1 Samuel 2 - Dios Iwene

Ana Diosnö ösödö yöja̧lina jawa

¹ Jejenö jitji̧nö Dios ömöayo̧ baibanö iyaju, Anama Diosnö ösödö yöja̧linobe baikwö: —Isabenö Jo̧nö omukwatö chomajadenö cho̧'wo ösöwachibobe, Isabenö Jo̧ma isabenö chujuluwachibanö pjaatajabe. Isabenö Jo̧ Chuluwo̧, chö̧jibinö pjakatobetjö̧ chöpöjojodönö otobe, juluwöködö jö̧ba̧lö.

² Isabenö bakwo̧bi deobe ökwödanö suli̧ jwibo̧ma Isabenö Jo̧ chuluwo̧, isabenö ökwödajayo̧ tjösödökwema deobe. Isabenö ökwödajayo̧ inawa 'diawa tjöbeba̧lö kwöji̧danöbo̧ma deobe Chuluwo̧ Dios.

³ Ökwödö Diosnö öpöjödadöma otiwadösa jö̧ba̧lö yöka̧laduwi̧ma kabatakwawaduwi, baikwö yöta̧la, Isabenö Jo̧ma okobe jwiinö waiso̧ Dios, ja̧danö jo̧bada jojodö ja̧bö tjö̧ji̧ badedö edo̧ma, otiwojobö sulojobö jö̧ba̧lö, jo̧kwajabetjö̧ ju'wedötjö bajalekwönönöbedösa jö̧ba̧lö yöba̧lökönaduwi.

⁴ Isabenö Jo̧ma badedö edö jweebobe, baikwö wanedö yöta̧la, juluwadö 'böawa waisadö tjö'böpöbiya 'deawajabe, tjujulu jwitjinö, ja̧danö tjujulu jwibadöma tjujuluwachibajabe.

⁵ Ajayinö tjomeawachibanö kwinadöma, awi̧chi̧ tjöbö otikwa isakwadö batjibajabe, tju̧kwa midö tjemobö, ja̧danö ajayinö a̧wi̧chi̧ lö̧jinawö̧ma otiwanö tjukwobe. Ja̧danö ajayinö o̧'wo tjo̧achö ji̧tji̧mu debinujuma, jo̧'wo ösöwachibanö ba̧jȩkwadönö jelemutjö̧ du̧ju̧tajanö 'yajebajabe, ja̧danö ji̧tji̧munö ba̧jekwadönö 'yabebinujuma jo̧'wo tjo̧achuju bajibajabe.

⁶ Isabenö badedö edö jwebebo̧ Isabenö Jo̧ chuluwo̧ma, woawabi ja̧kwawabi luwo̧ma jo̧bada. Ju'wedönö ö'wö batjibobö weonö, ju'wedönö 'yatja̧lobö webo̧ Diosma.

⁷ Ja̧danö ju'wedönö jwibadö usula jojodö batjibobö weonö, ju'wedönö nöinö juna̧ladö batjibobö webo̧ Isabenö Jo̧ma, nijakwönö jwibato̧bi, möakwö kabebo̧bi jo̧bada.

⁸ Isabenö otiwanö pjabato̧ Isabenö Jo̧ma, usula jojodö niji̧so̧pjanö ba̧jadönö, niji̧sopja tjö̧bemitjö kabebo̧, ja̧danö jwibadönö ökwölasopja̧nö tjö̧bemitjö otiwanö kabebo̧, la'aka luwedö tjö'da̧de tjö̧bamatobö, ja̧danö otiwanö tjomukwatawö̧ tjiteaka ba̧jadö batjibobö. Jobekwö webo̧ Isabenö Jo̧ma, Jo̧bada bö̧jȩ la'aka wa̧pedö ujuninobetjö̧, ja̧danö la'aka wa̧pedajo̧, jo̧ba̧da bö̧jebi wa̧pedö ujuninobetjö̧.

