1 Samuel 20 - Dios Iwene

Jonatan Davidnö pjaatina jawa

¹ Jejenö Davidnö isakwö Saul ichibiökwe, Davidma Rama comunidad Naiot ötjabobetjö döibajinobe. Döbibajo̧, Jonatan ö̧jobekwö 'ya̧nö, Jonatannö abebö a̧ja̧kwinobe, —Taji ja̧tinada, kwabe'dö ötjönö öpöjödobö? Kwabe'doma ötjönö kwabö loobö isakwobe, jo̧banö sulabenö ja̧tinama di̧yada, jo̧banö sulabenö ja̧tinaji̧? —jö̧ba̧lö.

² Abebö a̧ja̧kwökwe, Jonatanma atadinobe, —Ja̧maökö, chabe'doma ökwönö kwabö looböma isakwö̧kö̧, ökwönö kwabö lotjökena. Chabe'doma isabenö okobe jwiinö omukwati̧ ötjönö yöbawo̧, mikwawökö ji̧ jawa ja̧akwa̧ omukwati̧bi, ötjönö yöbawo̧. Jo̧kwajabetjö̧ isabenö ökwönö kwabö loobö isakwitjö̧ma, ötjönö yöawo jö̧a̧linena, ja̧danö yöawokobetjö̧ chöwaisa, ökwönö kwabö looböma isakwö̧kö̧, —jö̧ba̧lö atadinobe Jonatanma.

³ Atadiökwe, Davidma yöa̧linobe, —Isabenö yötawakwö Jonatan, kwabe'doma isabenö ötjönö kwabö loobö isakwo̧. Ja̧danö ökwönö yöbawökönö isakwi̧ma, baikwö yöta̧la, kwabe'doma ötjönö kwösödi̧ wene öwaisobe, yö̧ne dömöledödanö ösödabikwawö dö̧jobe jö̧ba̧lö. Ja̧danö jejenö öwaisobetjö̧, ötjönö kwabö loobö isakwi̧ma yöbawö̧kö̧, –Jonatannö yötawitjö̧ma o̧'wo tjo̧achena, –jö̧ba̧lö. Jau Jonatan, ökwönö yöawököjayonö, isabenö ötjönö kwabö loobö isakwo̧ kwabe'doma, baikwö yöta̧la: Duluwo̧ Isabenö Jo̧ Dios yaba̧lo̧ ö̧ji̧ wenema isabenö wene, ja̧danö ökwö yaba̧lo̧ kwö̧ji̧ wenebi, isabenö wene Jonatan, ¿jö̧tö? Ja̧danö ja̧ wene isabenö ji̧danö, ju'wibi yötawakwö isabenö woto jö̧ta̧lobe, wanedö yötala bakwo̧ ömasapa bakwötanö ö̧ja̧ti̧danö wobalema yö̧neawobe, —jö̧ba̧lö yöa̧linobe Davidma.

⁴ —Yöa̧lökwe, Jonatanma atadinobe, —Dakwö pjatatobö kwösödobeda? Akebi̧danö isabenö pjatatakwo̧sa, —jö̧ba̧lö.

⁵ Yöa̧lökwe, Davidma Jonatannö weinobe, —Baikwö ja̧bi, isabenö kwabe'do ötjönö kwabö loobö isakwojobö jö̧ba̧lö. Itekwai yö̧tema, yö̧te jawo̧ yabayo̧ laebakobe, ja̧danö ja̧ laebakwa̧ jawa ba'ali tjujunakobe, ¿jö̧tö? Kwabe'do yöne ömöayo̧chobetjö̧, ja̧ ba'ali ötjöbi jo̧bakwö banö chukwobö jo̧be. Jo̧kwaijayonö ökwödökwö ba'ali junökönö, jelobe chu̧ju̧kwawobö weköbotjö, ja̧danö ötjöma mejebe chu̧ju̧kwawocha, wapötakwa möle baledibanö.

