1 Samuel 28 - Dios Iwene

¹ Jemi ikenama, ja'yubenö lekwajabetjö, filisteo jojodö tjuluwedöma, tjömöayedö ölakwabikwawa jojodökwö tjo̧ko̧kokwinobe, israel jojodökwö ölakwabikwawö tji̧'yobö. Ja̧danö, Aquisma Davidnö yöa̧linobe, —David, kwöwaisa, ökwöma chömöayo̧ kwö̧jobetjö̧, isabenö ökwöbi, kwömöayedöbi ju'wedö chömöayedö ölakwabikwawa jojodökwö kwichaduwobö ja̧kobe, —jö̧ba̧lö.

² Yöa̧lökwe, Davidma atadinobe, —Jau otiwa chuluwo̧, ökwökwö ölakwabikwawö dichakobe, ja̧danö isabenö otiwanö ölakwabikwawa jojodö dö̧ji̧ma bajalianö kwedakobe, —jö̧ba̧lö. Atadökwe, Aquis yöa̧linobe, —Otiwa, ökwönö chujunocha, ötjö la'aka luwo̧nö inesö tjöbeba̧lö teada̧lakwawa jojo bakibanö, ba̧kwelöjatebö ötjönö teada̧lö tjökeba̧lobö, —jö̧ba̧lö yöa̧linobe Aquisma Davidnö.

Saul mea boawa jojosujunö abebö a̧ja̧kwina jawa

³ Ja̧ mölema, tupakwö baledakwa̧ yöbawo̧ deinobe, Saul abebö a̧ja̧kwobö. Dios weinadanö, Saulma okobe deinö mea bobadönö israel nijitjö a'dewö loinobe, Dios öpöjödi̧nö ja̧badö jö̧ba̧lö, wobinadönö yöba̧ladö ötjabawö̧nöbi, tupakwö baledakwa̧ yöbawadö ötjabawö̧nöbi, Dios weinadanö a'dewö. Ja̧danö ju'wibi, ajayinö Saul otiwanö abebö a̧ja̧kwinökwe Dios yöawi̧ yöbawo̧ Samuel mikwo̧ma, ö'wö baibinobe, ja̧danö okobe deinö israel jojodöma ko̧ko̧kwö, Samuel itebo Ramanö tjo̧tjinobe Samuelnö. Jo̧kwajabetjö̧, Samuelnöbi abebö a̧ja̧kwobö jwiinobe, ida̧ökö ö'wö baibinobetjö̧.

⁴ Ja̧danö, ja̧ baledaja̧ okobe, filisteo jojodöma ko̧ko̧kwö tjichinobe, ja̧danö Sunem comunidadtjö tjabemi tjujuninobe. Ja̧danö, Saulma okobe deinö israel jojodötjö ölakwabikwawa jojodönö ko̧ko̧dö, filisteo tjö̧jemi badeibö Gilboatjö tjabemi tjujuninobe.

⁵ Ja̧danö, Saul filisteo jojodönö edenama, jwiinö yeabinobe, omajade tjö̧awinö yeabinobe.

⁶ Ja̧danö yebabinö ja̧nö, Saulma Diosnö abebö a̧ja̧kwinobe, otiwanö filisteo jojodönö ölakwabikwawö ö̧jakwa̧ öwaisobö, jo̧kwaijayonö atadinokobe Diosma. Saul i̧'wi̧dinöbi atadinokobe, ja̧danö Diostjö jojodötjö tjö'da̧de pjabatadö inawiya tjikwonöbi atadinokobe, ja̧danö Dios yöawi̧ yöbawadötjöbi atadinokobe.

⁷ Jejenö Dios atadiökökwe, Saulma iteda ömöayedönö weinobe, —Bakwuju wobinadönö yöba̧lujunö kwisakwaduwo, jobujunö abebö cha̧ja̧kwakobetjö̧, —jö̧balö. Weawö, ömöayedöma yötjawinobe, —Endor comunidadtjö bakwuju jö̧jobe, wobinadönö yöba̧lujuma, —jö̧ba̧lö.

