1 Samuel 25 - Dios Iwene

Samuel ö'wö baibina jawa

¹ Jemi ikenama, ja'yubenö lekwajabetjö, Samuelma ö'wö baibinobe. Ja̧danö, ö'wö baibiawö̧, israel niji ba̧kwemeachibanö jojodö ko̧ko̧kwö, Samuelnö tjubudekwinobe. Ja̧danö Samuel eju Ramatjö jo̧banö tjo̧tji̧nobe. Jemi ikenama, Davidma ömöayedökwö jelobe ja̧nö i̧'yinobe jojodö deobe Paran nijibe, Maon comunidad pjeanö.

Nabal Davidnö sulabenö ja̧ina wene

² Ja̧danö jobe Maon comunidadnö bakwo̧ ö̧jinobe, yöne comunidad Carmeltjö niji junalo̧. Jo̧bama nöinö juna̧lo̧ ö̧jinobe, a̧jwi̧munö ba̧jȩkwadönö ujuna̧linobe, obejadötjö tres mil jenanö, ja̧danö chivodötjö mil jenanö. Ja̧danö, ja̧ möle jo̧bama ömöayedökwö a̧jwi̧mu obejadö tjöwö'ye 'wibö otidö ö̧jinobe, Carmel comunidadtjö.

³ Jo̧ba imima Nabal jö̧ba̧lö imikwinobe, ja̧danö ajayinö ji̧na Caleb mikwo̧ itji̧ tupadanö jojo. Ja̧danö Nabal ilekwoma Abigail jö̧ba̧lö mikwinuju. Ja̧danö Nabal ilekwoma isabenö otiwuju, ja̧danö waisanö omukwatö ja̧bö ju̧ju, jo̧kwaijayonö Nabalma jojodönö labina, ja̧danö sulabenö ja̧bö ji̧na.

⁴ Ja̧danö, jobe jojodö deobe ja̧nö, Davidma a̧ja̧kwinobe, Nabalma ajwimu tjöwö'ye Carmeltjö 'wibö otido̧, jö̧ba̧lö.

⁵ Jejenö a̧ja̧kwö Davidma öwaisinobe, ja̧ 'wiawa ba'ali tjukwena, jö̧ba̧lö, jo̧kwajabetjö̧, Davidma iteda ömöayedötjö domulatajabedönö weinobe, Carmelbe 'ya̧nö, Nabalnö yötja̧lobö, baikwö: —Jobe Nabal ö̧jobe ichibö, Davidma dokwa aebobe ökwönö, jö̧ba̧lö yökawaduwo Nabalnö.

⁶ Ja̧danö Dokwa jö̧ba̧lö abebajadö, yöta̧laja̧ jo̧banö yökawaduwo baikwö: –Davidma iteda yöa̧laja̧ yödawobö weajabe, baikwö: Otiwanö wene jwiinö kwö̧jobö chösöda, ja̧danö okobe deinö kwömöledö otiwanö tjö̧jobö chösöda, ja̧danö okobe deinö kwujuna̧lawö̧bi otiwanö tjö̧jobö chösöda.

⁷ Ötjö Davidma cha̧ja̧kwajabe, babe kwa̧jwi̧mu obejadö tjöwö'ye 'wibö kwotidobe kwömöayedökwö jö̧ba̧lö. Ja̧danö, baikwö isabenö yötawakwö, belö kwömöayedö obejadönö teada̧ladöma dö̧'da̧de ja̧nö otiwanö wene jwiinö tjö̧jinobe. Jobadönö suli̧ waedökönö, otiwanö jobadönö diteada̧lijatö, tjiteada̧lonö ja'yubebi kwa̧jwi̧mu deapji jö̧ba̧lö, dö̧'da̧de Carmeltjö tjö̧jayima.

⁸ Kwömöayedönö abebö kwa̧ja̧kwitjö̧ma, yöta̧laja̧danö tjatadakwedö, isabenö otiwanö jobadönö teada̧lö pjadatina wenema. Jo̧kwajabetjö̧, babe ba'ali möle baibobetjö̧, bidö chömöayedönö dösölö̧jinö edö pjakatobö atebakwö. Ba'ali kwukwaduwonö, u̧'yukwaja̧ ökwödönö kwiyobö ateba, kwömöaeyedönö pjabatinadö ötjö Davidbi, ju'wedö chömöayedöbi otiwanö dukwobö, —jö̧ba̧lö Nabalnö yötja̧lobö weinobe Davidma.

