1 Samuel 26 - Dios Iwene

David yemidanö Saulnö kwabö lobökönö ö̧jibinö pjaatina jawa

¹ Ikenama, Zif niji jojodötjö ju'wedö Saul ö̧jobekwö Guibeabe 'ya̧nö, yötjawinobe, —Davidma mösa'o Haquila ötjaba'onö u̧ju̧kwawobe, Jesimon comunidad badeibösa'onö, —jö̧ba̧lö.

² Yötjawökwe, Saulma a̧la̧ibö, ömöayedö ölakwabikwawa jojodö tres milbedö omudawö ujunajawö̧nö öbibö, jojodö deobe Zif nijibe i̧'yinobe, Davidnö isakwobö.

³ Jobe ichibajadö, Saulbi, ömöayedöbi tjabakwemi baibanö Haquila mösa'otjö löwötebiya tjujuninobe, mana pjeanö, Jesimon comunidadtjö jawo̧ ichobekwö. Jobe tjö̧jonö, Davidma ömöayedökwö jojodö deobe ö̧jinobe. Ja̧danö, —Saulma ökwönö isakwö ichajabe, —jö̧ba̧lö yötjawökwe,

⁴ Davidma ömöayedötjö ju'wedönö weinobe, Saul kweachi̧tenia edö kwetjachobö. Ja̧danö, edö kwebachajadö̧, tjebachajö yötjawinobe, —Isabenö ichajabe, yada abakwemi ujunajabe, —jö̧ba̧lö.

⁵ Yötjawökwe, ja̧ yö̧te Davidma a̧la̧ibö i̧'yinobe Saul abemi yöneawinö, ja̧danö ödökwönönö ja̧nö, Saulnöbi, ömöayo̧ ölakwabikwawa luwo̧ Abnernöbi nijinö tjabobe edinobe. Ju'wedö ölakwabikwawa jojodö tjö̧'da̧de tjabekwobe edinobe.

⁶ Edajo̧, Davidma ömöayo̧ heteo jojo Ahimelecnöbi, Sarvia jitji̧ Joab öjawo̧ Abisai mikwo̧nöbi yöa̧linobe, —Ökwödötjö diteda ötjökwö Saul abobe yutubajö i̧'yakwo̧ma? —jö̧ba̧lö. Aebökwe, Abisaima atadinobe, —Ötjöma ökwökwö yutubajö chi̧'yocha, —jö̧ba̧lö.

⁷ Ikenama, jejenö yutubajö, Davidbi Abisaibi yö̧te ja'ö tjichibinobe Saul ömöaeyedökwö abobe. Ja̧danö ichibö tjedinobe, Saul ömöayedö tjösawibö tjabonö, Saulma tjö̧'da̧denö abo̧nö tjedinobe. Ja̧danö uu ö'öbönö, Saul itea tokwöte nijinö tibatö junawöte tjedinobe. Ja̧danö, Abnerbi, ju'wedö Saul ömöayedöbi tjösawibö tjabobe tjedinobe.

⁸ Jejenö edajo̧, Abisaima Davidnö yöa̧linobe, —Isabenö Diosma otiwanö pjaatajabe, kwöpöjojonö kwujuluwobö. Atebakwö, Saulnö kwabö lotobö webitjö. Ötjöma jo̧ba nijinö bo̧nö tokwötenö tibatö kwabö lotitjöma, sule bakwötanöda titatena, jenada niji̧nö ba̧nö titatökwe ö'wö baibenanö. Isabenö dötölatajanö titatobö jwiakobe, bakwötanö titatena ö'wö baibakobe, —jö̧ba̧lö.

⁹ Yöa̧lökwe, —Jo̧banö kwabö loköba, jo̧bama Isabenö Jo̧ Diosda omudawö ujuninökwe. Kwedemi bakwo̧ Dios omudawö ujuninökwenö kwabö loi̧tjö̧ma, Dios öba a'otjö wene jwienaji̧? Ja̧maökö, Diosda omudawö ujuninökweobetjö̧, jo̧banö kwabö lobo̧nöma Dios lȩebakwo̧.