⁶ Ja̧danö, detiökwe, kwabe'doma, –Davidma daida, –jö̧ba̧lö abebö a̧ja̧kwitjö̧ma, jo̧banö yökawo baikwö: Davidma ötjönö aeba̧lajabe, itebobe Belenbe ȩwa̧jobö. Jobe Belentjö, o̧ba bakwabakwena Diosnö iyawa ba'ali tjujunobe ja̧danö jo̧babi ja̧ ba'ali ömöledökwö ukwobö aebajabe, ja̧danö aebi̧tjö̧ aebaja̧danö wetajabe, –jö̧ba̧lö kwatadonö.

⁷ Ja̧danö, jejenö kwatadajökwe, –Jau, otiwa, –jö̧ba̧lö yöa̧litjö̧ma, döwaisakobe, isabenö wene jwia, ötjönö kwabö loobö isakwö̧kö̧ jö̧ba̧lö. Jo̧kwaijayonö kwatadajökwe ödameakwitjö̧ma, kwöwaisachibakwo̧ja, kwabe'doma isabenö ötjönö suli̧ öwaedobö isakwo̧ jö̧ba̧lö.

⁸ Jau Jonatan, kwöwaisa, damötjö Isabenö Jo̧ öba a'otjö̧ isabenö ja̧bö dö̧jakwa̧ wene yöbawö dujunijatö, ba̧kwelöjatebö döpöjojodö babibökönö, yö̧ne dömöledö ja̧nö ösödabikwawö dösölöjinö dö̧jakwa̧ wenema, ¿jö̧tö? Jo̧kwajabetjö̧ ja̧ omukwatö, atebaja̧danö pjakatobö atebakwö. Jo̧kwaijayonö, ju'wibi atebakwö Jonatan, isabenö kwöba a'otjö sulabenö ja̧bajo̧ wene chujuna̧litjö̧ma, ökwöda ötjönö kwabö loköbobö atebakwö, isabenö sulabenö ja̧tatjö̧ma, kwabe'do ö̧jobekwö öbibökönö, ökwöda ötjönö kwabö loköbobö jo̧be, —jö̧ba̧lö yöa̧linobe Davidma.

⁹ Yöa̧lökwe, Jonatanma atadinobe, —Ja̧maökö chömöledöso̧, ötjöma la'akatjöda ökwönö kwabö lotökena. Ja̧danö ju'wibi, chabe'do ökwönö suli̧ öwaedobö omukwati̧ chöwaisitjö̧ma, ökwönö yötawoko jö̧ta̧lenaji̧? Isabenö ökwönö yötawo jö̧ta̧lena chömöledöso̧, —jö̧ba̧lö.

¹⁰ Atadökwe, Davidma abebö a̧ja̧kwinobe, —Kwabe'donö deti̧ wene yökawiökwe, dameakwö ataditjö̧ma, dakwö chöwaisachibakwa̧da? —jö̧ba̧lö

¹¹ Aebökwe, Jonatanma Davinö yöa̧linobe, —Mejebe dedajaduwo, —jö̧ba̧lö, ja̧danö mejebe tji̧'yinobe.

¹² Jobe ichibajadö, Jonatanma Davidnö yöa̧linobe, —Ökwödö israel jojodö Duluwo̧ Isabenö Jo̧ Dios öba a'otjö ja̧nö, jo̧ba a̧ja̧kwonö isabenö baikwö yötawakwö: Akebaja̧danö ja̧bö, chabe'do omukwati̧ chöwaisachibakwo̧sa. Ja̧danö, waisachibajo̧, itekwaiö̧kö̧, itekwayi dewachöö̧kö̧, babedajena yötawocha kwöwaisobö. Chabe'do otiwanö ökwönö ösödö omukwatitjö̧ma, ökwönö yötjawobö wetökenaji̧? Isabenö kwöwaisobö wetena chömöledöso̧.

¹³ Ja̧danö ju'wibi isabenö yötawakwö David, chabe'do ökwönö suli̧ öwaedobö ösöditjö̧bi, ja̧bi isabenö yötawocha, belö labebö, wene jwiobekwö otiwanö dökibajobö, baikwö yötawa: Chabe'do ökwönö suli̧ öwaedobö omukwati̧ waisachibajo̧, ökwönö yötawökötjö̧ma, Isabenö Jo̧ Dios ötjö Jonatannö labinö lȩebobö jȩna. Jau David isabenö tojökönö yötawocha. Isabenö chösödi̧ma baikwö yötawakwö chömöledöso̧ David, Isabenö Jo̧ ökwökwö ja̧nö pjaatobö chösöda, bakwainö chabe'dokwö ja̧nö pjaatinadanö.

