1 Tesalonicenses 1 - Dios Iwene

Pablo Tesalónicanö ju̧kwadönö ajayisa'ye iwȩyudina'yetjö ajayi jawa

¹ Ötjö Pablo mikwo̧sa, ja̧danö Timoteokwö Silvanokwö böja kwialusöja chiwȩyuda ökwödö Tesalónica comunidadnö ju̧kwadötjö Dabe'do Diosbi, Duluwo̧ Jesucristobi tjömöledönö. Dios ökwödönö lȩlö̧jinö edobö dösöda, kwo̧'wo̧ luwo̧duwi ösöwachibanö kwö̧jaduwobö.

Diosnö ösödö adebobe ökwödönö jö̧ba̧lö Pablo yöawina wene

^2-3 Chömöledö, ba̧kwȩlö̧jatebö Dabe'do Diosnö adebenama, ökwödönö adebobe. Jau chömöledö, Jesúsnö kwösödaduwobetjö̧, jo̧ba wei̧ ja̧bö kwotidaduwobe, ja̧danö ju'wedönö ösödö pjabatö kwö̧jaduwobe, ja̧danö jwaikwöda kwo̧'wo̧ wana̧lö kwö̧jaduwobe, isabenö Duluwo̧ Jesucristoma yemidanö ichakwo̧ jö̧ba̧lö. Ja̧danö, jejenö kwö̧jaduwi̧ omukwatö, kabatökönö ökwödönö omukwatö Dabe'do Diosnö ösödö adebobe, otiwanö ökwödö Tesalónicanö ju̧kwadönö pjaatinobe jö̧ba̧lö.

^4-5 Jau chömöledö, ökwödönö otiwa jawa wene yödawenama, sule yöbawödama yödawinokobe, yöbawöbi yödawinobe, ja̧danö Dios O̧'wo̧ Luwo̧ ujulu i̧seböbi di̧sebinobe, yödawi̧ma isabenö wene jö̧ba̧lö. Jejenö öwaetjöda öwawinobe, yödawi̧ wenema isabenö wene jö̧ba̧lö. Ja̧danö, jejenö Diosma iteda ujulu i̧sebinobetjö̧, ökwödönö Tesalónica ju̧kwadö döwaisa, Dios ösödawö̧ja jö̧ba̧lö, ja̧danö Dios omudawö ujuninawö̧ja jö̧ba̧lö. Jau chömöledö, ökwödökwö dö̧jinama kwöwaisaduwa, ökwödönö pjadatotö jö̧ba̧lö dö̧jinobe.

⁶ Ja̧danö, ökwödö ja̧bö di̧sebi̧danö ja̧bö, ökwödödanö ichejekwadö bakibinaduwobe chömöledö, ja̧danö Duluwo̧danö ichejekwadö bakibinaduwobe. Jau chömöledö, usula kwemawaduwijayonö, Dios O̧'wo̧ Luwo̧ pjaatawö̧, kwo̧'wo̧ luwo̧duwi ösöwachibanö kwösödinaduwobe otiwa jawa wenema.

⁷ Ja̧danö, jejenö ja̧bö, okobe deinö Macedonia nijinö ju̧kwadö Jesúsnö ösödadönöbi, okobe deinö Acaya nijinö ju̧kwadö Jesúsnö ösödadönöbi otiwanö kwi̧sekwinaduwobe, ökwödönö edö, jobadöbi ja̧bö kwö̧jaduwi̧danö ja̧bö tjö̧jo jö̧ba̧lö.

⁸ Jau chömöledö, okobe jwiinö Macedonia nijinöbi, Acaya nijinöbi yökawinaduwobe Dios iwenema. Ja̧danö, jemi tupakwöbi böjȩ bakwameachibanö ju̧kwadöma ökwödönö tja̧ja̧kwinobe, Diosnö kwösödaduwi̧ wenema. Jo̧kwajabetjö̧, ökwödö kwösödinaduwa wene ju'wedönö yödawoböma jwia, okobe deinö ida̧ökö ökwödönö tja̧ja̧kwinobetjö̧, Tesalónicanö ju̧kwadöma Diosnö ösödadötö, jö̧ba̧lö.

⁹ Jau chömöledö, ökwödödama jobadönö yödawököjayonö, ökwödönö yöbawö di̧'yina wene yötjawobe. Baikwö yötjawobe chömöledö: Tesalónicabe yöbawö di̧'yenama, ökwödönö kwösödinaduwobe, jö̧ba̧lö, ja̧danö o̧'wo̧ jawa kwösödinaduwawö̧nö kabatibö, Diosnö kwösödinaduwobe, jö̧ba̧lö. Jau chömöledö, ökwödönö yötjawobe, Tesalónicanö ju̧kwadöma o̧'wo̧ jawa kabatibö, isabenö Dios jo̧, 'yaba̧lo̧ Dios jo̧ wei̧ ja̧bö ju̧kwadötö, jö̧ba̧lö.

¹⁰ Ja̧danö, Dios Itji̧ mölejȩtjö ichakwa̧ te'ada̧lö ju̧kwadötö jö̧ba̧lö yötjawobe. Jau chömöledö, Diosma iteda Itji̧ Jesúsnö woawatjö tjeachajinö ja̧inobe, ja̧danö jo̧ba Jesúsda Dios lȩebakwa̧tjö dö̧jibinö ja̧bo̧ma.