^10-11 Isabenö yötawakwö, Isabenö Jo̧ yaba̧lo̧ ö̧ji̧ wene ji̧danö, baikwö isabenö yötawakwö, la'akatjöda Dios omudawö ujuninökwenö suli̧ chöwaedobö jwiakobe. Isabenö Jo̧ ösöditjö̧ma, jo̧bada Saulnö lȩbebö kwabö loena, ja̧danö pöe waekwö ö'wö baibena, ja̧danö öpöjojodökwö ölakwabikwawö debö i̧'yena. Jo̧kwaijayonö, la'akatjöda ötjö jo̧banö suli̧ chöwaedobö jwiakobe, Saulma Diosda omudawö ujuninökweobetjö̧. Jo̧banö kwabö lobökönö, baikwö ja̧do, Saul uu ö'öbö jö̧te otokwöte demo, ja̧danö itea ojwiyosa̧pja̧bi demo, ja̧danö emajadö dȩwa̧jo, —jö̧ba̧lö yöa̧linobe Davidma ömöayo̧ Abisainö.

¹² Ja̧danö, yöba̧lajo̧, Saul otokwötebi, ojwiyosa̧pja̧bi emibö, latjebinobe. Ja̧danö, jejenö baledonö, Saul ömöayedö wajwitjinobe. Bakwo̧bi edinokobe, ja̧danö bakwo̧bi wiluinokobe, okobe deinö aböda tjabinobe. Jejenö tjabi̧ma, Isabenö Jo̧da weinobe, bö̧ti̧söinö tjabobö.

¹³ Ikenama, Davidbi Abisaibi labebö, tupakwö badeibö jele'o mösa'onö ja̧nö tji̧'yinobe, Saul ö̧jelö ödö ja̧nö.

¹⁴ Ja̧danö, ödö ja̧nö, Davidma Saul ömöayedönö jwöinobe, tjuluwo̧ Abner mikwo̧nö jwöinobe. —Abner, kwa̧ja̧kwiji̧? Kwatadakwa̧ji̧? —jö̧ba̧lö jwöinobe. Jwöökwe, —Tiköba, la'aka luwo̧ Saulnö wiludö jwöbeba̧lo̧ma, tiköba, —jö̧ba̧lö atadinobe Abnerma.

¹⁵ Atadökwe, Davidma yöa̧linobe, —Ökwöma israel jojodötjö inesö juluwo̧ jö̧ba̧lö ötjabökweja, ¿jö̧tö? Israel nijitjö bakwo̧bi ökwödanöjo̧ma deobe, ¿jö̧tö? Jo̧kwajabetjö̧ tajawedö kwuluwo̧ Saulnö tjökeba̧lokobeda? Bakwo̧ ichibö, kwuluwo̧nö kwabö lootö jö̧ba̧lö ichijayonö, tjöbeba̧lökönö kwö̧jajabe.

¹⁶ Isabenö Jo̧ ö̧ji̧ wene isabenö ji̧danö isabenö yötawakwö, Jejenö sula Abner, isabenö ökwönöbi, okobe deinö ju'wedö kwömöayedönöbi kwabö lotjobö jo̧be, kwuluwo̧duwinö tjöbeba̧lökönö kwö̧jaduwobetjö̧. Jau, ökwödönö inesö weawama, Kwuluwo̧duwi Isabenö Jo̧ omudawö ujuninökwenö tjöbeba̧lö kwiteada̧lobö, jo̧kwaijayonö tjöbeba̧löma jö̧ködöja. Edaduwi, kwuluwo̧duwi itea tokwötebi, ojwiyosa̧pja̧bi, daida? Ajayinö ja̧aja̧danö uu ö'öbönö jo̧beji̧? Jwiobe, sulabenö kwiteada̧laduwobe, —jö̧ba̧lö yöa̧linobe Davidma.

¹⁷ Yöa̧liökwe, Saulma David iwene öwaisachibinobe, ja̧danö abebö a̧ja̧kwinobe, —Chitji̧ David, ökwöda kwiwene ökwöobeji̧? —Aebökwe, —Jau chuluwo̧, ötjöda chiwene ökwöobe, —jö̧ba̧lö atadinobe Davidma.

¹⁸ Ja̧danö tupakwö abebö a̧ja̧kwinobe Davidma: —Chuluwo̧, tajawedö ötjö kwömöayo̧nö luka̧lobeda? Taji sulabenö ja̧tinada? Isabenö sulabenö ja̧taji̧?

