1 Tesalonicenses 2 - Dios Iwene

Pablo Tesalónicanö yöbawö ö̧jina wene

¹ Chömöledö, ökwödöma kwöwaisaduwa, ökwödönö yöbawö di̧'yinama waekwinokobe jö̧ba̧lö.

² Jau chömöledö, kwöwaisaduwa, ökwödönö yöbawö di̧'yakwa̧ abönö, ina Filipos comunidadnö dö̧jayi, jobe jojodöma sulabenö ja̧tjinobe ökwödönö usula demawinö. Jo̧kwaijayonö, ida̧ökö usula demawinajayonö, Dios pjaatobetjö̧ yebabökönö ökwödönö yödawijatö Dios jawa otiwa jawa wenema. Jau chömöledö, döpöjojodö yödawokobö tjölabinajayonö, yayonö yebabökönö yödawijatö ökwödönöma.

³ Chömöledö, ökwödönö yödawinama, omöna wene ösödajadöma yödawijökötö, ja̧danö sulabenö omukwatöma yödawijökötö, ja̧danö omöna wene kwösödaduwo jö̧ba̧löma yödawijökötö chömöledö.

⁴ Jau chömöledö, Diosma ökwödönö omudawö ujuninobe, Bidöma otiwanö otiwa jawa wene yötjawakwedö, jö̧ba̧lö, jo̧kwajabetjö̧ jo̧ba ösödi̧danö yödawobe. Ja̧danö, jojodö ökwödönö tjösödo jö̧ba̧löma yöbawöködösa, Diosda yödawi̧ a̧ja̧kwö ösödo jö̧ba̧lö yöbawadösa chömöledö. Jau chömöledö, Diosma domajadenö domukwati̧ edo̧, otiwanö domukwatojobö jö̧ba̧lö, ja̧danö jo̧bada ösödo jö̧ba̧lö yöbawadösa ökwödöma.

⁵ Yödawinama kwöwaisaduwa chömöledö, la'akatjöda omönada kwösödachibaduwoböma yödawijökötö, Aaa, ökwödöma jwiinö otiwadöja, jö̧ba̧lö kwösödaduwoböma. Ja̧danö, la'akatjöda ökwödöda balada demotö jö̧ba̧löma yödawijökötö chömöledö. Jau chömöledö, Diosma yödawina edinobe, ja̧danö jo̧bama edö waiso̧, balada tjemotö jö̧ba̧löma yöbawinöködö jö̧ba̧lö.

^6-7 Ja̧danö jojodö ökwödönö otiwanö tjomukwatoböma yödawijökötö. Jau chömöledö, ökwödö otiwanö kwomukwataduwobö, ja̧danö ju'wedöbi otiwanö tjomukwatoböma yödawijökötö. Ja̧danö, Cristo webawedödobetjö̧, ökwödönö adebo jö̧da̧linena, ökwödönö pjabatö kwite'ada̧laduwo jö̧ba̧lö. Jo̧kwaijayonö, jejenö abebökönö dösölö̧jinö te'ada̧lö pjadatijatö ökwödönö, bakwuju ji̧tji̧munö jite'ada̧li̧danö.

⁸ Jau chömöledö, ökwödönö ile nidebobetjö̧, Dios jawa otiwa jawa wene yödawijatö, ökwödönö pjabatö. Jau chömöledö, yöbawöbi yödawijatö ökwödönö, ja̧danö okobe jwiinö ju'wi jaye ökwödönö pjadato jö̧da̧lina jawabi, ja̧bö dö̧jijatö ökwödönö jwiinö dösödobetjö̧.

⁹ Jau chömöledö, kwomukwataduwena ökwödökwö ja̧nö dotidinama. Ökwödönö Dios jawa otiwa jawa wene yöbawö dö̧jonö, ju'wibi ökwödöda du̧kwa kwakwawa demo jö̧ba̧lö dotidijatö chömöledö, usula emawö. Jau chömöledö, ökwödönö te'ada̧lakwawama ökwödö Tesalónica jojodönö baibapji jö̧ba̧lö, mölebi yö̧tebi dotidijatö.

¹⁰ Jau chömöledö, Diosma ja̧bö dö̧jina edö waiso̧, ja̧danö ökwödöbi edö waisadöja ökwödö Jesúsnö ösödadönö ja̧bö dö̧jinama. Ökwödökwö dö̧jenama, bakwainö otiwanö ja̧bö dö̧jijatö, ja̧do jö̧da̧li̧danö ja̧bö dö̧jijatö chömöledö. Jo̧kwajabetjö̧ bakwo̧bi yöawoböma jwiobe, Tesalónicanö ju̧kwadönöma sulabenö ja̧tjinobe jö̧ba̧lö.

¹¹ Kwöwaisaduwa chömöledö, bakwo̧ iteda i̧tji̧munö yöawi̧danö yödawijatö ökwödönö.

