1 Samuel 19 - Dios Iwene

Saul Davidnö kwabö loobö isakwina jawa

¹ Okobe deinö otiwanö Davidnö tjösödiökwe, Saul öpöjödinobe, ja̧danö Davidnö kwabö loobö omukwatinobe. Jejenö omukwatö, itji̧ Jonatannöbi, okobe deinö ju'wedö yö̧ne ömöayedönöbi yöa̧linobe, —Davidnö kwabö lodobö jo̧be, —jö̧ba̧lö. Jejenö yöa̧liökwe, Saul itji̧ Jonatanma öpöjödinobe, isabenö jwiinö Davidnö osödobetjö̧.

² Jo̧kwajabetjö̧ Jonatanma Davidnö yöawinobe, —Chabe'do Saulma ökwönö kwabö loobö isakwobe, jo̧kwajabetjö̧ ö'wiyakwawönö kwöjo. Itekwai yȩayi, jelobe ka̧putjö ju̧kwawö kwö̧jo.

³ Ja̧danö, kwuju̧kwawajena yö̧neawinö, chabe'donö öbibö chi̧'yocha, ja̧danö jobe ja̧nö chabe'donö yöta̧locha ökwönö. Ja̧danö, okobe jwiinö chabe'do yöa̧li̧, ökwönö yötawocha, —jö̧ba̧lö yöa̧linobe Jonatan, Davidnö. Yöa̧lökwe, Jonatan yöa̧laja̧danö uju̧kwawinobe Davidma.

⁴ Ja̧danö, ikena möle, yöawinadanö Jonatanma abe'do Saulnö yöa̧linobe, —Chabe'do la'aka luwo̧, isabenö ja'yubebi sulabenö ja̧köboböma jwiobe kwömöayo̧ Davidnö. Omukwatibi chabe'do, jo̧bama la'akatjöda ökwönö sulabenöma ja̧binö̧kö̧, ja̧danö ju'wibi okobe jwiinö ja̧bö ö̧ji̧ma, bakwainö ökwönö pjaatakwawa baibanö ja̧bö ö̧jajabe chabe'do.

⁵ Ja̧danö filisteo jojo Goliatnö kwabö loina omukwati chabe'do, isabenö debö i̧'yo jö̧a̧linobe, Goliatma jwiinö juluwo̧ ö̧jinobetjö̧. Jo̧kwaijayonö iteda otiwanö ö̧jakwa̧ omukwatökönö, Goliatnö kwabö loobö i̧'yinobe, ja̧danö Davidnötjö̧ Isabenö Jo̧ma okobe deinö israel jojodönö dö̧jibanö otiwanö pjaatinobe. Ja̧ möle ökwöbi edö, kwo̧'wo ösödachibanö kwedijatö chabe'do, ¿jö̧tö? Jo̧kwajabetjö̧ tajawedö babe Davidnö kwabö loawa kwösöda chabe'do? Isabenö jo̧banö suli̧ kwöwaedoböma jwiobe chabe'do, isabenö ja'yubebi ökwönö sulabenö ja̧okobetjö̧, —jö̧ba̧lö.

⁶ Jonatan yöa̧liökwe, Saulma otiwanö a̧ja̧kwinobe, ja̧danö Jonatannö yöbawö ujuninobe, —Duluwo̧ Isabenö Jo̧ yabalo̧ ö̧ji̧ wenedanö, ju'wibi isabenö yötawakwö, Davidnö kwabö lotökakobe, —jö̧ba̧lö.

⁷ Jemi ikenama, Jonatanma Davidnö jwöinobe, ja̧danö Davidnö yöawinobe, okobe jwiinö yöa̧laja̧bi, abe'do atadaja̧bi. Ja̧danö Jonatanma Davidnö öbibö i̧'yinobe Saul öba a'o ujunobö, ja̧danö yemidanö Saul öba a'o otidö ö̧jinobe, ajayinö otidö ö̧jinadanö.

⁸ Jemi ikenama, ja'yubenö lekwajabetjö̧, yemidanö filisteo jojodökwö ölakwabikwawa ji̧nobe. Jo̧kwajabetjö̧ ömöayedö ölakwabikwawa jojodökwö Davidma jobadökwö ölakwabikwawö i̧'yinobe, ja̧danö ba̧jekwadö filisteo jojodönö kwabawö lobö, jwiinö ujuluwinobe, öba a'otjö dötjibajenanö.

