1 Timoteo 3 - Dios Iwene

Jesúsnö ösödadönö te'ada̧lakwawa luwedö jawa Pablo yöawina wene

¹ Bakwo̧ Jesúsnö ösödadönö te'ada̧lakwawa luwo̧ baibanö otidobö ösöditjö̧ma, isabenö otiwa jawa otidobö ösödobe.

² Ja̧danö, te'ada̧lakwawa luwedö jawa yötawa. Te'ada̧lakwawa luwo̧ baibanö otidakwo̧ma, otiwanö ja̧bö jo̧. Ja̧danö, otiwanö ja̧bö ö̧jobetjö̧, jojodö sulabenö yötja̧loböma jwibo̧. Ja̧danö, ilekwo bakwujunöda junalo̧, ja̧danö jobujukwöda jo̧. Ja̧danö, ja̧bö ö̧ji̧ma, bakweminö omukwatö jo̧. Ja̧danö, Aaa, biya̧ma otiwanö ja̧awa, jö̧ba̧lö öwaisi̧danö ja̧bö jo̧. Ja̧danö jojodö, Aaa, bitema otiwanö ja̧bö jo̧, jö̧ba̧lö tjöwaisökweda. Ja̧danö, jelobetjö ichajadö tjichenama, ejutjö dösölö̧jinö tebatö pjabato̧, ja̧danö, Dios iwene ba̧ja̧dakwawa waiso̧.

³ Ja̧danö, te'ada̧lakwawa luwo̧ baibanö otidakwo̧ma, 'dukwachinö owa̧lö̧kö̧, ja̧danö, kwakwabakwawö̧kö̧. Wainö ja̧bö jo̧ te'ada̧lakwawa luwo̧ baibanö otidakwo̧ma, jojodönö dösölö̧jinö ja̧bö jo̧. Ja̧danö, ölakwabikwawa jwii̧ jawa ösödo̧. Ja̧danö, iteda nöinö balada emotö jö̧ba̧lö ösödö̧kö̧.

⁴ Ja̧danö, te'ada̧lakwawa luwo̧ baibanö otidakwo̧ma, otiwanö iteda ilekwonöbi i̧tji̧munöbi ba̧ja̧dö jwebebo̧. Ja̧danö, iteda i̧tji̧muma, tjabe'do wei̧danö ja̧badö, ja̧danö ju'wedö jojodönö otiwanö omukwatö ösödadö, jo̧ba i̧tji̧muma.

⁵ Baikwö yötawa Timoteo: Bakwo̧ iteda ejunö ju̧kwadönö jweebakwawa wajwiitjö̧ma, ju'wedö, Dios i̧tji̧munö jweebakwawabi wajwiena.

⁶ Ja̧danö, te'ada̧lakwawa luwo̧ baibanö otidakwo̧ma, iya̧nö Jesúsnö ösödo̧maökö, ida̧ökö o̧'wo̧ luwo̧nö da̧peachinada. Baikwö yötawa: Bakwo̧ iya̧nö Jesúsnö ösödo̧nö te'ada̧lakwawa luwo̧ baibanö otidobö weköbitjö̧ma, damötjö la'aka omöna yöba̧lina omukwatinadanö omukwatena, Aaa, ötjöma otiwo̧sa, jö̧ba̧lö. Jo̧kwajabetjö̧, iya̧nö Jesúsnö ösödo̧nö weköba, te'ada̧lakwawa luwo̧ baibanö otidoböma, Awetja omukwatinadanö omukwatapji jö̧ba̧lö, ja̧danö Awetja omukwatinadanö omukwatiökwe, Dios lȩebapji jö̧ba̧lö.

⁷ Ja̧danö, te'ada̧lakwawa luwo̧ baibanö otidakwo̧ma, ju'wedö Dios ömöledöböködöbi otiwanö tjomukwatökweda, jojodö sulabenö yötja̧liökwe Awetja ja̧ina 'daliwanö ö̧libapji jö̧ba̧lö.

