1 Timoteo 5 - Dios Iwene

¹ Timoteo, ömadö damöbedönö labinö yöbawö lȩkeba, wainö ökwöda kwabe'donö yökawi̧danö yökawodönö jobadönöma, dösölö̧jinö yöba̧lö tjo̧'omanö. Ja̧danö, ömadö ina damöböködönö kwöjawo̧nö kwöba̧ja̧di̧danö kwöba̧ja̧dodönö.

² Ja̧danö, ya̧dö damöbedönö kwojo'donö kwöba̧ja̧di̧danö kwöba̧ja̧dodönö. Ja̧danö ya̧dö ina damöböködönö kwöjawujunö kwöba̧ja̧di̧danö kwöba̧ja̧dodönö. Jau Timoteo, ya̧dönö lȩkebenama, bakwainö otiwanö omukwatö obökönö lȩkebodönö.

Jesúsnö ösödadöma baikwö ja̧bö tjö̧jo jö̧ba̧lö Pablo Timoteonö yöawina wene

³ Ya̧dö tji̧lȩkwa̧mu wobekwinadönöma otiwanö omukwatö te'ada̧lö kwö̧jo, isabenö tjömöledö debadönöma.

⁴ Jo̧kwaijayonö, bakwuju jilekwenö wobekwinujuma ji̧tji̧mubi, jö̧'dö̧döbi tjuju̧kwitjö̧ma, jobadöda jobujunö tjite'ada̧lobö jo̧be, Dios wei̧danö. Jau Timoteo, ajayinöma tjabe'do tjojo'doma jobadönö tjite'ada̧linobe, ¿jö̧tö? Ja̧danö, babema balekwa mikwa tjojo'do jilekwenö wobekwinujunö ja̧danö tja̧'do̧ jilekwenö wobekwinujunö tjite'ada̧lobö jo̧be. Ja̧danö, jejenö te'ada̧lö tjö̧jobö ösödo̧ Diosma.

⁵ Jesúsnö ösöduju jilekwenö wobekwinuju jömöledö debujuma, jömöledönö jo̧'wo̧ jöwana̧loböma jwibuju. Ja̧danö, Diosnöda jo̧'wo̧ wana̧luju, jo̧bada ite'ada̧lobö, ja̧danö kabatökönö Diosnö abebuju, kabatökönö Dios pjaatobö abebuju jobujuma, yö̧tebi, mölebi. Jobujujayedönö Dios ömöledö tjite'ada̧lobö jo̧be.

⁶ Jo̧kwaijayonö, jilekwe wobekwinuju Diosnö jo̧'wo̧ wana̧lökönö jwaikwöda jösödi̧da isakwujuma, ina 'yaba̧luju jö̧jijayonö, jo̧'wo̧ luwo̧nö wobinujudanö jichejekwa, ja̧danö Dios ömöledö jobujujayedönö tjite'ada̧loböma jwiobe.

⁷ Biya̧ wobekwinadö jawa yötawaja̧ma wobekwinadönöbi, tjömöledönöbi yöbawö weköbo, ju'wedö jobadönö sulabenö tjomukwatapji jö̧ba̧lö.

⁸ Ja̧danö, ju'wibi yötawa. Jesúsnö ösödadötjö bakwo̧ iteda ömöledönö ite'ada̧lökötjö̧ma, iteda yöne ömöledönö ite'ada̧lökötjö̧ma, jo̧bama Cristonö ösödö dö̧ji̧ öpöjödo̧, ja̧danö Cristonö öpöjödo̧nötjö o̧penönö sulabo̧ jo̧bama.

⁹ Ja̧danö, ya̧dö tji̧lȩkwa̧munö wobekwinadönö te'ada̧lakwawa jawa yötawa, Jesúsnö ösödadö jobadönö tjite'ada̧li̧ma. Wobekwinadötjö bidönöda wȩyukwöjanö kwödodönö, Jesúsnö ösödadö tjite'ada̧lobö: Sule sesenta o̧biya, ja̧danö jemi tupakwö juna̧ladönöda. Ja̧danö, tji̧lȩkwa̧mukwöda bi̧nadö wobekwinadönöda,

