1 Timoteo 2 - Dios Iwene

Diosma okobe deinö böjȩ jojodö tjö̧jibobö ösödo̧ jö̧ba̧lö Pablo yöawina wene

¹ Ja̧danö, Jesúsnö ösödadönö weawa yötawa Timoteo, Jesúsnö ösödadönö weköbobö. Jesúsnö ösödadönö ajayi weti̧ma biya̧, Jesúsnö ösödadöma Diosnö atjebobö jo̧be. Ja̧danö, Jesúsnö ösödadö jwibö tjö̧jenama, Diosnö atjebobö jo̧be iyobö. Ja̧danö, ju'wedö jojodönö atjebobö jo̧be, Dios jobadönö pjaatobö. Ja̧danö, Diosma otiwanö iyinobetjö̧, jo̧banö atjebobö jo̧be, otiwanö pjabatö kwiyajabe jö̧ba̧lö. Ja̧danö, Jesúsnö ösödadöma Diosnö atjebobö jo̧be okobe deinö jojodönö pjaatobö.

² Ja̧danö, la'aka luwedönöbi, ju'wedö luwedönöbi Jesúsnö ösödadö atjebobö jo̧be Diosnöma, jobadö luwedökwö ölakwabikwawa jwiinö, wene jwiinö Diosnö ösödö dö̧jobö, ja̧danö Dios ösödi̧danö ja̧bö dö̧jobö, ökwödö Jesúsnö ösödadöma.

³ Jejenö ja̧bö dö̧jobö otiwa, ja̧danö dö̧jibinö ja̧bo̧ Diosma jejenö ja̧bö dö̧jobö ösödo̧.

⁴ Jau Timoteo, Diosma jejenö ja̧bö dö̧jobö ösödo̧ okobe deinö böjȩnö ju̧kwadö tjö̧jibobö ösödobetjö̧, ja̧danö okobe deinö isabenö wene tjöwaisachibobö ösödobetjö̧.

⁵ Jau, Diosma bakwo̧da, jelo̧ma deobe, ¿jö̧tö? Ja̧danö Diostjö jojodötjö ö'weje pjabato̧ma bakwo̧da, jojo babibina Cristo Jesúsda.

⁶ Jo̧bada midawö woinobe, okobe deinö jojodö tjö̧jibobö. Jau, Dios badedö ujunina möle badekwachenama, Cristo Jesúsma midawö woinobe, ja̧danö jejenö Diosma öwaetjöda i̧sebinobe, okobe deinö tjö̧jibobö chösöda jö̧ba̧lö.

⁷ Ja̧danö, Diosma okobe deinö tjö̧jibobö ösödo̧obetjö̧, ötjönö weinobe, Jesús webawo̧ batibanö, ja̧danö judío jojodöböködönö yöbawo̧ batibanö. Ja̧danö, ötjönö weinobe judío jojodöböködönö isabenö wene yötawobö, Jesús jawa isabenö wene yötawobö weinobe. Ja̧ yötawi̧, judío jojodöböködönö yötawobö weinobe jö̧ba̧lö yötawi̧ma, jweinö yötawa, omöna yöta̧lökö.

Diosnö ösödö ko̧ko̧kwö tjö̧baji̧ jawa Pablo yöawina wene

⁸ Ja̧danö, Jesúsnö ösödadö Diosnö ösödö ko̧ko̧kwö tjö̧bajenama, baikwö wetadönö: Ömadö Diosnö atjebobö jo̧be, ja̧danö Diosnö atjebenama, tjo̧'wo̧ sulinö ja̧nöma atjeboko, ja̧danö ju'wedönö jwöjwöbakwawö ja̧nöma atjeboko. Jau Timoteo, Dios ösödi̧danö ja̧bö ja̧nö Diosnö atjebobö jo̧be.

^9-10 Ja̧danö, ya̧dö Jesúsnö ösödadönöbi weta: Ya̧dö kamijido̧ 'dutjawenama, ömadö jobadönö ösödö tjedo jö̧ba̧löma 'dutjawoko, otiwanö ja̧bö ju̧kwadö ya̧dö 'dutjawi̧danö 'dutjawo. Ja̧danö, ya̧dö tjotikwobö jo̧be. Ja̧ tjotikwobö yöta̧li̧ma, nöinö sasiyu tjönönawo jö̧ba̧lö yöta̧lökö, ja̧danö nöinö tjöwö'ye di̧batakwawö ja̧tjo jö̧ba̧lö yöta̧lökö, ja̧danö nöinö oro jawa tjönönawo jö̧ba̧lö yöta̧lökö, ja̧danö nöinö mikwawi̧ kamijido̧ 'dutjawo jö̧ba̧lö yöta̧lökö. Wanedö yöta̧la tjotikwi̧ma, jobadö otiwanö ja̧bö tjö̧ji̧ma, tjotikwobedanö ji̧, ja̧danö, ya̧dö Diosnö ösödadösa jö̧ba̧lö yöba̧ladöma, otiwanö ja̧bö tjö̧jobö jo̧be.

¹¹ Ja̧danö, Jesúsnö ösödadö ko̧ko̧kwachö tjö̧bajenama, ya̧döma 'wi̧inö banö waisachö tja̧ja̧kwa̧lobö jo̧be, Aaa, luwujudanöbökujusa, möayujudanöbujusa, jö̧ba̧lö omukwatö.

¹² Ja̧danö ya̧dö jamatö ömadönö tjöba̧ja̧doböma wetökö, ja̧danö ömadö tjuluwuju jojosuju bajiboböma wetökö, 'wi̧inö banö ja̧ja̧kwa̧lobö weta.

¹³ Jau Timoteo, baikwö labebö lobö yötawa. Diosma abönö Adánnö otidinobe, ikenama, jo̧banö otidaja̧ ikena, jojosujunö Evanö otidinobe, ¿jö̧tö? Ja̧danö, jejenöobetjö̧, ya̧dö 'wi̧inö banö tja̧ja̧kwa̧lobö jo̧be.

¹⁴ Ja̧danö, a̧ko'da omöna yöa̧lina ösödinujuma Evadainobe, Adánmaökö, ¿jö̧tö? Jau Timoteo, a̧ko'dama jweinö yöbawo̧ jö̧ba̧lö, Dios weökö jawa ja̧jinobe isujuma.

¹⁵ Jo̧kwaijayonö, ya̧döbi tjö̧jibobö jo̧be, jojo baibanö jeminökwenö tjösöditjö̧ma. Ja̧danö, ya̧döbi tjö̧jibakwedö, Jesúsnö ösödö ja̧nö, ja̧danö tjömöledönö ösödö ja̧nö, ja̧danö Aaa, otiwadösa jö̧ba̧lö omukwatökönö ja̧nö, ja̧danö Dios ösödi̧danö ja̧bö tjö̧jitjö̧ma.