1 Samuel 8 - Dios Iwene

Israel jojodö la'aka luwo̧nö atjebina jawa

¹ Ja̧danö, lekwe möle janö, Samuelma pöe baibinobe. Ja̧danö, pöe babibö, iteda i̧tji̧mu du̧ju̧tajanö ujuninobe, jwebebö yöawi̧danö jobadöbi israel jojodönö jwebebö yötjawobö.

² Jobadö Samuel i̧tji̧muma bidö, abönö pöema Joel mikwo̧, ja̧da̧nö öjawo̧ma, Abias mikwo̧. Jobadöma Beerseba comunidadnö ja̧nö jojodönö jwebebö yötjawinobe.

³ Jo̧kwaijayonö, tjabe'do otiwanö omukwatö jwebebö yöawi̧danöma tjotidinokobe, idöda tjemotö jö̧ba̧lö tjomukwatinobe. Ja̧danö, wene jȩna, ju'wedö midö, dösödi̧danö jwekebaduwitjö̧ma dimidocha jö̧ba̧lö tjimidawö̧, jweinöma jwebebö yötjawinokobe, midajadönö pjabatö sulabenö wetjinobe.

⁴ Jejenö sulabenö jwebebö tjotidiawö̧, israel jojodötjö la'aka jojodöma Samuel itebo Ramabe ko̧ko̧kwö tji̧yinobe, jo̧bakwö yötja̧lakwawobö.

⁵ Ichibö, Samuelnö yötja̧linobe, —Samuel, ökwöma isabenö ida̧ökö pöeköba, ja̧danö kwi̧tji̧muma, ökwö jweinö jwebebö yökawi̧danöma jwebebö yöbawöködö. Jo̧kwajabetjö̧, baikwö adebakwö: Dipjeanö ju̧kwadöma okobe deinö idöda tju̧luwo̧kwena la'aka luwo̧nö juna̧ladö, jobadönö yöbawö webo̧nö, ja̧danö ökwödöbi jejenö duluwo̧ la'aka luwo̧nö dujuna̧lobö dösöda. Jo̧kwajabetjö̧ bakwo̧nö omudawö kwunjunobö adebakwö, ökwödö israel jojodötjö inesö la'aka luwo̧ yöbawö weobö, ja̧danö wene baibena jwebebö yöawobö, —jö̧ba̧lö atjebinobe Samuelnö.

⁶ Atjebökwe, Samuel öpöjödinobe, —Inesö la'aka duluwo̧nö kwujuno, jo̧bada jwebebö yöawobö, —jö̧ba̧lö atjebaja̧ma. Jo̧kwajabetjö̧, Samuelma Isabenö Jo̧nö abebö a̧ja̧kwinobe, dakwö weojobö jö̧ba̧lö.

⁷ Aebökwe, Isabenö Jo̧ma Samuelnö atadinobe, —Jau, atjebaja̧danö inesö la'aka tjuluwo̧nö kwujuno. Isabenö Samuel, baikwö yötawakwö, jejenö atjebi̧ma baikwö ichejekwobe: Ökwönö öpöjödö atjebobedanö ichejekwijayonö, ötjönöda öpöjödö atjebobe, ötjöda inesö la'aka tjuluwo̧ chö̧jobö öpöjödinö.

⁸ Isabenö egipto nijitjö jobadönö labebö pjatatinemi baikwötjöma, kabatökönö ötjönö kabatiabinö, ju'wedö tjösödawö̧nö ösödö ju̧kwiabinadö. Ja̧danö, babebi ja̧danö. Baikwö yötawakwö Samuel, babe ökwönö tjöpöjödi̧ma, ba̧kwelöjatebö ötjönö öpöjödiatji̧danö, yemidanö tjöpöjödobe.

⁹ Jo̧kwajabetjö̧, atjebi̧ a̧ja̧kwö atjebi̧danö tjuluwo̧nö kwujuno. Jo̧kwaijayonö kwujunakwa̧ abönö, tjöwaisachibanö yöbawidönö, la'aka luwo̧ tjöpöjödi̧nö ja̧akwa̧ tjöwaisachibobö, baledakwa̧ waisachibajadö isabenö tjösödojobö jö̧ba̧lö, —atadö weinobe Isabenö Jo̧ma Samuelnö.

La'aka luwedö ja̧tjakwa̧ Samuel israel jojodönö yöawina jawa

¹⁰ Jejenö atadiökwe, Samuelma okobe jwiinö Isabenö Jo̧ yöawaja̧ israel jojodönö yöawinobe, inesö la'aka luwo̧nö ujunobö abebajadönöma.

¹¹ Baikwö yöawinobe Samuelma: —Inesö la'aka luwo̧ kwuluwo̧duwi ö̧jakwo̧ma, baikwö ja̧bö ö̧jakwa̧ yötawaduwakwö: Kwitji̧muduwi ömadönö emakobe, iteda ömöayedö batjibanö. Ja̧danö, jejenö emajo̧, kwitji̧mutjö ju'wedönö weakobe iteda ömöayedö ölakwabikwawa jojodö batjibanö, kolukanö ölakwabikwawadöbi, kabayunö wanö ölakwabikwawadöbi, kolukiya abönö ö'öbakwawö ölakwabikwawadöbi.

