2 Corintios 1 - Dios Iwene

Pablo Corintio jojodönö iwȩyudina jawatjö ajayi jawa

¹ Dokwa chömöledö. Ötjöma Pablosa, ja̧danö iteda ösödi̧danö Diosda 'da̧batö ujuninökwesa, Cristo Jesús webawo̧ batibanö. Chömöledö, döjawo̧ Timoteokwö ja̧nö, böja kwialusöja wȩyudö weta ökwödö Dios ömöledönö, Acaya nijitjö Corintio comunidadnö ko̧ko̧kwö ba̧jadönöbi, ju'wedö Acaya nijinö ju̧kwadönöbi.

² Böja wȩyudö jamatö yötawaduwakwö: Dabe'do Diosbi, Duluwo̧ Jesucristobi ökwödönö lȩlö̧jinö tjedobö dösöda, ja̧danö kwo̧'wo̧ luwo̧duwinö wene jwiinö kwö̧jaduwinö pjatjatobö dösöda.

Diosma isabenö ökwödönö pjaatobe do̧'wo̧ tjo̧bekwö dö̧jajelö do̧'wo̧ ösöwachibanö, ja̧danö jejenö pjaatitjö̧, cho̧'wo̧ ösöwanö Diosnö ösödo̧sa jö̧ba̧lö Pablo yöawina wene

³ Okobe deinö Diosnö, Duluwo̧ Jesucristo Abe'donö dösödaduwo chömöledö, otiwanö pjabato̧ja jö̧ba̧lö. Jau chömöledö, Diosma isabenö otiwanö pjabato̧ ökwödönö, jo̧kwajabetjö̧ jo̧banö dösödobö jo̧be, otiwanö pjabato̧ja jö̧ba̧lö. Jo̧bama lȩlö̧jinö edo̧ Dabe'do, chömöledö, ja̧danö jo̧batjöda ichi̧ do̧'wo̧ tjo̧bekwö dö̧jajelö do̧'wo̧ ösöwachibi̧ma chömöledö.

⁴ Jau chömöledö, okobe jwiinö wene döbaledi̧ma, ökwödönö do̧'wo̧ tjo̧bekwö dö̧jajelö do̧'wo̧ ösöwachibanö pjabato̧ Dabe'do Diosma, chömöledö. Ja̧danö, jejenö ökwödönö pjaatenama, ökwödönöda omukwatöma pjaatokobe, ju'wedönöbi omukwatö pjaatobe ökwödönö chömöledö, ökwödönö pjaati̧danö, tupakwö ju'wedö tjo̧'wo̧ tjo̧bekwajadönö ökwödöbi pjadato jö̧ba̧lö. Jau chömöledö, ju'wedö tjo̧'wo̧ tjo̧bekwö tjö̧jenama, Dios ökwödönö pjaatinobetjö̧, jobadönö pjadatobö jo̧be, Dios ökwödönö pjaatinadanö.

⁵ Jau chömöledö, Diosma isabenö pjaatobe ökwödönö, do̧'wo̧ ösöwachibanö. Baikwö labebö lobö yötawa chömöledö: Ökwödö Cristonö ösödadöma, dösödökwe Cristo usula emawinadanö bakobe jo̧bakwö nöinö usula emawadösa, ¿jö̧tö? Jau chömöledö, Cristokwö bakobe usula emawadösa, jo̧kwajabetjö̧ ju'wibi jo̧bakwö Dios pjaati̧tjö emadösa. Jau chömöledö, bakobe Cristokwö dötewanö dö̧jobetjö̧, jo̧ba Dios pjaati̧tjö nöinö eminadanö bakweminö emadösa chömöledö, do̧'wo̧ tjo̧bekwö dö̧jajelö do̧'wo̧ ösöwachibanö. Jau chömöledö, ajayi do̧'wo̧ tjo̧bekwö dö̧jajemi bajalekwönönö do̧'wo̧ ösöwachibanö pjaatobe Dabe'doma, wanedö yötawa: su̧'bȩ babibö welachibanö tupakwö do̧'wo̧ ösöwachibanö pjaatobe.