Jesúsnö ösödadönö pjaatakwawa luwedö jawa Pablo yöawina wene

⁸ Jesúsnö ösödadönö pjaatakwawa luwedöbi ja̧danö. Pjaatakwawa luwo̧ baibanö otidakwo̧ma jojodö, Aaa, bitema otiwanö ja̧bö jo̧, jö̧ba̧lö tjöwaisökweda, ja̧danö, dötölatajanö yöba̧lö̧kö̧, ja̧danö, nöinö nio ojwiyo owa̧lö̧kö̧, ja̧danö, nöinö balada iteda emotö jö̧ba̧lö ösödö̧kö̧.

⁹ Ja̧danö, pjaatakwawa luwo̧ baibanö otidakwo̧ma otiwa jawa wene, Biya̧ma jwei̧ wene, jö̧ba̧lö Dios i̧sebina wene 'diinö do̧ba̧lö jo̧, ja̧danö, omajadenö öwaisi̧danö, Aaa, biya̧ma ja̧tobö otiwa, jö̧ba̧lö öwaisi̧danö ja̧bo̧, pjaatakwawa luwo̧ baibanö otidakwo̧ma.

¹⁰ Ja̧danö, pjaatakwawa luwo̧ baibanö otidakwo̧nö kwujunakwa̧ abönö, otiwanö kwedo, ja̧ pjaatakwawa jawa otiwanö otidojobö. Ja̧danö, otiwanö ja̧bö ö̧jitjö̧ma, jo̧banö kwujunena, pjaatakwawa luwo̧ baibanö.

¹¹ Pjaatakwawa luwo̧ baibanö otidakwo̧ ilekwobi ja̧danö, otiwanö ja̧bö ju̧ju. Ja̧danö, jojodönö sulabenö yöba̧lökuju, ja̧danö nöinö nio ojwiyo owa̧lökuju.

¹² Ja̧danö, pjaatakwawa luwo̧ baibanö otidakwo̧ma ilekwo bakwujunöda juna̧lo̧, ja̧danö jobujukwöda jo̧. Ja̧danö, iteda ilekwonöbi i̧tji̧munöbi otiwanö jwebebo̧.

¹³ Jau Timoteo, pjaatakwawa luwedö otiwanö otidadöma, jojodö otiwanö jobadönö tjomukwatobö jo̧be. Ja̧danö, yebabökönö yötjawena Cristo Jesúsnö ösödakwawa jawama, pjaatakwawa luwedö otiwanö otidadöma.

Dösödi̧ wene Jesús jawa wenema, jwiinö otiwa wene jö̧ba̧lö Pablo yöawina wene

¹⁴ Timoteo, chedemi juluwanö chi̧'yena, kwö̧jobe Éfesobema, jo̧kwaijayonö, juluwanö chi̧'yobö chomukwatijayonö, ina biya̧ jawa chiwȩyudobe.

¹⁵ Ja̧danö, chi̧'yobö chomukwati̧ waekwitjö̧ma, böja kwialusöja chiwȩyudobetjö̧, Dios ömöledö otiwanö ja̧bö tjö̧ji̧ma kwöwaisena. Jau Timoteo, ökwödö Jesúsnö ösödadöma Dios ömöledöbedösa, ja̧danö isabenö wene te'ada̧ladösa, ju'wedö sulabenö yötja̧lapji jö̧ba̧lö.

¹⁶ Dösödi̧ wenema isabenö otiwa jawa wene Timoteo, jojodö ajayinö wajwitjina wene, Dios i̧sebina wenema. Ja̧danö bakwo̧bi, Aaa, sulabe wene, isa̧ökö wene, jö̧a̧loböma jwia. Ja̧ Cristo Jesús jawa wenema biya̧: Jo̧bama jojo baibanö öwawinobe. Jo̧banö i̧sebinobe Dios O̧'wo̧ Luwo̧ma, sulabe jwibo̧ jö̧ba̧lö. Jo̧banö tjedinobe ángelesdöma. Jo̧banö tja̧ja̧kwinobe böjȩ bakwameachibanö ju̧kwadö jojodöma. Jo̧banö tjösödinobe böjȩ bakwameachibanö ju̧kwadö jojodöma. Jo̧bama mölejȩbe kaekwajinobe.