1 Samuel 9 - Dios Iwene

Dios Saulnö omudawö ujunina jawa, israel jojodötjö inesö la'aka luwo̧ ö̧jobö

¹ Benjaminsaso jojodötjö bakwo̧ nöinö juna̧lo̧, ju'wibi jojodö otiwanö a̧ja̧kwö tjösödökwe ö̧jinobe, Cis mikwo̧. Jo̧ba Cisma, Abiel mikwo̧ itji̧, ja̧danö Abielma Zeror mikwo̧ itji̧, ja̧danö Zerorma Becorat mikwo̧ itji̧, ja̧danö Becoratma, Benjaminsaso jojo Afia mikwo̧ itji̧.

² Ja̧danö jo̧ba Cisma, itji̧nö ujuna̧linobe, jwiinö otiwo̧, okobe deinö ju'wedö israel jojodötjö bajalekwönönö otiwo̧nö, Saul mikwo̧nö. Ju'wibi, jo̧ba Saulma okobe deinö ju'wedö israel jojodötjö bajalekwönönö möbo̧ ö̧jinobe, ju'wedöma sule Saul öböbe'onönö tjichibinobe.

³ Ja̧danö, ja̧ möle baikwö baledinobe. Cis ajwimu bu̧lö̧dötjö ju'wedöma tjiledewinobe, ja̧danö jejenö tjile'dewiökwe, Cisma itji̧ Saulnö weinobe: —Saul, chömöayedötjö bakwo̧nö öbibö, chajwimu bu̧lö̧dönö kwisakwaduwo, —jö̧ba̧lö.

⁴ Weökwe, abe'do weaja̧danö ja̧inobe Saulma, abe'do ömöayo̧nö öbibö bu̧lö̧dönö tjisakwinobe. Isakwö, Efraimsaso jojodö tjitebo mösa'ijubenö isakwö tjöbaledinobe, ja̧danö Salisa nijibenö isakwö tjöbaledinobe, bu̧lö̧dönö badekwajökönö, jemi ikenama Saalim nijibenöbi badekwajökönö tjöbaledinobe, ikenama Benjaminsaso jojodö tjitebobenöbi badekwajökönö tjöbaledinobe.

⁵ Jejenö isakwö badekwajökönö Zuf niji̧be tjichibinobe, Saulbi, ömöayo̧bi. Ja̧danö, badekwajökönö Zuf nijibe ichibajadö, Saulma ömöayo̧nö yöa̧linobe, —Tjo̧wita, dewa̧ja̧duwo, chabe'do ökwödönö o̧'wo tjo̧achapji jö̧ba̧lö. Juluwanö dȩwa̧jökötjöma, chabe'doma bu̧lö̧dönö omukwatökönö, ökwödönöda o̧'wo tjo̧achena, dakwö baledajö jö̧ba̧lö.

⁶ Jöa̧lökwe, Saul ömöayo̧ma atadinobe, —Jejenömaökö chuluwo̧, teada̧li, bai bi̧ya comunidadnö bakwo̧ ö̧jobe, Dios ömöayo̧ma, jojodö –Jweinö yöba̧lo̧, –jö̧ba̧lö otiwanö tjo̧mukwatökwema. Jo̧bama isabenö jweinö yöbawo̧, okobe jwiinö tupakwö baledakwa̧ jawa yöawi̧ma, isabenö yöawaja̧danö baledajiobe. Jo̧kwajabetjö̧, dȩwa̧jakwa̧ abönö, jo̧banö abebö da̧ja̧kwaduwajo, jweinö disakwakwa̧ yöawojobö jö̧ba̧lö.

⁷ —Ömöayo̧ atadökwe, Saulma yöa̧linobe, —Jejenö edö di̧'yo jö̧da̧litjö̧ma, taji diyakwa̧da? Yöawi̧ mikwa balekwa mikwama taji diyakwa̧da? Pan ö̧pji̧a tuda'wijunö de'ewinama ida̧ökö 'dö̧ibajabe, ju'wi jaye jo̧banö iyawa baibanö diyobö dujuna̧lobeji̧, yöawi̧ mikwama? —jö̧ba̧lö abebö a̧ja̧kwinobe Saulma.

