1 Samuel 18 - Dios Iwene

Saul Davidnö öpöjödachibina jawa

^1-2 Jejenö Saulkwö yöa̧lakwawinobe Davidma, ja̧danö Saulma Davidnö 'da̧batö ujuninobe, iteda yö̧ne ömöayo̧ baibanö. Ja̧danö, ja̧ möle tupakwö, Saul weinokobe Davidnö, itebobe Belenbe ȩwa̧joböma. Ajayinö ȩwa̧jibö öji̧najayonö, ja̧ mölȩ tupakwö Saul ejutjöda yö̧ne ömöayo̧ ö̧jobö ösödinobe Saulma. Ja̧danö ju'wibi baledinobe ja̧ mölema. David Saulkwö yöa̧lakwawenama, Saul itji̧ Jonatanbi jobe ö̧jinobe, ja̧danö Davidnö öwaisachibenama, jwiinö Davidnö ösödinobe Jonatanma: —Isabenö bitema yö̧ne chömöledöso̧danöbo̧, —jö̧ba̧lö. Isabenö otiwanö ösödinobe Davidnö, iteda ösödakwawi̧danö.

³ Ja̧danö, Jonatanma Davidkwö isabenö otiwanö ösödabikwawö tjö̧jakwa̧ wene yöbawö tjujuninobe, —Ba̧kwelöjatebö, yö̧ne dömöledö ja̧nö ösödabikwawö dö̧jakwedösa, —jö̧ba̧lö.

⁴ Ja̧danö Jonatanma, iteda wamesa̧do̧ la'aka luwedö 'duawa̧do̧ma Davidnö iyinobe, ja̧danö ju'wibi iteda itea ölakwabikwawa jawa iyinobe Davidnö, ölakwabikwawadö dutjawa̧do̧bi, kwölöte'obi, 'böpöbi, koleasö̧jȩbi Davidnö ösödö iyinobe.

⁵ Ja̧danö, Saul ömöayo̧ ölakwabikwawa jojo ja̧nö, Davidma okobe jwiinö Saul wei̧ otiwanö otidinobe. Ja̧danö, kabatökönö ju'wedönöbi, ju'wedönöbi ölakwabikwawö ujuluwobö weena, otiwanö waekwökönö ujuluwinobe Davidma. Jo̧kwaiökwe, Saulma Davidnö ösödö ujuninobe, ölakwabikwawa jojodötjö la'aka tjuluwo̧ baibanö. Ja̧danö, ja̧ Davidnö luwo̧ baibanö ujunaja̧ edö, okobe deinö jojodöbi, ju'wedö Saul ömöayedöbi edö tjösödinobe, —Otiwanö Davidnö ujunajabe, —jö̧ba̧lö.

⁶ Jemi ikenama, filisteo jojodönö ölakwabikwawö kabatajadö, Goliatnö kwabö loaja̧ ikena, yemidanö comunidadbe tjȩwa̧jinobe. Ja̧danö ȩwa̧jö tjichibakwajibenama, israel jojodötjö ya̧döma lo̧böbi, baile döböbi latjebinobe, Saul ömöayedö ölakwabikwawa jojodökwö ȩwa̧jobe edö. Jobadö ya̧döma tjo̧'wo ösöwanö latjebinobe, ja̧danö pandero ötjabi̧ pjeböbi, ju'wi musika jawakwöbi, baile döbö

⁷ lo̧tjinobe baikwö: —Saulma otiwanö ba̧jȩkwadö döpöjojodönö milbedönö kwabawö loajabe, Ja̧danö Davidma otiwanö döpöjojodönö diez milbedönö kwabawö loajabe, —jö̧ba̧lö.

⁸ Jejenö lo̧tjiökwe, ödameakwinobe Saulma, ja̧danö yötja̧li̧ öpöjödö yöa̧linobe itedada, —Davidnö Diez milbedönö kwabawö lobo̧ jö̧ba̧lö yötja̧lonö, ötjö inesö la'aka luwo̧nö sule milbedönö kwabawö lobo̧ jö̧ba̧lö yötja̧lajabe, jejenö yötja̧li̧ma, ja'yubenö lekwajabetjö la'aka luwo̧ chö̧bemibi jo̧banö wetjobö jö̧tja̧lena, jo̧bada inesö la'aka luwo̧ baibanö, —jö̧ba̧lö omukwatinobe Saulma.

⁹ Ja̧danö jemi ikenama Saulma Davidnö o̧'wo sulinö edinobe, —Chö̧bemi iteda ö̧bobö ösödena, —jö̧ba̧lö.