¹⁰ ja̧danö, wobekwinadötjö tjite'ada̧lakwawö̧ma sule jojodö, Bidöma otiwanö ja̧bö ji̧nadö, jö̧ba̧lö tjöwaisawö̧nöda. Ja̧ otiwanö ja̧bö tjuju̧kwina jawama baikwö yötawa: Otiwanö tji̧tji̧munö bötjatö, jelobetjö ichajadönö tjejunö tebatö, ju'wedö Jesúsnö ösödadö tjömöayujudanöbujusa jö̧ba̧lö pjabatö, usula emawadönö pjabatö, ja̧danö jwaikwöda okobe jwiinö otiwanö ja̧awa ja̧bö. Jejenö ja̧bö ji̧nadö ya̧dö tji̧lȩkwa̧munö wobekwinadönöda kwujuno, Jesúsnö ösödadö tjite'ada̧lawö̧, jö̧ba̧lö

^11-12 Ja̧danö, jobadönö tjite'ada̧lijayonö, ina sesenta o̧biya ichiböködönö Jesúsnö ösödadö tjite'ada̧lawö̧ baibanö kwödoböma jwia. Baikwö yötawa: Jesúsnö ösödadö tjite'ada̧lawö̧ wobekwinadöma baikwö yöbawö junadö, Jwaikwöda Jesús wei̧da ja̧bö chö̧jakwujusa chilekwenö emökönö, jö̧ba̧lö. Jo̧kwaijayonö, ina möayedödanöbedö wobekwinadöma, iso̧kwö tjö̧jobö jö̧tja̧lobetjö̧, Jesús jawa kabatibö yemidanö tji̧lȩkwa̧munö tjemena, ajayi yöbawö tjujunina wene ja̧bökönö. Ja̧danö, yöbawö tjujunina wene ja̧tjokobetjö̧, sulabenö ja̧tjena.

¹³ Ja̧danö, ju'wibi yötawa. Otidökönö sule jelejube jelejube kwebachadö batjibena, ja̧danö jemi tupakwö jojodö tjoma'apekwönö yöba̧ladö, ja̧danö ju'wedö jawa yöba̧ladö batjibena, jojodö yötja̧loko jö̧tja̧li̧ma yöba̧lö.

¹⁴ Jo̧kwajabetjö̧, baikwö yötawa: Ina sesenta o̧biya ichiböködö ya̧dö tji̧lȩkwa̧munö wobekwinadöma, yemidanö tji̧lȩkwa̧munö tjemobö jo̧be, ja̧danö tji̧tji̧munö 'yabebö bötjatö, tjeju jawa otidö tjö̧jo, Jesúsnö ösödadönö öpöjödadöma ökwödönö sulabenö yötja̧lapji jö̧ba̧lö.

¹⁵ Jau Timoteo, ju'wedö ya̧dö tji̧lȩkwa̧munö wobekwinadöma ida̧ökö Jesúsnö ösödö dö̧ji̧ junibö Awetja jawada tjösödinobe. Ja̧danö jejenö tjösödinobetjö̧, döpöjojodöma ökwödönö sulabenö yötja̧lobe.

¹⁶ Ja̧danö jilekwe wobekwinuju jömöledötjö bakwuju Jesúsnö ösöduju jö̧jitjö̧ma, jobuju Jesúsnö ösödujuda jömöledösuju wobekwinujunö jite'ada̧lobö jo̧be, ju'wedö Jesúsnö ösödadö jobujunö tjite'ada̧lapji jö̧ba̧lö. Ja̧danö, jejenö pjajatobetjö̧, Jesúsnö ösödadöma ju'wedönö pjatjatobö tjujuna̧lakwedö, isabenö tjömöledö debadönöda.

¹⁷ Ja̧danö, Jesúsnö ösödadönö te'ada̧lakwawa luwedönö yötawa. Jesúsnö ösödadönö te'ada̧lakwawa luwedöma, otiwanö te'ada̧lö tjö̧jitjö̧ma, tjite'ada̧lawö̧ Jesúsnö ösödadöma jobadönö tjösödobö jo̧be, otiwanö jobadönö omukwatöbi, böjȩ tjö̧ji̧ jawa pjabatöbi. Ja̧danö, te'ada̧lakwawa luwedötjö nöinö Dios iwene yöbawö, nöinö Jesúsnö ösödadönö ba̧ja̧dö otidadönö isabenö tjösödobö jo̧be, otiwanö omukwatöbi, böjȩnö tjö̧ji̧ jawa pjabatöbi.

¹⁸ Baikwö laebobe Dios iwenema: Pakayaso̧kwö trigo jawa kwotidenama, pakayaso̧ aapo di̧kataduwoko, trigo jawa otidobetjö̧, otidonö jo̧babi trigo jawatjö ukwobö jo̧be, jö̧ba̧lö laebobe. Ja̧danö, jelobe baikwö laebobe Dios iwenema: Bakwo̧ otido̧ otiditjö̧ma, otidaja̧ mikwa balada otidajo̧nö tjimidobö jo̧be, jö̧ba̧lö laebobe. Ja̧danö, te'ada̧lakwawa luwedö Jesúsnö ösödadönö te'ada̧lö tjotidobetjö̧, balekwa mikwa jobadönö böjȩnö tjö̧ji̧ jawa pjatjatobö jo̧be.