⁸ Abebö a̧ja̧kwökwe, Saul ömöayo̧ma atadinobe, —Edi, diyobö ji̧ma chujuna̧la ötjöda, bipi̧ baladasa̧pi̧ ja'yuapi̧ma, ja̧danö jo̧banö chiyena, otiwanö bu̧lö̧dönö disakwakwa̧ yöawakobetjö̧.

^9-10 Atadökwe, Saulma, —Otiwa, jo̧banö abebö da̧ja̧kwajo, —jö̧ba̧lö, jobe comunidad Dios ömöayo̧ ö̧jena comunidadbe abebö aja̧kwö tji̧'yinobe. Ja̧ möle, Dios yöawi̧ yöbawadönö babe ötjabi̧danöma ötjabinokobe. Babe, —Dios yöawi̧ yöbawo̧, —jö̧ba̧lö ötjabawö̧nö, ajayinö, —Tupakwö baledakwa̧ edo̧, —jö̧ba̧lö ötjabinobe.

¹¹ Ja̧danö, Saulbi, ömöayo̧bi mösa'o nöchö, comunidadbe tji̧'yonö, comunidadtjö ojwiyo watjobö labebajadö ya̧dö möayedönö tjöbadekwajinobe. Jobadönö edö, —Tupakwö baledakwa̧ edo̧ma, bai ö̧jobeji̧? —abebö tja̧ja̧kwawö̧,

¹² möayedöma tjatadinobe: —Jau, ö̧jobe, yada yö̧ne comunidadnö ö̧jobe. Japö, juluwanö kwi̧'yaduwitjö̧ma, jo̧banö kwöbadekwaduwakwedöja. Babeda jo̧bama baikwö comunidadbe ichajabe, bemi comunidad jojodö möemi Diosnö iyawemitjö babe möle Diosnö tjiyakobetjö̧.

¹³ Juluwanö comunidad apjude tekachaduwitjö̧ma, jo̧banö kwöbadekwajaduwena, möemi Diosnö iyawemibe kwanö önöchapji. Jobe Diosnö iyajadö, ba'ali tjukwakobe, jo̧kwaijayonö jo̧ba ichibakwa̧ tjiteada̧lobe, Diosnö tjiyakwa̧ abönö Diosnö iyawa jo̧bada Diosnö aebakobetjö̧. Ja̧danö, jemi ikenama, jobe tjukwobö tja̧debajawö̧ma jobetjö ba'ali tjukwakwedö. Jo̧kwajabetjö̧ juluwanö jo̧banö edö 'ya̧duwi, juluwanö jo̧banö kwöbadekwaduwakobetjö̧, —jö̧ba̧lö yötjawinobe möayedöma, Saulnöbi, ömöayo̧nöbi.

¹⁴ Jejenö yötjawawö̧, Saulbi ömöayo̧bi juluwanö comunidad tetjachinobe, ja̧danö comunidad apjude tetjachemi, Samuelnö tjedinobe, tjö̧jobekwö icho̧nö, jojodö Diosnö tjiyemi möemibe labebö nöcho̧nö.

¹⁵ Jemi abönö möle, Isabenö Jo̧ma Samuelnö yöawinobe,

¹⁶ Itekwayi babedajayenö bakwo̧nö kwö̧jobekwö wetocha, Benjamin niji jojodötjö bakwo̧nö. Jo̧banöda uunö o̧te tokebö, jo̧bada chömöledö israel jojodö la'aka tjuluwo̧ baibakobetjö̧. Isabenö chömöledö israel jojodöma filisteo jojodötjö usula emawadö, ja̧danö usula emawö ötjönö tjubudekwajabe, jo̧kwajabetjö̧ tjubudekwi̧ a̧ja̧kwö lȩlöinö edö jo̧banö omudawö chujunocha, filisteo jojodötjö tjö̧jibanö pjaatobö, —jö̧ba̧lö.

¹⁷ Ja̧danö, Samuel Saulnö edenama, Isabenö Jo̧ma jo̧banö yöawinobe, —Edi, biteda mada ökwönö yötawinökwema. Biteda chömöledö israel jojodö tjuluwo̧ baibanö jobadönö jweebakwo̧, —jö̧ba̧lö.

¹⁸ Ikenama, comunidad apjude a'o Saulma Samuel ö̧jobekwö ichibö abebö a̧ja̧kwinobe, —Tupakwö baledakwa̧ edo̧ ejuma daida, yökawobö atebakwö, —jö̧ba̧lö.