⁹ Isabenö Jo̧ma isabenö tjöeba̧lakwo̧ jo̧banö tjo̧'wo wana̧ladönöma, jo̧kwaijayonö sulabedönö yȩa'wo okwa debö tji̧'yobö weakwo̧. Jau, isabenö idöda tjujulunö tjujuluwökakwedö bö̧jȩ jojodöma, Isabenö Jo̧da ujuluwakwo̧ma.

¹⁰ Jo̧banö öpöjödadönö isabenö tji'delachajinö söbebö loakwo̧ Isabenö Jo̧ma, isabenö böba ökwödi̧danö mölȩjebetjö labinö ökwöakobe jobadönö lȩebakwa̧ma. Isabenö bö̧jȩ ba̧kwemeachibanö ju̧kwadönö badedö edakwo̧ Isabenö Jo̧ma, ja̧tjina otiwojobö sulojobö jö̧ba̧lö, ja̧danö iteda ujunajökwe la'aka luwo̧nö isabenö ujulu iyakwo̧, iteda omudawö ujunajökwenö, —jö̧ba̧lö yöja̧linobe Anama, Diosnö ösödö.

¹¹ Jemi ikenama Elcanama ȩwa̧jinobe itebo Ramá comunidadbe ömöledökwö, jo̧kwaijayonö itji̧ Samuelma okobe Silo comunidadnö ö̧jibinobe, ja̧danö Eli öba a'otjö janö, Isabenö Jo̧ wei̧ otidö ö̧jinobe Samuelma.

Eli i̧tji̧mu sulabenö ja̧bö tjö̧jina jawa

¹² Eli i̧tji̧muma, isabenö sulabenö otidö tjö̧jinobe. Diostjö jojodötjö tjö'da̧de pjabatö tjotidinajayonö, Isabenö Jo̧nö otiwanöma tjomukwatinokobe, ja̧danö wei̧ma tja̧ja̧kwinokobe.

¹³ Jobe Silo comunidadtjö Dios weina omukwatökönö sulabenö ja̧tjina baikwö laebobe: Bakwo̧ Diosnö kwabö juwö iyenama, Diostjö jojodötjö tjö'da̧de pjabato̧ ömöayo̧ma 'yi̧ainobe pa̧laka'do̧ itebia toawa'do̧ jo̧bekwö itebia tibatö wi'yekwaka wapö'ikwa ji̧ jawaka do̧ba̧lö,

¹⁴ ja̧danö itebia tibatö wi'yekwaka pa̧laka'do̧ okwa tibatiainobe, okobe jwiinö tibatö wi'yebaja̧ma Diostjö jojodötjö tjö'da̧de pjabato̧ u̧kwa̧ baibanö. Jejenö ba̧kwelöjatebö ja̧biatjinobe Silo comunidadtjö, jojodö Diosnö kwabö juwö tjichenama.

¹⁵ Ja̧danö, jemi tupakwö baikwöbi sulabenö ja̧tji̧nobe Eli i̧tji̧muma. Ju'wikwenama, kwatjajökwe o̧te ina Diosnö iyö tjujuwapji, tjömöayo̧ma abönö 'yi̧ainobe iyo̧ ö̧jobekwö, ja̧danö iyakwo̧nö yöba̧liainobe baikwö: —Itebia ina o'di iyitjö, toköbaja̧ itebia öpöjöda tjö'da̧de pjabato̧ma, o'dida ösöda, söobö, —jö̧ba̧lö yöba̧liainobe Eli i̧tji̧mu tjömöayo̧ma.

¹⁶ Jejenö yöalökwe Diosnö iyo̧ öpöjödö, —Teada̧li̧, abönö tjö'da̧de pjabato̧ o̧te ujuwobö jo̧be, ikenama okobe jwiinö kwösödi̧ kwemo, —jö̧ba̧lö ataditjö̧ma, —Jejenömaökö, babeda iyitjö, kwiyökötjö̧ma emöda chemocha, —jö̧ba̧lö atadiainobe sulabenö. Jobekwö Dios weina a̧ja̧kwökönö sulabenö ja̧biatjinobe Eli i̧tji̧muma.