¹⁹ Chuluwo̧, ötjönö kwa̧ja̧kwobö atebakwö, ötjö kwömöayo̧ yöta̧li̧ kwa̧ja̧kwobö ateba. Isabenö Jo̧ Diosda ötjönö kwöpöjödobö weatjö̧ma, jo̧banö iyawa chiyobö jȩna, ötjönö ödameakwi̧ kaatakwawobö. Jo̧kwaijayonö jojodöda ötjönö kwölabobö ja̧tjatjö̧ma, Isabenö Jo̧ jobadönö lȩebobö jo̧be. Jau, ötjönö kwölabobö ja̧badöma sulabenö ötjönö a'dewö lotjobe, Duluwo̧ Isabenö Jo̧ iyinemi nijitjöma, ja̧danö ötjönö wetjobe, –Isabenö Jo̧nö ösödökönö, ju'wedö tjösödawö̧nöda ösödö kwö̧jo,–jö̧ba̧lö.

²⁰ Chuluwo̧ Saul, Isabenö Jo̧ Diosnö ösödakwawemi nijima ditebo israel nijida, ¿jö̧tö? Jo̧kwajabetjö̧ ökwönö ateba, ditebotjö a'dewö lobökönuwitjö, ötjöma Dios öba a'otjö 'da̧bachibö, ödö ja̧nö, jo̧banö öpöjödadö tjitebonö ja̧nö ö'wö batiboböma chöpöjöda. Isabenö mikwawö̧kö̧sa chuluwo̧, ötjönö isakwö luka̧loböma. Wanedö yötawa, ötjöma tjö̧biyadanö mikwawö̧kö̧ chö̧jijayonö, jojodö tjukwobö tjösödökwe pjiyuwanö mösa'otjö lekwe isakwö lutja̧lidanö, ötjönö luka̧lobe, —jö̧ba̧lö yöa̧linobe Davidma.

²¹ Yöa̧lökwe, Saulma atadinobe, —Isabenö sulabenö ja̧tajabe. Babe otiwanö ditebobe kwȩwa̧jobe jo̧be, tupakwö ökwönö suli̧ chöwaedoböma chisakwökakwo̧sa. Jau chitji̧ David, ötjönö kwabö loköbobö ji̧jayonö, ötjönö ösödö, Saulma ö̧jobö mikwawo̧ jö̧ba̧lö chö̧jibinö ja̧köbajabe. Isabenö omukwatökönö, sulabenö ja̧tajabe David, —jö̧ba̧lö.

²² Yöa̧lökwe, Davidma atadinobe, —Chuluwo̧, kwotokwötema bai chujuna̧lobe, kwömöayedötjö bakwo̧nö weköbo, ichö emobö.

²³ Isabenö Jo̧ma isabenö otiwanö pjabato̧, otiwanö ja̧bö ju̧kwadö, jwaikwöda Dios ösödi̧danö ja̧bö ju̧kwadönö. Ja̧tji̧ edö, balekwa mikwa otiwanö iyö pjabato̧. Jau chuluwo̧, babe möle Diosma ökwönö iyajabe, chösöditjö̧ma ökwönö chujuluwobö, jo̧kwaijayonö ökwönö suli̧ chöwaedobö chöpöjödatö, Isabenö Jo̧ omudawö ujuninökwenö suli̧ waedö̧kö̧sa jö̧ba̧lö.

²⁴ Ja̧danö, ökwönö mikwawo̧ jö̧ba̧lö chomukwati̧danö, bakwainö Isabenö Jo̧ ötjönö omukwatobö chösöda. Ötjöma ökwönö kwabö lotobö chujuluwijayonö, –Saulma isabenö mikwawo̧, kwabö lotoko, –jö̧ta̧latö, ja̧danö Isabenö Jo̧ jejenö ötjönö omukwatobö chösöda, ja̧danö usula emawö chö̧ji̧tjö chö̧jibinö pjaatobö chösöda, —jö̧a̧linobe Davidma.

²⁵ Yöa̧lökwe, Saulma Davidnö yöa̧linobe, —Isabenö Jo̧ ökwönö pjaatobö ateba chitji̧ David, isabenö waekwökönö nöinö otiwanö ja̧köbakwo̧ja, —jö̧ba̧lö. Ikenama Davidma ömöayedö tjö̧jobekwö ȩwa̧jinobe, ja̧danö Saulma ejube ȩwa̧jinobe.