö yöbawo̧sa jö̧ba̧lö tabakwö chö̧jo jö̧ta̧lena, ¿jö̧tö? Jo̧kwaijayonö, jobadö ja̧tji̧danö ja̧awama otiwökö chömöledö, jo̧kwajabetjö̧ taba jwiinö yötawaduwakwö, isabenö otiwanö yöbawo̧sa̧ jö̧ba̧lö chömöledö. Chömöledö, isabenö yötawi̧ kwa̧ja̧kwaduwobö jo̧be, yötawi̧ma isabenö nöinö mikwawobetjö̧. Ötjöma isabenö ökwödönö yöbawadötjö ja'yubebi baikwönönöbö̧kö̧sa chömöledö, baikwö yötawa: Jobadötjö bakwo̧ ju'wijayetjö, Aaa, otiwo̧sa jö̧a̧lobö jö̧a̧litjö̧ma, wame jawa omukwatadö yötja̧li̧danö ötjöbi jejenö yöta̧locha, ötjöbi bakwainö otiwo̧sa jö̧ba̧lö. Jau chömöledö, kwomukwataduwobö ötjöbi jobadö yötja̧li̧danö wame jawa yöba̧lö yöta̧locha, otiwo̧sa jö̧ba̧lö.

²² Baikwö yöta̧la: Jobadöma Hebreo jojodödobetjö̧ otiwadösa jö̧ba̧lö yötja̧lobe, jo̧kwaijayonö jobadödamaökö, ötjöbi bakwainö Hebreo jojosa. Ja̧danö jobadöma Israel jojodödobetjö̧ otiwadösa jö̧ba̧lö yötja̧lobe, jo̧kwaijayonö jobadödamaökö, ötjöbi bakwainö Israel jojosa. Jobadöma Abraham i̧tji̧mu tupadanö jojodödobetjö̧ otiwadösa jö̧ba̧lö yötja̧lobe, jo̧kwaijayonö jobadödamaökö, ötjöbi bakwainö Abraham itji̧ tupadanö jojosa.

²³ Ja̧danö jobadöma yötja̧lobe, ökwödödasa Cristo ömöayedö otiwadö jö̧ba̧lö, ¿jö̧tö? Wame jawa omukwato̧ yöa̧li̧danö baikwö atadö yöta̧la, ötjöma jobadötjö bajalekwönönö Cristo ömöayo̧ otiwo̧sa, baikwö yöta̧la: Tjotidi̧tjö bajalekwönönö nöinö chotidobe, ka̧lena tjö̧bi̧tjö bajalekwönönö nöinö ka̧lena chö̧bobe, ja̧danö jobadötjö bajalekwönönö chöba̧ja̧dökenanö kwakwatjajökwe chö̧jobe, ja̧danö jobadötjö bajalekwönönö nöinö woto jö̧ta̧lobe.

²⁴ Jau chömöledö, bakwamu jawanö judío jojodöma ötjönö kwakwatjinobe, treinta y nuevenö kwakwaakwama,

²⁵ ja̧danö wa̧pötakwanö ö̧sö̧'anö ötjönö kwakwatjinobe, ja̧danö bakwötanö ötjönö kwabö lotjo jö̧ba̧lö inawiya tjikwawinobe. Wa̧pötakwanö isowinö kwebachö metajinobe, ja̧danö jejenö mebajo̧, yö̧tebi, mölebi baledibanö ojwenö chö̧lijatö chömöledö.

²⁶ Ja̧danö nöinö kwebachö, ojwetjö labi̧ jawa balediachijatö, ja̧danö naukwabidötjö labi̧ jawa balediachijatö, ja̧danö ötjöda chömöledö judío jojodötjö labi̧ jawa balediachijatö, ja̧danö judío jojodöböködötjö labi̧ jawa balediachijatö, comunidadnö ja̧nö, labi̧ jawa balediachijatö, ja̧danö jojodö deobetjö labi̧ jawa balediachijatö, ojwe nöödönö kwebachö, labi̧ jawa balediachijatö, ja̧danö Aaa, ökwödöbi Jesúsnö ösödadösa jö̧ba̧lö omöna yöba̧ladötjöbi labi̧ jawa balediachijatö chömöledö.

