1 Samuel 23 - Dios Iwene

David Keila comunidad jojodönö pjaatina jawa

¹ Ja̧danö, ju'wi möle Davidnö yötjawinobe: —Filisteo jojodöma Keila comunidad jojodökwö ölakwabikwawö tjö̧jobe, ja̧danö tju̧kwa trigo tjö̧naukwobe. Jau David, trigo sula'wo chabö loawejube ichibö, filisteo jojodö tjö̧naukwobe, —jö̧ba̧lö yötjawinobe.

² Yötjawiökwe, Davidma Isabenö Jo̧nö abebö a̧ja̧kwinobe, —Keila jojodönö pjabatö, filisteo jojodönö mebibö ölakwabikwawö chi̧'yobö jo̧beji̧? —jö̧ba̧lö. Aebökwe, Isabenö Jo̧ma weinobe, —Jau, filisteo jojodönö ölakwabikwawö kwi̧'yo, Keila jojodö tjö̧jibanö, —jö̧ba̧lö.

³ Jo̧kwaijayonö, David ömöayedöma öpöjödö yötja̧linobe, —Yedabi, ökwödöma bena Juda niji ja̧nö yebabinö dö̧jobe, ja̧danö bena ditebonö ja̧nö yedabitjö̧ma, isabenö jemi tupakwö yedabobe, Keila comunidadbe 'ya̧nö, filisteo ölakwabikwawa jojodökwö ölakwabikwawö dö̧jobö, labobe, —jö̧ba̧lö.

⁴ Tjatadökwe, Davidma yemidanö Isabenö Jo̧nö abebö a̧ja̧kwinobe, —Isabenö jobe di̧'yobö jo̧beji̧? —jö̧ba̧lö. Aebökwe, Isabenö Jo̧ma atadinobe, —Jau, a̧la̧ibö, Keila comunidadbe 'ya̧duwi, isabenö filisteo jojodönö kwujuluwaduwobö pjatatakobetjö̧, —jö̧ba̧lö.

⁵ Jo̧kwajabetjö̧ Davidbi, ömayedöbi Keila comunidadbe 'ya̧nö, filisteo jojodökwö tjölakwabikwawinobe, ja̧danö jobadönö tjujuluwinobe. Jobadönö ba̧jȩkwadönö kwabawö lotjinobe, ja̧danö tja̧jwi̧munö ba̧jekwadönö 'döbebö tjeminobe. Jejenö ja̧bö Keila comunidadnö ju̧kwadönö tjö̧jibanö pjatjatinobe.

⁶ Ahimelec itji̧ Abiatar, Saultjö döbibajinama, Keilabe Davidkwö i̧'yinobe, ja̧danö i̧'yenama, tjö'da̧de pjabatadö Dios öba a'otjö 'dutjawa̧do̧ e'ewö i̧'yinobe. Jo̧kwajabetjö̧ Abiatar pjaatonö, David Diosnö abebö a̧ja̧kwobö ji̧nobe ja̧ möle.

⁷ Ja̧danö, ja̧ möle baikwö baledinobe: Ju'wedöma Saulnö yötjawinobe, —Davidma Keila comunidadbe ichibajo̧, jobe ö̧jobe, —jö̧ba̧lö. Yötjawökwe, Saulma ösödö yöa̧linobe, —Otiwa, Diosma otiwanö pjaatajabe, chöpöjojonö chujuluwobö. Davidma tjöekwemi möemibi, apjudebi jȩmi teachajabe, jo̧kwajabetjö̧ 'daliwadanö ja̧kobe Keila comunidadma, ötjötjö döibajobö jwiena, —jö̧ba̧lö.

⁸ Ja̧danö, jejenö yöba̧lajo̧, okobe deinö ölakwabikwawa jojodönö jwöinobe ölakwabikwawö, Keila comunidad tjötjösawibö Davidnöbi ömöayedönöbi do̧tjatobö.

⁹ Jo̧kwaijayonö, Davidma ja̧ Saul suli̧ öwaedobö omukwati̧ a̧ja̧kwinobe, ja̧danö a̧ja̧kwö, Diostjö jojodötjö tjö'da̧de pjabato̧ Abiatarnö weinobe baikwö: —Dios öba a'otjö 'dukawa̧do̧ 'dubawö baikwö ichi, Diosnö atebobö, —jö̧ba̧lö.

¹⁰ Ja̧danö Abiatar ichenama, Davidma abebö a̧ja̧kwinobe: —Isabenö Jo̧ ökwödö israel jojodö Duluwo̧ Dios, ötjö kwömöayo̧ma isabenö cha̧ja̧kwajabe, Saulma ötjönö söbebö lootö jö̧ba̧lö, baikwö Keila comunidad söbebö lobö ichobe jö̧ba̧lö.