¹⁷ Jejenö ja̧tjiökwe, Isabenö Jo̧ma jwiinö öpöjödinobe, —Isabenö bidöma sulabedö, jojodö ötjönö tjiyi̧ma mikwawökö ji̧ jö̧ba̧lö sulabenö omukwatadö jö̧ba̧lö.

Samuel Dios öba a'o ö̧jina jawa

¹⁸ Samuelma, ina tjemu bo̧, Dios öba a'otjö otidö ö̧jinobe, tjö'da̧de pjabatadö 'dutjawi̧danö pjewö̧ka̧do̧ linotjö otikwa̧do̧ otiwa̧do 'dubawö.

¹⁹ O̧bakwena Samuel ojo'doma linotjö tjö'da̧de pjabato̧ 'duawi̧sa̧do̧ 'dö̧biajinobe, ja̧danö o̧bakwena Diosnö ösödö iyö tjichenama, Samuelnö iyiajinobe.

²⁰ Ja̧danö, jejenö tjichiökwe, Elima ba̧kwelöjatebö Elcananöbi ilekwo Ananöbi ösödö jobadönö yöba̧liainobe, —Bisuma isabenö otiwanö Isabenö Jo̧nö ösödö abebinuju, ja̧danö ja̧ ajebina omukwatö, ju'wedö kwi̧tji̧muduwinöbi 'yajebobö ateba Isabenö Jo̧nö, —jö̧ba̧lö yöba̧liainobe Elima Elcananöbi, Ananöbi. Ja̧danö jemi ikenama tjejube ȩwa̧jiatjinobe.

²¹ Ja̧danö, Eli aebi̧danö pjaatinobe Isabenö Jo̧ma, Ananö lȩlöinö edö, ji̧tji̧mu ömadönö wamedukwanöbi, ji̧tji̧mu ya̧dönö du̧ju̧tajanöbi 'yajebinobe. Ja̧danö, jitji̧ Samuelma Isabenö Jo̧ öba a'o ja̧nö ö̧da̧peachinobe.

I̧tji̧mu sulabenö ja̧bö tjö̧ji̧ Eli a̧ja̧kwina jawa

²² Elima jwiinö pöe baibinobe. Ja̧danö, pöe ja̧nö, Eli̧ma iteda i̧tji̧mu sulabenö ja̧bö tjö̧ji̧ wene a̧ja̧kwiainobe, baikwö: —Eli i̧tji̧mu Diostjö jojodötjö tjö'da̧de pjabatadöma isabenö sulabenö ja̧badö israel jojodönö, ja̧danö ju'wibi Dios eju apjude pjeanö otidadö ya̧dönö sulabenö 'da̧'da̧bö ju̧kwadötö, —jö̧ba̧lö a̧ja̧kwinobe Elima.

²³ Jejenö a̧ja̧kwö, Elima i̧tji̧munö yöali̧nobe baikwö: —Chi̧tji̧mu, tajawedö sulabenö ja̧köbaduwa jejenöma? Sulabenö ja̧köbaduwi̧ma, okobe deinö jojodötjö cha̧ja̧kwobe.

²⁴ Ja̧köbaduwi̧ma sula chi̧tji̧mu, ja̧köbaduwa. Isabenö Jo̧ ömöledö Israel jojodö ökwödönö yötjawi̧ma, isabenö sulabenö ja̧köbaduwi̧ wene yötjawobe.

²⁵ Baikwö yötawaduwakwö chi̧tji̧mu, ökwödö sulabenö ja̧köbaduwi̧ma, jojodönödama sulabenö ja̧böködöja, Diosnöda sulabenö ja̧badöja, jwiinö labi̧. Kwöwaisaduwa, jojodö ju'wedö jojodökwö wene tjujuna̧lenama, Dios pjaatena, wene jwiamachibobö, ¿jö̧tö? Jau chitji̧mu, Diosda wene juna̧ladö tjö̧'da̧de ja̧nö pjaatobö jo̧be, jojodö jojodökwö wene tjujuna̧lenama. Jo̧kwaijayonö, jojodö Diosnö sulabenö ja̧tjenama, pjabato̧ deobe wene tjujuna̧li̧ jwiamachibanö pjaatoböma chitji̧mu, Diosnöda sulabenö ja̧tjobetjö̧. Jo̧kwajabetjö̧, ökwödö sulabenö ja̧köbaduwi̧ma inesö labi̧, Diosnöda sulabenö ja̧köbaduwobetjö̧ chitji̧mu, kabatakwawaduwi, Diosma ökwödönö lȩebapji jö̧ba̧lö, —yöa̧linobe Elima i̧tji̧munö. Jo̧kwaijayonö, jejenö yöa̧lijayonö, tjabe'do yöa̧li tja̧ja̧kwinokobe Eli i̧tji̧muma, Diosma ida̧ökö jobadönö lȩbebö kwabö loakwa̧ omukwatö ujuninobema, tja̧ja̧kwinokobe.

