1 Samuel 21 - Dios Iwene

David Diosnö iyapja̧ pan, sule Diostjö jojodötjö tjö'da̧de pjabatadöda tjukwo jö̧tja̧li̧ pan ukwina jawa

¹ Jonatan ö̧jelö labebajo̧, Davidma Nob comunidadbe ichibinobe, ja̧danö Diostjö jojodötjö tjö'da̧de pjabato̧ Ahimelecnö edö i̧'yinobe. Jejenö ichibiökwe, taji waekwajö jö̧ba̧lö, Ahimelecma yebabinö Davidnö edö laebinobe, ja̧danö Davidnö abebö a̧ja̧kwinobe, —Taji waekwa, tajawedö jo̧dawa'yeda kwichaja̧da? —jö̧ba̧lö.

² Aebökwe, Davidma omöna yöa̧linobe, —Waekwokobe, La'aka luwo̧ Saulma ötjönö weajabe, jojodö wajwitjonö wei̧ chotidobö, ju'wedönö yöbawökönö. Ja̧danö, chömöayedö ölakwabikwawa jojodönö jelobe dediakwawobö chujunajabe, –Yöta̧lajobetjöda makö dediakwawo, –jö̧ba̧lö. Jo̧kwajabetjö̧, baikwö jo̧dawa'ye chichajabe, —jö̧ba̧lö atadö omöna yöa̧linobe Davidma.

³ Yöba̧lajo̧, tupakwö aebinobe tjö'da̧de pjabato̧ Ahimelecnö, —Kwakwawa dukwobö kwujuna̧liji̧? Kwujuna̧litjö̧ma, pan ö̧pji̧ya bakwamu jawa ö̧pji̧yaö̧kö̧, ju'wi kwakwawa kwujuna̧litjöö̧kö̧, kwiyobö chösöda, —jö̧ba̧lö.

⁴ Aebökwe, Ahimelecma atadinobe, —Jo̧kwadabedö tjukwi̧ jawa panma jwitobe, sule Dios öba a'o junawa panda chujuna̧lobe. Ja̧danö mada möletjö baikwö bajalenö ya̧dökwö jö̧könö kwö̧jaduwatjö̧ma, ja̧ pan kwukwaduwobö jȩna, jo̧kwaijayonö ya̧dökwö kwö̧jaduwatjö̧ma, kwukwaduwobö jwiobe.

⁵ —Yöa̧lökwe, David atadinobe, —Ba̧kwelöjatebö ölakwabikwawö di̧'yenama, chömöayedöma ya̧dökwö jö̧ködö, Dios öba a'otjö wene jwiinö tjö̧jobö. Ja̧danö babe duluwo̧ wei̧ dotidobö kwedachi̧ma, ju'witjö bajalekwönönö inesö mikwawi̧ 'ya̧kwawa, jo̧kwajabetjö̧ isabenö ya̧dökwö jö̧könö kwedachobe, jwaikwöda Dios öba a'o otiwanö kwedachobö, —jö̧ba̧lö.

⁶ Atadökwe, tjö'da̧de pjabato̧ Ahimelecma Davidnö iyinobe Isabenö Jo̧ öba a'o tjujunaja̧ pan ö̧pji̧yama, ju'wi jo̧kwadabedö tjukwi̧ jawa pan jwiobetjö̧. Ja̧ panma, ajayinö Isabenö Jo̧ öba a'o ji̧na pan. David ichibakwa̧ abönö, Ahimelecma yayapja̧ balekwapja̧ junajo̧, ajayisapja̧ Dios öba a'otjö eminobe, ja̧danö ja̧ öbalewaja̧pja̧ panda, Davidnö iyinobe.

⁷ Ja̧ möle jejenö yötja̧lakwawonö, Saul ömöayedötjö bakwo̧ Doeg mikwo̧ eda̧linobe, ja̧ möle Isabenö Jo̧ öba a'o ö̧jobö ji̧nobetjö̧. Jo̧ba Doeg mikwo̧ma, edomita jojo, ja̧danö ju'wibi Saul ajwimunö teada̧ladö la'aka tjuluwo̧.