¹¹ Abebö cha̧ja̧kwakwö Chuluwo̧, jejenö ichiawö̧, Keila jojodöma ötjönö do̧batö tjiyakwa̧ji̧ Saulnö? Saulma isabenö baikwö ichakwa̧ji̧? Chuluwo̧ israel jojodö Duluwo̧ Isabenö Jo̧ Dios, ötjö kwömöayo̧nö yökawobö atebakwö, —jö̧ba̧lö. Aebökwe, —Jau, ichakobe, —jö̧ba̧lö atadinobe Isabenö Jo̧ma.

¹² Atadökwe, Davidma abebö a̧ja̧kwinobe: —Keila jojodöja? Saul ichiawö̧, ötjönöbi, chömöayedönöbi do̧batö, Saulnö tjiyakwa̧ji̧? —jö̧ba̧lö. Abebö a̧ja̧kwökwe, —Jau, ökwödönö tjiyakwedö, —jö̧ba̧lö atadinobe Isabenö Jo̧ma.

¹³ Jejenö yöawökwe, Davidbi, ömöayedö seiscientos jenanöbedöbi a̧la̧ibö Keila comunidadtjö latjebinobe. Ja̧danö labebajadö, Davidma ömöayedönö öbibö, jelobebi, jelobebi pjolachö kwebachö tjö̧jinobe, Saul jobadönö öbadekwapji jö̧ba̧lö. Ja̧danö, —Davidma Keila comunidadtjö döibajabe, —jö̧ba̧lö yötjawiökwe, Saulma kabatakwawö, yainöma Keilabe i̧'yinokobe.

Saul Davidnö isakwina jawa

¹⁴ Ja̧danö, Davidma ömöayedökwö jojodö deobe ju̧kwawö tjö̧jinobe, jelobebi, jelobebi. Jelobe jojodö deobebi, Zif niji̧ mösa'iju jȩmi niji̧bi, Davidma ömöayedökwö ju̧kwawö ö̧jinobe, Saul jobadönö öbadekwapji jö̧ba̧lö. Ja̧danö, mölekwena Saul ömöayedö Davidnö tjisakwinobe, jo̧kwaijayonö Diosma weinokobe, Davidnö tjöbadekwajobö.

¹⁵ Baikwö laebobe Saul Davidnö isakwina wenema. Davidma jojodö deobe Zif niji Hores ötjabobe ö̧jena, a̧ja̧kwinobe, —Saulma Davidnö kwabö lootö jö̧ba̧lö isakwobe, —jö̧ba̧lö.

¹⁶ Ja̧danö, Horesnö ö̧jono, Saul itji̧ Jonatanma David ö̧jobekwö Davidnö edö i̧'yinobe, ja̧danö jo̧banö ujuluwachibanö pjaatinobe, —Isabenö Diosma ökwönö pjaatakobe, —jö̧ba̧lö.

¹⁷ Jonatanma Davidnö yöa̧linobe, —Chabe'do ökwönö isakwijayonö, yebabökönui, chabe'do Saulma ökwönö öbadekwajökakobe. Isabenö ökwöma israel jojodö la'aka tjuluwo̧ bakibakwo̧ja, ja̧danö ötjöma kwömöayo̧ ja̧nö kwipjea jojo chö̧jakwo̧sa. Chabe'dobi ja̧ wene öwaisobe, isabenö ökwöma israel jojodö la'aka tjuluwo̧ bakibakwo̧ja, jö̧ba̧lö ja̧danö ötjöma kwömöayo̧ chö̧jakwo̧ja, jö̧ba̧lö öwaisobe chabe'do Saulma, —jö̧ba̧lö yöawinobe Jonatanma.

¹⁸ Ja̧danö, jejenö yöa̧laja̧ ikena, yemidanö Isabenö Jo̧ öba a'otjö ösödabikwawö tjö̧jakwa̧ wene yöbawö tjujuninobe, dösölöji̧nö ösödabikwawö dö̧jökötjö̧ma, Dios lȩebobö jȩna, jö̧ba̧lö. Jemi ikenama, David Horesnö ö̧jonö, Jonatanma ejube ȩwa̧jinobe.

