1 Timoteo 1 - Dios Iwene

Ajayisa'ye Pablo Timoteonö iwȩyudinatjö ajayinö iwȩyudina jawa

¹ Ötjö Pablo mikwo̧sa, Cristo Jesús webawo̧sa, iteda yöawi̧ yötawo jö̧ba̧lö. Do̧'wo̧ döwana̧lökwe Cristo Jesúsbi, ja̧danö dö̧jibinö pjabato̧ Diosbi wetjinobe, Cristo Jesús webawo̧ baibanö chö̧jobö.

² Ja̧danö, böja kwialusöja chiwȩyuda ökwönö Timoteo. Ökwöma ötjöda chitji̧danöbo̧ja bakobe Jesúsnö ösödö dö̧jobetjö̧. Dabe'do Diosnöbi, Duluwo̧ Cristo Jesúsnöbi ateba, mikwa jwiinö otiwa jawa iyö ökwönö pjatjatobö, ja̧danö lȩlö̧jinö edö ökwönö pjatjatobö, ja̧danö kwo̧'wo̧ luwo̧nö wene jwiinö kwö̧jobö pjatjatobö.

Sulabenö yöbawadönö katjatibobö webidönö jö̧ba̧lö Pablo yöawina wene

³ Ina Éfesonö dö̧jayi, Macedoniabe chi̧'yakwa̧ abönöma, ökwönö wetijatö, jenada Éfeso comunidadnö kwö̧jibobö, ja̧danö, ina jobe kwö̧jobö weta babema. Jobe ju̧kwadötjö ju'wedöma sulabenö yötjawobe, Dios iwene laebi̧danömaökö. Jo̧kwajabetjö̧ jejenö sulabenö yötjawi̧ma katjatibobö weköbo jö̧ba̧lö jobe Éfesonö kwö̧jobö chösöda Timoteo.

⁴ Ja̧danö, jobadönö weköbo Timoteo, nöinö tja'dödö yötjawina jawa yötjawoko jö̧ba̧lö. Ja̧danö, jobadönö weköbo jojodö tja'dödönö nöinö tjomukwatokobö, Aaa, ötjötjö ajayinö ji̧nadöma bidö, bidö, jö̧ba̧lö. Ja̧ jawama, sule jojodö jwöjwötjakwawoböda ji̧, mikwawö̧kö̧. Jau Timoteo, Diosnö ösödöda tjöda̧peachobe tjo̧'wo̧ luwo̧nö, ja̧ jawa omukwatömaökö. Jo̧kwajabetjö̧ webidönö ja̧ jawa katjatibobö.

⁵ Jau Timoteo, jobadönö kwöba̧ja̧do, sulabenö tjomukwati̧ kabatibö, tjömöledö Jesúsnö ösödadönö tjösödo jö̧ba̧lö. Ja̧danö, tjomajadenö sulabenö omukwatökönö tjuju̧kwobetjö̧, ja̧danö: Aaa, biya̧ma otiwanö ja̧awa jö̧ba̧lö tjomajadenö tjöwaisi̧danö ja̧bö tjuju̧kwobetjö̧, ja̧danö isabenö Diosnö ösödö tjuju̧kwobetjö̧, tjömöledö Jesúsnö ösödadönö ösödö tjö̧jena.

⁶ Timoteo, ju'wedöma jweinö yöawakwawa katjatibinobetjö̧, mikwawö̧kö̧ jawada yöba̧lakwawö tjö̧jobe.

⁷ Ja̧danö, jobadöma Dios weina Moisés iwȩyudina jawa yötjawobö tjösödijayonö, wajwibö yötjawobe. Jau Timoteo, wajwibadö jobadöma, idöda yötjawi̧ jawabi wajwibadö. Ja̧danö Dios wei̧ jawa waisadösa, baikwö webo̧, jö̧ba̧lö labinö yötjawijayonö, wajwibadöda yötjawobe.

⁸ Jau Timoteo, döwaisa, Dios weinama otiwa, Dios weinadanö omukwatö yöbawö weditjö̧ma.

⁹ Ja̧danö, baikwö domukwatobö jo̧be: Dios weina Moisés iwȩyudinama, otiwanö ja̧badönöma weinokobe, sulabenö ja̧köbaduwa jö̧ba̧lö. Dios yöawi̧ a̧ja̧kwökönö sulabenö ja̧badönö weinobe, ja̧danö Diosnö öpöjödadönöbi, Dios weökö jawa ja̧badönöbi, Diosnö öpöjödö Diosnö sulabenö yöba̧ladönöbi, tjabe'donö tjojo'donö kwabö lobadönöbi, ju'wedönö kwabö lobadönöbi,

¹⁰ tji̧lȩkwa̧muböködökwö ja̧badönöbi, ömadö ömadökwö, ja̧danö ya̧dö ya̧dökwö ja̧badönöbi, jojodönö do̧batö naukwabidönöbi, omöna yöba̧ladönöbi, la'aka luwedö tjöba a'otjö ja̧nö jojodö ja̧tjina jawa omöna yöba̧ladönöbi, ja̧danö okobe jwiinö ju'wi jaye isabenö wene laeböködanö ja̧badönöbi webö iwȩyudinobe Moisésma, tjusula tjöwaisachibo jö̧ba̧lö.

¹¹ Jobekwö laebobe isabenö wene ötjö yötawi̧ wenema Timoteo. Ja̧danö, ja̧ jwiinö otiwa jawa wene yötawi̧ma, inesö otiwo̧ Diosma ötjönö yöbawö iyinobe, tupakwö ju'wedönö yötawo jö̧ba̧lö.

