1 Samuel 24 - Dios Iwene

David Saulnö kwabö lobökönö, ö̧jibina pjaatina jawa

¹ Ja̧danö, Saul filisteo jojodökwö ölakwabikwawö a'dewö lobö kaataja̧ ikena, ju'wedö yötja̧li̧ a̧ja̧kwinobe, Davidma jojodö deobe Engadi ötjabobe jo̧ jö̧ba̧lö.

² Ja̧danö, jejenö a̧ja̧kwö, okobe deinö israel ölakwabikwawa jojodötjö, Saulma tres milbedönö omudawinobe, ju'wedötjö bajalekwönönö ölakwabikwawa jawa waisadönö. Ikenama, jobadönö öbibö, Davidnö isakwö i̧'yinobe, tebonö ju̧kwadö chivodö inawa ötjabawa badeibö.

³ Ja̧danö, jobe kwebachö, obejadönö teada̧lakwawa tjöekwemi jȩmi öbaledinobe, inawa ötöla nööla jȩmi. Ja̧danö, jöla ötöla teachinobe Saulma, jobetjö yo'oobö, jo̧kwaijayonö wajwiinobe, Davidbi ömöayedöbi ötöla okwa ju̧kwawö ba̧jadö jö̧ba̧lö.

⁴ Jejenö jo̧dawa'ye teachiawö̧, David ömöayedöma Davidnö yötja̧linobe, —Edi, damötjö Isabenö Jo̧ ökwönö yöa̧linadanö baledajabe. Damötjö yöa̧linobe, –Ökwö kwöpöjojonö ökwö kwujuluwobö chiyocha, ökwöda kwösödi̧danö jo̧banö ja̧köbobö, –jö̧ba̧lö. Jejenö Dios yöa̧linama babeda badekwachajabe, kwöpöjojonö wene jwiinö kwabö loköbobö baibajabe, —jö̧ba̧lö yötja̧linobe. Yötja̧lökwe, Davidma tjo'omanö wi̧inö i̧'yinobe, Saul ö̧jobekwö, ja̧danö ichibö, Saul ökamiji̧do̧ bajale 'wiebinobe, ja̧danö 'wibebajo̧, ömöayedökwö ȩwa̧bijinobe.

⁵ Ikenama, Davidma o̧'wo tjo̧ekwinobe, Saul ökamiji̧do̧ 'witeboko jö̧ta̧lajabe jö̧ba̧lö.

⁶ Ja̧danö ömöayedönö yöa̧linobe, —Jejenö ja̧toko jö̧ta̧lajabe, Isabenö Jo̧ öba a'otjö, ja'yubebi chuluwo̧ Diosda omudawö ujuninökwenö sulabenö ja̧toböma jwiobe. Jau chömöledö, Isabenö Jo̧ weökökwesa, Saulnö suli̧ chöwaedoböma, isabenö Saulma Diosda omudawö ujuninökwe ö̧jobetjö̧, —jö̧ba̧lö yöa̧linobe Davidma ömöayedönö.

⁷ Ja̧danö, jejenö yöba̧lö, ömöayedö Saulnö kwabö lotjobö tjomukwati̧ katjatibobö ja̧bö, Saulnö kwabö lotjoböma weinokobe. Ja̧danö, yo'obö kabatajo̧, Saulma a̧la̧ibö ötölatjö labebö ömöayedökwö kweachinobe.

⁸ Ikenama Davidbi a̧la̧ibö, Saul ökömanö 'ya̧nö, ötölatjö laebinobe, ja̧danö labebajo̧, Saulnö jwöinobe, —Chuluwo̧ la'aka luwo̧ Saul, —jö̧ba̧lö. Ja̧danö, Saul a̧ja̧kwö öjalachibenama, Davidma öba nijakwö bȩachibinobe, chuluwo̧ja jö̧ba̧lö.

⁹ Ja̧danö Davidma Saulnö, —Tajawedö ötjönö omöna yöba̧ladö yötja̧li̧ kwösödobeda chuluwo̧, Davidma Saulnö suli̧ öwaedobö isakwo̧ jö̧ba̧lö omöna yötja̧li̧ma?

¹⁰ Edi chuluwo̧, babe möle ökwöda öwaetjöda öwawinö kwedajabe, Isabenö Jo̧ ökwönö iyaja̧ma, chösödi̧danö ökwönö ja̧tobö chuluwo̧. Ja̧danö isabenö ökwönö suli̧ chöwaedobö chisakwitjö̧ma, ötöla okwatjö ökwönö kwabö loto jö̧ta̧lajena. Isabenö chuluwo̧, chömöayedötjö ju'wedö wetjatö, Saulnö kwabö loköbo jö̧ba̧lö, jo̧kwaijayonö lȩlöinö edö kwö̧jibinö pjatatatö. Kwabö loköbonö wetji̧ a̧ja̧kwö chatadatö, –Ötjöma isabenö chuluwo̧nö suli̧ chöwaedökakwo̧sa, chuluwo̧ Saulma, Isabenö Jo̧da omudawö ujuninökweobetjö̧, –jö̧ba̧lö.

