2 Corintios 10 - Dios Iwene

Isabenö Dios 'da̧batö ujuninökwesa, jo̧kwajabetjö̧ yötawi̧ kwa̧ja̧kwaduwo jö̧ba̧lö Pablo yöawina wene

¹ Chömöledö, Cristoma lȩlö̧jinö ja̧danö dösölö̧jinö ja̧bö jo̧, ¿jö̧tö? Ja̧danö, ötjö Pabloma jo̧ba Cristo iminö dösölö̧jinö abebö wetaduwakwö, ökwödönö wȩyudö yötawi̧ kwa̧ja̧kwaduwobö, kwiteboduwibe chichibena ökwödönö lȩtebapji jö̧ba̧lö. Jau chömöledö, ju'wedö ötjönö yötja̧lena, Aaa, Pablo ökwödökwö ö̧jenama, labinöma yöba̧lö̧kö̧, sule jelobetjö iwȩyudenada labinö yöbawö wȩyudo̧ Pabloma, jo̧kwajabetjö̧ ichakwa̧ yedabökö jö̧ba̧lö yötja̧lena.

² Ja̧danö, baikwö wetaduwakwö chömöledö, otiwanö yötawi̧ kwa̧ja̧kwaduwobö, jobe ichibö labinöma yötawökakobetjö̧. Jau chömöledö, ju'wedöma ötjönö baikwö yötja̧lobe: Böjȩ jojodö tjomukwati̧danö omukwatö, iteda emotö jö̧ba̧lö yöbawo̧ Pabloma jö̧ba̧lö. Jejenö yöba̧ladöma sulabenö tjomukwatobe chömöledö, ja̧danö baikwö yötawaduwakwö, wȩyudö yötawi̧ tja̧ja̧kwökötjö̧ma, isabenö labinö lȩbebö yötawakwo̧sa jobadönöma.

³ Chömöledö, isabenö böjȩ jojodösa ökwödöma, jo̧kwaijayonö ökwödö ölakwabikwawö dö̧ji̧ma, böjȩ jawa demotö jö̧ba̧löma ölakwabikwawöma jö̧ködösa.

⁴ Jau chömöledö, ökwödö dölakwabikwawobö ji̧ma, böjȩ jojodö 'bötjawi̧ jawamaökö, ja̧danö kwakwaakwa jawamaökö, Dios ujulu ji̧da dölakwabikwawobö ji̧ma. Ja̧danö, ja̧ Dios ujulu ji̧nö, wanedö yötawa: Döpöjojodö tjöekwinö tjö̧jemi 'dobö söbebö lobadösa, jobadönö juluwö.

⁵ Jau chömöledö, waisanö omukwatadösa jö̧ba̧lö tjomukwati̧ma, ja̧danö otiwadösa jö̧ba̧lö tjomukwati̧ma, ja̧danö okobe jwiinö jejenö tjomukwati̧ma, tjöekwemidanö ichejekwa, Diosnö tjöwaisapji jö̧ba̧lö. Jo̧kwaijayonö Dios ujulu ji̧nö ja̧ tjöekwemidanö tjomukwati̧ söbebö lodobedanö ichejekwa, ja̧danö tjomukwati̧tjö dujuluwobedanö ichejekwa, otiwanö omukwatö Cristo wei̧danö ja̧tjakobetjö̧.

⁶ Ja̧danö, ju'wibi chömöledö, Dios ujulu ji̧ jawanö Cristonö ösödadönöbi jwedebobe. Jau chömöledö, Cristonö ösödadö Cristo wei̧ a̧ja̧kwökönö tjö̧jenama, Dios ujulu ji̧ jawanö jobadönö lȩbebö jwebebadösa.

⁷ Chömöledö, Cristo ömöayo̧ chö̧ji̧ma isabenö öwawobe, kwöwaisaduwobö, ¿jö̧tö? Jejenö öwaetjöda öwawijayonö, ökwödötjö jelo̧ omukwatena, Aaa, Pabloma Cristo ömöayo̧bö̧kö̧, ötjödasa Cristo ömöayo̧ma jö̧ba̧lö. Jejenö omukwatoböma jwia chömöledö, ötjö Pablobi isabenö Cristo ömöayo̧sa, ja̧danö Cristo ömöayo̧sa jö̧ba̧lö omukwato̧ma, ötjönöbi jweinö omukwatobö jo̧be, isabenö Pablobi Cristo ömöayo̧ jö̧ba̧lö.

⁸ Yötawi̧ a̧ja̧kwö, Cristo ömöayo̧sa, kwa̧ja̧kwaduwotjö jö̧ba̧lö yötawi̧ a̧ja̧kwö, Aaa, otiwo̧sa jö̧ba̧lö yötawobedanö ichejekwena chömöledö. Jejenö ichejekwijayonö, omönama yöta̧lökö chömöledö jweinö yötawa, isabenö Duluwo̧ 'da̧batö ujuninökwesa. Ja̧danö, ötjönö 'da̧batö ujunenama, ökwödönö suli̧ chöwaedo jö̧ba̧löma 'da̧batö ujuninokobe, ökwödönö kwujuluwaduwachibanö pjatato jö̧ba̧lö 'da̧batö ujuninobe chömöledö. Jo̧kwajabetjö̧, Aaa, otiwo̧sa jö̧ba̧lö yötawobedanö ichejekwijayonö, taba lö̧jökwe chö̧joböma jwia chömöledö. Dios 'da̧batö ujuninökökwe ja̧nö jejenö yöta̧litjö̧ma taba lö̧jökwe chö̧jo jö̧ta̧lena, jo̧kwaijayonö, isabenö yöta̧li̧danö Dios ötjönö 'da̧batö ujuninobetjö̧ la'akatjöda taba lö̧jökakobe.