Diosma ötjönö lȩlö̧jinö edinobe jö̧ba̧lö Pablo yöawina wene

¹² Duluwo̧ Cristo Jesúsma ujulu iyinobe ötjönöma, biya̧ chotidi̧ jawa chotidobö. Ja̧danö, Cristo Jesúsma ötjönö ösödö omukwatinobe, bitema weti̧ otiwanö ja̧akwo̧, jö̧ba̧lö. Ja̧danö, ötjönö 'da̧batö ujuninobe iteda wei̧ chotidobö. Ja̧danö, jejenö 'da̧batö ujuninobetjö̧, jo̧banö ösödö yöta̧la, otiwanö weköbinobe, jö̧ba̧lö.

¹³ Damötjö Cristonö chösödakwa̧ abönö, sulabenö yöba̧liachijatö Cristonöma, sulabo̧ jö̧ba̧lö. Ja̧danö, jo̧banö öpöjödö sulabenö ja̧biachijatö jo̧banöma. Jo̧kwaijayonö, jejenö ja̧tinajayonö, ötjönö ösödö 'da̧batö ujuninobe, Cristo wei̧ chotidobö. Jau, wajwibö chöpöjödijatö Cristonöma, Cristoma Dios weökökwe, jö̧ba̧lö. Ja̧danö, wajwibö chöpöjödiökwe, Diosma lȩlö̧jinö edinobe ötjönöma.

¹⁴ Ja̧danö, Duluwo̧ma ötjönö lȩlö̧jinö edö, mikwa jwiinö otiwa jawa iyinobe ötjönöma. Wanedö yötawa: Su̧'bȩ babibö welachibanö tupakwö kabatökönö iyinobe otiwa jawa ötjönöma. Ja̧danö ju'wibi, jo̧ba yöawi̧ chösödobö pjaatinobe. Ja̧danö, ju'wedö chömöledö Cristo Jesúsnö ösödadönö chösödobö pjaatinobe, okobe deinö Cristo Jesúskwö a̧jö ju̧kwadönö pjaati̧danö.

¹⁵ Jau Timoteo, Cristo Jesúsma böjȩkwö ichinobe sulabenö ja̧badönö tjö̧jibinö ja̧obö. Ja̧ wenema isabenö wene Timoteo, okobe deinö ja̧ wene tjösödobö jo̧be. Ja̧danö, ökwönö yötawa, jobadö sulabenö ja̧badötjö, o̧penönö sulabenö ja̧bö ji̧achijatö ötjöma.

¹⁶ Jo̧kwaijayonö Diosma lȩlö̧jinö edinobe ötjönöma. Jau, Cristo Jesús kabatökönö o̧'wo̧ 'dibachibö lȩlö̧jinö edi̧ma öwaetjöda öwawo jö̧ba̧lö, Diosma ötjönö, sulabedötjö o̧penönö sulabenö ja̧binanö lȩlö̧jinö edinobe. Ja̧danö, o̧'wo̧ 'dibachibö lȩlö̧jinö edinobe ötjönöma, ju'wedöma edö tjöwaisachibobö, Aaa, Cristo Jesúsma isabenö kabatökönö o̧'wo̧ 'dibachibö sulabenö ja̧badönö lȩlö̧jinö edo̧, jö̧ba̧lö. Ja̧danö jobadöbi ösödö ba̧kwȩlö̧jatebö ja̧kwawa juna̧ladö batjibakobetjö̧, ötjönö lȩlö̧jinö edinobe Duluwo̧ma.

¹⁷ Inesö la'aka luwo̧, wobökönö ba̧kwȩlö̧jatebö jo̧, jojodöbi dedökökwe Diosma bakwo̧da, jelo̧ma deobe, jo̧banöda otiwanö domukwatobö jo̧be, ja̧danö jo̧banöda dösödobö jo̧be, otiwo̧ja̧, juluwo̧ja, jö̧ba̧lö. Jejenö kabatökönö dösödobö jo̧be.

¹⁸ Jau chitji̧ Timoteo, Dios yöawi̧ yöbawadöma ökwönö yötjawinobe, ja̧bö kwö̧jakwa̧, ¿jö̧tö? Ja̧danö, jobadö yötjawinadanö ja̧bö kwö̧jobö weta. Ja̧danö, ökwönö yötjawina omukwatö, yötjawinadanö Dios wei̧ ja̧bö kwö̧jo. Ja̧danö, guardia jojo tjöbeba̧lö ö̧ji̧danö, tjöbeba̧lönö otiwa jawa wene a̧'dȩlanö te'ada̧lö kwö̧jo, sulabenö yöbawadö otiwa jawa wene balewö lobö, isa̧ökö weneda yötjawapji jö̧ba̧lö.

¹⁹ Ja̧danö kabatökönö Cristonö ösödö kwö̧jo, ja̧danö kwomajadenö kwöwaisi̧danö, jwaikwöda otiwanö ja̧bö kwö̧jo, sulabenö ja̧bökönö. Ju'wedöma tjomajadenö tjöwaisi̧danö ja̧bö tjö̧jinokobetjö̧, waekwinobe. Ja̧danö, Dios iwene tjösödo jö̧tja̧li̧ wenema kabatibö, isa̧ökö weneda tjösödinobe.

²⁰ Jejenö ja̧tjinobe Himeneobi, Alejandrobi. Ja̧danö, jejenö ja̧tjinobetjö̧, jobadönö lȩbebö yötawijatö, Awetjama wainö jobadönö sulabenö ja̧o jö̧ba̧lö. Jejenö yötawijatö, Himeneobi, Alejandrobi usula tjemawenama, Diosnö sulabenö yöda̧loko jö̧ba̧lö tjöwaisachibakobetjö̧.