⁶ Ja̧danö, baikwö yötawaduwakwö chömöledö: Ökwödö usula demawi̧bi, do̧'wo̧ tjo̧bekwö dö̧jajelö do̧'wo̧ ösöwachibanö Dios pjaati̧bi ökwödö Corintio jojodönö pjaatakwawa baibanö jo̧be. Jau chömöledö, usula demawenama, ökwödönö pjadatotö jö̧ba̧lö dotidobetjö̧ usula demawobe. Ja̧danö, Dios do̧'wo̧ tjo̧bekwö dö̧jajelö do̧'wo̧ ösöwachibanö pjaatenama, ja̧bi ökwödönö pjaatakwawa baibanö jo̧be chömöledö. Baikwö yötawa: Ökwödöma ökwödö usula demawi̧ kwedaduwena chömöledö, ja̧danö ja̧ usula demawi̧ baledajadö, Dios do̧'wo̧ tjo̧bekwö dö̧jajelö do̧'wo̧ ösöwachibanö pjaati̧bi kwedaduwena, ¿jö̧tö? Ja̧danö, jejenö edö, kwo̧'wo̧ luwo̧duwi ujuluwachibanö kwedaduwena, Aaa, ökwödöbi bakweminö usula emawö do̧'wo̧ 'dibachibö döbaleditjö̧ma, bakweminö Dios pjaati̧tjö demakwedösa do̧'wo̧ ösöwachibanö, jö̧ba̧lö. Jau chömöledö, usula demawi̧bi, do̧'wo̧ tjo̧bekwö dö̧jajelö Dios pjaati̧bi okobe jwiinö ökwödö Corintio jojodönö pjaatakwawa baibanö jo̧be.

⁷ Jo̧kwajabetjö̧, usula kwemawaduwijayonö, ayö dömöledöwe jö̧ba̧löma do̧'wo̧ tjo̧achökö chömöledö. Jau chömöledö, ökwödö Corintio jojodönö döwaisobe, Diosma isabenö ökwödönöbi pjaatakobe jö̧ba̧lö. Jau chömöledö, baikwö isabenö döwaisobe, bakobe ökwödökwö usula kwemawaduwi̧danö, ju'wibi do̧'wo̧ tjo̧bekwö dö̧jajelö do̧'wo̧ ösöwachibanö Dios pjaati̧tjö ökwödöbi bakobe kwemaduwakwedöja jö̧ba̧lö. Jau chömöledö, isabenö otiwanö pjabato̧ Dabe'doma, jo̧kwajabetjö̧ isabenö jo̧banö dösödobö jo̧be, otiwanö pjabato̧ja jö̧ba̧lö.

⁸ Jau chömöledö, baikwö yötawa Asia nijinö ja̧nö Dios ökwödönö pjaatina wenema, a̧ja̧kwö Dios isabenö otiwanö pjaati̧ wene kwöwaisaduwakobetjö̧. Asia nijinö ja̧nö, nöinö usula demawijatö chömöledö, döbaledökenanö usula demawijatö, ja̧danö nöinö do̧'wo̧ tjo̧dekwijatö, biya̧tjö ö'wö badibena jö̧ba̧lö.

⁹ Jau chömöledö, domukwatijatö, isabenö biya̧tjö wodakwedösa jö̧ba̧lö. Jo̧kwaijayonö, baikwö yötawaduwakwö chömöledö: Ja̧ usula demawinama, Diosda döbaledobö weinobe, ökwödö dujuluda do̧'wo̧ döwana̧lapji jö̧ba̧lö, Diosnöda do̧'wo̧ döwana̧lo jö̧ba̧lö. Jau chömöledö, ökwödöma usula emawö, biya̧tjö wodena jö̧ba̧lö domukwatijayonö, Dabe'do Diosma wobinadönö tjetjachajinö pjabato̧, chömöledö, jo̧kwajabetjö̧ isabenö jo̧banöda do̧'wo̧ döwana̧lobö jo̧be.

^10-11 Ja̧danö, Diosma isabenö labi̧ jawatjö, debö di̧'yo jö̧da̧linatjö dö̧jibinö pjaatinobe. Ja̧danö jemi tupakwöbi dö̧jibinö pjaatakwo̧, chömöledö. Jau chömöledö, Diosnö do̧'wo̧ wana̧ladösa, isabenö tupakwö ökwödönö pjaatakwo̧ jö̧ba̧lö, ja̧danö ökwödö Corintio jojodönö ateba, ökwödöbi pjabatö Diosnö akebaduwobö, jejenö pjaatobö. Jejenö akebaduwiökwe Diosma isabenö tupakwöbi pjaatakobe chömöledö, ba̧jekwadö ökwödönö pjaataja̧ omukwatö, Diosnö tjösödakobetjö̧, otiwanö pjabato̧ja jö̧ba̧lö.