¹⁹ Aebökwe, Samuelma atadinobe, —Ötjödasa tupakwö baledakwa̧ edo̧ma. Babema chabönö 'ya̧duwi möemi Diosnö iyawemibe, babema ötjökwö kwukwaduwakobetjö̧. Ja̧danö, itekwayi yȩayi lakebaduwobö wetocha, ja̧danö okobe jwiinö kwöwaisobö jö̧ka̧li̧ma yötawocha.

²⁰ Ja̧danö kwa̧jwi̧mu bu̧lo̧dönö, wapötakwa möle baledibajabe le'dewinadönö kwo̧'wo tjo̧acha Saul, ida̧ökö jobadönö tjöbadekwajabe. Ja̧danö, ju'wibi yötawakwö Saul, inesö israel jojodö tjujuna̧li̧tjö otiwi̧ma, ökwöda kujuna̧lakwo̧ja, ja̧danö kwabe'do ömöledöda tjujuna̧lakwedö, —jö̧ba̧lö yöawinobe Samuelma Saulnö.

²¹ Jejenö, —Ökwöda kwujuna̧lakwo̧ja, —jö̧ba̧lö yöawiökwe, —Ötjöma Benjaminsaso jojosa, ja̧danö Benjaminsasoma, okobe deinö israel jojodötjö baikwönönösasobedösa. Ja̧danö Benjamin jojodötjö, Chabe'do ömöledödöma ju'wedötjö baikwönönöbedösa. Jo̧kwajabetjö̧ tajawedö jejenö yöka̧laja̧da ökwödönö? —jö̧ba̧lö abebö a̧ja̧kwinobe Saulma.

²² Jemi ikenama Samuelma Saulnöbi ömöayo̧nöbi öbibö, ba'ali tjukwȩko̧ okwa teatinobe, ja̧danö luwedö tjö̧bemi tjöbamatobö weinobe, Saulnöbi, ömöayo̧nöbi. Jobe jȩko̧ okwa treinta jenanö jojodö tjö̧binobe, ja̧danö okobe deinö jobadö tjö̧bemitjö bajalekwönönö la'aka luwo̧ ö̧bajiemi tjöbamatobö weinobe.

²³ Ja̧danö, ju'wibi Samuelma kwakwawa otido̧nö weinobe, —Jo̧da ökwönö kwakwawa iyö, bi̧yama 'da̧batö kwujuno jö̧ba̧lö yötawaja̧, ichejebi, bite ukwobö, —jö̧ba̧lö.

²⁴ Jejenö weökwe, kwakwawa otido̧ma Diosnö tjiyajökwe i̧sȩ'bobi, ja'bo itebiabi ichejebö Saul öba a'o öwaninobe, Saul ukwobö. Ja̧danö Samuelma Saulnö weinobe, —Kwidi. Kwakwawa otido̧nö wetatö, bi̧ya 'da̧batö ujunobö, babe bidö cha̧debajawö̧ tjöba a'o ja̧nö kwukwobö, —jö̧ba̧lö. Ja̧danö, jejenö weökwe, Saulma Samuelkwö ukwinobe.

²⁵ Ja̧danö, jemi ikenama, tjukwaja̧ ikenama, möemi Diosnö iyawemitjö yutjutajenama, jobe comunidadtjö Saul abakwapjo kamapjo tjödinobe, o̧do wa̧pekwobe. Ja̧danö, jobe abobö öbamatinobe Saulma.

²⁶ Ikenama, dewachenama, Samuelma Saulnö jwöinobe, mö abo̧nö: —Saul, a̧la̧ibi, tjo̧wi kwȩwa̧jobö wetakwö, —jö̧ba̧lö. Jwöökwe, Saulma a̧la̧libinobe, jadanö Saulbi, Samuelbi comunidad manabe latjebinobe.

²⁷ Ja̧danö, comunidadtjö labebö, comunidad ö'öbö tjichibenama, Samuelma Saulnö weinobe: —Kwömöayo̧nö, abönö ȩwa̧jobö webi, ja̧danö abönö ȩwa̧jonö, ökwöma okobe bai ji̧bi, Dios yöawi̧ ökwönö yötawakobetjö̧, —jö̧ba̧lö weinobe Samuelma Saulnö.