²⁷ Ja̧danö, nöinö usula emawö otidiachijatö, ja̧danö nöinö yö̧te abökönö ji̧achijatö, ja̧danö a̧wi̧chi̧tjöbi ojwiyotjöbi, o̧ti̧ tjöbö ji̧achijatö, ja̧danö nöinö kwakwawabi jwibö ji̧achijatö, ja̧danö chejubi jwibö, kamijido̧ otiwado̧bi jwibö, tiyuwobe ji̧achijatö chömöledö.

²⁸ Jau chömöledö, ja̧ jawatjö okobe jwiinö chöbaledijatö, ja̧danö ja̧tjö bajalekwönönö, ba̧kwȩlö̧jatebö ju'wi möle jwiinö ko̧ko̧kwö tjö̧baji̧tenia Jesúsnö ösödadönö o̧'wo̧ tjo̧achö chö̧jobe, chömöledöma dakwö ja̧döjö jö̧ba̧lö.

²⁹ Jau chömöledö, ökwödötjö bakwo̧ ime'dawitjö̧ma, ötjöbi chime'dawobedanö ichejekwa. Ja̧danö, ökwödötjö bakwo̧nö jelo̧ suli̧ waedö sulabenö ja̧obö öibitjö̧ma, ötjöbi jo̧ba suli̧ waedajo̧nö chölabobe chömöledö.

^30-31 Okobe jwiinö ja̧ chöbaledina jawa yötawaja̧ma isabenö chöbaledijatö chömöledö, ja̧danö ja̧ jawama öwaetjöda i̧sebobe isabenö Cristo ömöayo̧ otiwo̧sa jö̧ba̧lö. Jau chömöledö, ju'wedö Cristo ömöayedö otiwadösa jö̧ba̧lö yötjawobö ji̧tjö̧ma, ötjöbi Cristo ömöayo̧ otiwo̧sa yöta̧lobö jȩna chömöledö, jo̧kwajabetjö̧ isabenö yötawi̧ kwa̧ja̧kwaduwobö jo̧be. Jau chömöledö, isabenö ja̧ jawa chöbaledijatö, ja̧danö Diosma chöbaledina waiso̧ chömöledö. Jau chömöledö, Duluwo̧ Jesús uluwo̧ Dios, iteda abe'doma kabatökönö ba̧kwȩlö̧jatebö dösödakwo̧, ja̧danö jo̧bama waiso̧, isabenö jweinö yöta̧lobe jö̧ba̧lö. Chömöledö, ötjöma otiwo̧sa, juluwo̧sa jö̧ba̧lö yöta̧loböma isabenö chöpöjöda, jo̧kwajabetjö̧ chö̧ji̧ jawatjö ju'wi jaye otiwa jö̧ba̧lö yöta̧lobö ji̧tjö̧ma, ötjöda chujulu i̧sebi̧ jawa yöta̧lökö, sule chujulu jwiti̧ wene i̧sebi̧ jawada yöta̧lobö chösöda chömöledö, otiwa jö̧ba̧lö.

³² Jau chömöledö, tupakwö yöta̧la chujulu jwii̧ wene yöbawö. Belö Damasco comunidadnö chö̧jenama, la'aka luwo̧ Aretas mikwo̧ ujuninökwe gobernadorma ötjönö do̧atobö ösödinobe, jo̧kwajabetjö̧ guardia jojodönö ujuninobe comunidad tjöekwemi apjudebiya tjite'ada̧lobö, ötjönö do̧tjatobö.

³³ Jo̧kwaijayonö, tjöekwemi ventanasa'donö, ju'wedöma ötjönö jwitjatinobe, wi̧lȩyu̧ nöayu̧nö cha̧jonö, ja̧danö jejenö jo̧batjö chö̧jibijatö chömöledö. Jobekwö yötawa ötjö chujulu jwiti̧ i̧sebi̧ jawama. Ötjöma isabenö wame jawama omukwatö̧kö̧sa chömöledö, jo̧kwajabetjö̧ ötjönö baledi̧ jawa yöta̧lobö jȩnama, chujulu i̧sebi̧ jawa yöta̧lobö chöpöjöda. Jau chömöledö, sule chuluwo̧ ujulu i̧sebi̧ jawada yöta̧lobö chösöda, chuluwo̧ ujuluda öwaetjöda öwawakobetjö̧.