¹⁴ Ja̧danö luwo̧ kwö̧jenama, ötjöma ina yaba̧lo̧ chö̧jitjö̧ma, ötjönö dösölö̧jinö ösödö kwö̧jo, Isabenö Jo̧ ötjönö dösölö̧jinö ösödö ö̧jidanö. Jau David, la'aka luwo̧ bakibenama, ötjönö kwabö lobökönui.

¹⁵ Ja̧danö debö chi̧'yaja̧ okobe luwo̧ bakibitjö̧ma, ba̧kwelöjatebö chitji̧munöbi, chi̧tji̧mu tupadanö jojodönöbi ötjönö kwösödo jö̧ka̧li̧danö jobadönö dösölö̧jinö ösödö kwö̧jobö. Jau David, chöwaisa, Isabenö Jo̧ma okobe deinö kwöpöjojodönö jwiinö söbebö loakobe, ja̧danö la'akatjöda chi̧tji̧munö, –Chöpöjojodö, –jö̧ba̧lö omukwatökönö, ba̧kwelöjatebö jobadönö dösölö̧jinö ösödö kwö̧jo, —jö̧ba̧lö aebinobe Jonatanma, Davidnö.

¹⁶ Ja̧danö jejenö yöba̧lajadö, Jonatanbi, Davidbi isabenö ösödabikwawö tjö̧jakwa̧ wene yemidanö yöbawö tjujuninobe. Ja̧danö, yöbawö junö, Jonatanma yöa̧linobe, —Isabenö chösödi̧ma, Isabenö Jo̧ Dios okobe deinö David öpöjojodönö lȩebo, —jö̧ba̧lö.

¹⁷ Ja̧danö Jonatan jwiinö iteda ösödakwawi̧danö Davidnö ösödobetjö̧, Davidbi isabenö dösölö̧jinö ösödabikwawö ö̧jakwa̧ wene yöbawö ujunobö aebinobe, Jonatannöbi, i̧tji̧mu tupadanö jojodönöbi ösödabikwawö ö̧jakwa̧ wenema, ja̧danö aeba̧ja̧danö Davidbi yöbawö ujuninobe.

¹⁸ Ikenama, yöbawö junajadö, Jonatanma Davidnö yöa̧linobe: —Itekwayima, yö̧te jawo̧ yabayo̧ laebakwa̧ jawa ba'ali dukwakobe, ja̧danö kwiteakanö bo̧ma deobetjö̧, chabe'doma deköbi̧ omukwatakobe.

¹⁹ Jo̧kwajabetjö̧, itekwayi dewachö yi̧benakwö, ajayinö wene ji̧nena kwuju̧kwawinemi kwu̧ju̧kwawo, inawa Ezel mikwawa pjeanö.

²⁰ Ja̧danö, ötjöma jobe ichibö, wapunukwa nayunubiya 'bötocha, ju'wi jaye 'bötobedanö.

²¹ Ja̧danö, 'böbajo̧, chömöayo̧nö wetocha, –Nayunu isakwö emaji, –jö̧ba̧lö. Ja̧danö, isakwemi, –Kwöbaledajabe, baikwönönö isakwö ichi, –jö̧ba̧lö yöta̧lobe kwa̧ja̧kwitjö̧ma, kwöwaisakwo̧ja, isabenö wene jwia jö̧ba̧lö. Jau David, Isabenö Jo̧ yaba̧lo̧ ö̧ji̧ wene isabenö ji̧danö, isabenö wene yötawakwö, jejenö nayunu isakwo̧nö yöta̧litjö̧ma, wene jwiobetjö̧ yöta̧lakobe. Ja̧danö, wene jwiinö kwichena, ökwönö labokobetjö̧.

²² Jo̧kwaijayonö chömöayo̧nö, –Ina kwichiba, tupakwöda isakwi, –jö̧ba̧lö jwötitjö̧ma, kwöwaisakobe, Isabenö Jo̧ma dökibajobe weobe jö̧ba̧lö, ja̧danö juluwanö lakebobö ja̧kobe.

