1 Samuel 27 - Dios Iwene

David filisteo jojodö tjitebobe 'döibajina jawa

¹ Ikenama, suli̧ chöwaedoböma chisakwökakwo̧sa jö̧ba̧lö Saul yöa̧lijayonö, Davidma omukwatinobe itedada: —Isabenö yemidanö isakwö ichakwo̧ Saulma, ja̧danö belö latebökötjö̧ma, ju'wi möle Saulma ötjönö kwabö loena. Jo̧kwajabetjö̧ bai israel nijinö chö̧jobö jwiobetjö̧, filisteo jojodö tjitebobe chi̧'yobö otiwena, jobadö tjitebonö chö̧jobö. Jejenö latebobetjö̧, israel nijitjö detiökwe, Saulma ötjönö isakwö kaatakwawena, ja̧danö jo̧batjö chö̧jibena, —jö̧ba̧lö omukwatinobe Davidma.

² Ikenama, jejenö omukwatajo̧, Davidbi, ömöayedö seiscientosbedö ömadöbi, israel nijitjö labebö, filisteo jojodö tjitebobe tji̧'yinobe. Gat comunidad la'aka luwo̧nö edö tji̧'yinobe, Maoc itji̧ Aquis mikwo̧nö, jo̧bakwö tjö̧jobö.

³ Ja̧danö, jemi tupakwö Davidma filisteo jojodötjö la'aka luwo̧ Aquis mikwo̧kwö ö̧jinobe Gat comunidadtjö, Davidbi, ilekwamu jezreel jojosuju Ahinoambi, Nabal wobö ujunibinoko Carmel jojosuju Abigailbi. Ja̧danö David ömöayedöbi, tjömöledökwena jobe Gatnö tjö̧jinobe.

⁴ Ja̧danö, jejenö baledajabema, ju'wedö yötjawinobe Saulnö, Davidma Gatbe döbibajö i̧'yajabe jö̧ba̧lö, ja̧danö jejenö yötjawiökwe, Davidnö isakwi̧ kaatibinobe Saulma.

⁵ Ikenama, ju'wi möle Davidma Aquisnö aebinobe: —Chuluwo̧, ötjöma kwömöayo̧sa, jo̧kwajabetjö̧ ötjöbi chömöayedöbi la'aka luwo̧ ö̧jemi comunidadnö kwöba a'o dö̧jobö jwibadösa. Jo̧kwajabetjö̧, isabenö ötjönö kwösöditjö̧ma, baikwö atebakwö: ja'yuwemi niji kwiyobö atebakwö, jobe ditebo baibanö dö̧jobö, —jö̧ba̧lö.

⁶ Aebökwe, Aquisma ösödinobe, ja̧danö Siclag ötjabobe Davidnö iyinobe, itebo baibanö. Ja̧danö, jejenö iyinobetjö̧, ja̧ möletjö baikwö bajalenö ja̧ Siclag comunidadma, Juda niji la'aka luwedö tjitea comunidad jo̧be.

⁷ Ja̧danö, Davidma ja'yubenö lekwe jobe filisteo jojodö tjitebonö ö̧jinobe, o̧ba bakwaba, ja̧wo̧dö ö'wejemubedö baibanö.

⁸ Baikwö laebobe David jobe filisteo jojodö tjitebonö ö̧jina wene. Jobe tjö̧jonö, Davidma ömöayedönö öbibö, ju'wedö israel jojodö tjöpöjojodönö ölakwabikwawö, tjitea emö 'yi̧a̧inobe, gesurita jojodönöbi, gezritas jojodönöbi, amalecitas jojodönöbi, israel jojodö tjichibakwa̧ abönö ja̧ nijinö jinadönöma. Jobe David ölakwabikwawö yi̧nemima, Telam comunidadtjö a̧likwö Shur niji baibanö, ja̧danö egipto niji badeibö baibanö.

⁹ Ja̧danö, David ölakwabikwawö i̧'yenama, baikwö ja̧inobe: Ju'wedönö mebibö ujuluwenama, okobe deinö jojodönö kwabawö loinobe, ömadönöbi, ya̧dönöbi, ja̧danö kwabawö lobajo̧, tjiteaja̧ma eminobe, kamiji̧do̧bi, tja̧jwi̧mu obejadönöbi, pa̧ka̧yadönöbi, bu̧lö̧dönöbi, kameyodönöbi. Ikenama, emö kabatajo̧, Aquis ö̧jobekwö ȩwa̧jiyainobe.

¹⁰ Ja̧danö, ȩwa̧jiökwe, —Detjö kwabawö emö kwȩwa̧jada, — jö̧ba̧lö Aquis abebö a̧ja̧kwenama, omöna yöba̧lö atadiainobe. Ju'wikwenama, —Juda niji̧ a̧likwöobetjö israel jojodönö kwabawö chȩwa̧jabe, —jö̧ba̧lö, ju'wikwenama, —Jerameel nijitjö kwabawö chȩwa̧jabe, —jö̧ba̧lö, ja̧danö ju'wikwenama, —Ceneo jojodönö kwabawö chȩwa̧jabe, —jö̧ba̧lö omöna yöba̧liainobe Davidma.

¹¹ Ja̧danö, jejenö Aquisnö omöna yöa̧lobö omukwatobetjö̧, Davidma kwabawö i̧'yenama, bakwo̧bi ö̧ji̧bökönö kwabawö loinobe. Omukwatinobe, chujuluwajawö̧tjö ji̧bajadö tjö̧jitjö̧ma, ju'winö baikwö Gatbe ichibö Aquisnö yötjawena, —Kwitebonö ö̧jonö, Davidma itebo israel jojodönö kwabawö lobökönö, ökwödönöda kwabawö loajabe, —jö̧ba̧lö. Ja̧danö isabenö kwabö loawö̧nö Aquis öwaisachibapji jö̧ba̧lö, ji̧badö deinö kwabawö loinobe Davidma.

¹² Jo̧kwajabetjö̧, David omöna yöa̧liökwe, Aquisma David yöa̧li̧ ösödinobe, —Isabenö Davidma iteda ömöledö Israel jojodönö kwabawö lobö, tjöpöjödökwe baibanö ja̧ajabe, —jö̧ba̧lö. Jo̧kwajabetjö̧, —Isabenö ba̧kwelöjatebö ötjöda chömöayo̧ ö̧jakobe, —jö̧ba̧lö omukwatinobe Aquisma.