1 Tesalonicenses 5 - Dios Iwene

^1-2 Chömöledö, Duluwo̧ ichakwa̧ möle jawa ida̧ökö kwöwaisaduwa, jojodö wajwitjonö Duluwo̧ ichakwa̧ möle badekwachakobe jö̧ba̧lö. Jo̧kwajabetjö̧, Aaa, biya̧ möle baledakobe, ja̧danö, Aaa biya̧ baledaja̧ okobe baledakobe jö̧ba̧lö ba̧ja̧dö chiwȩyudoböma jwia, ida̧ökö kwöwaisaduwobetjö̧. Jau chömöledö, wanedö yötawa: Yö̧te naukwabo̧ma, jojodö tjomukwatokonö tebachö naukwo̧, ¿jö̧tö? Ja̧danö, jojodö tjomukwatokonö Duluwo̧ ichakwa̧ möle badekwachakobe.

³ Jojodö, Aaa, wene jwia, yedaboböma jwia jö̧ba̧lö tjomukwatelö ja'ötjö, juluwanö baibakobe jobadönö lȩebakwa̧ma. Jau chömöledö, ja̧ baibakwa̧ma wanedö yötawa, jitji̧nö jemakwujuma, jo̧'wo̧ söba̧lö jö̧jelö ja'ötjö, juluwanö niatibobe, ¿jö̧tö? Jejenö baibakobe jojodönö lȩebakwa̧ma, ja̧danö döibajakwa̧ma jwiakobe.

⁴ Jejenö wajwitjonö ja̧ möle baibakobe yȩa'wo okwa ju̧kwadönö chömöledö, jo̧kwaijayonö yȩa'wo okwa jö̧ködöja ökwödöma. Jo̧kwajabetjö̧ naukwabo̧ ichibi̧danö badekwachökena ja̧ möle ökwödönöma chömöledö, ja̧ möle te'ada̧lö kwö̧jaduwobetjö̧.

⁵ Chömöledö, wanedö yötawa: Okobe deinö ökwödöma dewi̧ jojodöja, möle jojodöja. Jau chömöledö, ökwödö Jesúsnö ösödadöma yö̧te jojodöböködösa, ja̧danö yȩa'wo okwa jö̧ködösa.

⁶ Jo̧kwajabetjö̧, wanedö yötawa: Kwo̧'wo̧ luwo̧duwi jawama, ju'wedö tjaba̧li̧danöma daba̧laduwoko chömöledö, möle eda̧ladödanö dö̧jo, 'dukwachinö jö̧könö.

⁷ Jau chömöledö, baikwö yötawa: Abadöma, yö̧te abadö, ¿jö̧tö? Ja̧danö, 'dukwachinö owa̧ladöma, yö̧te 'dukwachinö owa̧ladö, ¿jö̧tö?

⁸ Jo̧kwaijayonö, ökwödöma möle jojodösa chömöledö, jo̧kwajabetjö̧ 'dukwachinöma dö̧joko. Wanedö yötawa: Döpöjojo ökwödönö ölakwabikwawö ö̧jobetjö̧, guardia jojo omuko tjöekwado̧ 'duawi̧danö, Dios yöawi̧ ösödakwawi̧bi, dömöledönö ösödabikwawi̧bi 'dudawo, tjöekwado̧ baibanö. Ja̧danö, guardia jojo tjöekwaka bötjawaka ubutjawi̧danö, dö̧jibinö pjabato̧ jö̧ba̧lö Diosnö do̧'wo̧ döwana̧li̧ma dubutjawaduwo, tjöekwaka baibanö.

⁹ Jau chömöledö, Diosma ökwödönö omudawö ujuninokobe, iteda lȩebakwawö̧ badibanöma, Duluwo̧ Jesucristonötjö ji̧badö badibanö omudawö ujuninobe chömöledö.

¹⁰ Jo̧ba Jesucristoma dö̧jibobö midawö woinobe, woditjö̧böbi, 'yada̧litjö̧böbi jo̧bakwö dö̧jakobetjö̧.

¹¹ Ja̧danö, jejenö jo̧betjö̧, ida̧ökö ja̧bö kwö̧jaduwi̧danö, tupakwö pjabatakwawö yöka̧lakwawaduwo, ja̧danö kwujuluwachibaduwanö yökawakwawaduwo.

