1 Samuel 22 - Dios Iwene

David inawa ötöla Adulam ötjabölanö ö̧jina jawa

¹ Jejenö balediökwe, Davidma Gattjö döbibajö, inawa ötöla Adulam mikwölabe janö i̧'yinobe. Ja̧danö, David yö̧ne ömöledöbi, ju'wedö ömöledöbi jobe inawa ötölanö ö̧ji̧ wene a̧ja̧kwö, jo̧bakwö ja̧nö tji̧'yinobe.

² Ja̧danö, ju'wedöbi Davidkwö ja̧nö tji̧'yinobe. Jobadötjö ju'wedöma wene juna̧ladö, ju'wedöma musidadö, ja̧danö ju'wedöma tjo̧'wo sulawö̧ la'aka luwedönö öpöjödadö. Jobadöma David ö̧jobekwö 'ya̧nö, David ömöayedö batjibanö jobe tji̧'yinobe, jo̧bakwö ömadö cuatrocientos jenanö batjibanö.

³ Jemi ikenama, inawa ötölatjö Davidma abe'donöbi, ojo'donöbi öbibö, Moab niji comunidad Mispabe i̧'yinobe, Saul öpöjojodökwö tjö̧jobö. Ja̧danö, jobe ichibajo̧, Davidma Moab jojodö la'aka tjuluwo̧nö aebinobe, baikwö: —Ina Dios ötjönö pjaatakwa̧ma wajwita, jo̧kwajabetjö̧ ökwönö ateba, chöwaisachibenanö kabatö bidönö ökwökwö tjö̧jobö weköbobö, —jö̧ba̧lö aebinobe.

⁴ Jejenö jobadönö Moab la'aka luwo̧kwö junibö, inawa ötölabe tjeachainobe. Ja̧danö David abe'dobi, ojo'dobi jobe Moab nijinö tjö̧jinobe, Davidma ötölatjö laebenanö kabatö.

⁵ Ja̧ David ötölatjö laebina wene, baikwö laeba, Dios yöawi̧ yöbawo̧ Gad mikwo̧ma Davidnö yöawinobe, —Belö labebö, kwömöledö Judasaso tjitebobe kwi̧'yo, —jö̧ba̧lö. Ja̧danö yöawökwe, Davidma ömöayedönö öbibö tebobe Haret ötjabobe i̧'yinobe, Juda nijibe.

Saul Diostjö jojodötjö tjö'da̧de pjabatadönö kwabö loina jawa

⁶ Ju'wi möle Saulma a̧ja̧kwinobe, Davidbi, ömöayedöbi Juda nijinö tjö̧jobe jö̧ba̧lö. Jejenö a̧ja̧kwenama, Saulma Guibea comunidadtjö mösa'o wa̧pekwa'obe, tamarisco towi teebe ö̧binobe, otokwöte do̧ba̧lö. Ja̧danö okobe deinö ömöayedö ölakwabikwawa la'aka luwedöma ipjeanö tjö̧jinobe.

⁷ Ja̧danö, Davidnö a̧ja̧kwö, Saulma iteda ömöayedö ipjeanö ju̧kwadönö yöa̧linobe, —Tajawedö Judasaso jojo Isai itji̧nö pjakataduwobeda? Ökwödöma ötjöda chömöledö Benjaminsaso jojodöja, ¿jö̧tö? Kwedaduwemi, la'aka luwo̧ babibö, ökwödö Benjamin jojodönö kwakwawa batjobi, uba batjobi ökwödönö iyenaji̧? Ja̧danö iteda ömöayedö ölakwabikwawa jojodö tjuluwedö bakibaduwanö, milbedö tjuluwedönöbi, cienbedö tjuluwedönöbi ökwödönö omudawö ujunenaji̧? Ja̧maökö, jo̧bama Benjaminsaso jojodönö pjabatö̧kö̧ jejenöma.

