1 Samuel 4 - Dios Iwene

Filisteo jojodö Dios iteapjo isapjo 'döbebö tjemina jawa

¹ Ja̧danö, ju'wi mölȩ, israel jojodötjö ölakwabikwawa jojodöma filisteo jojodönö tjölakwabikwawobö tji̧'yinobe. Ja̧danö israel jojodöma Ebenezer mikwobe tjabakwa̧ löwötebiya otidö tjujuninobe, ja̧danö filisteo jojodöma jobe pjeanö Afec mikwobe tjabakwa̧ löwötebiya otidö tjujuninobe.

² Ja̧danö jobe janö, filisteo jojodötjö ölakwabikwawa jojodöma israel jojodötjö ölakwabikwawa jojodönö mebibö tjölakwabikwawinobe, ja̧danö tjölakwabikwawenama, israel jojodönö tjujuluwinobe, ja̧danö ölakwabikwawö israel jojodötjö ömadö cuatro mil jenanö kwabö lotjinobe.

³ Ja̧danö, jejenö balediawö̧, tjö̧jemi Ebenezerbe tjȩwa̧bijenama, israel jojodötjö luwedöma baikwö yötja̧lakwawinobe: —Tajawedö jejenö ökwödönö tjujuluwobö weajö Isabenö Jo̧ma, tajawedö filisteo jojodö ökwödönö tjujuluwobö weajö? —jö̧ba̧lö o̧'wo tjoachö yötja̧lakwawinobe. Ja̧danö, yöba̧lakwawö yötja̧linobe, —Baikwö ja̧do, filisteo jojodönö dujuluwobö, Silo comunidadnö jȩju Dios ejutjö, Isabenö Jo̧ weinapjo, Dios domulataja jawa weina a̧ja̧pjo ichejebö kwedato, ja̧danö jejenö kwedatitjöma Isabenö Jo̧ma dö̧'da̧de ja̧nö döpöjojodönö dujuluwobö weakwo̧, —jö̧ba̧lö.

⁴ Jejenö yöba̧lakwawajadö, Silo comunidadbe wetjinobe, tjichejebobö, ja̧danö wetjaja̧danö Dios weina a̧ja̧pjo, Isabenö Jo̧ okobe jwiinö juluwo̧ Dios, angeledö querubines mikwadö tjöwame inesö iteakanö bo̧ Dios iteapjo tje'ewinobe ölakwabikwawadö tjö̧jobekwö. Ja̧danö, Eli i̧tji̧mu du̧ju̧taja Ofni mikwo̧bi, Finees mikwo̧bi japjo isapjokwö tji̧'yinobe.

⁵ Ja̧danö, ja̧pjo Dios weina a̧ja̧pjo ichejebö ölakwabikwawadö tjö̧jobe tjichibenama, tjo̧'wo ösöwachibanö jwötjeba̧linobe israel jojodöma, jwiinö labinö jwötjeba̧linobe, niji̧bi tjö̧awenanö baibanö.

⁶ Ja̧danö, filisteo jojodöma israel jojodö jwötjeba̧li̧ ökwöobe tja̧ja̧kwinobe, ja̧danö a̧jakwö, abebö tja̧ja̧kwinobe, —Idö hebreo jojodö tjö̧jelö jwötjeba̧li̧ ökwöi̧ma, taji jö̧ba̧lö jwötjeba̧lobeda? —jö̧ba̧lö abebö tja̧ja̧kwinobe. Ja̧danö, abebö a̧ja̧kwajadö, tjöwaisachibinobe, —Aaa, Isabenö Jo̧ iteapjo babe tjö̧'da̧de jo̧betjö̧, tjo̧'wo ösöwachibanö jwötjeba̧lobe, —jö̧ba̧lö.

