1 Samuel 6 - Dios Iwene

Filisteo jojodö Dios iteapjo tjetjatina jawa

¹ Isabenö Jo̧ iteapjoma filisteo jojodö tjitebonö ji̧nobe jelemutjö̧ du̧ju̧taja ja̧wo̧dö baledibanö.

² Jemi ikenama, filisteo jojodöma o̧'wo jawa tjösödawönö ösödakwawa luwedönöbi, tupakwö baledakwa̧ yöbawadönöbi jwötjinobe, ko̧ko̧kwö yötja̧lakwawobö. Ja̧danö ko̧ko̧kwajadönö abebö tja̧ja̧kwinobe: —Bipjo Isabenö Jo̧ iteapjoma, dakwö ja̧dakwa̧da? Yemidanö japjo itebobe wedenama, dakwö ja̧bö wedakwa̧da, wene dujuna̧lakwawi söawoböma? —jö̧ba̧lö abebö tja̧ja̧kwinobe.

³ Abebö tja̧ja̧kwawö: —Jwiböma weköbaduwoko, itebobe tjekataduwenama, ju'wibi iyawa weköbaduwo, Dios öba a'otjö wene juna̧ladösa jö̧ba̧lö i̧sȩkwa iyawa. Ja̧danö, jejenö webö tjebatajadö, usula emawö kwö'wöchaduwi̧tjö kwö̧bibaduwitjö̧ma, isabenö öwaetjöda öwawena, babe usula kwemawaduwi̧ma isabenö Diostjöda ichi̧, —jö̧ba̧lö tjatadinobe.

⁴ Tjatadiawö̧: —¿Dios öba a'otjö wene juna̧ladösa jö̧ba̧lö i̧sekwi̧ iyawama, di̧ya wedakwa̧da? —jö̧ba̧lö, abebö tja̧ja̧kwawö: —Bakwamu jawa orotjö otikwa tutiyu o̧'wo jawabi, bakwamubedö orotjö otikwa ö'i duwo o̧'wo jawabi weköbaduwo. Ökwödö filisteo jojodötjö luwedöma bakwamu luwedö tjö̧jobetjö̧, o̧'wo jawa bakwamu jawa weköbaduwo. Jau, kwöwaisaduwa, ökwödö bakwamu jawa ditebokwena jojodöbi, ditebokwena luwedöbi, bakwainö ö'i du̧wö̧tjöbi, tutiyutjöbi usula emawadösa, ¿jö̧tö?

⁵ Jau, bakwainö ditebokwena ö'i du̧wo̧döma niji suli̧ tjöwaedobe, ja̧danö bakwainö ditebokwena jojodönö tutiyubiya saamawö̧ dö'wöchobe, ¿jö̧tö? Jo̧kwajabetjö̧ ja̧ usula kwemawaduwi̧ jawa o̧'wo jawa otidö kwiyaduwo, isabenö israel jojodö tjösödökwe Diosma juluwo̧ jö̧ba̧lö. Ja̧danö, jejenö Diosma juluwo̧ jö̧ba̧lö kwi̧sȩkwaduwitjö̧ma, ökwödönö lȩebi̧ma kaatibena, ja̧danö o̧'wo jawa dösödawö̧nö lȩebi̧ kaatibena, ja̧danö ditebo niji̧ suli̧ öwaedi̧ma kaatibena, isabenö Diosma juluwo̧ jö̧ba̧lö kwösödaduwobetjö̧.

⁶ Jau chömöledö, damötjö egipto niji jojodöbi, tjuluwo̧ faraonbi tjuu 'dibadö tjö̧jina kwomukwatadibaduwo. Jobadöma Dios wei̧, israel jojodö latjebobö webaduwi jö̧ba̧lö wei̧ tja̧ja̧kwobö tjöpöjödinobe, jo̧kwaijayonö yayonö bajalianö tja̧ja̧kwobö ji̧nobe. Jau, tjuu 'dibadö tjö̧jiökwe, Diosma jwiinö labinö lȩebinobe jobadönö, bajalianö tjowita jö̧ba̧lö israel jojodö latjebobö wetjenanö, ja̧danö israel jojodöma latjebinobe. Jobadö tjuu 'dibadö tjö̧jinadanöma kwö̧jaduwoko, Dios ajayinö lȩebi̧ edö, juluwanö Dios iteapjo tjekataduwo, tupakwönönö egipto jojodönö lȩebinadanö ökwödönöbi lȩebapji jö̧ba̧lö.