¹² Jau chömöledö, Diosma ökwödönö jwöinobe salöobe iteda webö ö̧jobe ökwödöbi kwö̧jaduwobö, ¿jö̧tö? Jo̧kwajabetjö̧, kabatökönö bakwo̧nökwena ökwödönö yödawijatö, ja̧danö kwujuluwachibaduwanö yödawijatö, ja̧danö ökwödönö wedijatö Dios ömöledö ja̧tjo jö̧tja̧li̧danö ja̧bö kwö̧jaduwo jö̧ba̧lö.

¹³ Ja̧danö, ju'wibi yötawaduwakwö chömöledö. Ökwödönö Dios iwene yödawenama, Aaa, jojodö yötjawi̧ jö̧ba̧löma kwöpöjödinaduwokobe, Dios iwene jö̧ba̧lö kwösödinaduwobe chömöledö. Ja̧danö, jejenö kwösödinaduwobetjö̧, Diosnö kabatökönö ösödö adebobe, otiwanö Tesalónicanö ju̧kwadönö pjabato̧ja jö̧ba̧lö. Jau chömöledö, yödawina wenema isabenö Dios iwene, ja̧danö ja̧ wenetjö Diosma ina ökwödö Jesúsnö ösödadönö kwöbalewachibaduwanö ja̧bo̧.

¹⁴ Chömöledö, ökwödöma Dios ömöledö Judea nijinö ju̧kwadö Cristo Jesúsnö ösödadödanö ichejekwadöja, jobadödanö ökwödöbi kwiteboduwi jojodötjö usula kwemawinaduwobetjö̧. Jau chömöledö, ökwödö kwiteboduwi jojodötjö usula kwemawaduwi̧danö, jobadö judío jojodötjö Cristo Jesúsnö ösödadöma tjitebo ju̧kwadö judío jojodötjö usula tjemawinobe, ¿jö̧tö?

¹⁵ Jau chömöledö, jobadö judío jojodöma Dios yöawi̧ yöbawadönö kwabawö lotjinobe, ja̧danö Duluwo̧ Jesúsnöbi kwabö lotjinobe, ja̧danö ökwödönöbi labinö a'dewö lotjinobe. Dios öpöjödinö ja̧badö jobadöma chömöledö, ja̧danö okobe deinö jojodö tjöpöjojodödanö tjichejekwobe jobadö judío jojodöma chömöledö.

¹⁶ Jau chömöledö, judío jojodöböködönö tjö̧jibobö yödawenama, judío jojodöma tjöpöjödobe, judío jojodöböködönöma yökawaduwa jö̧ba̧lö, ja̧danö yödawökönö sulabenö ja̧tjobö tjisakwobe chömöledö. Jau chömöledö, la'akatjöda sulabenö ja̧biatjinadanö, ja̧bi sulabenö ja̧tjajabe judío jojodöma. Ja̧danö wanedö yötawa: Sulabenö ja̧tji̧ma su̧'bȩ baibajabe ida̧ökö. Jo̧kwajabetjö̧, babema bajaliyanö Dios lȩebi̧ma jobadönö badekwachajabe chömöledö.

Yemidanö ökwödönö chedowe jö̧ba̧lö Pablo yöawina wene

¹⁷ Chömöledö, ökwödö kwö̧jaduwelö ja'yubeda lekwajabetjö 'da̧bachibö dö̧jajabema, jwiinö ökwödönö dedobö dösödijatö. Ja̧ 'da̧bachibö dö̧ji̧ma, do̧'wo̧ luwo̧tjöma la'akatjöda 'da̧bachibö dö̧jijökötö chömöledö. Jo̧kwaijayonö diteba'otjö 'da̧bachibö dö̧jobetjö̧, dömöledönö dedowe jö̧ba̧lö ökwödönö yemidanö döbabiyakwena dediakwawobö disakwijatö chömöledö.

¹⁸ Kwö̧jaduwobe yemidanö tjedachajobö disakwijatö, ja̧danö ötjöma yemidanö, yemidanö chi̧'yobö chisakwijatö chömöledö, jo̧kwaijayonö Awetjama tjöeba̧linobe, di̧'yökönö.

^19-20 Ökwödönö dedobö dösödijatö, Aaa, dömöledöma otiwadö jö̧ba̧lö ökwödönö dösödobetjö̧, ja̧danö ökwödönö omukwatö do̧'wo̧ ösöwachibanö dö̧jobetjö̧. Jau chömöledö, bajaleapo möle ökwödö Tesalónica jojodöbi mölejȩbe Duluwo̧ Jesús öba a'o kwö̧jaduwobetjö̧, do̧'wo̧ ösöwanö dö̧jakwedösa ökwödöma, ja̧danö yöbawö dotidina dösödakobe, isabenö otiwanö yöbawö dotidinobe jö̧ba̧lö. Jau chömöledö, ökwödö yödawina a̧ja̧kwö ösödadöma mölejȩbetjö kwi̧sebaduwakwedöja, isabenö otiwanö dotidina wenema.