⁹ Weawö̧, Nabal ö̧jobekwö ichibö David weaja̧ yötjawinobe Nabalnö, ja̧danö yöbawajadö, tjiteada̧linobe, dakwö atadojobö jö̧ba̧lö.

¹⁰ Yötja̧lökwe, Nabalma atadinobe: —Jo̧ba Davidma tida, jo̧banö chiyobö? Jo̧ba Isai itji̧ma, luwo̧sa jö̧ba̧lö omukwatö chiyobö aebobeji̧? Ditebotjö ba̧jȩkwadö tjömöayedö tjuju̧kwobe, tjuluwedö wetji̧ öpöjödö, tjuluwo̧nö kabatibö sulabenö döbibajadöma, ja̧danö chedemi Davidma jobadöja̧yo̧ ö̧jena.

¹¹ Akebaduwaja̧ma, chu̧kwa panbi, ojwiobi, kwataja̧ itebiyabi ötjöda chömöayedö obejadö tjöwö'ye 'wibö otidadö tjukwobö jo̧be. Kwedaduwemi ja̧ ökwödö wajwitawö̧nö chiyenaji̧? Ökwödöma wajwitawö̧ja, wajwitobetjö ichajadöja, chiyökö ökwödönö, —jö̧ba̧lö atadinobe.

¹² Atadawö̧, David ömöayedöma jalachibö David ö̧jobekwö tjȩwa̧jinobe, ja̧danö okobe jwiinö yöa̧laja̧ yötjawinobe.

¹³ Yötja̧lökwe, ödameakwinobe Davidma, ja̧danö okobe deinö ömöayedönö weinobe, —Okobe deinö kwitea kwölöte'oduwima koleasö̧jenö nönaduwi, jo̧ba Nabalnö kwabö lodajo, —jö̧ba̧lö. Ja̧danö Davidbi iteda itea kwölöte'o koleasö̧jenö önawinobe. Ikenama, ömadö doscientobedö okobe tjitea teada̧lö tjö̧jibonö, ju'wedö cuatrocientobedö jenanö Davidkwö tji̧'yinobe Nabal ö̧jobekwö.

¹⁴ Jejenö baledonö, Nabal ömöayedötjö bakwo̧, Nabal yöa̧laja̧ a̧ja̧kwajo̧ma, Nabal ilekwo Abigail mikwujunö yöbawö i̧'yinobe. Ichibö, yöawinobe: —Chuluwuju, isabenö wene baibajabe. Davidma iteda ömöayedönö weinobe, duluwo̧ Nabalnö dokwa jö̧ba̧lö atjebobö, jo̧kwaijayonö jo̧bama sule jwöbeba̧löda sulabenö atadatö.

¹⁵ Jo̧kwaijayonö Davidbi ömöayedöbi isabenö otiwanö dösölö̧jinö ja̧bö tjö̧jinobe ökwödökwö. Jobadökwö dö̧jayi, otiwanö wene jwiinö kwedachijatö, ja̧danö jobadökwö dö̧jonö, bakwo̧bi ökwödönö suli̧ öwaedinokobe, ja̧danö ja'yubebi tjönaukwinokobe dujuna̧linama.

¹⁶ Isabenö ökwödönö suli̧ waedökönö, ju'wedöbi ökwödönö sulabenö ja̧tjapji jö̧ba̧lö ökwödönö tjöbeba̧lö tjö̧jinobe. Wanedö yötawa, isabenö 'diinö tjöekwi̧danö tjöbeba̧lö tjö̧jinobe, mölebi yö̧tebi, okobe jwiinö jobadökwö ja̧nö obejadönö teada̧lö dö̧jinama jejenö ji̧nobe.

¹⁷ Ja̧ wene kwöwaisobö jo̧be chuluwuju, ja̧danö otiwanö ja̧köbakwa̧ omukwatö kwujuno. Isabenö chuluwo̧ kwilekwe sulabenö ja̧ajabetjö̧, wene baibakobe. Chöwaisa, isabenö chuluwo̧nöbi, okobe deinö ömöledönöbi suli̧ tjöwaedobö ja̧kobe. Jo̧kwaijayonö, jejenö chöwaisijayonö, chuluwo̧nö lȩbebö yötawobö jwiobe, jo̧ba kwilekwema isabenö mikwawö̧kö̧ sulabo̧obetjö̧, ja̧danö jo̧banö pjabatö yötja̧li̧ma a̧ja̧kwö̧kö̧, —jö̧ba̧lö yöa̧linobe.