Pablo labebö lobö yöawobe, Corintiobe juluwanö i̧'yinö̧kö̧ wene, ja̧danö ju'wedö sulabenö yötja̧liökwe, ba̧kwȩlö̧jatebö ökwödönö otiwanö yöbawo̧sa jö̧ba̧lö Pablo labebö lobö yöawina wene

¹² Chömöledö, otiwanö ökwödönö ja̧bö dö̧jina wene yötawaduwakwö, ökwödönö sulabenöma ja̧binöködösa jö̧ba̧lö. Jau chömöledö, okobe jwiinö böjȩnö ja̧nö ja̧di̧ma, ja̧danö ökwödönö ja̧bö dö̧ji̧ma sulabenö ja̧bökönö dö̧jijatö, Dios pjaatonö jweinö ja̧bö dö̧jijatö chömöledö. Ja̧danö, ja̧bö dö̧jinama ökwödöda waisanö omukwatöma ja̧dijökötö chömöledö, Diosda lȩlö̧jinö edö ökwödönö pjaatobetjö̧, otiwanö ja̧bö dö̧jijatö chömöledö. Jejenö yötawaja̧ma, jweinö yötawa chömöledö, ja̧danö chomajadenö chöwaisa, isabenö yötawa jö̧ba̧lö.

¹³ Ja̧danö chömöledö, ökwödönö chiwȩyudinenama, chiwȩyudi̧ okwa jawa tojönöma chiwȩyudijatö, laebi̧ jawa otiwanö do̧kataduwobö chösödobetjö̧. Jau chömöledö, ökwödönö chiwȩyudenama, otiwanö edö yöba̧lö kwöwaisaduwobö chösöda, ja̧danö okobe jwiinö laebi̧ jawa do̧kataduwobö chösöda chömöledö.

¹⁴ Jau chömöledö, babe sule ja'öda do̧kataduwijayonö, ju'winö okobe jwiinö kwöwaisaduwobö chösöda. Ja̧danö, jejenö otiwanö kwöwaisaduwobetjö̧, Duluwo̧ Jesús yemidanö ichenama, ökwödönö dösödi̧danö balekwa mikwa ökwödönö kwösödaduwakwedöja, dömöledö otiwadö jö̧ba̧lö.

Ökwödönö edö chichakobe jö̧ba̧lö yöta̧lina waekwinajayonö, isabenö ökwödönö edö chichobö chomukwatinobe jö̧ba̧lö Pablo labebö lobö yöawina wene

¹⁸ Chömöledö, kwöwaisaduwa, Dabe'do Diosma jweinö yöba̧lo̧, omöna yöba̧lö̧kö̧, ¿jö̧tö? Ja̧danö, Dios jweinö yöa̧li̧danö jweinö yötawaduwakwö chömöledö, dötölatajanö waedabinöma yöba̧lö̧kö̧sa chömöledö, ba̧kwȩlö̧jatebö jweinöda yöta̧lobö chisakwobe chömöledö.

¹⁹ Jau chömöledö, Jesús webawo̧ chö̧jobetjö̧, jo̧ba jweinö jö̧a̧li̧danö yöta̧lobö jo̧be. Baikwö yötawa: Jesús jawa wene ökwödönö yödawina wenema dötölatajanö laebokobe, ¿jö̧tö? Jau chömöledö, ötjöbi, Silasbi, Timoteobi Dios itji̧ Jesucristonö yödawijatö ökwödönö, ¿jö̧tö? Jo̧bama jweinö jö̧a̧li̧danö ja̧bo̧, dötölatajanöma yöba̧lö̧kö̧, ¿jö̧tö?

²⁰ Jau chömöledö, okobe jwiinö Dios ja̧tocha jö̧a̧lina, badekwachinö ja̧bo̧ma Jesucristoda, ja̧danö öwaetjöda öwawobe jö̧a̧li̧danö ja̧bo̧ jö̧ba̧lö. Ja̧danö, ju'wibi chömöledö, Jesucristoda Dios jö̧a̧lina badekwachinö ja̧bo̧obetjö̧, ökwödö jo̧banö dötewadöma amen jö̧ba̧ladösa, jejenö otiwa jö̧ba̧lö. Jau chömöledö, jejenö jo̧be, okobe deinö Diosnö otiwanö tjomukwatakobetjö̧. Ja̧danö chömöledö, Dabe'do Diosbi, Duluwo̧ Jesucristobi ba̧kwȩlö̧jatebö jweinö yötja̧lobetjö̧, ötjöbi jweinöda yöta̧lobö jo̧be.

²¹ Jau chömöledö, Diosma isabenö okobe jwiinö jö̧a̧li̧danö ja̧bo̧. Cristonö dösödiökwe, yöbawö ujuninadanö Diosma ökwödönö ujuninobe, Cristokwö dötewadö dö̧jobö, ötjönöbi, ökwödö Corintio jojodönöbi, ja̧danö jo̧bada ökwödönö 'da̧batö ujuninobe iteda ömöledö badibanö.