⁹ Chömöledö, ökwödönö kwialusöja chiwȩyudi̧ma labinö lȩbebö chiwȩyudobe, jo̧kwaijayonö sule yebeabinöma chiwȩyudökö chömöledö, isabenö chiwȩyudi̧danö ja̧takwo̧sa.

¹⁰ Jau chömöledö, ju'wedöma baikwö yöba̧ladö: Aaa, Pabloma sule yebeabinöda yebeabo̧. Jelobetjö kwialusöja iwȩyudenama, juluwo̧danö labinö lȩbebö iwȩyudijayonö, ökwödökwö ö̧jenama, juluwö̧kö̧, ja̧danö yöawi̧ma mikwawökö, ujulu jwibo̧ jö̧ba̧lö.

¹¹ Jejenö omukwatadöma baikwö tjöwaisobö jo̧be chömöledö, jelobetjö Pablo yöbawö iwȩyudi̧danö, ökwödökwö bakobe ö̧jenama bakweminö juluwinö yöawakwo̧ jö̧ba̧lö.

¹² Jau chömöledö, jo̧da yötawaja̧danö, Cristo ömöayo̧sa jö̧ba̧lö omukwatadöma ökwödönöbi bakwainö tjomukwatobö jo̧be, ökwödöbi Cristo ömöayedösa jö̧ba̧lö, bajalekwönönö otiwadösa jö̧ba̧lö badedö edökönö. Jau chömöledö, ökwödö Cristo ömöayedöma ju'wedö jojodönö badedö dedoböma jwiobe. Ja̧danö chömöledö, jojodönö badedö dedoböma jwiobetjö̧, ökwödöma idö otiwadösa jö̧ba̧lö omukwatadönö badedö dedoböma omukwatöködösa, jobadötjö bajalekwönönö otiwadösa yöda̧loböma. Jo̧kwaijayonö ju'wedö ökwödönö yöbawadöma jejenö sulabenö badedö edadö chömöledö. Jau chömöledö, jobadöma jojodönö badedö omukwatö, jelo̧nötjö o̧penönö otiwo̧sa, ja̧danö jelo̧nötjö bajalekwönönö otiwanö otido̧sa jö̧ba̧lö badedö yötja̧lobe, ja̧danö jejenö yötja̧lenama, wajwibö tjomukwatobe chömöledö, sule jojodönöda badedö tjomukwatobetjö̧.

^13-14 Chömöledö, ¿tida ökwödö Corintio jojodönö ajayinö Cristo jawa otiwa jawa wene yöbawinama? Ötjöda, ¿jö̧tö? Jau chömöledö, Diosma isabenö jojodönö yödawobö ujuninobe, ja̧danö jejenö ujunenama, ökwödö Corintio jojodönöbi yödawobö ujuninobe, jo̧kwajabetjö̧ ökwödökwö otiwanö otidinadösa jö̧ba̧lö yöda̧lenama, sulabenöma yöda̧lokobe chömöledö, Dios dotidobö ujunina jawada yöda̧lobetjö̧. Ökwödökwö dotidököjayonö, otiwanö dotidinobe jö̧ba̧lö yöda̧litjö̧ma, sulabenö yöda̧lena chömöledö, ja̧danö jelo̧ otidina dönaukwobedanö ichejekwena, jelo̧ otidijayonö ökwödöda otiwanö otidinadösa jö̧ba̧lö yöda̧lobetjö̧.

¹⁵ Jo̧kwaijayonö jelo̧ otidina jawama yöba̧löködösa chömöledö, sule isabenö dotidina jawada yöda̧lobe, otiwanö dotidinobe jö̧ba̧lö. Jau chömöledö, isabenö otiwanö ökwödökwö dotidinobe, ja̧danö tupakwö Dios yöawi̧ ösödö kwöda̧peachaduwobö dösöda chömöledö, jemi tupakwöbi kwöda̧peachaduwobö nöinö ökwödökwö otiwanö dotidakobetjö̧.

¹⁶ Ja̧danö chömöledö, jejenö ökwödökwö otidajadö, kwiteboduwitjö tupakwö ina a̧ja̧kwöködönöbi yödawena. Jau chömöledö, ju'wedo yötjawokobe yödawakwedösa, Otiwanö dotidinobe, jö̧ba̧lö yöda̧lenama, ja̧bi ju'wedö tjotidina jawada yöda̧lökakobetjö̧.

¹⁷ Jau chömöledö, otiwanö dotidina yötawa, jo̧kwaijayonö ökwödöda dotidina jawama yöta̧lökö, Duluwo̧ otidawa yötawa, otiwa jö̧ba̧lö, Dios iwene laebi̧danö. Jau chömöledö, baikwö laebobe Dios iwene damötjö tjiwȩyudinama: Bakwo̧ otiwanö otidina yöa̧lobö jö̧a̧litjö̧ma, iteda jawamaökö, Duluwo̧ otidinada yöawobö jo̧be, otiwa jö̧ba̧lö, laebobe chömöledö.

¹⁸ Jau chömöledö, bakwo̧ iteda omukwatö, Aaa, otiwanö otido̧sa jö̧a̧litjö̧ma, jejenö jö̧a̧li̧ma mikwawokobe, Duluwo̧ jo̧ba otidawa edö, otiwanö otido̧ja yöawi̧da mikwawi̧ma otiwanö otidinojobö, otidinokojobö jö̧ba̧lö chömöledö.