¹⁸ Jejenö yöa̧lioko, Abigailma juluwanö Davidnö jiyakwa̧ jo̧ko̧kodinobe. Docientos pan ö̧pji̧yabi, ubasobu o̧'dobusa'wiju do'wolatajabi, bakwamubedö obejadö tjitebia ida̧ökö söawa itebiabi, bakwamu litro jenanö trigo balawabi, cien ochiju uba köködakwawabi, doscientos higotjö dalö isa'wo baibanö tjotidinabi jo̧ko̧ko̧dinobe, ja̧danö ko̧ko̧daju, ja̧jwi̧mu bu̧lö̧ tjoma'anö jöwaninobe.

¹⁹ Ikenama, wanaju, jömöayedönö wejinobe, —Juluwanö, bidönö öbibö David ö̧jobekwö 'ya̧duwi, ja̧danö ötjöma juluwanö ökömanö chicha —jö̧ba̧lö. Jobekwö ja̧jinobe Abigailma, jo̧kwaijayonö jilekwe Nabalnö yöbawökönö jejenö ja̧jinobe.

²⁰ Ja̧danö, jajwi bulonö wanö, Abigailma David ö̧jobekwö ji̧'yinobe, mösa'iju 'da̧de ömöayedökwö ö̧jobe. Ja̧danö, mösa'o yutubajö, David ö̧jobekwö jichonö, ajayinö Abigailnö edinokobe Davidma, mana öwawokobetjö̧. Ikenama, juluwanö Davidbi, ömöayedöbi jö̧jobekwö tjichonö tjöba a'o jichibinobe.

²¹ Jobuju jichobe tjöbadekwajakwa̧ abönö, Davidma omukwatö yöa̧linobe, —Isabenö ite Nabal itea chiteada̧lina, jojodö deobe ja̧nö chiteada̧linama ja'yubebi mikwawinokobe. Otiwanö ja'yubebi iteatjö jwiapji jö̧ba̧lö otiwanö chiteada̧lijatö, otiwanö jo̧banö pjabatö. Jo̧kwaijayonö jo̧banö bakwainö otiwanöda pjatatijayonö, balekwa mikwa otiwanöma pjabatö̧kö̧. Otiwanö pjatatiökwe, Nabal otiwa jawa tjeato jö̧a̧laja̧ma, tjebatökönö su̧li̧da tjeatajabe.

²² Isabenö jo̧ba Nabalnöbi, okobe deinö ömöledönöbi kwabö lotobö jo̧be. Itekwayi yȩayi jo̧ba ömöledötjöbi, ömöayedötjöbi i̧so̧ bakwo̧bi ina yaba̧lo̧ ö̧jitjö̧ma, isabenö Dios ötjönö lȩebobö jȩna, —jö̧ba̧lö omukwatö yöa̧linobe Davidma, Abigailnö edakwa̧ abönö.

²³ Ja̧danö, Davidnö jedenama, Abigailma juluwanö jajwitjö mebibö, David ö̧jobekwö 'ya̧wibö, öba a'o nijakwö bȩjachibinobe, kwömöayujusa jö̧ba̧lö.

²⁴ David öba a'o nijakwö mebö, Davidnö yöja̧linobe: —Chuluwo̧, chilekwe wene ujuna̧li̧ma, ötjönöda baledobö jo̧be. Atebakwö, ötjö kwömöayuju yöta̧lonö kwa̧ja̧kwobö.

²⁵ Atebakwö, mikwawö̧kö̧ Nabal yöa̧laja̧ kwomukwatokobö chuluwo̧. Jo̧ba imi Nabal jö̧ba̧löma waisanö omukwatö̧kö̧ jö̧ba̧lö laebobe, ja̧danö imi laebi̧danö isabenö waisanö omukwatö̧kö̧. Jo̧kwaijayonö ötjöma kwömöayujusa, ja̧danö ökwö chuluwo̧ weköbajawö kwömöayedönö chedökötö, otiwanö akebaja̧danö chiyobö.

²⁶ Jau chuluwo̧, baikwö isabenö yötawakwö, Isabenö Jo̧ ö̧ji̧ wenebi, ökwö kwö̧ji̧ wenebi isabenö wene, ja̧danö ja̧ isabenö ji̧danö yötawakwö, Diosda isabenö tjöbeba̧lö pjaatajabe, ökwöda balekwa mikwa ökwönö sulabenö ja̧badönö kwabö loköbapji jö̧ba̧lö. Jau chuluwo̧, jejenö ja̧köbatjö̧ma, sulabenö ja̧böködönöbi kwabawö loköbo jö̧ka̧lajena, ja̧danö jejenö kwabö lobajo̧, wene juna̧lo̧ bakibajena. Jo̧kwaijayonö Diosma otiwanö pjaatajabe, jejenö baledapji jö̧ba̧lö. Jau chuluwo̧ isabenö Diosda balekwa mikwa lȩebakwo̧ Nabalnöma, baikwö wanedö yötawa, okobe deinö kwöpöjojodöbi, ökwönö suli̧ baledobö ösödadöbi Nabaldanö batjibitjö̧ma, isabenö kwöpöjojojodö deinö kwö̧jena, jo̧ba Nabalma isabenö Dios lȩebakwo̧obetjö̧.