⁹ Ikenama, ju'wi möle, Saulma iteda ejunö iteakanö ö̧binobe, ja̧danö otokwöte do̧balö ö̧binobe. Jejenö ö̧bonö, Isabenö Jo̧ weökwe o̧'wo luwo̧ sulabo̧ma juluwanö ichibinobe Saulnö. Ja̧danö, Saul öba a'otjö David arpa pjeonö,

¹⁰ Saulma otokwöte Davidnö ikwinobe, tjöekweminö ikwö tibatö önobö. Jo̧kwaijayonö Davidma döbibajö ö̧jibinobe, ja̧danö otokwöteda tjöekweminö söbibö ji̧nobe. Ja̧danö Davidma Saul öba a'otjö döibajinobe, ja̧danö ja̧ yö̧te Saul itebotjö̧ döibajinobe.

David ilekwo Mical Davidnö jabe'dotjö ö̧jibobö pjajatina jawa

¹¹ Baikwö laebobe David Saul itebotjö döibajina wenema. Ja̧ yö̧te Saulma iteda ömöayedönö weinobe, David ejube teada̧lö tji̧'yobö, yȩayi David ejutjö laebena jo̧banö kwabö lotjobö. Jejenö teada̧lö tjö̧jioko, David ilekwo Micalma Davidnö yöja̧linobe, —Babe yö̧teda dökibajobö jo̧be, babe dökibajökötjö̧ma, itekwayi kwabö lotjakwo̧ja, —jö̧ba̧lö.

¹² Ja̧danö, jejenö yöba̧laju, jilekwe Davidnö ventanasa'dotjö nijakwö jwijatinobe, ja̧danö jejenö jobetjö döibajinobe, jo̧banö kwabö lotjapji jö̧ba̧lö.

¹³ Ja̧danö, Davidnö jwijataja̧ ikenama, Micalma kamapjonö o̧'wo jawa jödinobe, ja̧danö o̧'wo jawa uunö, chivo öwö'ye jödinobe, ja̧danö o̧wo jawa 'dujatinobe David ökamijido̧nö, David kamapjonö bo̧bedanö ichejekwakobetjö̧.

¹⁴ Ikena yȩayi, Saul weawö̧ ömöayedöma Davidnö isakwö tjichinobe, jo̧kwaijayonö ichibö abebö tja̧ja̧kwioko, Micalma jobadönö yöja̧linobe, —Chilekwe Davidma ö'wöchobe, kamapjotjö a̧la̧ibobö jwibo̧, —jö̧ba̧lö.

¹⁵ Yöja̧lawö̧, Saulnö yötjawinobe yöja̧laja̧ma, ja̧danö Saul weinobe, —Kamapjobi, kamapjonö bo̧nöbi e'ewö chö̧jobekwö ichejebaduwinö, kamapjonö bo̧nö kwabö lotakobetjö̧, —jö̧ba̧lö.

¹⁶ Weawö̧, o̧do okwa tetjachinobe, Davidnö do̧tjatobö, jo̧kwaijayonö edö, —Ayö, David deobe, o̧'wo jawada bo̧be, —jö̧ba̧lö tjedinobe. Davidnö badekwajökönö, o̧'wo jawa kamapjonö bo̧nöda tjöbadekwajinobe, ja̧danö o̧'wo jawa uunö chivo öwö'yeda tjöbadekwajinobe.

¹⁷ Jejenö balediökwe, Saulma itjiju Micalnö abebö a̧ja̧kwinobe, —Tajawedö omöna jawa chomukwatobö choma'apekwönö ja̧bö, chöpöjojo döibajobö pjakataja̧da? Chöpöjojonö do̧tatobö pjakato jö̧ka̧lijayonö döibajobö pjakatajabe, —jö̧ba̧lö. Aebioko, Micalma jatadinobe, —Davidma ötjönö yebeabinö yöa̧latö, dötibajobö pjakatökötjö̧ma, kwabö lotakwujuja jö̧ba̧lö, jo̧kwajabetjö̧ ötjönö kwabö loapji jö̧ba̧lö, döibajobö pjatatajabe, —jö̧ba̧lö omöna jatadinobe Micalma, jabe'do Saulnö.