Pablo bajaleapo weina

¹² Chömöledö, yödawaduwakwö, ökwödö kwuluwedöduwinö otiwanö kwomukwataduwo. Jau chömöledö, jobadöma 'diinö tjotidobe ökwödönö pjabatö, jwebeböbi ökwödönö jwetjebobe, ja̧danö ba̧ja̧döbi tjöba̧ja̧dobe ökwödönö. Jo̧kwajabetjö̧ otiwanö kwomukwataduwodönö jobadö kwuluwedöduwinöma.

¹³ Jobadö tjotidi̧ omukwatö, jobadönö otiwanö omukwatö kwösödaduwodönö. Ja̧danö, kwömöledöduwikwö wene jwiinö kwö̧jaduwo chömöledö.

¹⁴ Ja̧danö, tupakwö wedaduwakwö chömöledö, 'dö̧wekwachibadönöma kwöba̧ja̧daduwo, 'dö̧wekwachibökönö tjö̧jo jö̧ba̧lö. Ja̧danö yebabinö ju̧kwadönöma tjujuluwachibanö pjakataduwo. Ja̧danö me'dawadönöbi pjakataduwo. Jobadö okobe deinö pjabatö kwö̧jaduwenama, kwo̧'wo̧duwi 'dibachibö kwö̧jaduwo chömöledö, jobadönö öpöjödökönö.

¹⁵ Ja̧danö, ökwödönö sulabe baibenama, kwite'ada̧laduwo, ökwödötjö bakwo̧bi balekwa mikwa sulabenö ja̧apji jö̧ba̧lö. Kabatökönö otiwanö ja̧bö kwö̧jaduwobö kwisakwaduwo, kwömöledöduwi Jesúsnö ösödadönöbi, ju'wedö jojodönöbi.

¹⁶ Ba̧kwȩlö̧jatebö kwo̧'wo̧ luwo̧duwi ösöwanö kwö̧jaduwo,

¹⁷ kabatökönö Diosnö akebaduwo,

¹⁸ okobe jwiinö baledi̧ma, Diosnö kwösödaduwo, otiwanö pjabato̧ja jö̧ba̧lö. Jejenö ökwödö Cristo Jesúsnö dötewadö kwö̧jaduwobö ösödo̧ Diosma.

¹⁹ Chömöledö, Dios O̧'wo̧ Luwo̧ma kwo̧'wo̧ luwo̧duwinö ja̧nö ökwödönö öba̧ja̧dobe, ¿jö̧tö? Jo̧ba öba̧ja̧di̧ma kwöpöjödaduwa chömöledö.

²⁰ Dios yöawi̧ yöawakwawama öpöjödökönaduwi.

²¹ Jo̧kwaijayonö, okobe jwiinö kwa̧ja̧kwaduwi̧ma, otiwojobö jweojobö jö̧ba̧lö kwisakwaduwo, ja̧danö kwa̧ja̧kwaduwaja̧ otiwitjö̧ma 'diinö do̧ka̧laduwo.

²² Ja̧danö okobe jwiinö suli̧tjöma kwöpöjödaduwo sulabenö ja̧bökönö.

²³ Chömöledö, do̧'wo̧ luwo̧nö wene jwiinö dö̧jobö pjabato̧ Diosnö ateba, kwiteba'oduwitjöbi, kwomajadeduwitjöbi, kwo̧'wo̧ luwo̧duwitjöbi bakwainö sulabe jwibadö bakibaduwanö ja̧o jö̧ba̧lö. Ja̧danö, jejenö ja̧obetjö̧, Duluwo̧ Jesucristo ichakwa̧ möle badekwachenama, ja'yubebi wene jwiinö kwö̧jaduwakwedöja.

²⁴ Jau chömöledö, Diosma ökwödönö jwöinobe, jejenöbedö bakibaduwobö, ja̧danö jö̧a̧li̧danö ja̧bo̧obetjö̧ isabenö jejenö bakibaduwanö ja̧akwo̧.

²⁵ Chö̧ja̧wo̧dö, Diosnö akebaduwo ökwödönö.

²⁶ Okobe deinö kwömöledöduwi Jesúsnö ösödadönö du̧batö kwösödaduwo, dömöledö Jesúsnö ösödadönö du̧dati̧danö.

²⁷ Duluwo̧ iminö wetaduwakwö, böja kwialusöja okobe deinö Jesúsnö ösödadönö yöka̧laduwo.

²⁸ Duluwo̧ Jesucristo ökwödönö lȩlö̧jinö edobö chösöda. Biya̧data.