²⁷ Jau chuluwo̧, ötjöma bi̧ya ökwönö chiyobö chichejebajabe, ökwöbi kwömöayedöbi kwujuna̧laduwobö, jo̧kwajabetjö̧ chiyi̧ kwemaduwobö atebakwö.

²⁸ Ja̧danö kwöba a'otjö wene chujuna̧li̧ omukwatökönö söbebö loköbobö atebakwö chuluwo̧. Jau chuluwo̧, chöwaisakwö, ökwöma Isabenö Jo̧ wei̧ otidö, jo̧ba öpöjojojodönö ölakwabikwawö jo̧ja jö̧ba̧lö, ja̧danö ju'wibi chöwaisa, jejenö wei̧danö ölakwabikwawö kwö̧jiökwe, Isabenö Jo̧ma isabenö ökwönöbi, kitji̧mu tupadanö jojodönöbi ujunakobe, inesö la'aka luwedö kwö̧jaduwinö. Ja̧danö chöwaisa chuluwo̧, Dios ökwönö pjaatobetjö̧, ina kwö̧jayi bakwo̧bi ökwönö suli̧ öwaedobö jwiakobe.

²⁹ Jau chuluwo̧, kwöpöjojodö ökwönö suli̧ tjöwaedobö tjisakwitjö̧bi, waekwakobe, Kwuluwo̧ Isabenö Jo̧ Dios ökwönö iteada̧lobetjö̧. Bakwo̧ mikwawi̧ jawa jwabebö iteada̧li̧danö ökwönö otiwanö iteada̧lakobe, debö kwi̧'yapji jö̧ba̧lö, jo̧kwaijayonö kwöpöjojodönö wökwebö loakobe, bakwo̧ inawa wökwebö loi̧danö.

³⁰ Jau chuluwo̧, Isabenö Jo̧ma otiwanö ökwönö pjaatakwa̧ wene yöawinobe, ja̧danö jö̧a̧linadanö isabenö pjaatakobe, ja̧danö isabenö ökwönö ujunakobe, israel jojodö la'aka duluwo̧ bakibanö.

³¹ Jo̧kwajabetjö̧ babe Nabal ja̧aja̧ balekwa mikwama sulabenö ja̧köba chuluwo̧, ja̧ möle badekwachenama kwo̧'wo tjo̧achapji jö̧ba̧lö. Isabenö Nabal ja̧aja̧ balekwa mikwa ökwöda lȩkebitjöbi, sulabenö ja̧böködönö kwabö loköbitjö̧bi kwo̧'wo tjoachena chuluwo̧. Ja̧danö, ja̧ mölȩ Isabenö Jo̧ yöawinadanö baledenama, otjönö kwömöayujunö dösölö̧jinö kwomukwatobö atebakwö chuluwo̧, —jö̧ba̧lö yöja̧linobe Abigailma Davidnö.

³² Yöja̧lökwe, Davidma Abigailnö atadinobe: —Isabenö Jo̧ israel jojodö Duluwo̧ Diosnö ösödö yöta̧lobe, isabenö otiwanö ökwönö weajabe ötjönö yöka̧lobö.

³³ Isabenö waisanö omukwatö ichö yöka̧lajabe, ja̧danö jejenö ja̧köbitjö̧ Diosnö ateba, otiwanö ökwönö pjaatobö. Isabenö otiwanö pjakatajabe, balekwa mikwa, jojodönö kwabö lotapji jö̧ba̧lö, ja̧danö kwabö lobajo̧, Dios öba a'otjö wene chujuna̧lapji jö̧ba̧lö.

³⁴ Isabenö yötawakwö Abigail, Israel jojodö Duluwo̧ Isabenö Jo̧ Dios ö̧ji̧ wenema isabenö wene, ja̧danö ja̧ wene isabenö ji̧danö isabenö yötawakwö, tjöbeba̧lö kwichajökötjö̧ma, okobe deinö Nabal ömöledö ömadönö kwabö loto jö̧ta̧lajena, yȩayi dewachakwa̧ abönö, okobe deinö Nabalbi, ömöayedö ömadöbi, bakwo̧bi ö̧ji̧bökönö debö tji̧'yo jö̧tja̧lajena.