¹² Ja̧danö jobadö ölakwabikwawa jojodötjö, ju'wedönö omudawö ujunakobe, milbedö tjuluwedö batjibanö, ja̧danö ju'wedönö cincuentabedönö tjuluwedö batjibanö. Ja̧danö, ju'wibi, kwi̧tji̧muduwitjö ju'wedönö weakobe iteda öbatjo otidadö batjibanö tjö̧jobö, ju'wedö niji sobö tjotidobö, ja̧danö ju'wedö wa̧ji̧ emö tjotidobö. Ja̧danö ju'wibi kwi̧tji̧muduwitjö ju'wedönö weakobe, ölakwabikwawa jawa tjotidobö, ju'wedönö weakobe kwölöte'ijubi, 'böpöbiyabi, ju'wi ja̧ jaye jawabi tjotidobö, ja̧danö ju'wedönö kolukiya jawa tjotidobö weakobe kwuluwo̧duwi ö̧jakwo̧ma.

¹³ Ja̧danö, kwi̧tji̧mu ömadönö emi̧danö, kwi̧tji̧mu ya̧dönöbi emakobe, iteda ömöayedö batjibanö. Ju'wedönö weakobe omewi̧ jawa tjotidobö, ja̧danö kwakwawa totjobö, ja̧danö pan öpji̧ya wöbö tjotidobö.

¹⁴ Ja̧danö jemi tupakwöbi kwiteaduwi 'döbebö emakobe kwuluwo̧duwi ö̧jakwo̧ma. Kwöbatjijuduwitjö, inesö otiwayu 'döbebö, iteda ömöayedö ölakwabikwawa luwedönöbi, ju'wedö iteda ömöayedönöbi iyakobe, kwakwawa waji̧ batjijubi, uba waji̧ batjijubi, olivo towibiya jȩna batjijubi.

¹⁵ Ja̧danö, ju'wibi, kwiteaduwi batjo jawatjö 'döbebö, iteda ömöayedö ölakwabikwawa luwedönöbi ju'wedö ömöayedönöbi iyakobe, baikwö yötawa: domulataja jawatjö bakwöta jawa 'döbebö emakobe, kwakwawa batjo waji̧ jawatjöbi, uba batjo waji̧ jawatjöbi.

¹⁶ Ja̧danö, kwömöayedöduwitjö ömadönöbi ya̧dönöbi 'döbebö emakobe, iteda ömöayedö batjibanö, ja̧danö kwajwimuduwitjö inesö otiwadö pa̧ka̧yadönöbi, bu̧lö̧dönöbi do̧batö emakobe, iteda wei̧ tjotidobö.

¹⁷ Ja̧danö ju'wibi, okobe deinö kwajwimuduwitjö, domulataja luwatjö, bakwo̧nö emakobe, iteda a̧jwi̧mu batjibanö. Jau chömöledö, jejenö ja̧akwo̧ inesö la'aka luwo̧ kwuluwo̧duwi baibakwo̧ma, ja̧danö ökwödöma jo̧ba ömöayedö, midö tjemawö̧ 'diinö otidadödanö bakibaduwakwedöja, kwuluwo̧duwi labinö weawö̧ bakibaduwanö.

¹⁸ Jau chömöledö, jejenö ökwödönö weakobe kwuluwo̧duwi ö̧jakwo̧ ökwödöda omudawö kwujunaduwakwo̧ma, isabenö nöinö usula kwemawaduwinö weakobe, usula emawö kwubudekwaduwenanö baibanö. Ja̧danö, usula emawö, Isabenö Jo̧nö budekwö akebaduwakwedöja, pjaatobö. Jo̧kwaijayonö budekwö akebaduwijayonö a̧ja̧kwökakwo̧ Isabenö Jo̧ma, ja̧danö usula kwemawaduwi̧tjö kwö̧jibaduwinöma pjaatökakwo̧, —jö̧ba̧lö yöawinobe Samuelma, israel jojodö inesö la'aka tjuluwo̧nö ujunobö abebadönöma.

¹⁹ Jo̧kwaijayonö, jejenö jweinö inesö la'aka luwo̧ ja̧akwa̧ yöawijayonö, yebaiböma tjomukwatakwawinokobe, dujunoko jö̧ba̧löma. Samuel yöawi̧ tja̧ja̧kwobö tjöpöjödinobe israel jojodöma, ja̧danö baikwö tjatadinobe: —Jejenö baibitjö̧bi, yayonö inesö la'aka duluwo̧nö dösöda.

²⁰ Ökwödöma ju'wedö bö̧jȩ bakwemeachibanö tjitebökwena jojodö tjujuna̧li̧danö inesö la'aka duluwo̧nö dujuna̧lobö dösöda, jo̧ba duluwo̧da wene dujuna̧li̧ jwebebö yöawobö, ja̧danö döpöjojodökwö dölakwabikwawenama, jo̧bada ökwödönö öbibö ölakwabikwawobö, —jö̧ba̧lö tjatadinobe israel jojodöma.

²¹ Jejenö tjatadökwe, Samuelma okobe jwiinö yötja̧laja̧ yöawinobe Isabenö Jo̧nö,

²² ja̧danö yöawökwe, Isabenö Jo̧ma Samuelnö weinobe, —Atjebi̧ kwa̧ja̧kwo, atjebaja̧danö inesö la'aka tjuluwo̧nö baibanö kwujuno, —jö̧ba̧lö. Weökwe, Samuelma jojodönö yöawinobe, —Akebaduwaja̧danö kwuluwo̧duwinö omudawö chujunocha, —jö̧ba̧lö, ja̧danö okobe deinö tjitebokwena tjewa̧jobö weinobe.