1 Timoteo 6 - Dios Iwene

¹ Ja̧danö tjömöayedö baibanö midö tjeminawö̧ Cristo Jesúsnö ösödadöma, böjȩ tjuluwedönö otiwanö tjomukwatobö jo̧be, bite wei̧ ja̧bö chö̧jo jö̧ba̧lö. Jejenö omukwatö öpöjödabökönö tjuluwedönö tjösödobö jo̧be Cristonö ösödadö tjömöayedöma, ju'wedö Diosnö sulabenö yötja̧lapji jö̧ba̧lö, ja̧danö yödawi̧ wene sulabenö yötja̧lapji jö̧ba̧lö.

² Ja̧danö, tjuluwedöbi Cristonö ösödadö tjö̧jitjö̧ma, tjuluwedönö sulabenö tjomukwatoko, bitema chömöledöso̧obetjö̧, ötjönö weoko jö̧ba̧lö. Jejenö omukwatökönö, ajayi wetji̧ ja̧bö tjö̧ji̧tjö o̧penönö otiwanö ja̧bö tjö̧jobö jo̧be, bite chösödökwe chömöledöso̧nö pjatatobe jö̧ba̧lö. Jau Timoteo, okobe jwiinö biya̧ ökwönö yötawaja̧ma, Cristonö ösödadönö yökawodönö. Ja̧danö, jobadönö yöbawö weköbo, yötawaja̧danö ja̧bö tjö̧jobö.

Sulabenö yöbawadönö Pablo yöawina wene

³ Ju'wedöma yötawaja̧danöma yöbawöködö, ja̧danö Duluwo̧ Jesucristo yöawi̧ öpöjödadö, ja̧danö Cristonö ösödadö ja̧bö tjö̧jo jö̧ba̧lö döba̧ja̧di̧ wene öpöjödadö.

^4-5 Jobadö wainö yöbawadöma, Aaa, waisadösa, jö̧ba̧lö tjomukwatijayonö, wajwibadö jobadöma. Ja̧danö, sulabe jawa tjösödoko jö̧tja̧li̧ jawama ösödadö. Baikwö ösödadö jobadö wainö yöbawadöma, ölakwabikwawa jawa ösödadö, ja̧danö jwöjwötjakwawobö ösödadö jojodö yötja̧li̧ma, biya̧ma baikwö jö̧ba̧lö laebobe, baikwö jö̧ba̧lö laebobe jö̧ba̧lö. Jejenö ölakwabikwawö jwöjwötjakwawobetjö̧, ju'wedö isabenö wene wajwibadö, tjomukwati̧ bakwainö sulabenö omukwatadöma ö'wiabinö tjedobe jojodönöma. Ja̧danö, jojodönö jwöjwötjakwawobe, ja̧danö ju'wedönö sulabenö yötja̧lobe. Ja̧danö, jojodö ja̧tji̧ tjedököjayonö, ju'wedönö sulabenö tjomukwatobe sulabenö ja̧badö jö̧ba̧lö. Ja̧danö, kabatökönö ölakwabikwawö jwöjwötjakwawobe jobadö bakwainö sulabeda omukwatadöma. Ja̧danö, ju'wibi tjomukwatobe, Aaa, Diosnö ösödakwawama, nöinö böjȩ jawa juna̧ladö badibobö ji̧, jö̧ba̧lö.

Jesúsnö ösödadö nöinö dujuna̧li̧ma do̧'wo̧ luwo̧ jawada jö̧ba̧lö Pablo yöawina wene

⁶ Timoteo, do̧'wo̧ ösöwanö ja̧nö Diosnö ösödadöma, isabenö nöinö juna̧ladösa, do̧'wo̧ luwo̧ jawama.

⁷ Baikwö yötawa: Ökwödö böjȩ jojodö dojo'do jukwa'wotjö döbötjachenama, ¿taji dujuna̧linada? Ja'yubebi jwidinobe, ¿jö̧tö? Ja̧danö, böjȩtjö wodajenama ¿taji de'ewakwa̧da? Ja'yubebi de'ewökakobe, ¿jö̧tö?

⁸ Jo̧kwajabetjö̧, böjȩnö ja̧nö dukwoböbi, da̧du̧kwoböbi dujuna̧litjö̧ma, do̧'wo̧ ösöwanö dö̧jobö jo̧be, otiwanö juna̧ladösa jö̧ba̧lö.

⁹ Jo̧kwaijayonö, ju'wedö nöinö balada tjujuna̧lobö tjösödobetjö̧, waekwadö, ja̧danö sulabenö ja̧badö. Ja̧danö, sulabenö tjösödi̧ma 'daliwadanö ichejekwa jobadönöma. Ja̧danö, sulabenö tjösödi̧ma jobadönö suli̧ waedobe ichejekwa, waekwadö batjibanö.

¹⁰ Jau Timoteo, baikwö wanedö yötawa: Balada ösödakwawama, sulabe bö'diadanö ji̧, ja̧danö balada ösödakwawatjö, nöinö suli̧ pokwobedanö ichejekwa. Ja̧danö, ju'wedö nöinö balada tjujuna̧lobö tjösödobetjö̧, Cristonö ösödö dö̧ji̧tjö 'da̧bachibö tji̧'yajabe, balada tjujuna̧lobö isakwö. Ja̧danö, jejenö 'da̧bachibö tji̧'yajabema, kabatökönö jwiinö o̧'wo̧ tjo̧achadö tjuju̧kwobe.