⁸ Jo̧kwajabetjö̧ tajawedö bakobe jo̧banö pjakataduwobö omukwatö kwujunaduwaja̧da? Tajawedö ökwödötjö bakwo̧bi yöawinököda, chitji̧ Jonatan Isai itji̧ Davidnö pjaatobö yöbawö ujuninama? Chitji̧ ujuluwachibanö pjaatökwe, babema jo̧ba chöpöjojoma ötjönö kwabö lootö jö̧ba̧lö ju̧kwawö meibobö isakwobe. ¿Tajawedö ökwödötjö bakwo̧bi ja̧ baledi̧ wene yökawinököda? ötjönö lȩlöinö edö, yökawaduwinatjö̧bö, —jö̧ba̧lö yöa̧linobe Saulma ömöayedönöma.

⁹ Jejenö yöa̧lenama, edomita jojo Doeg mikwo̧ma Saul ömöayedö tjipjeanö ö̧jinobe, ja̧danö yöa̧li̧ a̧ja̧kwö yöawinobe, —Chuluwo̧, belö jo̧ba Isai itji̧nö chedijatö, Nob comunidadtjö Ajitob itji̧ tjö'da̧de pjabato̧ Ahimelecnö edö i̧'yenama.

¹⁰ Ja̧danö jejenö ichiökwe, Ahimelecma jo̧banö pjabatö, Isabenö Jo̧nö abebö a̧ja̧kwinobe, ja̧danö ju'wibi kwakwawa iyinobe, ja̧danö ju'wibi filisteo jojo Goliatmine itea'o kwölöte'o iyinobe. Ötjöma ja̧ baledi̧ chedijatö, —jö̧ba̧lö yöawinobe Doegma.

¹¹ Jejenö yöawökwe, Saul weinobe, tjö'da̧de pjabato̧ Ahimelecnö öbibö tjichejebobö, Ahimelecbi, okobe deinö yö̧ne ömöledö Diostjö jojodötjö tjö'da̧de pjabatadö Nob comunidadtjö otidadöbi Saul ö̧jobekwö tjichobö. Ja̧danö, weawö̧, okobe deinö Saul öba a'o tjichibinobe.

¹² Ja̧danö, Saulma Ahimelecnö yöa̧linobe baikwö: —Ökwö Ahitub itji̧, a̧ja̧kwitjö, —jö̧ba̧lö. Yöa̧lökwe, —Jau chuluwo̧, kwöba a'o chö̧ja, yöba̧li̧tjö, —jö̧ba̧lö.

¹³ Atadökwe, Saul abebö a̧ja̧kwinobe, —Tajawedö bakobe Isai itji̧kwö ötjönö suli̧ kwöwaedotö jö̧ba̧lö kwisakwobeda? Tajawedö chöpöjojo Isai itji̧nö pjabatö, pan iyöbi, kwölöte'o iyöbi kwiyinada? Ja̧danö tajawedö jo̧banö pjabatö, ja̧akwa̧ öwaisachibobö Diosnö abebö kwa̧ja̧kwinada? Jejenö pjakatökwe, ötjönö ujuluwobö isakwajabe, ja̧danö babema ju̧kwawö iteada̧lobe, wajwitonö mebibö ötjönö kwabö loobö. Tajawedö sulabenö jo̧ba chöpöjojonö pjakataja̧da? —Jö̧ba̧lö.

¹⁴ Aebökwe, Ahimelecma atadinobe, —Chuluwo̧, dakwö jo̧ba Davidnö kwöpöjojo jö̧ba̧lö chomukwatobö? Jo̧bama okobe deinö kwömöayedötjö, ju'wedötjö bajalekwönönö jwaikwöda weköbi̧ a̧ja̧kwö jo̧, ja̧danö ju'wibi ökwö kwo̧jo̧li, ja̧danö ju'wibi kwömöayedö ökwönö tjöbeba̧ladö tjuluwo̧, ja̧danö ju'wibi ökwöda kwejunö ju̧kwadö otiwanö omukwatö tjösödökwe Davidma.

¹⁵ Kwedemi ja̧ möleda jamatö Diosnö atebinaji̧, jo̧banö pjabatöma? Ja̧maökö, ba̧kwelöjatebö weköbi̧ otidonö ötjönö abebiainobe pjabatö Diosnö atebobö, otiwanö Dios ösödi̧ öwaisobö. Ja̧danö ju'wibi isabenö yötawakwö chuluwo̧, ja'yubebi wajwidatö, ötjöbi yö̧ne chömöledöbi, David kwöba a'otjö wene ujuna̧li̧ma, babeda döwaisachibobe chuluwo̧. Jo̧kwajabetjö̧ ökwödönö kwomukwata, –Chöpöjojodönö pjabatadö, —jö̧ba̧löma, —atadinobe Ahimelecma.

