1 Samuel 31 - Dios Iwene

Saul ö'wö baibina jawa

¹ Baikwö laebobe Saul filisteo jojodökwö ölakwabikwawina wenema. Filisteo jojodöma israel jojodökwö ölakwabikwawö tjö̧jinobe mösa'o Guilboa mikwa'otjö. Ja̧danö, ölakwabikwawö, filisteo jojodöma israel jojodönö tjujuluwinobe, tjöba a'otjö israel jojodö dötjibajinö. Ja̧danö jobe Guilboa mösa'otjö, ba̧jȩkwadö israel jojodönö kwabö lotjinobe filisteo jojodöma.

² Ja̧danö israel jojodönö lubö, Saul i̧tji̧mukwö ölakwabikwawobe tjichibinobe, ja̧danö filisteo jojodöma Saul itji̧munö Jonatan mikwo̧nöbi, Abinadab mikwo̧nöbi, Malquisua mikwo̧nöbi jobetjö kwabö lotjinobe.

³ Ja̧danö Saul ö̧jobekwö yö̧ne ichibö labinö ölakwabikwawö tjö̧jinobe, ja̧danö 'böawa jojodöma Saulnö 'bötjinobe, ö'wöchenanö inia tjöinö.

⁴ Jejenö jamatekwajo̧, Saulma ömöayo̧ ölakwabikwawa jawa kwebato̧nö weinobe, —Kwölöte'o do̧batö, kwabö lobitjö, idö Diosnö öpöjödadö tjötade bajalesa̧do̧ 'wibekwöködö ötjönö, ina ya̧ba̧lo̧nö do̧tjatjapji jö̧ba̧lö, ja̧danö do̧batajadö, ötjönö tibatö alewö otjapji jö̧ba̧lö. —Weökwe, ömöayo̧ma öpöjödinobe, uluwo̧nö kwabö loobö yeabobetjö̧, jo̧kwajabetjö̧ jejenö öpöjödiökwe Saulma iteda kwölöte'o nijinö dobö junö, tibatakwawö lobö, nijinö meinobe.

⁵ Ja̧danö, jejenö ja̧iökwe, —Chuluwo̧ Saulma ö'wö baibajabe, —jö̧ba̧lö, Saul ömöayo̧bi itea kwölöte'onö tibatakwawö loinobe, uluwo̧ tibatakwawö loaja̧danö.

⁶ Jejenö bakwöta möle, Saulbi, i̧tji̧mu wamedukwabi, ömöayo̧ itea ölakwabikwawa jawa kwebato̧bi, ju'wedö jo̧bakwö ölakwabikwawadöbi okobe deinö i̧yada möle debö tji̧'yinobe.

⁷ Ja̧danö, wabeko tupakwöchobe ju̧kwadö israel jojodöbi, Jordad mikwödö tupakwö ju̧kwadöbi ja̧ wene tja̧ja̧kwinobe, —Guilboatjö dötjibajabe israel jojodöma, ja̧danö Saulbi, i̧tji̧mubi debö tji̧'yajabe, —jö̧ba̧lö. Ja̧danö, jejenö a̧ja̧kwö, tjitebokwena comunidadtjö döbibajö latjebinobe. Ja̧danö latjebaja̧ okobe, filisteo jojodöma ichibö, tjö̧jinemi comunidadnö tjö̧jinobe.

⁸ Ja̧danö, Saul ö'wö baibaja̧ ikena möle, filisteo jojodöma ichö, kwabö lotjinawö̧ tjitea emö kwetjachinobe, ja̧danö Saul iteba'obi, itji̧mu tjiteba'ijubi tjöbadekwajinobe jobe Guilboasa'onö.

⁹ Badekwajadö, Saul uu bulatö tjeminobe, ja̧danö itea ölakwabikwawa jawa tjeminobe. Ikenama, tjitebo ba̧kwemeachibanö yöbawadö kwebachö tjujuluwaja̧ wene yötjawobö wetjinobe, o̧'wo jawa tjösödawö̧nö ösödakwawejunö ju̧kwadönöbi, ju'wedö tjitebo ba̧kwemeachibanö jojodönöbi.

¹⁰ Ja̧danö Saul itea ölakwabikwawa jawama, o̧wo jawa tjösödoko Asterot ötjabokonö ösödakwaweju okwa tjujuninobe, dösödokoma Saulnö jujuluwajabe jö̧ba̧lö. Ja̧danö, ju'wibi Saul iteba'obi, i̧tji̧mu tjiteba'ijubi, Betsan comunidad tjöekweminö akwatö tjöninobe, tjujuluwaja̧ wene i̧sȩbö.

¹¹ Jejenö filisteo jojodö Saul iteba'o tjöekweminö akwatö tjöniawö̧, Galaad niji comunidad Jabes jojodöma a̧ja̧kwö tjöpöjödinobe, duluwo̧nö obö tjönajabe jö̧ba̧lö.

¹² Ja̧danö, öpöjödö, jobe ömadötjö juluwadö yebaböködöma, a̧la̧ibö yö̧te baledibanö Betsanbe tji̧'yinobe, ja̧danö Saul iteba'obi, i̧tji̧mu tjteba'ijubi tjöekwemitjö tjimeatinobe. Ikenama, meatajadö, e'ewö tjȩwa̧jinobe Jabesbe. Ja̧danö Jabes comunidadtjö tjiteba'iju juwö lotjinobe.

¹³ Ikenama juwajadö, tjiwe'iju emö, Jabes comunidadnö jo̧wi tamarisco towi teebe tjo̧tji̧nobe. Ja̧danö o̧tjajadö, tjuluwo̧ woina budekwö, jelemutjö̧ dötölataja möle tju̧kwa̧ ö̧töchö tjö̧jinobe.