Pablo Timoteonö bajaleapo weina jawa wene

¹¹ Jau Timoteo, ökwöma Dios ömöledöso̧ja, jo̧kwajabetjö̧, biya̧ yötawaja̧ sulabenö ja̧awatjö döbibaji, sulabenö ja̧bökönö. Dios ömöledöso̧köbobetjö̧, ju'wida isakwö kwö̧jobö jo̧be, ja̧ma biya̧: Dios ösödi̧danö ja̧awa kwisakwo, ja̧danö Diosnö ösödö jo̧ba ösödi̧danö ja̧bö kwö̧jobö kwisakwo. Ja̧danö, kabatökönö Cristonö kwo̧'wo̧ wana̧lö kwö̧jobö kwisakwo, ja̧danö jwaikwöda kwömöledö Cristonö ösödadönö kwösödobö kwisakwo. Ja̧danö, wene baibenabi kwo̧'wo̧ 'dibachibö me'dawachibökönö Cristonö kwo̧'wo̧ kwöwana̧lobö kwisakwo, ja̧danö otiwanö dösölö̧jinö jojodönö ja̧köbobö kwisakwo Timoteo.

¹² Cristonö ösödö dö̧ji̧ma, ölakwabikwawadanö ji̧, döpöjojo ö̧jobetjö̧, ja̧danö otiwanö ölakwabikwawö ja̧wi, ba̧kwȩlö̧jatebö ja̧kwawa kwujuna̧lakobetjö̧. Jau Timoteo, Diosma ökwönö jwöinobe, ba̧kwȩlö̧jatebö ja̧kwawa kwujuna̧lobö, ja̧danö ba̧jekwadö jojodö tjöba a'otjö ja̧nö otiwanö yökawijatö Cristonö kwösödi̧ma.

¹³ Timoteo, okobe deinö ja̧kwawa iyo̧ma Diosda, ja̧danö Cristo Jesúsda otiwanö Pilatonö isabenö wene yöbawinama. Ja̧danö, Dios öba a'otjö, ja̧danö Cristo Jesús öba a'otjö ja̧nö,

¹⁴ wetakwö, wainö Dios ökwönö wei̧danö ja̧bö ja̧wi, ja̧danö okobe jwiinö ökwönö wetaja̧ma jwaikwöda ja̧bö ja̧wi, Duluwo̧ Jesucristo yemidanö öwawachenanö kabatö.

¹⁵ Jau Timoteo, Duluwo̧ Jesucristo isabenö yemidanö öwawachobö ja̧akobe Diosma, Dios badedö ujunina möle badekwachenama. Jo̧ba jojodö tjösödökwe Diosda okobe deinö tjuluwo̧ma, ja̧danö Diosda luwedö tjuluwo̧ma, ja̧danö Diosda la'aka luwedö inesö la'aka tjuluwo̧ma.

¹⁶ Jo̧bada ba̧kwȩlö̧jatebö jo̧ma, ja̧danö dewinö jojodö tjichibökenanö salöinö dewinö jo̧. Jo̧bama la'akatjöda jojodö tjedökökwe, ja̧danö jo̧banö jojodö tjedoböma jwibadö. Jo̧banöda dösödobö jo̧be, otiwo̧ja jö̧ba̧lö, ja̧danö jo̧bada ba̧kwȩlö̧jatebö inesö la'aka luwo̧ ö̧jobö jo̧be, jejenö otiwa.

¹⁷ Cristonö ösödadötjö balada luwedönö baikwö yöbawidönö Timoteo, Aaa, ju'wedönötjö o̧penönöbedösa, jö̧ba̧lö tjomukwatokobö. Ja̧danö, böjȩ jawa tjujuna̧li̧, tupakwö jwiakwa̧ jawa tjujuna̧li̧ma tjo̧'wo̧ tjöwana̧lokobö yöbawidönö, Diosnöda tjo̧'wo̧ tjöwana̧lobö jo̧be. Jau, jo̧ba Diosda okobe jwiinö ökwödönö iyo̧ma, do̧'wo̧ ösöwanö dö̧jobö.

¹⁸ Ja̧danö, balada luwedönö otiwanö ja̧tjobö yöbawidönö, baikwö wanedö yötawa: Otiwanö ja̧awa luwedö baibanö tjuju̧kwobö yöbawidönö, a̧'dȩlökönö ju'wedönö pjabatö.

¹⁹ Ja̧danö, wanedö yötawa: Jejenö ja̧bö tupakwö tjujuna̧lakwa̧ jawa 'da̧batö tjujunakobe, mölejȩnö tjujuna̧lakwa̧ jawama, ja̧danö isabenö ja̧kwawa Dios chiyocha jö̧ba̧lö yöawina ja̧kwawama tjujuna̧lakwedö.

²⁰ Jau Timoteo, baikwö wetakwö: Dios ökwönö ja̧köbobö iyinama, te'ada̧lönö ja̧bö kwö̧jo. Ja̧danö, jojodö omöna yötja̧li̧ma kwa̧ja̧kwoko, mikwa jwii̧ jawa yötja̧li̧, Diosnö öpöjödö yötja̧li̧ma. Jobadöma, Aaa, biya̧ yöda̧li̧ma waisakwawa ji̧, jö̧ba̧lö yötja̧lijayonö, waisakwawa jwii̧ Timoteo.

²¹ Ja̧danö ju'wedöma, Aaa, biya̧ma domukwato, waisakwawa ji̧, jö̧ba̧lö tjomukwatobetjö̧, waekwadö, Cristonö ösödö dö̧ji̧tjö 'da̧bachibö tji̧'yobetjö̧. Biya̧da yöbawö chiwȩyuda, ja̧danö Diosnö ateba, ökwödönö lȩlö̧jinö edö pjaatobö. Biya̧data.