⁸ Yötjawökwe, Saulma jeledo̧ 'duawinobe, jo̧banö tjöwaisapji jö̧ba̧lö, ja̧danö 'dubawajo̧, jo̧babi, ömöayedö du̧ju̧tajabi yö̧te jobuju jejube tji̧'yinobe. Ichibajadö, Saul yöa̧linobe, —Atebakwö, bakwo̧ wobina o̧'wo luwo̧nö jwököbobö, jwököbakwo̧ imi yötawocha, jwököbobö, —jö̧ba̧lö.

⁹ Yöa̧loko, jatadinobe, —Ötjönö kwabö loköbotö jö̧ba̧lö 'daliwa kwujunobeji̧? Kwöwaisa, bai israel nijitjö wobinadönö yöba̧ladöma deobe, la'aka luwo̧ Saulma okobe deinö wobinadönö yöba̧ladönöbi, ju'wedö mea bobadönöbi kwabawö a'dewö loajabe ditebotjöma. Jo̧kwajabetjö̧ tajawedö 'daliwa kwujunotö jö̧ba̧lö wobinanö jwötobö akebobeda? —jö̧ba̧lö.

¹⁰ Ajebökwe, Saulma yöbawö junö atadinobe: —Isabenö yötawakwö, atebaja̧danö wobinanö jwököbitjö̧ma, la'akatjöda lȩtjebökakwujuja. Jobekwö isabenö yötawakwö, ja̧danö omöna yöta̧litjö̧ma Isabenö Jo̧ ötjönö lȩebobö ja̧kobe —jö̧ba̧lö.

¹¹ Yöa̧loko, abebö ja̧ja̧kwinobe, —Wobinadötjö tinö wiludö jwötakwa̧da? —jö̧ba̧lö. Ajebökwe, —Samuelnö jwöbi, —jö̧ba̧lö.

¹² Weioko, Samuelnö jwöjinobe. Ikenama jwöbaju, Samuelnö jedenama, yebabinö labinö jwöjeba̧linobe, —Ayö, ötjöwe! Ökwöma Saulja, tajawedö ökwönö chöwaisapji jö̧ba̧lö wainö 'dukawaja̧da? Ökwöma Saulja, ötjöwe debö chi̧'yakuwujusa, —jö̧ba̧lö yebabinö jwöjeba̧linobe.

¹³ Jwöjeba̧liökwe, —Yebabökönuwi, yebabökönö kwedi̧ yöbawitjö, —jö̧ba̧lö yöa̧linobe Saulma. Yöa̧loko, jatadinobe, —Bakwo̧nö diosdanö ichejekwo̧nö chedobe, nijitjö a̧la̧ibo̧nö, —jö̧ba̧lö.

¹⁴ Jatadökwe, —Dakwö ichejekwo̧? —jö̧ba̧lö aeboko, —Pöema a̧la̧ibö öwawachobe, wamesa̧do̧ ödöado̧ jwabawo̧ma, —jö̧ba̧lö yöjawinobe. Yöjawökwe, Saulma öwaisachibinobe, isabenö Samuelda jö̧ba̧lö, ja̧danö öba nijakwö, bȩachibinobe.

¹⁵ Ikenama, Samuelma Saulnö yöa̧linobe, —Tajawedö sulabenö wiludö chöwawachobö weköbaja̧da? —jö̧ba̧lö. Abebö a̧ja̧kwökwe, Saulma atadinobe, —Jwiinö cho̧'wo tjo̧bekwö chö̧jobetjö̧, ökwönö jwötajabe. Filisteo jojodöma ötjönö ölakwabikwawö tjichajabe, ja̧danö Diosma abebö cha̧ja̧kwi̧ma atadö̧kö̧, chi̧'wi̧dinöbi, yöawi̧ yöbawadönötjö̧bi atadö̧kö̧. Jo̧kwaitjö̧, ökwönö jwötajabe, otiwanö ja̧takwa̧ yökawobö, —jöba̧lö.