⁷ Ja̧danö, waisachibö, jwiinö yetjaibinobe filisteo jojodöma, —Ökwödöwe, tjuluwo̧ Dios tjö̧'da̧de ö̧jobetjö̧ ökwödöwe, —jö̧ba̧lö. Yebabinö yötja̧lakwawinobe, —Ökwödöwe, babe baledi̧danö la'akatjöda baledajiokobe ökwödönöma.

⁸ Ökwödöwe, isabenö juluwadö bidö israel jojodö tjo̧'wo tjöwawa̧lawö̧ma, dakwö dö̧jibobö. Bidö israel jojodö tjösödawö̧ma, idöda damötjö̧ Egipto jojodönö juluwi̧ jawa webinadö jojodö deobetjöma, ju'wi juluwi̧ jawabi, ju'wi juluwi̧ jawabi webö, Egipto jojodö jwiinö usula tjemawinö webinadö, —jö̧ba̧lö yebabinö yötja̧lakwawinobe.

⁹ Ja̧danö ölakwabikwawa jojodönö yötja̧linobe baikwö: —Isabenö kwujuluwachibaduwobö jo̧be, ömadö juluwadö yebaböködö tjö̧ji̧danö kwö̧jaduwobö jo̧be, 'diinö ja̧nö ölakwabikwawö kwö̧jaduwobö jo̧be, ökwödönö tjujuluwapji jö̧ba̧lö, ja̧danö israel jojodö tjömöayedö bakibaduwapji jö̧ba̧lö. Jau, ajayinö ökwödö dömöayedö tjö̧jinobe idö israel jojodöma, jo̧kwaijayonö 'diinö ja̧nö ölakwabikwawö kwö̧jaduwökötjö̧ma, ökwödöda jobadö tjömöayedö bakibaduwena, —jö̧ba̧lö wetjinobe filisteo jojodö ölakwabikwawa jojodönö.

¹⁰ Jejenö weawö̧, isabenö 'diinö ja̧nö tjölakwabikwawinobe filisteo jojodöma, ja̧danö israel jojodönö tjujuluwinobe. Isabenö ba̧jȩkwadönö kwabö lotjinobe filisteo jojodöma, israel jojodötjö ömadö treinta mil jenanö kwabö lotjinobe, ja̧danö israel jojodötjö ji̧bajadöma döbibajö tjejukwena tjȩwa̧ji̧nobe.

¹¹ Ja̧danö, ju'wibi Dios iteapjo do̧tjatinobe filisteo jojodöma, ja̧danö ju'wibi Eli i̧tji̧mu Ofninöbi, Fineesnöbi kwabö lotjinobe.

Eli ö'wö baibina jawa

¹² Ja̧danö, i̧ya̧da möle bakwo̧ israel jojo, Benjaminsaso jojoma, tjölakwabikwawelö Silobe döbibajö ö'öakwawinobe. Jo̧bama ö̧ka̧miji̧do̧ kȩekwö, uunö nijisjopja̧ wanawö, ichibinobe, isabenö o̧'wo tjo̧acho̧sa jö̧ba̧lö.

¹³ Ja̧danö, jobe ichibenama, Elima mana ö'öbö iteakanö wa̧nö iteada̧linobe, ja̧danö teada̧lö, omajade tjö̧bawö yebabinö iteada̧linobe, —Dios iteapjoma, dakwö baledobejö, —jö̧ba̧lö. Ja̧danö, jojo tjölakwabikwawelö ichajo̧ ichibö, comunidad jojodönö baledaja̧ yöawenama, okobe deinö comunidad ju̧kwadöma tjo̧'wo tjo̧achö jwötjeba̧linobe,

¹⁴ ja̧danö Elima jwötjeba̧li̧ ökwöobe a̧ja̧kwinobe. A̧ja̧kwö, Elima abebö a̧ja̧kwinobe, —I̧ya̧ ökwöi̧ma, tajida, —jö̧ba̧lö. Jejenö abebö a̧ja̧kwiökwe, yöbawö ichajo̧ma juluwanö Eli ö̧jobekwö i̧'yi̧nobe, Elinö yöawobö.