⁸ Ja̧danö, Ahimelec pan iyaja̧ ikena, Davidma ju'wibi aebinobe, —Chuluwo̧ Saul wei̧tjö̧, juluwanö teada̧lökönö latebobö ja̧tö, ja̧danö chitea ölakwabikwawa jawa jwibö chichajabe, juluwanö latebajabetjö̧. Bena kwölöte'oö̧kö̧, tokwöteö̧kö̧ kwujuna̧liji̧, kwebatö chi̧'yoböma? —jö̧ba̧lö.

⁹ Aebökwe, Ahimelecma atadinobe, —Jele'o jwiobe baima, sule filisteo jojo Goliat ujuna̧lina'o kwölöte'oda, wabeko Ela mikwobetjö kwabö loköbinökwe ujuna̧lina'oda. Yena Dios eju okwa, Dios öba a'o 'dutawa̧do o̧pe sabana'wonö jwaekwa'o jo̧be, kwösöditjö̧ma ja'oda kwekatena, —jö̧ba̧lö. Yöa̧lökwe, —Jau, otiwa, ja'oma isabenö jele'otjö bajalekwönönö otiwa'o, kwetatobö iyitjö, —jö̧ba̧lö atadinobe Davidma.

David filisteo jojodö tjitebobe Gatbe döibajina jawa

¹⁰ Ja̧danö, ja̧ möle Davidma a̧la̧ibö Saul ö̧jelö döbibajö, filisteo niji comunidad Gatbe i̧'yinobe, Gat comunidad la'aka luwo̧ Aquis mikwo̧ ö̧jobekwö, —Kwömöayo̧ batibobö chösöda, —jö̧ba̧lö.

¹¹ Ja̧danö, jejenö ichibiawö̧, Aquis ömöayedöma tjöpöjödinobe, —Biteda ökwödönö kwawabö lobina, —jö̧ba̧lö. Ja̧danö tjuluwo̧ Aquisnö yötja̧linobe, —Bitema David mikwo̧, israel niji la'aka luwedötjö bakwo̧, ¿jö̧tö? Jo̧ba Davidnöda israel jojodö lo̧tjökwe, Saul milbedönö kwabawö lobo̧, ja̧danö Davidma diez milbenönö kwabawö lobo̧ jö̧ba̧lö ösödö, baile 'döbö lo̧tjökwe. Jo̧banö kwösödoko, kwömöayo̧ baibobö duluwo̧, —jö̧ba̧lö yötja̧linobe Aquisnö.

¹² Jejenö yötja̧liökwe, Davidma a̧ja̧kwö jwiinö yeabinobe, —Gat comunidad la'aka luwo̧ Aquisma, ötjönö pjabatökönö, kwabö loena, —jö̧ba̧lö.

¹³ Ja̧danö, jejenö omukwatö, ajayinö ja̧aja̧ balewö lobö, o̧'wo jwibo̧ ja̧i̧danö tjöba a'o i̧sȩbinobe, bitema omukwati̧ jwibo̧ jö̧ba̧lö tjomukwatakobetjö̧. O̧'wo jwibo̧ ja̧idanö ja̧bö, apjudenö wȩyudö, ja̧danö aasobu aasa'yenö toinö, tjöba a'o i̧sȩbö ja̧inobe.

¹⁴ Jejenö ja̧iökwe, la'aka luwo̧ Aquisma ömöayedönö yöa̧linobe, —Edaduwi, itema o̧'wo jwibo̧. Tajawedö o̧'wo jwibo̧nö chö̧jobekwö kwichejebaja̧da?

¹⁵ Ida̧ökö tjo̧'wo jwibadö tjö̧jobe baima. Kwedaduwemi babe tjö̧ba̧jekwi̧tjö bajalekwönönö tjo̧'wo jwibadö chöba a'o tjö̧ba̧jekwachibobö chösödenaji̧? Chöpöjöda, tajawedö bite o̧'wo jwibo̧nö baikwö chejube kwichejebaduwaja̧da, chöpöjöda, —jö̧ba̧lö yöa̧linobe Aquisma ömöayedönö.