1 Samuel 3 - Dios Iwene

Isabenö Jo̧ Samuelnö yöa̧lina jawa

¹ Ina tjemu ö̧jayi, Samuelma, Eli ömöayo̧danö ja̧nö Isabenö Jo̧ Dios wei̧ otidö ö̧jinobe. Ja̧danö, ja̧ mölȩma Isabenö Jo̧ma iteda yöawi̧ yöbawiainokobe nöinöma, ja̧danö jojodö tji̧'wi̧didanö tjedoböma webiainokobe nöinöma.

² Ja̧danö, ju'wibi Elima, ida̧ökö pöe waekwö, otiwanöma edinokobe, öbajalebiyama ida̧ökö öbalajale tjewawo̧ baibanö ö̧jinobe. Ja̧danö, ju'wi yö̧te, Eli ida̧ökö iteda abȩko̧nö abena, baikwö baledinobe:

³ Yö̧te, ina Dios eju jawa dejuwa'yu ina ubayi, Samuelma Isabenö Jo̧ ejunö ö̧binobe, isapjo Dios iteapjo jȩna.

⁴ Ja̧danö, Isabenö Jo̧ma Samuelnö jwöinobe, ja̧danö jwöökwe, —Tajida chuluwo̧, —jö̧ba̧lö,

⁵ Samuelma Eli ö̧bobekwö ö'öakwawinobe, ja̧danö ichibö Elinö yöa̧linobe, —Jwököbitjö̧ chichajabe, bai kwöba a'o chö̧ja, —jö̧ba̧lö. Yöa̧lökwe, Elima atadinobe, —Jwötokobe, kwabobö bamataji, —jö̧ba̧lö. Weökwe, Samuelma yemidanö abobö ȩwa̧bijö öbamatinobe.

⁶ Jemi ikenama, Isabenö Jo̧ma yemidanö jwöinobe, —Samuel, —jö̧ba̧lö. Jwöökwe, Samuelma yemidanö a̧la̧ibö Eli ö̧bobekwö 'ya̧wibö Elinö yöa̧linobe, —Ötjönö jwököbi̧tjö̧ bai kwöba a'o chö̧ja, —jö̧ba̧lö. Jo̧kwaijayonö, yöa̧lökwe Elima atadinobe, —Jwötokobe chitji̧, yemidanö kwabobö bamataji, —jö̧ba̧lö.

⁷ Jejenö baledenama, Samuelma ina Isabenö Jo̧ yöawi̧ ina wajwiinobe, jemi abönö iteda yöawi̧ Samuelnö la'akatjöda yöawinokobetjö̧ Isabenö Jo̧ma.

⁸ Ja̧danö, Isabenö Jo̧ma yemidanö Samuelnö jwöinobe, wapötakwanö baibanö. Ja̧danö Samuelma yemidanö a̧la̧ibö Eli ö̧bobekwö 'ya̧wibö Elinö yöa̧linobe, —Ötjönö jwököbi̧tjö bai kwöba a'o chö̧ja, —jö̧ba̧lö. Jejenö yemidanö ichibiökwe, Elima öwaisachibinobe, —Samuelnö jwöbo̧ma, Isabenö Jo̧da, —jö̧ba̧lö.

⁹ Jo̧kwajabetjö̧ waisachibajo̧, Elima Samuelnö weinobe, —Da̧ji̧, yemidanö bamataji, ja̧danö yemidanö ökwönö jwöitjö̧ma, baikwö kwatado: Chuluwo̧ Isabenö Jo̧, ötjöma kwömöayo̧sa, yöbawitjö, isabenö cha̧ja̧kwa̧lobe, —jö̧ba̧lö. Jejenö weökwe, Samuelma ȩwa̧bijö, yemidanö abȩko̧nö öbamatinobe.

¹⁰ Ikenama Isabenö Jo̧ yemidanö ichö janö Samuelnö jwöinobe ajayinö jwöaja̧danö, —Samuel, Samuel, —jö̧ba̧lö. Jwöökwe, Samuelma atadinobe, —Chuluwo̧, ötjöma kwömöayo̧sa, yöbawitjö isabenö cha̧ja̧kwa̧lobe, —jö̧ba̧lö.