¹⁹ Jemi ikenama, Zif niji ju̧kwadötjö, ju'wedöma Saul ö̧jobekwö Guibeabe 'ya̧nö yötjawinobe, —Duluwo̧, Davidma ditebotjö dömöledö tjö̧'da̧de ö̧jobe. Jo̧bama Horestjö uju̧kwawobe, mösa'o Haquila ötjaba'otjö, Jesimontjö a̧likwösa'o.

²⁰ Jo̧kwajabetjö̧ baikwö yöda̧lakwö duluwo̧, ökwöda kwösödenada jo̧banö do̧batö kwicho, ja̧danö kwichenama, ökwödöma pjabatö, jo̧banö do̧batö diyakobe ökwönö, —jö̧ba̧lö.

²¹ Yötja̧lökwe, Saulma ösödinobe, ja̧danö jobadönö yöa̧linobe: —Isabenö otiwanö dösölö̧jinö ötjönö ösödö pjabatadöja, jo̧kwajabetjö̧ balekwa mikwa Isabenö Jo̧ ökwödönö pjaatobö jo̧be.

²² Jobe kwitebobe chi̧'yakwa̧ abönö, tupakwö Davidnö kweda̧laduwobö jo̧be, isabenö ö̧jemi kwöwaisaduwobö. Ja̧danö ju'wibi David ö̧jobe edajadönö kwöbadekwajaduwobö. Jo̧ba Davidnö cha̧ja̧kwajabe, isabenö ju̧kwawakwawa waiso̧ jö̧ba̧lö, jo̧kwajabetjö̧ teada̧lönö kweda̧laduwobö jo̧be, 'döbibajö ö̧jibapji jö̧ba̧lö.

²³ Jo̧kwajabetjö̧ okobe jwiinö u̧ju̧kwawemitenia kwedaduwo, ja̧danö jemi ikenama, otiwanö edajadö, ichö yökawaduwo. Ja̧danö, jenama ökwödökwö chi̧'yocha. Ja̧danö abönö otiwanö kwedaduwobetjö̧, ö̧jibobö jwiena, ba̧jȩkwadö Juda niji ju̧kwadö tjö̧'da̧detjö u̧ju̧kwawobö isakwitjö̧böbi, ö̧jibökena, otiwanö jo̧banö do̧tatocha, —jö̧ba̧lö weinobe.

²⁴ Weawö̧, jobadöma abönö tji̧'yinobe, Saul i̧'yakwa̧ abönöma. Ja̧ möle Davidma ömöayedökwö jojodö deobe Maon niji ö̧jinobe, Jesimontjö a̧li̧kwö Araba ötjabobema.

²⁵ Ja̧danö, Saulma ömöayedönö öbibö jobe Davidnö isakwö i̧'yinobe, jo̧kwaijayonö ichibakwa̧ abönö, juwedö Davidnö yötjawinobe. Jo̧kwajabetjö̧, Davidma inawa jojodö deobe Maon nijinö ba̧wa bo̧bekwö i̧'yinobe, ja̧danö jobe jojodö deobe Maontjö ö̧jinobe. Jejenö i̧'yiökwe, Saul a̧ja̧kwinobe, ja̧danö Davidnö lubö i̧'yinobe, jojodö deobe Maon nijitjö.

²⁶ Ja̧danö, Saulma mösa'otjö bakwachobe kweachonö, Davidbi ömöayedöbi ja'o bakwacha'obe dötjibajinobe, ja̧danö tjö̧jibotö jö̧ba̧lö, juluwanö ö'öbakwawö dötjibajinobe. Jejenö Saulma, Davidnö do̧atotö jö̧ba̧lö yö̧ne ötjösawibobö ichibinobe, juluwanö Davidnö do̧ato jö̧a̧lenanö.

²⁷ Jo̧kwaijayonö, ina Davidnö ötjösawibapji, bakwo̧ yöbawo̧ ichibö Saulnö yöawinobe, —Japö, juluwanö ichi, filisteo jojodöma ditebobe ichibö dömöledönö metjibobe, —jö̧ba̧lö.

²⁸ Jo̧kwajabetjö̧, jejenö yöawiökwe, Davidnö lubö kabatakwawö, Saulma ömöayedö ölakwabikwawa jojodökwö ȩwa̧jinobe, filisteo jojodökwö ölakwabikwawobö. Jo̧kwajabetjö̧, jejenö baledinobetjö̧, jobe ba̧wa inawa pjeanö jejenö tjö̧jibinobetjö̧, jawa tjimidinobe, —Ji̧bakwawa inawa, —jö̧ba̧lö.

²⁹ Jemi ikenama jelö labebö, Davidma ömöayedönö öbibö i̧'yinobe Engadi nijibe, jobe u̧ju̧kwawobö.