1 Samuel 5 - Dios Iwene

Filisteo jojodö Dios iteapjo isapjo tjujuna̧lina jawa

¹ Filisteo jojodöma Dios iteapjo israel jojodötjö 'dötjebinobe, Ebenezertjö israel jojodönö tjujuluwenama, ja̧danö 'döbebajadö, tjitebo comunidad Asdodbe tje'ewinobe.

² Ichibajadö, filisteo jojodö tjösödökwe o̧'wo jawa Dagon jö̧ba̧lö ötjabökwenö ösödakwawejunö tetjatinobe, ja̧danö Dios iteapjo Dagon ipjeanö tjujuninobe, dösödökwe Dagonma isabenö Diosnö ujuluwajabe jö̧ba̧lö.

³ Jemi ikena möle, ina yȩayi, Asdod comunidad jojodöma wilubö tjösödökwe Dagon ejube tji̧'yinobe, ja̧danö ichibö, tjöbajale jalaka baibanö tjösödökwe Dagon o̧'wo jawa tjöbadekwajinobe, öba nijakwö Isabenö Jo̧ iteapjo isapjö öba a'o mebajo̧nö. Jejenö badekwajadö, Dagonnö a̧la̧pedö ajayinö ö̧jinena tjujuninobe.

⁴ Jo̧kwaijayonö jemi ikena möle yȩayi wilutjenama, yemidanö Dagonnö tjöbadekwajinobe öba nijakwö bo̧nö, Isabenö Jo̧ iteapjo öba a'o mebajo̧nö, ja̧danö ju'wibi uubi, ömamijubi bulatakwajo̧nö tjöbadekwajinobe. Dagontjö, sule iteba'oda bulatakwawökönö tjedinobe, ja̧danö uubi, ömamijubi apjude a'o bi̧nobe.

⁵ Ja̧danö, ja̧ baledina omukwatö jemi ikena baikwö bajalenö, Dagonnö ösödakwawa luwedöbi, ju'wedö jojodöbi Dagon ejunö tetjachenama, apjude a'o ja̧tökönö sakakwibö tetjachobe, tjösödökwe uu binemi tjö̧jatapji jö̧ba̧lö.

⁶ Isabenö Jo̧ma isabenö jwiinö usula tjemawinö lȩebinobe Asdodnö ju̧kwadönöbi, jobe pjeanö ju̧kwadönöbi. Jwiinö yetjaibanö nöinö tutiyu saaminö weinobe, Asdod comunidadnö ju̧kwadönöbi, ö'öbönö ju̧kwadönöbi.

⁷ Ja̧ baledi̧ edö, Asdodnö ju̧kwadöma tjöwaisachibinobe, —Bi̧ya̧ ökwödönö baledi̧ma, Diostjöda ichi̧, —jö̧ba̧lö. Ja̧danö, waisachibö yötja̧linobe, —Israel jojodö tjösödökwe Dios iteapjo ditebonö jo̧bö jwiobe, iteda iteapjo ditebonö jo̧betjö, jwiinö lȩbebo̧ ökwödönöbi, dösödökwe o̧'wo jawa Dagon mikwo̧nöbi, —jö̧ba̧lö.

⁸ Jo̧kwajabetjö̧ wetjinobe okobe deinö filisteo jojodötjö la'aka luwedö tjo̧ko̧ko̧kwobö, ja̧danö ko̧ko̧kwajadönö abebö tja̧ja̧kwinobe, —Dakwö ja̧dakwa̧da Israel jojodö tjösödökwe Dios iteapjoma, dai wedakwa̧da? —jö̧balö̧. Abebö a̧ja̧kwawö̧, luwedöma tjatadinobe, —Gat comunidadbe tje'ewobö jo̧be jö̧ba̧lö. Jo̧kwajabetjö̧ Israel jojodö tjösödökwe Dios iteapjo tje'ewinobe Gatbe.

⁹ Jo̧kwaijayonö, Gatbe tjichejebaja̧ ikenama, Isabenö Jo̧ma jobadönöbi jwiinö usula tjemawinö lȩebinobe, jwiinö yetjaibanö. Ja̧ comunidad jojodötjö ömadönö nöinö tutuyubiya saaminö weinobe, damönöbi, ina möayedönöbi, usula tjemawinö.

¹⁰ Jejenö balediawö̧, Dios iteapjo wetjinobe Ecrón comunidadbe. Jo̧kwaijayonö, Dios iteapjo Ecrónbe ichibenama, Ecrón jojodöma juluwanö yebabinö jwötjeba̧linobe, —Ayö, Israel jojodö tjösödökwe Dios iteapjo tjichejebajabe, Diosma ökwödönöbi, dömöledönöbi kwabö loakobe jö̧ba̧lö, —yebabinö jwötjeba̧linobe Ecrón comunidad jojodöma.

^11-12 Isabenö Ecrón comunidad ba̧kwemeachibanö jojodö jwiinö yetjabinobe, Diosma isabenö jobadönö labinö lȩebobetjö̧. Jobe Ecrón comunidad jojodötjö, ba̧jȩkwadönö kwabö loinobe Diosma, ja̧danö ji̧bajadönö nöinö tutiyu saaminobe, jwiinö usula tjemawinö. Ja̧danö nöinö o̧'wo tjo̧achö yebabinö jwötjeba̧linobe tjösödawönö pjatjatobö. Jo̧kwajabetjö̧ filisteo jojodötjö la'aka luwedö tjo̧ko̧kokwobö wetjinobe Ecrón jojodöma, ja̧danö yötja̧linobe: —Israel jojodö tjösödökwe Dios iteapjo belö weköbaduwo, yemidanö jo̧ jö̧a̧lemi israel niji̧be ȩwa̧jobö weköbaduwo, ökwödönöbi dömöledönöbi kwabö loapji jö̧ba̧lö, —yötja̧linobe Ecrón jojodöma.