¹⁶ Atadökwe, Samuel yöa̧linobe: —Isabenö Jo̧ma ökwönö a̧ja̧kwö̧kö̧ baibanö, kwöpöjojo ö̧jobe. Jo̧kwajabetjö̧, Dios kwöpöjojo ö̧jobema, tajawedö ötjö Dios ömöayo̧nö akebobö?

¹⁷ Isabenö ökwönö baledi̧ma, damötjö̧ Isabenö Jo̧ yötawobö weinadanö badekwachobe. Babe baledi̧ma, ökwönö yötawinadanö badekwachobe, Isabenö Jo̧ma la'aka luwo̧ kwö̧ji̧ma ökwötjö 'döbebö, jelo̧ israel jojonö iyajabe, Davidnö.

¹⁸ Jau Saul, kwöwaisa, damötjö Isabenö Jo̧ma amalecita jojodönö jwiinö ödameakwinobe, ja̧danö ökwönö weinobe, jobadönö bakwo̧bi ö̧ji̧bökönö kwabawö loköbobö, ¿jö̧tö? Jo̧kwaijayonö Isabenö Jo̧ ökwönö weina a̧ja̧kwökönö, jobadönö Dios inesö ödameakwi̧ lȩbebökönö ja̧köbinobe, jo̧kwajabetjö̧ babe baledi̧ ökwönö baledobö weajabe.

¹⁹ Ja̧danö, ju'wibi yötawakwö Saul, Isabenö Jo̧ma ökwönöbi, ju'wedö israel jojodönöbi filisteo jojodö tjujuluwobö weakobe itekwayima, ja̧danö itekwayi ökwöbi, kwi̧tji̧mu ömadöbi, ö'wö babibö ötjökwö kwö̧jaduwakwedöja. Isabenö Jo̧ma isabenö weakobe, filisteo jojodöma kwömöayedö israel ölakwabikwawa jojodönö tjujuluwobö, —jö̧ba̧lö yöawinobe Samuelma Saulnö.

²⁰ Jejenö yöawiökwe, Saulma jwiinö yeabinobe, ja̧danö yebabinö öba nijakwö nijinö meinobe. Ja̧ mölebi, yö̧tebi ja'yubebi kwakwawa ukwinokobe, ime'dawachibanö, ja̧danö ujulu jwibö öba nijakwö meinobe Saulma.

²¹ Jejenö meioko, jojosujuma Saul ö̧jobekwö ichibö jedinobe, jwiinö yeabobe jö̧ba̧lö. Ja̧danö, Saulnö yöja̧linobe: —Chuluwo̧, ötjö kwömöayujuma akebaja̧ cha̧ja̧kwajabe, akebaja̧ isabenö woawa labijayonö yayonö cha̧ja̧kwajabe.

²² Jo̧kwajabetjö̧, babe ötjö weti̧bi kwa̧ja̧kwobö atebakwö, Kwakwawa otidö, ökwönö chiyobö webitjö, kwȩwa̧bijenama juluwachibajo̧ otiwanö kwȩwa̧bijobö, —jö̧ba̧lö.

²³ Yöja̧liökwe, Saul öpöjödinobe, —Kwakwawa chukwökö, —jö̧ba̧lö. Jo̧kwaijayonö, ömöayedöbi, jojosujubi, —Kwukwobö jo̧be, —jö̧ba̧lö pjabatö yötja̧liökwe, a̧ja̧kwinobe. Ja̧danö nijinö ö̧bobetjö a̧la̧ibö, kamapjonö öbamatinobe.

²⁴ Jojosujuma jajwi pakaya itji̧ o̧tewo̧nö jujuna̧linobe, tupakwö chukwakwo̧ jö̧ba̧lö jukwejebinökwema, jo̧kwajabetjö̧ juluwanö jajwinö kwabö tojinobe, ja̧danö harinaso̧pja̧ emö, juluwanö pansa'be otidö ye'yeachi̧ jwiinö wöjinobe.

²⁵ Ikenama ja̧ kwakwawa otidaju, Saul öba a'obi, ömöayedö tjöba a'obi kwakwawa jujuninobe, tjukwobö. Ja̧danö, jiyaja̧ kwajadö, a̧la̧ibö latjebinobe ja̧ yö̧te.