²⁶ Ja̧danö, Samuelma otiwanö öda̧peachinobe, ja̧danö Isabenö Jo̧ öba a'otjöbi, jojodö tjöba a'otjöbi otiwanö ja̧bö ö̧jiawö, Diosbi jojodöbi Samuelnö tjösödinobe, otiwanö ja̧bö jo̧ jö̧ba̧lö.

Dios Eli ömöledönö öpöjödö kaatibina jawa

²⁷ Ju'wi möle bakwo̧ Dios yöawi̧ yöbawo̧ma Eli ö̧jobekwö ichö yöawinobe Elinö: —Baikwö yöawobe Isabenö Jo̧ma ökwönö, Damötjö̧ kwa'dödö ina egipto nijinö ja̧nö faraon tjömöayedö tjö̧jayi, ötjöma kwa'dömine Aaronnö chöwawachijatö, ¿jö̧tö?

²⁸ Ja̧danö, bakwasotenia jojodötjö, okobe deinö israel jojodötjö kwa'dö Aaronnöda omudawö chujunijatö, ötjötjö jojodötjö dö'da̧de pjabato̧ baibanö, ¿jö̧tö? Jau, kwa'dö Aaronnö wetijatö, jo̧bada, ja̧danö i̧tji̧munöda ötjönö iyawöte mesasöte wamenö iyawa kwujuwaduwobö, ja̧danö ökwödöda chöba a'otjö omewi̧ jawa kwujuwaduwobö, ja̧danö ö̧kwödöda tjö'da̧de pjabato̧ 'duawa̧do̧ 'dubawö chöba a'otjö kwotidaduwobö, ¿jö̧tö? Ja̧danö ökwödö Aaron itji̧mu tupadanö jojodönö chiyijatö, okobe jwiinö israel jojodö ötjönö juwö tjiyi̧tjö, ökwödöbi kwukwaduwobö, ¿jö̧tö?

²⁹ Jo̧kwajabetjö̧, tajawedö jojodö kwabö juwö ötjönö tjiyi̧bi, ju'wi jaye ötjönö tjiyi̧bi kwöpöjödaduwobeda, mikwawökö ji̧ jö̧ba̧lö? Ja̧danö tajawedö ötjönö otiwanö kwomukwato jö̧ka̧li̧tjö bajalekwönönö kwi̧tji̧munöda otiwanö kwomukwatobeda, ötjönöda jojodö tjiyo jö̧tja̧li̧ jawa kwitji̧munöda iyö. Isabenö chömöledö israel jojodö tjiyi̧ jawatjö, inesö otiwa jawa, ötjönöda tjiyo jö̧tja̧li̧ jawama do̧kataduwajabe, ja̧danö ja̧ kwanö kwo̧tewachaduwobe, —jö̧ba̧lö yöawinobe Dios yöawi̧ yöbawo̧ma Elinöma.