¹⁹ Ja̧danö, ju'wibi yötawa Timoteo. Bakwo̧da Jesúsnö ösödadönö te'ada̧lakwawa luwo̧nö, Aaa, bitema sulabenö ja̧ajabe, jö̧ba̧lö yöa̧litjö̧ma, juluwanö a̧ja̧kwökönuwi yöa̧li̧ma. Jo̧kwaijayonö du̧ju̧tajaö̧kö̧, wa̧medukwaö̧kö̧, Bite sulabenö ja̧aja̧ dedajabe, jö̧ba̧lö yötjawitjö̧ma yötjawi̧ kwa̧ja̧kwo Timoteo, isabenö sulabenö ja̧obetjö̧.

²⁰ Ja̧danö, te'ada̧lakwawa luwedötjö sulabenö ja̧bö ju̧kwadönö, Jesúsnö ösödadö tjöba a'otjö ja̧nö jobadönö lȩkebo. Jau Timoteo, jojodö tjöba a'otjö ja̧nö sulabenö ja̧bö ju̧kwadönö lȩkebo, lȩkebi̧ a̧ja̧kwadö a̧ja̧kwö yetjaibakobetjö̧, ja̧danö jobadöbi sulabenö ja̧tjapji jö̧ba̧lö.

²¹ Dios öba a'otjö, ja̧danö Cristo Jesús öba a'otjö, ja̧danö Dios weawö̧ ángelesdö tjöba a'otjö ja̧nö biya̧ inesö mikwawi̧ jawa wetakwö Timoteo, ökwönö yöbawö wetaja̧ma ja̧bö kwö̧jo jö̧ba̧lö. Ja̧danö, biya̧ wetaja̧ jawa ja̧bö kwö̧jena, ja̧danö biya̧ jawa Jesúsnö ösödadönö weköbena, bakwo̧nöbi ju'wedönötjö o̧penönö omukwatökönuwi, Aaa, biteda otiwo̧, jö̧ba̧lö, ja̧danö bakwo̧nöbi ju'wedönötjö o̧penönö ösödökönuwi, Aaa, biteda jwiinö chösödökwe, jö̧ba̧lö.

²² Ja̧danö, jojodönö juluwanöma kwömamu 'bibeba̧lö ja̧bökönuwi, bidöma Jesúsnö ösödadönö te'ada̧lakwawa luwedö jö̧ba̧löma, otiwanö kweda̧lo jobadönö kwujunakwa̧ abönöma. Ja̧danö, ju'wibi yötawakwö ju'wedö sulabenö ja̧tji̧tjö wainö 'da̧bachibö ja̧wi, sulabenö ja̧tji̧ jobadökwö ja̧bökönö, bakwainö otiwanö ja̧böda kwö̧jo.

²³ Ja̧danö ju'wibi wetakwö Timoteo. Kwukwa'wo kabatökönö sulobe kwö'wöchobetjö̧, ojwiyodama kwowoko, ojwiyokwö, ja'yubeda ubasobu o̧'dobukwö pjabatö kwowo, kwukwa'wo sulobe kwö'wöchapji jö̧ba̧lö.

²⁴ Ja̧danö ju'wibi yötawa. Jojodö sulabenö ja̧tjena, ju'wedökwena sulabenö ja̧tji̧ma wajuwanö öwawobe, ja̧danö Dios jobadönö lȩebakwa̧ abönö ida̧ökö waisadö ju'wedö jojodöma, sulabenö ja̧tjinobe jö̧ba̧lö. Ju'wedökwena sulabenö ja̧tjenama, sulabenö ja̧tji̧ma juluwanö öwawokobe, jo̧kwaijayonö juluwanö öwawököjayonö, tupakwö wajuwanö öwawakobe.

²⁵ Jojodö otiwanö ja̧tji̧bi ja̧danö. Ju'wedökwena otiwanö ja̧tjenama, juluwanö öwawobe, okobe deinö edö tjöwaisobö, otiwanö ja̧tjinobe jö̧ba̧lö. Ja̧danö ju'wedökwena otiwanö ja̧tjenama, juluwanö öwawokobe otiwanö ja̧tji̧ma, jo̧kwaijayonö juluwanö öwawököjayonö, tupakwö öwawakobe otiwanö ja̧tjinobe jö̧ba̧lö.