¹⁰ Jemi ikena möle, Dios weökwe o̧'wo luwo̧ sulabo̧ Saulnö juluwanö ichibö, usula emawinö ja̧inobe, ja̧danö Saulma ejunö ja̧nö, o̧'wo jwibo̧ ja̧idanö ja̧inobe. Jejenö ja̧onö, ba̧kwelöjatebö pjei̧danö, Davidma Saul öba a'otjö arpa pjeinobe. Ja̧danö, jobe ja̧nö, Saulma otokwöte do̧ba̧lö ö̧jinobe,

¹¹ ja̧danö jöte do̧ba̧lö, Saulma omukwatinobe, —Bötenö Davidnö kwabö lotitjö̧ma, chö̧bemi ö̧bökena, böte ikwö, tjöekweminö ikwö tiachibanö chönocha, —jö̧ba̧lö. Ja̧danö jejenö omukwatö, Davidnö tiatotö jö̧ba̧lö, Davidnö ikwinobe, jo̧kwaijayonö jo̧batjö ö̧jibinobe Davidma. Jejenö dötölatajanö Saultjö ö̧jibinobe Davidma.

¹² Davidnö edö, ja̧danö Dios Davidnö pjaati̧ edö, Saulma öwaisachibinobe, —Isabenö Jo̧ma Davidkwö jo̧, —jö̧ba̧lö. Ja̧danö, Dios O̧'wo Luwo̧ Saulkwö jö̧könö, Davidkwöda ja̧nö pjaatiökwe, Saulma Davidnö yeabinobe, —Bitema la'aka luwo̧ chö̧bi̧ 'döebena, —jö̧ba̧lö.

¹³ Jejenö omukwatö, Saulma öba a'otjö David 'da̧bachibö i̧'yobö weinobe, ja̧danö Davidnö milbedö ölakwabikwawa jojodö tjuluwo̧ baibanö junö, öpöjojodönö ölakwabikwawö i̧'yobö webiainobe. Weökwe, Davidma ömöayedönö öbibö tjöpöjojodönö ölakwabikwawö 'yi̧ainobe, ja̧danö jobadönö juluwajo̧ ȩwa̧jiainobe.

¹⁴ Isabenö Jo̧ otiwanö Davidkwö ja̧nö pjaatobetjö̧, okobe jwiinö ölakwabikwawö ö̧ji̧ma, waekwökönö otiwanö ujuluwinö ölakwabikwawinobe.

¹⁵ Jejenö kabatökönö waekwökönö tjöpöjojodönö ujuluwiökwe, ajayitjö bajalekwönönö yeabinobe Saulma Davidnö,

¹⁶ jo̧kwaijayonö ju'wedö israel jojodöbi, David ömöledö Judasaso jojodöbi jwiinö Davidnö tjösödinobe, —Isabenö bitema otiwanö döpöjojodötjö dö̧jibanö pjabato̧, —jö̧ba̧lö.

David Saul itjijunö emina jawa

¹⁷ Ikenama Saulma Davidnö yöa̧linobe, —Bisuju chitjiju abönö pöonö, ökwö kwilekwo bajibanö wetobö chösöda. Ökwönö atebi̧ma bi̧yada, chömöayo̧ ja̧nö, yebabökönö Isabenö Jo̧ öpöjojodönö ölakwabikwawö kwö̧jobö. Isabenö jejenö yebabökönö ölakwabikwawö kwö̧jitjö̧ma, chitjiju Merab mikwujunö wetocha, —jö̧ba̧lö yöa̧linobe Saulma. Jo̧kwaijayonö, jejenö wamenö yöa̧lijayonö, isabenö omukwati̧ma baikwö omukwatinobe, —Ötjöda Davidnö kwabö lotobö jwiena, filisteo jojodökwö ölakwabikwawö ö̧jobö wetitjö̧ma, jobadöda Davidnö kwabö lotjena, —jö̧ba̧lö.

¹⁸ Jejenö chitjijunö wetocha jö̧a̧liökwe, Davidma atadinobe, —Isabenö mikwawö̧kö̧sa, inesö la'aka luwo̧ o̧joli chö̧joböma. Ötjöma mikwawö̧kö̧sa, ja̧danö chömöledö chabe'dö a'dödöma, mikwawöködö israel nijitjöma, —jö̧ba̧lö atadinobe Davidma.

¹⁹ Ikenama, itjiju Merabnö David ilekwo bajibanö weo jö̧a̧laja̧ma, jelo̧nöda weinobe Saulma, Mehola comunida jojo Adriel mikwo̧nö weinobe, Adriel ilekwoda bajibobö.

²⁰ Ja̧danö, jeluju Saul itjiju Mical mikwujuma, nöinö Davidnö jösödinobe, ja̧danö ju'wedö Saulnö yötja̧linobe, —Kwitjiju Micalma Davidnö ösöduju, —jö̧ba̧lö. Yötjawökwe, Saulma ösödinobe,

²¹ baikwö omukwatö: —Micalnö David ilekwo bajibobö wetakwa̧ yötawitjö̧ma, ja̧ 'daliwadanö jȩna, filisteo jojodö jo̧banö kwabö lotjobö, —jö̧ba̧lö. Ja̧danö, jejenö omukwatö yemidanö Davidnö yöa̧linobe, —Isabenö cho̧jo̧li babibö, chitjiju Micalnö kwemobö jo̧be, —jö̧ba̧lö.