¹¹ Edi chabe'do, isabenö kwabö loto jö̧talatö, edi, kwökamiji̧do̧tjö 'witebaja̧ma. Ökwönö kwabö lobökönö, kwökamiji̧do̧da 'witebajabe. Ja̧ 'witebaja̧ma öwaetjöda öwawinö i̧sȩbobe, ökwönö suli̧ chöwaedoböma isakwö̧kö̧sa jö̧ba̧lö. Jau chuluwo̧, isabenö ötjönö kwabö loköbotö jö̧ba̧lö luba̧libö kwisakwijayonö, yayonö ökwönö sulabenöma ja̧bö̧kö̧sa jö̧ba̧lö chi̧sebajabe.

¹² Jau chuluwo̧, Isabenö Jo̧da ökwödönö badedö edo̧ma, ökwödötjö dite otiwanö ja̧ojobö jö̧ba̧lö. Ja̧danö, jo̧bada ötjönö sulabenö ja̧köbi̧ edö lȩebobö jȩna. Jo̧kwaijayonö ötjönö sulabenö ja̧köbijayonö, ötjöma la'akatjöda balekwa mikwa ökwönö chujuluwoböma chisakwökakwo̧sa chuluwo̧.

¹³ Jau chuluwo̧, da'dödö yötja̧li̧ma baikwö laebobe, –Sulabedöma, jwaikwöda sulabenö ja̧badö, –jö̧ba̧lö, ja̧danö ötjöma isabenö sulabo̧chitjö̧ma, ökwönö sulabenö ja̧to jö̧ta̧lajena. Jo̧kwaijayonö sulabö̧kö̧sa, ja̧danö la'akatjöda ökwönö sulabenö ja̧bö chujuluwoböma chisakwökakwo̧sa.

¹⁴ Jau chuluwo̧, ökwöma israel jojodötjö inesö la'aka luwo̧ja, tajawedö ötjönö lubö kwisakwobö? Ötjöma mikwawö̧kö̧sa, ötjöma ö'wö babibajo̧ awilidanö mikwawö̧kö̧sa. Ju'wibi ökwö mikwawo̧ öba a'otjö, ötjöma awili ötjö̧biyadanö ichejekwo̧sa, mikwawö̧kö̧sa ötjönö lubö kwisakwobö.

¹⁵ Jau chuluwo̧, Isabenö Jo̧da ja̧di̧ edö badedö edakwo̧ma, ökwödötjö dite otiwanö ja̧ojobö jö̧ba̧lö. Ja̧danö jo̧banö cho̧'wo chöwana̧lobe, isabenö jo̧bada ja̧bö chö̧ji̧ edö, tjöbeba̧lö pjaatakobe jö̧ba̧lö, ja̧danö ötjönö kwabö loköbapji jö̧ba̧lö chö̧jibinö pjaatakobe jö̧ba̧lö, —yöa̧linobe Davidma Saulnö.

¹⁶ Jejenö yöa̧lökwe, David jejenö yöba̧lö kaatena, Saulma jwöbö abebö a̧ja̧kwinobe, —Chitji̧ David, isabenö ökwödaji̧? Isabenö ökwöda kwiwene cha̧ja̧kwaji̧? —jö̧ba̧lö. Ja̧danö David yöa̧laja̧ omukwatö, Saulma labinö ubudekwinobe.

¹⁷ Ja̧danö Saulma Davidnö yöa̧linobe, —Isabenö ökwöma otiwanö ja̧bö chö̧ji̧tjö bajalekwönönö otiwanö ja̧bö jo̧ja. Ötjöma ökwönö sulabenö ja̧tijayonö, ökwöma jwaikwöda otiwanö pjabatöda ja̧bö kwö̧jajabe.

¹⁸ Babe möle kwi̧sebajabe ötjönö otiwanö ja̧köbi̧ma, Isabenö Jo̧ma ötjönö kwabö loköbobö iyajayonö, ötjönö kwabö lobökönö otiwanö ja̧köbajabe.

¹⁹ Isabenö jejenö ja̧böködö jojodöma, tjöpöjojodönöma. Bakwo̧ iteda öpöjojonö badekwajo̧, wene jwiinö laebobö weenaji̧? Weökena, kwabö loena, jo̧kwaijayonö chö̧jibinö ja̧köbajabe. Isabenö otiwanö ja̧köbajabe David, jo̧kwajabetjö̧ balekwa mikwa Isabenö Jo̧ ökwönö otiwanö iyobö chösödakwö David.

²⁰ Ja̧danö ju'wibi yöta̧lakwö David, Ötjöma chöwaisa, isabenö israel la'aka luwo̧ bakibakwo̧ja, isabenö okobe deinö israel jojodö tjuluwo̧ ö̧jakwo̧ma ökwöda jö̧ba̧lö.

²¹ Jo̧kwajabetjö̧ Isabenö Jo̧ öba a'otjö chi̧tji̧mu tupadanö jojodönö otiwanö ja̧köbakwa̧ wene yöbawö kwujunobö atebakwö. Jau David, ju'wedö ajayi luwo̧ i̧tji̧munö kwabö lobö ja̧biatji̧danö ja̧bökönö, chi̧tji̧mu tupadanö jojodonö dösölö̧jinö ja̧köbakwa̧ wene yöbawö kwujunobö atebakwö, chi̧tji̧mu tupadanö jojodöma okobe deinö debö tji̧'yapji jö̧ba̧lö.

²² —Aebökwe, Davidma Saul i̧tji̧munö dösölö̧jinö ja̧akwa̧ wene yöbawö ujuninobe, Saul aebaja̧danö. Ikenama Saulma ejube ȩwa̧jinobe, ja̧danö Davidbi ömöayedöbi tjuju̧kwawajemibe tjȩwa̧jinobe.