³⁰ Tupakwö yöawinobe Dios yöawi yöbawo̧ma Elinö: —Jo̧kwajabetjö̧, jejenö sulabenö ja̧köbaduwitjö̧, baikwö yöawobe Isabenö Jo̧, israel jojodö tjuluwo̧ Diosma, Isabenö yöbawö chujunijatö kwömöledönö, Aaronbi, i̧tji̧mu tupadanö jojodöbi ba̧kwelöjatebö chöba a'otjö weti̧ otidö tjö̧jakwedö jö̧ba̧lö, jo̧kwaijayonö baikwö yötawakwö, la'akatjöda ja̧ wene badekwachökakobe ökwödönö, baikwö yötawa: Ötjönö otiwanö omukwatö ju̧kwadönöma, ötjöbi balekwa mikwa otiwanö jobadönö omukwatö chö̧jocha, ja̧danö ötjönö öpöjödadönö, ötjöbi balekwa mikwa chöpöjödocha jö̧ba̧lö. Ja̧danö ökwödöma ötjönö otiwanö omukwatökönö kwöpöjödaduwobetjö̧, Aaronnö yöbawö chujuninama ökwödönö badekwachökakobe la'akatjöda.

³¹ Isabenö yötawakwö Eli, ja'yubenö lekwajabetjö kwömöledö tjujulu söbebö lotocha, ja̧danö kwabe'dotjö tupadanö jojodö tjujulu söbebö lotocha, ökwödötjö bakwo̧bi pöe baibökenanö.

³² Isabenö o̧'wo tjo̧achö kwö̧jaduwakwedöja, ja̧danö ju'wedö israel jojodönönö otiwanö pjatatakwa̧ edö kwo̧'woduwi suli̧nö kwedaduwakwedöja, ökwödöbi jejenö demowe jö̧ba̧lö, ja̧danö kwitji̧mu tupadanö jojodötjö bakwo̧bi damö ichibökakwo̧.

³³ Okobe deinö ju'wedö debö tji̧'yonö, ökwö kwi̧tji̧mu tupadanö jojodötjö sule bakwo̧nöda wetocha tjö'da̧de pjabato̧ otidobö, jo̧kwaijayonö jo̧babi jwiinö usula emawakobe. Nöinö budekwabinö ö̧jajabetjö̧ öbajale tjewawinö baibakwo̧, ja̧danö okobe deinö ju'wedö kwi̧tji̧mu tupadanö jojodönö kwölöte'onö kwabö lotjakwedö jojodöma.

³⁴ Ja̧danö baikwö kwöwaisakwo̧ja Eli, yötawi̧ wenema isabenö yötawobe jö̧ba̧lö, bakwöta möle, kwi̧tji̧mu Ofnibi, Fineesbi bakobe debö tji̧'yakwedö. Ja̧danö, jejenö yötawaja̧danö baibenama, ju'wibi öwaetjöda öwawakobe, okobe jwiinö ju'wi jaye kwömöledönö yötawaja̧bi isabenö baledakobe jö̧ba̧lö.

³⁵ Ja̧danö, ökwönöbi, kwitji̧mu tupadanö jojodönöbi kabatibö, ökwö kwö̧jinemi, balekwo̧nöda kabebö chujunakwo̧sa, isabenö otido jö̧a̧li̧danö otidakwo̧nöma. Jo̧bama isabenö okobe jwiinö chösödi̧danö, ja̧danö chomukwati̧danö otidö ö̧jakwo̧, ja̧danö jo̧banö iteda i̧tji̧mu tupadanö jojodönö chiyocha, jo̧badanö otiwanö tjotidakwedönöma. Jau Eli, jobadöma ba̧kwelöjatebö omudawö chujunajökwe la'aka luwo̧ öba a'otjö otidö tjö̧jakwedö.

³⁶ Ja̧danö jobadöma ötjötjö jojodötjö dö'da̧de pjabatö tjö̧jonö, ökwö kwi̧tji̧mu tupadanö jojodötjö ina 'ya̧baladöma usula tjemakwedö. Usula emawö, kwö̧bajena balekwo̧ chujunajökwenö bȩbachibö atjeba̧lakobe, ja'yubeda baladabi, kwakwawabi tjujuna̧lobö, ja̧danö jo̧banö atjeba̧lakobe, Ötjönö Diostjö jojodötjö tjö'da̧de pjabatadötjö bakwo̧ ömöayo̧ batibanö junitjö, ötjöbi ja'yubeda kwakwawa chukwakobetjö̧, —jö̧ba̧lö yöawinobe Dios yöawi̧ yöbawo̧ma Elinöma.