⁷ Baikwö yödawaduwakwö Dios iteapjo otiwanö tjekataduwakwa̧ma: Koluka yayaka kwotidaduwo, ja̧danö du̧ju̧taja pa̧ka̧yadö i̧yanö tji̧tji̧munö emajadönö kwemaduwo, la'akatjöda ju'wi jaye töawa wajwibadönö. Ja̧danö, ja̧ka yayaka tötjobö di̧bataduwidönö, jo̧kwaijayonö tji̧tji̧munö 'döbebö tjuluwo̧ ejube tjekataduwodönö.

⁸ Ja̧danö, Isabenö Jo̧ iteapjoma, kolukanö kwanaduwo, ja̧danö japjo ö'öbö, jelepjobi kwanaduwo, o̧'wo jawa kwotidaduwaja̧ a̧ja̧pjoma, isabenö Dios öba a'otjö wene juna̧ladösa jö̧ba̧lö tutiyubi, ö'i duwobi o̧'wo jawa kwotidaduwaja̧ma. Ja̧danö, jejenö otidajadö, pa̧ka̧yadö töbö latjebobö webaduwi,

⁹ ja̧danö otiwanö kweda̧laduwo, israel nijibe tötjojobö, tjitji̧mu tjö̧jobekwö tötjojobö jö̧ba̧lö. Jweinö 'ya̧nö, japjo itebobe, israel niji comunidad Bet-semesbe töbö tji̧'yitjö̧ma, jejenö tji̧sȩkwelöda kwöwaisachibaduwena, wene kwöbaledaduwi̧ma, isabenö Diostjöda ichi̧ jö̧ba̧lö. Jo̧kwaijayonö pa̧ka̧yadö jelobekwö töbö tji̧'yitjö̧ma, kwöwaisachibaduwena, ökwödönö baledi̧ma, Diostjö ichökö ji̧, a̧dekwanö baledi̧ jö̧ba̧lö, —wetjinobe tjösödawö̧nö ösödakwawa luwedöbi, tupakwö baledakwa̧ yöbawadöbi.

¹⁰ Weawö̧, wetjaja̧danö tjotidinobe, pa̧ka̧yadönö du̧ju̧tajanö do̧tjatinobe, tji̧tji̧munö ojwadönönöma. Ja̧danö tji̧tji̧mu okobe tjuluwo̧ ejunö tjö̧jibonö, koluka tötjobö di̧tjatinobe.

¹¹ Ja̧danö, Isabenö Jo̧ iteapjo kolukanö tjaninobe, ja̧danö japjo ö'öbö jelepjobi tjaninobe, orotjö otikwa ö'i du̧wo̧dö o̧'wo jawabi, tutiyu o̧'wo jawabi a̧ja̧pjoma.

¹² Jemi ikenama pa̧ka̧yadöma töbö latjebinobe, ja̧danö 'ya̧nö, jweinö manabenö Bet-semes comunidadbe tji̧'yinobe, ja̧danö tji̧'yonö, tji̧tji̧munö jwöbiyabö tji̧'yinobe. Ja'yubebi jalachibökönö, manatjö ja'yubebi labebökönö, jweinö Bet-semes comunidadbe tji̧'yinobe. Ja̧danö, tjö̧kömanö, filisteo jojodö la'aka luwedö eda̧liabö lutjinobe, Betsemes comunidad ö'öbö tjichibenanö kabatö.

¹³ Jejenö baledonö, Betsemes comunidad jojodöma trigo wa̧ji̧ emö tjotidonö baledinobe, ja̧danö tjotidemi ja'ötjö, möakwö pöbamö tjedemi, Dios iteapjo ichobe tjedinobe, ja̧danö edö, tjo̧'wo ösöwachibanö tjedinobe.

