1 Tesalonicenses 4 - Dios Iwene

Dios ösödi̧danö ja̧bö kwö̧jaduwo jö̧ba̧lö Pablo yöawina wene

¹ Chömöledö, belö ökwödönö yödawijatö, Dios ösödi̧danö ja̧kwawama, baikwö ja̧bö kwö̧jaduwo jö̧ba̧lö, ¿jö̧tö? Ja̧danö babema Duluwo̧ Jesús iminö budekwödanö wedaduwakwö, yödawinadanö ja̧bö kwö̧jaduwo jö̧ba̧lö. Isabenö jejenö ja̧bö ju̧kwadöja ida̧ökö chömöledö, jo̧kwaijayonö jemi tupakwöbi jejenö ja̧bö kwö̧jaduwo chömöledö.

² Kwöwaisaduwa chömöledö, Duluwo̧ Jesús iminö ökwödönö döba̧ja̧dinama.

³ Dios ösödi̧ma baikwö yötawaduwakwö chömöledö: Bakweminö Dios ösödi̧danö ja̧bö kwö̧jaduwo, kwi̧lȩkwa̧muböködökwö ja̧bökönö.

⁴ Ja̧danö, ökwödö ömadöma bakwo̧nökwena kwöwaisaduwobö jo̧be, kwi̧lȩkwa̧muduwikwö otiwanö ja̧kwawama, Diosbi jojodöbi kwö̧jaduwi̧ edö otiwa jö̧ba̧lö tjomukwatakobetjö̧.

⁵ Jau chömöledö, Diosnö wajwibadö ja̧bö tjö̧ji̧danöma, bakwainö 'da̧'da̧akwawa ösödö ja̧nöma, ja̧bö kwö̧jaduwoko.

⁶ Ja̧danö, kwöjawo̧duwinö suli̧ waedökönaduwi, jo̧ba ilekwonö sulabenö ja̧böma. Jau chömöledö, belö jweinö lȩdebijatö ökwödönö, jejenö ja̧badönö isabenö lȩbebo̧ Duluwo̧ma jö̧ba̧lö.

⁷ Diosma ökwödönö jwöinokobe kwi̧lȩkwa̧muböködökwö ja̧köbaduwoböma chömöledö, sulabe jwiinö kwö̧jaduwo jö̧ba̧lö jwöinobe.

⁸ Jo̧kwajabetjö̧ biya̧ yötawaja̧ öpöjödo̧ma, jojo yöawi̧ma öpöjödö̧kö̧, Dios yöawi̧da öpöjödo̧. Jau chömöledö, Diosma iteda O̧'wo̧ Luwo̧nö ökwödönö iyo̧, ja̧danö jo̧ba yöawi̧da öpöjödobe yötawaja̧ öpöjödo̧ma.

^9-10 Chömöledö, Diosma ida̧ökö ökwödönö öba̧ja̧dobe, kwömöledöduwi Jesúsnö ösödadönö ösödabikwawö kwö̧jaduwobö. Ja̧danö, jo̧ba öba̧ja̧di̧danö isabenö okobe deinö kwömöledöduwi kwiteboduwi Macedonia nijinö ju̧kwadönö ösödadöja. Jo̧kwajabetjö̧, Aaa, ja̧ jawa ba̧ja̧dö chiwȩyudo jö̧ba̧löma chomukwatökö chömöledö, ida̧ökö jejenö ja̧bö kwö̧jaduwobetjö̧. Jo̧kwaijayonö, yayonö ökwödönö budekwödanö wedobe chömöledö, jemi tupakwönönö ösödabikwawö kwö̧jaduwo jö̧ba̧lö.

¹¹ Ja̧danö, wene jwiinö kwö̧jaduwobö kwisakwaduwo chömöledö, ja̧danö kwomukwataduwo jö̧ka̧laduwi̧da omukwatö kwö̧jaduwo, ja̧danö kwakwawa jawa kwo̧'wo̧li̧ jawa otidö kwö̧jaduwo, belö ökwödönö wedinadanö.

¹² Jejenö ja̧bö kwö̧jaduwitjö̧ma, Jesúsnö öpöjödadöbi otiwanö tjomukwatena ökwödönö, ja̧danö kwo̧'wo̧li̧ jawa kwujuna̧laduwena, ju'wedötjö abebökönö.

Jesús yemidanö ichakwa̧ Pablo yöawina wene

^13-14 Chömöledö, wajwiköbaduwapji jö̧ba̧lö, Jesúsnö ösödö wobinadönö yötawa. Jobadönö yötawa chömöledö, kwo̧'wo̧ tjo̧achaduwapji jö̧ba̧lö, Jesúsnö ösödöködö tjo̧'wo̧ tjo̧achi̧danö. Jobadö Jesúsnö ösödöködöma, Aaa, yemidanö dömöledönö dedakwedösa, jö̧ba̧lö Diosnö tjo̧'wo̧ tjöwana̧loböma jwibadö chömöledö, jo̧kwaijayonö ökwödö Jesúsnö ösödadöma jejenö do̧'wo̧ döwana̧lobö jo̧be. Jau chömöledö, Jesús wobajo̧, yemidanö woawatjö tjeachajina wene dösödobe, ¿jö̧tö? Ja̧danö, biya̧ wenebi dösödobe chömöledö, Jesúsnö ösödö wobinadönöbi tjetjachajinö ja̧akwo̧ Diosma Jesúskwö batjibanö, jö̧ba̧lö.

¹⁵ Jau chömöledö, Duluwo̧ yöawi̧ ökwödönö yödawobe, baikwö: Duluwo̧ yemidanö ichakwa̧ möle badekwachenama, ökwödötjö ina 'yaba̧ladöma ökwödötjö wobinadö tjabönöma dȩwa̧jökakobe chömöledö.

¹⁶ Baikwö baledakwa̧ yötawa: Duluwo̧ma mölejȩbetjö jwiachakobe, ja̧danö labinö webö jwöakobe, ja̧danö ángelesdötjö la'aka ángelma yöa̧lakobe, ja̧danö Dios asabi̧ jawa trompeta ökwöakobe. Jejenö baledenama, Jesúsnö ösödadötjö wobinadöma dabönö 'yabibajö katjekwajachakobe.

¹⁷ Jemi ikenama ökwödö ina 'yaba̧ladöbi kadekwajachakobe, ja̧danö ja'ö ojwiyo'woelö jobadökwöbi, Duluwo̧kwöbi bakobe dediakwawakobe, ja̧danö jemi tupakwö ba̧kwȩlö̧jatebö Duluwo̧kwö dö̧jakwedösa.

¹⁸ Jejenö ja̧kobe chömöledö, jo̧kwajabetjö̧ biya̧ wene yöba̧lakwawö pjakatakwawaduwo kwo̧'wo̧ luwo̧duwi ösöwachibanö.