¹⁵ Ja̧ mölȩma Elima ida̧ökö jwiinö pöe ö̧jinobe, ida̧ökö noventaiocho o̧bia ujuna̧linobe Elima, ja̧danö ida̧ökö öbajale tjewawo̧ ö̧jinobe.

¹⁶ Ja̧danö Elinö yöbawö ichajo̧ma Elinö yöawinobe, —Ötjöma tjölakwabikwawelö ichajo̧sa, jobetjö döbibajo̧sa, —jö̧ba̧lö. Yöawökwe, Elima abebö a̧ja̧kwinobe, —Jau chitji̧, yöbawitjö, tjölakwabikwawaja̧ma dakwö baledaja̧da? —jö̧ba̧lö.

¹⁷ Abebö a̧ja̧kwökwe yöbawö ichajo̧ma atadö yöawinobe, —Filisteo jojodöma ba̧jȩkwadö ökwödö israel jojodönö kwabö lotjajabeta, ja̧danö tjöba a'otjö dödibajabeta, ja̧danö ju'wibi kwitji̧mu Ofnibi Fineesbi ö'wö batjibajabeta, ja̧danö ju'wibi, isapjo Dios iteapjo do̧tjatajabeta, —jö̧ba̧lö yöawinobe.

¹⁸ Elima jwiinö pöe ö̧jinobe, ja̧danö jwiinö o̧tewo̧ ö̧jinobe. Ja̧danö jejenö Dios iteapjo do̧tjatajabeta jö̧ba̧lö a̧ja̧kwenama, Elima o̧'wo tjo̧achö iteakatjö ökömakwö meinobe, ja̧danö mebö ulumea 'deawinobe, ja̧danö ö'wö baibinobe. Jwiinö pöe ö̧jobetjö̧, ja̧danö jwiinö ömöko̧obetjö̧, 'debawö ö'wö baibinobe. Ö'wö baibakwa̧ abönö, jo̧ba Elima cuarenta o̧biya baledibanö israel jojodönö jwebeba̧lö jina.

¹⁹ Ja̧ möle, ju'wibi baledinobe. Eli o̧jo̧li̧ju Finees ilekwoma, metu'wo jö̧jinobe, ja̧danö baledaja̧ wene, Dios iteapjo do̧tja̧taja̧ wenebi, jöjaba ö'wö baibaja̧ wenebi, jilekwe ö'wö baibaja̧ wenebi ja̧ja̧kwenama, jemakwa̧ nii̧ma juluwanö niatibinobe, ja̧danö juluwanö jitji̧nö jemibinobe.

²⁰ Emaju, ja'yubenö lekwajabetjö ö'wö bajibinobe Finees ilekwoma. Ja̧danö, ö'wö bajibakwa̧ abönö, jipjeanö ju̧kwadö ya̧döma jujuluwachibanö pjatjatotö jö̧ba̧lö yötjawinobe, —Yebabökönui, kwitji̧nö otiwanö kwemajabe, —jö̧ba̧lö, jo̧kwaijayonö jatadinokobe, ja̧danö ja̧ja̧kwobö jöpöjödinobe.

²¹ Ja̧danö, jitji̧nö jimidinobe Icabod jö̧ba̧lö, —Dios dejatinö ujuluma israel nijitjö tjo̧wi laebajabe, —jö̧ba̧lö. Dios iteapjo filisteo jojodö do̧tjataja̧ omukwatö, ja̧danö jöjaba ö'wö baibaja̧ omukwatö, ja̧danö jilekwe ö'wö baibaja̧ omukwatö, jejenö Icabod jö̧ba̧lö jitji̧nö jimidinobe.

²² Jobuju Eli o̧jo̧lijuma yöja̧linobe, —Dios iteapjo filisteo jojodö do̧tjatajabetjö̧, Dios dejatinö ujuluma tjo̧wi ditebo israeltjö laebajabe, —jö̧ba̧lö, ja̧danö yöba̧laju, ö'wö bajibinobe.