¹¹ Atadökwe Isabenö Jo̧ma Samuelnö yöawinobe baikwö: —Isabenö yötawakwö, ja'yubenö lekwajabetjö bemi israel nijinö labi̧ jawa chi̧sebakwo̧sa, chi̧sebakwa̧ wene a̧ja̧kwadöma yebabinö tjö̧bawadö batjibanö, isabenö yetjaibi̧ jawa chi̧sebakwo̧sa.

¹² Ja̧ chi̧sebakwa̧ mölȩ badekwachenama, isabenö Elinöbi, ömöledönöbi lȩtebocha, ja'yubebi junibökönö okobe jwiinö yötawinadanö badekwachinö.

¹³ Jo̧ba Eli i̧tji̧muma isabenö sulabenö ja̧bö tjö̧jinobe, isabenö jwiinö sulabenö ötjö Diosnö yötja̧linobe, ja̧danö sulabenö ja̧tji̧ öwaisijayonö, katjatiboböma weinokobe Elima. Ja̧danö jejenö katjatibobö weinokobetjö̧, jo̧banö yötawijatö, ja'yubenö lekwajabetjö jo̧banöbi ömöledönöbi lȩtebakwo̧sa̧, la'akatjöda 'dö̧ibajökö lȩekwa baibanö jö̧ba̧lö.

¹⁴ Jau Samuel, jejenö sulabenö ja̧tji̧tjö, jo̧banö yöbawö chujunajabe, Eli ömöledö sulabenö ja̧tji̧ma, la'akatjöda söbebö loawa jwiakobe jö̧ba̧lö, kwabö juwö tjiyitjö̧böbi, ju'wi iyawa tjiyitjö̧böbi la'akatjöda tjusula söbebö loawa jwiakobe ba̧kwelöjatebö, —jö̧ba̧lö yöawinobe Isabenö Jo̧ma Samuelnö.

¹⁵ Jemi ikenama, Samuelma camapjonö ö̧binobe dewachenanö baibanö, ja̧danö dewachenama, ba̧kwelöjatebö po̧bebajiadanö, Isabenö Jo̧ eju apjude po̧ebinobe. Jo̧kwaijayonö Samuelma Elinö Dios i̧'wi̧didanö yöawa̧ja̧ yöawobö öpöjödinobe, yeabobetjö̧.

¹⁶ Jo̧kwaijayonö, Elima Samuelnö jwöinobe, —Chitji̧ Samuel, —jö̧ba̧lö. Jwöökwe, —Tajida chuluwo̧, bai kwöba a'o chö̧ja, —jö̧ba̧lö atadinobe Samuelma.

¹⁷ Atadökwe Elima Samuelnö abebö a̧ja̧kwinobe, —Dios ökwönö yöawaja̧ma di̧yada? Ja'yubebi tojö junökönö, okobe jwiinö yöbawitjö, Dios yöawaja̧ jawatjö ja'yubebi junibö yökawitjö̧ma, isabenö Dios ökwönö lȩebobö ja̧kobe, —jö̧ba̧lö.

¹⁸ Weökwe, Samuelma okobe jwiinö Dios yöawaja̧ yöawinobe Elinö, ja'yubebi tojö junökönö. Jadanö yöawökwe, Elima atadinobe, —Jau, jo̧bama duluwo̧ Isabenö Jo̧, iteda omukwatö ujuni̧danö ja̧obö jo̧be, —jö̧ba̧lö.

¹⁹ Ja̧danö, jemi tupakwö Samuelma otiwanö ö̧da̧peachinobe, ja̧danö Isabenö Jo̧ma isabenö Samuelkwö ö̧jinobe. Ja̧danö Diosma isabenö pjaatinobe, okobe jwiinö Samuel yöawi̧danö badekwachinö baledobö, Samuel tupakwö baledakwa̧ jawa yöawi̧ma.

²⁰ Jejenö balediawö̧, israel niji̧ ba̧kwemeachibanö, okobe deinö israel jojodöma isabenö Samuelnö tjöwaisachibinobe, —Isabenö Samuelma Isabenö Jo̧ yöawi̧ yöbawo̧, —jö̧ba̧lö.

²¹ Ja̧danö jemi tupakwöbi jobe Silo comunidadnö Isabenö Jo̧ma Samuelnö öwawachiainobe, ja̧danö iteda yöawi̧ Samuelnö yöbawiainobe, ja̧danö Dios yöawaja̧ma, Samuelma tupakwö okobe deinö israel jojodönö yöbawiainobe.