²² Ja̧danö Saulma iteda ömöayedönö weinobe, ju'wedö wajwitjonö Davidnö yötja̧lobö, baikwö: —David, inesö la'aka luwo̧ma ökwönö ösödo̧, ja̧danö jo̧ba ömöayedöbi ökwönö ösödadö, jo̧kwajabetjö̧ itjijunö kwemobö jo̧be, —jö̧ba̧lö Davidnö yötja̧lobö weinobe Saulma.

²³ Weawö̧, yötja̧linobe, ja̧danö yötja̧lökwe, Davidma atadinobe, —Isabenö otiwökena, bakwo̧ mikwawö̧kö̧ma inesö la'aka luwo̧ o̧jo̧li baibobö. Inesö la'aka luwo̧ o̧jo̧li ja̧kwawama isabenö otiwa, nöinö mikwawi̧ ji̧ jawa, jo̧kwaijayonö ötjöma chitea jwibo̧sa, ja̧danö mikwawö̧kö̧sa, —jö̧ba̧lö.

²⁴ Yöa̧lawö̧, Saul ömöyaedöma tjuluwo̧nö yötjawinobe: —Davidma baikwö atadajabe, —jö̧ba̧lö. Ja̧danö yötjawökwe,

²⁵ Saul weinobe: —Baikwö yökawaduwo Davidnö: Ba̧kwelatebö tjilekwamunö tjemakwedö midajitjadanö kwimidoböma öpöjöda Saulma, bi̧yada ösöda. Filisteo jojodö sulabenö ja̧tjina balekwa mikwa jobadönö kwabö loköboböda ösödobe. Ja̧danö Saul badedö omukwataja̧ möle baibakwa̧ abönö jobadö öpöjojodötjö cienbedönö kwabö lobö tjötade bajalesa̧do̧ 'wibebö kwichejebitjö̧ma, tjilekwamunö tjemakwedö midajitjadanö midawa ja̧kobe, jö̧ba̧lö yökawaduwo Davidnö, —jö̧ba̧lö weinobe Saulma. Jejenö webö, isabenö omukwati̧ma, —Filisteo jojodöma Davidnö kwabö lotjena, —jö̧ba̧lö omukwatö weinobe Saulma.

²⁶ Saul yöa̧laja̧ yötjawiökwe, Davidma jwiinö ösödinobe, —Inesö la'aka luwo̧ o̧jo̧li batibobö chösöda, —jö̧ba̧lö. Jo̧kwajabetjö̧, Saul badedö ujunaja̧ möle baibakwa̧ abönö,

²⁷ ömöayedö ölakwabikwawa jojodökwö 'ya̧nö, filisteo jojodötjö ömadö doscientosbedönö kwabawö loinobe, ja̧danö kwabawö lobajo̧, tjötade bajale o̧diju 'wibebö ichejebinobe Saulnö. Ja̧danö Saul öba a'otjö ba̧ja̧dö i̧sebinobe, —Isabenö ja'yubebi ji̧bökönö okobe jwiinö akebaja̧ chiyobe, —jö̧ba̧lö. Jejenö iyinobe Davidma, inesö la'aka luwo̧ Saul o̧jo̧li baibakobetjö̧. Iyiökwe, Saulma itjiju Micalnö weinobe, David ilekwo bajibanö.

²⁸ Ja̧danö, baledi̧ edö, Saulma öwaetjöda öwawinö edö öwaisachibinobe, Isabenö Jo̧ma Davidkwö ja̧nö pjabato̧, jö̧ba̧lö. Ja̧danö ju'wibi edinobe, chitjiju Micalma isabenö Davidnö ile nibebö ösöduju jö̧balö.

²⁹ Jejenö edö, ajayitjö bajalekwönönö jwiinö yeabinobe Saulma, Davidnö, jo̧kwajabetjö̧ jemi tupakwö ba̧kwelöjatebö David öpöjojo ö̧jinobe Saulma.

³⁰ Ja̧danö, filisteo jojodöma kabatökönö israel jojodönö tjujuluwotö jö̧ba̧lö ölakwabikwawö tjö̧jinobe, ja̧danö ba̧kwelöjatebö jobadökwö ölakwabikwawö ö̧jenama, Davidma ju'wedö israel jojodö ölakwabikwawa luwedötjö bajalekwönönö waisanö ölakwabikwawö jobadönö juluwiainobe. Jo̧kwajabetjö̧, jejenö waisanö ujuluwiaiawö̧, okobe deinö jojodöma Davidnö otiwanö tjomukwatinobe, —Isabenö Davidma juluwo̧, ölakwabikwawa waiso̧, —jö̧ba̧lö.