²³ Ja̧danö jo̧da dö̧ja̧kwa̧ wene yöbawö dujunaja̧ma, Isabenö Jo̧ma dö̧'da̧de ja̧nö a̧ja̧kwajabe, ja̧danö jo̧bada eda̧lö pjaatakobe, yöbawö dujunaja̧danö ba̧kwelöjatebö ja̧bö dö̧jobö, —jö̧ba̧lö yöa̧linobe Jonatanma.

²⁴ Jejenö yöa̧lökwe, Jonatan weaja̧danö Davidma mejebe uju̧kwawinobe. Ja̧danö, yö̧te jawo̧ yabayo̧ laebenama, ba'ali tjukwobö öbamatinobe Saulma.

²⁵ Ba̧kwelöjatebö bamatajitjadanö, la'aka luwo̧ Saulma iteda iteaka tjöekwemi ö'öbösakanö öbamatinobe, ja̧danö badeibö Jonatan öbamatinobe, ja̧danö jakwölakwö Abner mikwo̧ öbamatinobe. Jo̧kwaijayonö, David iteakatjö, deinobe.

²⁶ Jo̧kwaijayonö David deijayonö, ja̧ ajayi mölema abebö a̧ja̧kwinokobe Saulma, baikwö omukwatö: —Aaa, babe möle ju'wi otidajabetjö, usula yȩekwajena, Dios öba a'o ichibobö jwienanö. Itekwayi Dios öba a'o tjichibakwedö tjidichawi̧danö, wame jawa usula dichö loaja̧ ikenada ichena, —jö̧ba̧lö.

²⁷ Jo̧kwaijayonö, jemi ikena mölebi, jawo̧ yabayo̧ laebaja̧ ikena mölema, David iteakanö deinobe. Ja̧danö, jejenö deiökwe, Saulma Jonatannö abebö a̧ja̧kwinobe, —Tajawedö madabi, babebi ichö̧kö̧ Isai itji̧ Davidma? —jö̧ba̧lö.

²⁸ Aebökwe, Jonatanma atadinobe, —Davidma ötjönö aeba̧linobe, Belenbe ba'ali junö i̧'yobö.

²⁹ Baikwö yöba̧lö aebijatö, –Chömöledöma Belentjö Diosnö tjiyakwedö, ja̧danö chöpöema chȩwa̧jobö weajabe, jo̧kwajabetjö̧ isabenö ötjönö kwösöditjö̧ma, jobadökwö ja̧ ba'ali chujunobö webitjö, –jö̧ba̧lö David aeba̧linobe. Jo̧kwajabetjö̧, jobe ȩwa̧jinobetjö̧, bai ökwökwö kwö̧kö̧, —jö̧ba̧lö atadinobe Jonatanma.

³⁰ Jejenö atadiökwe, Saulma jwiinö ödameakwinobe, ja̧danö dameakwö Jonatannö yöa̧linobe, —Ökwöma sulabo̧ja, jilekwebö̧kö̧kwö sulabenö ja̧buju jitji̧ja. Chöwaisa, ökwöma Isai itji̧ Davidnö pjakatöbö omukwatö kwujunajabe. Isabenö jo̧banö pjakatobetjö̧ taba lö̧jakwo̧ja, ja̧danö kwojo'doma taba lö̧jakwuju, –La'akatjöda Jonatannö 'yatebinökötjö̧bö, –jö̧ba̧lö.

³¹ Wajwiköbiji̧, ina jo̧ba Isai itji̧ yaba̧lo̧ ö̧jayi, la'akatjöda inesö la'aka luwo̧ bakibökakwo̧ja, ja̧danö kwi̧tji̧mu tupadanö jojodöma la'akatjöda luwedö batjibökakwedö. Jo̧kwajabetjö̧, Davidnö jwöbö, chö̧jobekwö ichejebinö, isabenö jo̧banö kwabö lotakobetjö̧, —jö̧ba̧lö weinobe Saulma.

³² Jö̧a̧lökwe, Jonatanma atadinobe, —Tajawedö jo̧banö kwabö lodobö? David sulabenö ja̧inama di̧ya? —jö̧ba̧lö.