²² Ja̧danö, iteda O̧'wo̧ Luwo̧ do̧'wo̧ luwo̧nö ö̧jobö weenama, ökwödönö seyu doinobedanö ichejekwa, bidöma ötjöda chömöledö jö̧ba̧lö. Ja̧danö, ja̧ iteda O̧'wo̧ Luwo̧nö iyinama öwaetjöda i̧sebobe, isabenö Dios ömöledösa jö̧ba̧lö. Isabenö okobe jwiinö jö̧a̧li̧danö ja̧bo̧ Duluwo̧ma chömöledö, jo̧kwajabetjö̧ jo̧ba webawo̧ ja̧nö, ötjöbi jweinö yötawobö jo̧be.

¹⁵ Jau chömöledö, ba̧kwȩlö̧jatebö jweinö yötawobö isakwo̧sa chömöledö. Isabenö jweinö yötawobö chisakwijayonö, jejenö yö̧ta̧li̧ a̧ja̧kwö, ju'wedö yötja̧lena, omöna, Pabloma jweinö yöba̧lö̧kö̧, belö chichocha jö̧ba̧lö yöa̧lijayonö, omöna yöa̧linobe. Ja̧danö, jejenö omöna yöa̧linobetjö̧ ju'wi yöa̧li̧bi dösödobö jwiobe jö̧ba̧lö. Isabenö chi̧'yobö yötawinama waekwijatö chömöledö, jo̧kwaijayonö chichibinökö wene baikwö labebö lobö yötawaduwakwö, isabenö jweinö yötawi̧ kwöwaisaduwakobetjö̧. Jau chömöledö, ötjönö kwedaduwobö kwösödaduwi̧ waisö, isabenö dötölatajanö kwiteboduwibe chichibobö chömukwatijatö chömöledö, dötölatajanö ötjönö edö, kwo̧'wo̧ ösöwanö kwö̧jaduwo jö̧ba̧lö.

¹⁶ Jau chömöledö, baikwö chomukwatina yötawa. Macedonia nijibe chi̧'yena, ja'ö 'da̧abibö kwiteboduwibe chichibobö chomukwatijatö, ja̧danö Macedonia nijibetjö chȩwa̧jenabi, yemidanö ja'ö 'da̧abibö kwiteboduwibe chichibobö chomukwatijatö, ja̧danö jemi ikenama, Judea nijibe chȩwa̧jakwa̧ pjakataduwobö chomukwatijatö chömöledö.

¹⁷ Kwöwaisaduwa chömöledö, jejenö chomukwatina waekwinobe, Macedoniabetjö chȩwa̧jijayonö, kwiteboduwibe chichibökötö, ¿jö̧tö? Jejenö waekwinobema, ¿dakwö kwomukwataduwa chömöledö? ¿Tajawedö waekwinada jejenö chomukwatinama? Chomukwataja̧ chöbalewabobetjö̧ ¿chichibinökiji̧? Böjȩ jojodö dötölatajanö tjöwaedabi̧danö, chi̧'yököjayonö chi̧'yocha jö̧ba̧lö ¿omöna yöta̧linaji̧? Ja̧maökö chömöledö.

²³ Jau chömöledö, chi̧'yakwa̧ jö̧ta̧lina waekwinama baikwö jweinö yötawaduwakwö, ja̧danö chuluwo̧ Diosma öwaisa, biya̧ yöta̧li̧ma jwei̧ wene jö̧ba̧lö. Sule chomukwati̧ chöbalewabobetjö̧ chi̧'yobö chomukwati̧ma waekwijökötö chömöledö, ju'wida, sulabenö ja̧köbinaduwa wene cha̧ja̧kwijatö. Ja̧danö jejenö cha̧ja̧kwitjö̧ kwiteboduwi Corintiobema chi̧'yijökötö chömöledö, labinö ökwödönö lȩtebapji jö̧ba̧lö, ja̧danö labinö lȩtebawö̧, nöinö kwo̧'wo̧ tjo̧achaduwapji jö̧ba̧lö.

²⁴ Jejenö lȩtebapji jö̧ba̧lö chichijökötö jö̧ba̧lö yöta̧li̧ma, Aaa, kwuluwo̧duwisa, Jesúsnö kwösödaduwi̧ma, weti̧danöda ösödaduwi jö̧ba̧löma yöta̧lökö chömöledö. Ökwödö kwuluwo̧duwibö̧kö̧sa chömöledö, ökwödökwö bakobe otido̧sa, kwo̧'wo̧ luwo̧duwi ösöwachibanö kwö̧jaduwakobetjö̧, ja̧danö jwaikwöda waekwökönö Jesúsnö ösödö kwö̧jaduwakobetjö̧. Jau chömöledö, ökwödönö kwo̧'wo̧ tjo̧achinö ja̧tapji jö̧ba̧lö, juluwanöma ökwödönö edö chi̧'yijökötö, isabenö ökwödönö chösödobetjö̧.