¹⁶ Atadökwe, Saulma ödameakwinobe, ja̧danö Ahimelecnö yöa̧linobe, —Isabenö kwabö lotakwawö̧ja, ökwönöbi, okobe deinö yö̧ne kwömöledönöbi, —jö̧ba̧lö.

¹⁷ Ja̧danö, jejenö yöba̧lajo̧, la'aka luwo̧ Saulma iteda ömöayedö ölakwabikwawa jojodö, ipjeanö ju̧kwadönö weinobe, —Bidö Isabenö Jo̧ ömöayedö tjö'da̧de pjabatadönö kwabö lobaduwinö, jobadöma bakobe David ömöledö ja̧dö. Jobadöma David döibajina tjöwaisinobe, jo̧kwaijayonö tjöwaisijayonö yötjawo jö̧tja̧lidanöma yötjawinokobe. Jo̧kwajabetjö̧ ö'wö batjibobö jo̧be, kwabö lobaduwidönö, —jö̧ba̧lö weinobe ömöayedö ölakwabikwawa jojodönö. Jo̧kwaijayonö, jejenö weijayonö, tjöpöjödinobe, —Bidöma Isabenö Jo̧ ömöayedö, jobadönö kwabö loböködösa, —jö̧ba̧lö.

¹⁸ Jejenö tjöpöjödiökwe, Saulma Doegnö weinobe, —Ökwöda, bidö tjö'da̧de pjabatadönö kwabö lobidönö, —jö̧ba̧lö. Weökwe, jo̧ba edomita jojo Doegma jobadönö meibinobe, ja̧danö ja̧ möle ochenta y cinco tjö'da̧de pjabatadönö kwabawö loinobe, Dios öba a'otjö tjö'da̧de pjabatadö 'dutjawi̧ linotjö otikwa̧do̧ 'dubawadönö.

¹⁹ Ja̧danö ju'wibi, jobadönö kwabö lobajo̧, tjitebo comunidad Nobbe i̧'yinobe, tjö'da̧de pjabatadö tjöjemi comunidadbe, ja̧danö jobe ju̧kwadönö kwabawö loinobe, ömadönöbi, ya̧dönöbi, tjemunöbi, tjemu pebadönöbi, tjajwimu pa̧ka̧yadönöbi, bu̧lö̧nöbi, obejadönöbi.

²⁰ Jo̧kwaijayonö, ju'wedönö kwabö loonö, Ahitob itji̧ Ahimelec i̧tji̧mutjö bakwo̧ ö̧jibinobe, Abiatar mikwo̧. Ja̧danö, jo̧bama David ö̧jobekwö döibajinobe.

²¹ Ja̧danö, David ö̧jobe ichibö, Abiatarma Davidnö yöawinobe, Saul Isabenö Jo̧ ömöayedö tjö'da̧de pjabatadönö kwabö loaja̧ wenema.

²² Yöawökwe, —Jobadönö kwabö loaja̧ma, ötjöda jawa, —jö̧a̧linobe Davidma. —Belö ja̧ möle edomita jojo Doeg mikwo̧nö edö, chöwaisijatö, wene ja̧kobe, Doegma Saulnö yöawakobe jö̧ba̧lö. Isabenö ökwö yö̧ne kwömöledönö kwabö lotjaja̧ma, ötjöda jawa Abiatar.

²³ Ja̧danö, babema ötjökwö yebabökönö ja̧wi̧, ötjökwö kwö̧jonö otiwanö kwö̧jakobe. Jau, ökwönö kwabö loobö isakwo̧ma, ötjönöbi kwabö loobö isakwobe. Jo̧kwaijayonö ötjökwö kwö̧jitjö̧ma, otiwanö chiteada̧locha, ökwönö kwabö lotjapji jö̧ba̧lö, —yöa̧linobe Davidma Abiatarnö.