³³ Aebökwe, Saulma dameakwö itea otokwöte Jonatannö ikwinobe, itji̧ Jonatannö ö̧ja̧matekwobö. Jejenö ikwiökwe, Jonatan öwaisachibinobe, —Isabenö chabe'doma Davidnö kwabö loobö omukwatö ujunajabe, —jö̧ba̧lö.

³⁴ Jejenö waisachibö, Jonatanma jwiinö ölabinobe, ja̧danö a̧la̧ibö tjukwȩko̧tjö laebinobe. Ja̧danö, ja̧ möle, jawo̧ yabayo̧ laebaja̧ ikena möle kwakwawa ukwinokobe Jonatanma. Abe'do Saul Davidnö taba lö̧jinö sulabenö ja̧iökwe, Jonatanma jwiinö o̧'wo tjoachinobe ömöledöso̧ Davidnö, ja̧danö o̧'wo tjo̧achö ja̧nö, ukwinokobe.

³⁵ Jemi ikena möle yȩayi, Jonatanma Davidnö edö i̧'yinobe mejebe, ajayinö yötja̧linadanö, ja̧danö ömöayo̧ tjemunö öbibö i̧'yinobe.

³⁶ Ja̧danö, Jonatanma ömöayo̧ tjemunö weinobe, —Nayunu 'bötocha, jo̧kwajabetjö̧ 'bötaja̧ kwemobö ö'öbakwawi, —jö̧ba̧lö. Ja̧danö tjemu ö'öakwawonö, tupakwö 'böinobe nayunuma.

³⁷ Ja̧danö 'böajemi tjemu ichibenama, Jonatanma jwöinobe, —Ina, nayunuma tupakwö 'bötajabe, —jö̧ba̧lö.

³⁸ Ja̧danö ju'wibi jwöinobe, —Japö, juluwanö isakwaji, teada̧lökönui, —jö̧ba̧lö. Jejenö weökwe, Jonatan ömöayo̧ tjemuma uluwo̧ 'böaja nayunuma ko̧ko̧dö ichejebinobe uluwo̧ Jonatan ö̧jobekwö.

³⁹ Jo̧kwaijayonö, tjemunö yöa̧lobedanö ichejekwijayonö, isabenö Davidnöda yöa̧linobe Jonatanma. Jo̧kwaijayonö, tjemuma ja̧ baledi̧ma wajwiinobe, sule Jonatanda, Davida isabenö yöa̧li̧ okwa jawa tjöwaisinobe.

⁴⁰ Ikenama, Jonatanma tjemunö 'böpöbi, nayunubi iyö weinobe, —Bi̧ya e'ewö comunidadbe da̧ji̧, —jö̧ba̧lö.

⁴¹ Ikenama, tjemu ȩwa̧jaja okobema, Davidma inawiya o̧penö uju̧kwawajelö labebö, Jonatan ö̧jobekwö 'ya̧wibö, Jonatan öba a'ö öba nijakwö wapötakwanö bȩbachibö ja̧inobe. Ja̧danö, ösödabikwawö du̧batö, tjubudekwinobe, jo̧kwaijayonö Jonatan ubudekwi̧tjö bajalekwönönö nöinö ubudekwinobe Davidma.

⁴² Ja̧danö Jonatanma Davidnö yöa̧linobe, —Ötjökwö wene jwibö ja̧nö labebö kwi̧'yo. Jau David, ökwödöma ida̧ökö yöbawö dujunajabe, Isabenö Jo̧ ö̧ji̧ wene isabenö ji̧danö, isabenö otiwanö dö̧jakwa̧ wenema. Jau David, yöbawö dujunajabe, –Isabenö Jo̧ma dö̧'da̧de ja̧nöbi, di̧tji̧mukwena tjö̧'da̧de ja̧nöbi yöbawö dujunina ba̧kwelöjatebö domukwatobö pjaatakwo̧, ba̧kwelöjatebö dösölö̧jinö ösödabikwawö dö̧jakobetjö̧, –jö̧ba̧lö. Jo̧kwajabetjö̧ ötjökwö wene jwiinö labebö kwi̧'yo, —jö̧ba̧lö yöa̧linobe Jonatanma Davidnö. Ikenama Davidma a̧la̧ibö laebinobe, ja̧danö Jonatanma comunidadbe ȩwa̧jinobe.