¹⁸ Ja̧danö, Saul ö̧jelö döbibajo̧, Davidma Saultjö ö̧jibinobe, ja̧danö Samuelnö edö i̧'yinobe Rama comunidadbe. Jobe ichibö, Samuelnö yöawinobe okobe jwiinö Saul jo̧banö ja̧aja̧ma. Ikenama Samuelbi, Davidbi Rama comunidadtjö Naiot ötjabobe ja̧nö tji̧'yinobe.

¹⁹ Ja̧danö, ju'wedö Saulnö yötjawinobe, —Davidnö tjedajabe, jo̧bama Samuelkwö Rama comunidadnö ö̧jobe, Naiot ötjabobetjö, —jö̧ba̧lö.

²⁰ Yötjawökwe, Saulma iteda ömöayedönö weinobe Naiotbe 'ya̧nö, Davidnö do̧tja̧tobö, jo̧kwaijayonö waekwinobe. Jobe Naiottjö, Dios yöawi̧ yöbawadöma ko̧ko̧kwö tjö̧jinobe, ja̧danö Samuelma tjuluwo̧ ja̧nö tjabönö ö̧jinobe, ja̧danö jobe ko̧ko̧kwadö Dios yöawi̧ yöbawadöma Dios yöawi̧ yötjawinobe. Ja̧danö, Davidnö do̧tjatobö Saul weawö̧ tjichibenama, ja̧ baledi̧ tjedinobe, ja̧danö tjedenama, Dios O̧'wo Luwo̧ma jobadö Saul weawö̧nöbi juluwanö ichibinobe, ja̧danö jobadöbi Dios yöawi̧ yöbawö tjö̧jinobe.

²¹ Jejenö balediawö̧, ju'wedö Saulnö yötjawinobe, —Weköbajawö̧ma Samuel öba a'otjö Dios yöawi̧ yöbawö tjö̧jobe, —jö̧ba̧lö, ja̧danö yötjawökwe, ju'wedönöbi weinobe, Davidnö do̧tjatobö. Jo̧kwaijayonö ja̧bi waekwinobe, jobadöbi ichibö, Dios yöawi̧ yöbawö tjö̧jinobe. Jo̧kwajabetjö̧ yemidanö ömöayedönö weinobe Saulma, wapötakwanö baibanö, ja̧danö jobadöbi Dios yöawi̧ yöbawö tjö̧jinobe.

²² Jejenö balediökwe, bajalianö Saulda Ramabe i̧'yinobe, ja̧danö Ramabe 'ya̧nö, ojwese'do nöe'do Secu ötjabe'do ö'öbö ichibinobe. Jobe ichibajo̧, jemi ju̧kwadönö abebö a̧ja̧kwinobe, —Samuelbi, Davidbi dai tjö̧jobeda, —jö̧ba̧lö. Ja̧danö abebö a̧ja̧kwawö bakwo̧ atadinobe, —Yada tupakwö Rama comunidadtjö Naiotnö tjö̧jobe, —jö̧ba̧lö.

²³ Yöawökwe, Saulma jobe Rama comunidadtjö Naiotbe i̧'yinobe, ja̧danö i̧'yemi ja'ötjö, Dios O̧'wo Luwo̧ma jo̧banöbi ichibinobe, ja̧danö jo̧babi Dios yöawi̧ yöbawö kweachinobe, Rama comunidad Naiotbe ichibenanö baibanö.

²⁴ Ja̧danö, jobe ichibajo̧, ajayinö weajawö̧danö Saulma ökamido̧ 'yobekwö, nijinö banö Samuel öba a'otjö Dios yöawi̧ yöawinobe. Jejenö ja̧ mölebi ja̧ yö̧tebi baledibanö, Saulma a̧do jwibö ba̧nö Dios yöawi̧ yöbawö ö̧binobe. Ja̧danö ja̧ baledina wene omukwatö, yöa̧lakwawa baibinobe, —Tajijö, Saulbi Dios yöawi̧ yöbawadötjö bakwo̧ ö̧jobeji̧? —jö̧ba̧lö.