³⁵ Ikenama, jö̧ba̧lajo̧, Abigail jiyaja̧ eminobe, otiwa jö̧ba̧lö. Ja̧danö Abigailnö yöa̧linobe, —Otiwanö wene jwiinö kwejube da̧ji̧. Yöka̧laja̧ cha̧ja̧kwajabe, ja̧danö akebaja̧ a̧ja̧kwö, akebaja̧danö ja̧tocha, —jö̧ba̧lö.

Nabal ö'wö baibina jawa

³⁶ Ja̧danö, jejube Nabal ö̧jobekwö jȩwa̧bijenama Abigailma jilekwenö jöbadekwajinobe, ba'ali juno̧nö. Inesö la'aka luwedö tjujuni̧jaye ba'ali ujuninobe, ja̧danö o̧'wo ösöwanö jwiinö 'dukwachökwe ö̧jinobe. Jo̧kwajabetjö̧, 'dukwachökwe ö̧jioko, Abigailma jo̧banö yöjawinokokobe baledaja̧ma, ikena möle dewachenanö kabatö.

³⁷ Ja̧danö, ikena möle yeayi, ida̧ökö 'dukwachi̧ bö̧jachajökwe ö̧jioko, Abigailma baledina wene yöjawinobe, ja̧danö yöjawökwe, 'dö̧achibinobe, ja̧danö inawa pjolachibökönö bi̧danö, Nabalma itea kamapjonöda ö̧binobe, pjolachibökönö.

³⁸ Ikenama, domulataja möle jenanö baledaja̧ ikenama, Diosma yemidanö Nabal ö'wöchinö weinobe, ja̧danö debö i̧'yinobe Nabalma.

Abigail jilekwe woaja̧ ikena, David Abigailnö emina jawa

³⁹ Ja̧danö, Nabal ö'wö baibaja̧ wene a̧ja̧kwenama, Davidma Diosnö ösödö yöa̧linobe, —Isabenö Jo̧nö chösöda, isabenö otiwanö pjabato̧ jö̧ba̧lö. Nabal sulabenö ja̧iökwe, balekwa mikwa jo̧bada lȩebajabe, ja̧danö ötjö jo̧ba ömöayo̧nö otiwanö iteada̧linobe, ötjöma sulabenö ja̧tapji jö̧ba̧lö. Nabal sulabenö ja̧iökwe, Nabal ju'wedönö suli̧ öwaedobö omukwataja̧ma, Nabalnöda baibobö weajabe Isabenö Jo̧ma. Nabal sulabenö ja̧iökwe, balekwa mikwa Nabalnö kwabö loajabe Diosma, —jö̧ba̧lö yöa̧linobe Davidma. Ikenama Davima iteda ömöayedönö weinobe, Abigail jö̧jobekwö ya̧nö, David Abigailnö emobö ösödi̧ wene yötjawobö.

⁴⁰ Ja̧danö weawö̧, ichibö Carmelnö ju̧junö Abigailnö yötjawinobe, —Davidma ökwödönö weajabe, jo̧ba ö̧jobekwö ökwönö öbibö dichejebobö, David ilekwo bakibakobetjö̧, —jö̧ba̧lö.

⁴¹ Yötjawoko, Abigailma jöba nijakwö bȩbachibö yöja̧linobe, —Otiwa, jo̧ba ömöayujusa. Ja̧danö ju'wibi jo̧ba ömöayedönö pjabatö tjömasapiya dichö lotakwujusa, —jö̧ba̧lö.

⁴² Ja̧danö yöba̧laju, Abigailma jömöayedö bakwamu ya̧dönö öbibö, juluwanö jajwi bulonö wanö, David weaja̧wökwö ji̧'yinobe David öjobekwö. Ja̧danö, David ö̧jobe ichibö, David ilekwo bajibinobe.

⁴³ Abigailnö emakwa̧ abönö, jelujunöbi eminobe Davidma, Jezreel jojosuju Ahinoam mikwujunö. Jo̧kwajabetjö̧ Ahinoambi, Abigailbi David ilekwamu tjö̧jinobe.

⁴⁴ Jo̧kwaijayonö ajayinö David ilekwo ji̧nuju Mical mikwuju Saul itjijuma, Saulma jelo̧nö weinobe jemobö, Palti mikwo̧nö. Jo̧ba Paltima Lais itji̧, ja̧danö Galim comunidad jojo.