^14-15 Pa̧ka̧yadöma koluka tötjinobe, Betsemes jojodötjö bakwo̧ Josue mikwo̧ öbatjobema, ja̧danö batjo ö'wejenö inawa nöawa ö'öbönö tjö̧jamatinobe. Jejenö balediawö, jojodöma Diosnö tjösödinobe. Jobe ju̧kwadötjö Levisaso jojodö ömadöma, Dios iteapjo isapjobi, jelepjo orotjö otikwa o̧'wo jawa a̧ja̧pjobi meatö, inawa nöawanö tjöwaninobe, ja̧danö jojodöma koluka bulatö, pakaya̧dönö kwabö juwö okobe jwiinö ubinö tjiyinobe, Isabenö Jo̧nö ösödö. Ja̧ möle Betsemes jojodöma nöinö Diosnö ösödö tjiyinobe, kwabö juwö jwiinö ubinö iyawabi, ju'wi iyawabi, Isabenö Jo̧nö ösödö.

¹⁶ Ja̧ baledi̧ tjedinobe filisteo jojodötjö la'aka luwedö bakwamu luwedöma, ja̧danö, edajadö, i̧ya̧da möle Ecrón comunidadbe tjȩwa̧jinobe.

¹⁷ Filisteo jojodö Isabenö Jo̧nö tjiyina, kwöba a'otjö isabenö wene juna̧ladösa jö̧ba̧lö tjiyinama, baikwö laebobe. Tutiyu orotjö otikwa o̧'wo jawama, bakwamu jawa wetjinobe, Asdodtjö bakwayu, Gazatjö bakwayu, Ascalóntjö bakwayu, Gattjö bakwayu, Ecróntjö bakwayu.

¹⁸ Ja̧danö, tutiyu o̧'wo jawa tjiyi̧danö, tjitebokwena jojodöma orotjö otikwa ö'i duwo o̧'wo jawa bakwo̧kwena tjiyinobe. Filisteo jojodötjö la'aka luwedö tjö̧ba̧jȩkwidanö tjiyinobe, tjitebokwena ju̧kwadö 'diinö tjöekwi̧nö comunidad jojodöbi, tjöekwi̧ jwii̧ comunidad jojodöbi, tjitebokwena ö'i duwo o̧'wo jawa bakwo̧kwena tjiyinobe. Ja̧danö inawa, Betsemes jojo Josue öbatjonö ba̧wama, Dios iteapjo meatö tjujuninawama ina jobeda bo̧be, jojodö ja̧wa edö bi̧ya baledina tjomukwatobö.

Dios Betsemes jojodönö lȩebina jawa

¹⁹ Ja̧danö, ja̧ möle ju'wibi baledinobe, Betsemes jojodötjö ju'wedö Isabenö Jo̧ iteapjo edawökemi, weinökemi tjedinobe, ja̧danö jejenö tjediökwe, Diosma jobadönö setentabedönö kwabö loinobe. Jejenö lȩebiawö̧, jemi jojodö tjubudekwinobe, Isabenö Jo̧ma isabenö labinö ökwödönö lȩebajabe jö̧ba̧lö.

²⁰ Ikenama Betsemesnö ju̧kwadöma yebabinö yötja̧linobe, —Isabenö bakwo̧bi deobe, Isabenö Jo̧ , bite suli̧ jwibo̧ Dios öba a'o jo̧ma. Dai wedakwa̧da jo̧ba iteapjo isapjoma, ökwödö ditebonö jo̧bö jwiobe jö̧ba̧lö.

²¹ Ikenama Betsemes jojodöma ju'wedönö wetjinobe, ju'wi israel niji comunidad Quiriat-jearim mikwobe 'ya̧nö yötjawobö, —Filisteo jojodöma Isabenö Jo̧ iteapjo tjetjatajabeta, ichö kwemaduwo, —jö̧ba̧lö yötjawobö wetjinobe.