1 Tesalonicenses 3 - Dios Iwene

¹ Jau chömöledö, jwiinö dösödijatö ökwödönö dedoböma, jo̧kwaijayonö domukwati̧ waekwobetjö̧, do̧'wo̧ 'dibachibö dö̧jijatö, 'yö̧könö. Ikenama jwiinö ökwödönö döwaisobö jö̧da̧lobetjö̧, ökwödöma okobe Atenasnö dö̧jibonö,

² Timoteonö wedijatö ökwödönö edö i̧'yobö. Jo̧ba Timoteoma do̧'wo̧ luwo̧nö döjawo̧, ja̧danö Dioskwö otidö Cristo jawa otiwa jawa wene yöbawö jo̧ jo̧bama. Jo̧banö wedijatö kwo̧'wo̧ luwo̧duwi kwujuluwachibaduwanö tupakwö pjaatobö, ja̧danö Jesúsnö ösödö kwö̧jaduwi̧ pjaatobö,

^3-4 usula emawö Jesúsnö ösödö dö̧ji̧ kakatibaduwapji jö̧ba̧lö. Jau chömöledö, ina ökwödökwö dö̧jayi, ökwödönö yödawijatö ökwödö Jesúsnö ösödadö usula demawakwa̧ma. Jo̧kwajabetjö̧ ökwödöma kwöwaisaduwa chömöledö, ökwödö Jesúsnö ösödadöma, isabenö usula demawakwedösa jö̧ba̧lö. Ja̧danö, kwöwaisaduwa chömöledö, ökwödönö yödawinadanö ida̧ökö baledajabe jö̧ba̧lö.

⁵ Jau chömöledö, usula kwemawaduwi̧ chöwaisobetjö̧, yetabijatö, Aaa, Awetja sulabenö ja̧tjojobö ja̧ajawö̧, Tesalónica ju̧kwadöma Jesúsnö ösödö dö̧ji̧ katjatibajena, jö̧ba̧lö. Jejenö yetabobetjö̧, tupakwö cho̧'wo̧ 'ditachibökenanö baibenama, Timoteonö wetijatö, Dömöledö Tesalónicanö ju̧kwadö Jesúsnö ösödadönö edaji jö̧ba̧lö. Jejenö wetijatö chömöledö, ökwödö Jesúsnö ösödö kwö̧jaduwi̧ wene chöwaisobö, dotidina waekwinojobö jö̧ba̧lö.

⁶ Ja̧danö, Timoteoma ida̧ökö edö ȩwa̧jabe, ja̧danö otiwa wene yöawajabe ökwödönö, Tesalónicanö ju̧kwadöma Jesúsnö ösödö tjö̧jobetö jö̧ba̧lö, ja̧danö tjömöledönö ösödabikwawö tjö̧jobetö jö̧ba̧lö. Ja̧danö, ökwödönö yöawajabe, kabatökönö ökwödönö otiwanö kwomukwataduwi̧ma. Ja̧danö, ökwödönö dedobö nöinö dösödi̧danö, bakweminö ökwödönö kwedaduwobö kwösödaduwi̧ wene yöawajabe.

⁷ Jau chömöledö, Timoteo ja̧ otiwa wene ökwödönö yöawobetjö̧, wene döbaledijayonö, ja̧danö usula demawijayonö, do̧'wo̧ luwo̧ma ujuluwachibajabe ökwödönö omukwatö. Jau chömöledö, ökwödö Jesúsnö ösödö kwö̧jaduwi̧ma do̧'wo̧ luwo̧nö ujuluwachibanö ja̧ajabe.

⁸ Baikwö yötawa: ökwödöma bakobe Duluwo̧kwö otiwanö 'diinö kwö̧jaduwobetjö̧, ökwödöma isabenö otiwanö dö̧jobe.

⁹ Jau chömöledö, ökwödönö omukwatö, Dios öba a'otjö ja̧nö jwiinö do̧'wo̧ ösöwachibanö dö̧jobe, ja̧danö Diosnö ösödö adebobe, ökwödö Tesalónicanö ju̧kwadönö otiwanö pjakatinobe jö̧ba̧lö.

¹⁰ Ja̧danö, mölebi, yö̧tebi nöinö Diosnö adebobe, döbabiyakwena yemidanö ökwödönö dedobö weo jö̧ba̧lö. Ja̧danö Jesúsnö ösödö kwö̧jaduwo jö̧ka̧laduwi̧danö isabenö kwö̧jaduwinö pjadatobö weo jö̧ba̧lö adebanö Diosnöma.

¹¹ Chömöledö, Dabe'do Diosnöbi, Duluwo̧ Jesúsnöbi ateba, yemidanö kwiteboduwibe dichibinö pjatjato jö̧ba̧lö.

¹² Ja̧danö, Duluwo̧nö ateba, kwömöledö Jesúsnö ösödadönöbi, ja̧danö okobe deinö jojodönöbi kwösödabikwawaduwi̧ nöachinö pjaato jö̧ba̧lö, ökwödönö dösödi̧danö kwösödabikwawaduwo jö̧ba̧lö.

¹³ Jau chömöledö, jejenö kwösödabikwawawaduwi̧ nöachinö ja̧bö, Duluwo̧ma kwo̧'wo̧ luwo̧duwinö kwujuluwachibaduwanö ja̧akobe. Ja̧danö jejenö ja̧obetjö̧, Duluwo̧ Jesúsma okobe deinö iteda ömöledökwö ichenama, Dabe'do Dios öba a'otjö wene jwiinö, ja̧danö sulabe jwiinö kwö̧jaduwakwedöja.