1 Samuel 29 - Dios Iwene

Filisteo jojodö David ichobö tjöpöjödina jawa

¹ Filisteo jojodöma Afec mikwobe tjo̧ko̧kokwinobe, ja̧danö israel jojodöma Jezrel comunidad ojwese'do yöneawinö tjo̧ko̧kokwinobe.

² Ja̧danö, filisteo la'aka luwedöma, tjömöayedönö 'da̧batö tjujuninobe, ölakwabikwawö tjö̧jakwa̧sokwena, jeleso cienbedö, jeleso milbedö jenanö. Ja̧danö, Davidbi, ömöayedöbi ju'wedö tjökömanö la'aka luwo̧ Aquiskwö kwetjachinobe.

³ Ja̧danö, jobadönö edö, ju'wedö filisteo ölakwabikwawa la'aka luwedöma abebö tja̧ja̧kwinobe, —Idö hebreo jojodöma, tajawedö ökwödökwö ölakwabikwawö kwetjachobeda? —jö̧ba̧lö. Abebö tja̧ja̧kwökwe, Aquisma atadinobe, —Bite tjuluwo̧ma David mikwo̧, ajayinö israel la'aka luwo̧ Saul ömöayo̧ ji̧na. Jo̧bama lekwe ötjökwö ö̧jajabe, bakwaba bajalekwönönö lekwe chömöayo̧ ö̧jajabe. Saul ö̧jelö döibajinemi baikwöma, ba̧kwelöjatebö otiwanö weti̧ otidö ö̧jajabe. Jo̧bama chömöayo̧ otiwo̧obetjö̧ ökwödökwö ichobe, —jö̧ba̧lö atadinobe.

⁴ Atadawö̧, tjölabinobe filisteo ölakwabikwawa luwedöma, ȩwa̧jobö webinö jö̧ba̧lö. Aquisnö yötja̧linobe, —Ȩwa̧jobö webinö, kwiyinemi nijibe ȩwa̧jobö. Ökwödöma wedökö, jo̧ba ökwödökwö ölakwabikwawö ichoböma, israel jojodökwö dölakwabikwawemi ja'ötjö jalachibö, döpöjojo baibanö ökwödönö ölakwabikwawapji jö̧ba̧lö. Jau, babe Saulkwö wene ujuna̧lobe Davidma, jo̧kwaijayonö ja̧ wene söbebö lobö yemidanö Saulkwö baibobö ösödena, –Aaa, Saul öpöjojodönö kwabö lotitjö̧ma yemidanö Saul ömöledöso̧ batibena, –jö̧ba̧lö. Jejenö omukwatitjö̧ma, ökwödönö pjaato jö̧a̧lijayonö, Davidma ökwödönöda kwabawö lobö Saulnöda pjaatena.

⁵ Kwo̧'wo jwikibaji̧ bite Davidnö lo̧tjinama? –Saulma otiwanö ba̧jȩkwadö döpöjojodönö milbedönö kwabö loajabe, ja̧danö Davidma otiwanö döpöjojodönö diez milbedönö kwabö loajabe, –jö̧ba̧lö lo̧tji̧nökwema bite Davidda. Jo̧kwajabetjö̧ wedökö, ökwödökwö kweachoböma, jalachibö ökwödönöda kwabö loapji jö̧ba̧lö, —yötjawinobe Aquisnö.

⁶ Jejenö yötja̧liökwe, Aquisma Davidnö jwöbö yöawinobe, ȩwa̧jobö. Davidnö yöawinobe baikwö, —David, isabenö chömöayo̧ otiwo̧ kwö̧jajabe, Isabenö Jo̧ yaba̧lo̧ ö̧ji̧ wene ji̧danö isabenö yötawakwö, ötjökwö kwichobö chösöda, bakobe ötjökwö ja̧nö döpöjojodönö ölakwabikwawö dö̧jobö. Isabenö la'akatjöda chö̧jobekwö kwichinemi baikwöma ja'yubebi chöba a'otjö wene kwujuna̧li̧ma cha̧ja̧kwokobe, ja̧danö kwichobö chösöda. Jo̧kwaijayonö ju'wedö filisteo jojodö la'aka luwedöma tjöpöjöda, –David ichobö wedökö, –jö̧ba̧lö.

⁷ Jo̧kwajabetjö̧, babe wene jwiinö kwȩwa̧jo, ju'wedö filisteo luwedö tjöpöjödi̧nö ja̧dapji jö̧ba̧lö, —yöa̧linobe Aquisma.

⁸ Yöa̧lökwe, Davidma atadinobe, —Tajawedö chichobö jwiobeda? Taji sulabenö ja̧taja̧da? Ökwö kwömöayo̧ batibinemitjö baikwö bajalenö di̧ya kwa̧ja̧kwinada, Davidnö cho̧'wo chöwana̧loko jö̧ba̧lö kwomukwatobö? Chuluwo̧ la'aka luwo̧, ökwö kwöpöjojodönö ölakwabikwawö chö̧jobö jö̧ta̧la, isabenö kwömöayo̧ otiwo̧sa, —jö̧ba̧lö atadinobe Davidma.

⁹ Atadökwe, Aquisma yöa̧linobe, —Ötjöma chöwaisa, isabenö chöba a'otjö wene jwibo̧ja jö̧ba̧lö, Dios weökwe angelso̧danö, wene jwibo̧ja. Jo̧kwaijayonö, jejenö chöwaisijayonö, ju'wedö filisteo luwedöma wainö omukwatadö, ja̧danö jobadöma yötja̧lajabe, –Davidma ökwödökwö ölakwabikwawöma ichö̧kö̧, –jö̧ba̧lö.

¹⁰ Jo̧kwajabetjö̧, itekwai yȩayi a̧la̧ibö, ju'wedö chömöayedö ökwökwö ichinadökwö kwȩwa̧jo, dewachibena kwȩwa̧jaduwo, —jö̧ba̧lö weinobe Aquisma.

¹¹ Jo̧kwajabetjö̧, Davidbi, ömöayedöbi yȩayi latjebinobe, filisteo jojodö tjitebobe tjȩwa̧jobö, ja̧danö filisteo ölakwabikwawa jojodöma, israel niji Jezrelbe tji̧'yinobe.