1 Samuel 16 - Dios Iwene

Dios David mikwo̧nö omudawö ujunina jawa, israel jojodö la'aka tjuluwo̧ baibobö

¹ Jemi ikenama, ja'yubenö lekwajabetjö̧, Isabenö Jo̧ma Samuelnö yöa̧linobe: —Samuel, ida̧ökö Saulnö öpöjödö yöta̧lajabe, Saulma chömöledö israel jojodö tjuluwo̧ ö̧joböma chöpöjöda jö̧ba̧lö, ¿jö̧tö? Jo̧kwajabetjö̧, dokwa lekwe ina Saulnö o̧'wo tjo̧achö kwubudekwakwa̧da? Tjowi, budekwö kabati. O̧te tobebi i̧sa̧yunö, ja̧danö jayu e'ewö Belen jojo Isai ö̧jobekwö 'ya̧wi, jo̧ba itji̧mutjö bakwo̧nö omudawö chujunajobetjö̧, israel jojodö la'aka tjuluwo̧ baibobö, —jö̧ba̧lö.

² Yöa̧lökwe, Samuel atadinobe, —Yetabi, jejenö omudawö kwujunajökwenö o̧te tobebö chi̧'yitjö̧ma, Saulma a̧ja̧kwena, ja̧danö a̧ja̧kwö, ötjönö kwabö loena, —jö̧ba̧lö. Atadökwe, Isabenö Jo̧ma yöa̧linobe, —Baikwö ja̧bi, o̧te tobebö kwi̧'yi̧ wene Saul öwaisachibapji jö̧ba̧lö. Pakayasujunö la'akatjöda metu'wo jö̧kujunö öbibö kwi̧'yo Belentjö kwabö juwö kwiyobö, ja̧danö yökawo, –Baikwö chichajabe, belö kwabö juwö Isabenö Jo̧nö chiyobö, –jö̧ba̧lö.

³ Ja̧danö, jejenö yöbawajo̧, Isainö kwa̧debo, kwabö juwö iyawa ba'ali junö ichobö, ja̧danö jo̧ba itji̧mutjö omudawö chujunajökwenö chi̧sebocha, o̧tesobu tokebakwo̧nöma, —jö̧ba̧lö weinobe Diosma Samuelnöma.

⁴ Yöa̧lökwe, Isabenö Jo̧ weaja̧danö ja̧inobe Samuelma, ja̧danö 'ya̧nö, Belenbe ichibinobe. Jejenö ichibiawö̧, Belen jojodötjö luwedöma yetjaibinobe, —Wene dujuna̧liökwe ichibajena, —jö̧ba̧lö, ja̧danö tjö̧bawö Samuel ö̧jobekwö 'ya̧nö abebö tja̧ja̧kwinobe, —Wene jwiinö kwichaji̧, —jö̧ba̧lö.

⁵ Atjebökwe, —Jau, wene jwia, Isabenö Jo̧nö kwabö juwö chichajabe. Ökwödöbi Diosnö iyawa ba'ali kwanö kwichaduwo, jo̧kwajabetjö̧ Dios öba a'o tjichibakwedö tjidichawi̧danö otiwanö wame jawa kwusuladuwi dichawö loköbaduwo, otiwanö Dios öba a'otjö ba'ali kwukwaduwakobetjö̧, —jö̧ba̧lö atadinobe Samuelma. Ja̧danö Samuelma Isainöbi, i̧tji̧munöbi wame jawa tjusula dichö loinobe, ja̧danö Diosnö iyawa ba'ali tjukwobö a̧debinobe.

⁶ Jemi ikenama, ba'ali junö tjichenama, Samuelma Isai itji̧ abönö pöe Eliab mikwo̧nö edinobe, ja̧danö edö, —Isabenö biteda Isabenö Jo̧ omudawö ujunajökwema, —jö̧ba̧lö omukwatinobe.

⁷ Jo̧kwaijayonö, jejenö omukwatiökwe, Isabenö Jo̧ma Samuelnö yöa̧linobe, —Jo̧banö edö wame jawa omukwatökönui, Aaa, bitema otiwo̧, otiwanö möbo̧ jö̧ba̧lö. Ötjöma jo̧banö omudawö junö̧kö̧sa. Ötjö Isabenö Jo̧ma jojodö wamenö tjedi̧danöma edö̧kö̧sa, ötjöma jojodö tjomajadenö tjomukwati̧ edo̧sa, —jö̧ba̧lö yöa̧linobe Diosma Samuelnö, bitemaökö jö̧ba̧lö.

⁸ Ikenama, —Bitemaökö, —jö̧ba̧lö Samuel yöawajökwe, itji̧ ikena jojo Abinadab mikwo̧ Samuel öba a'o öbaledobö weinobe Isaima, ja̧danö öbaledajiökwe, —Bitenöbi omudawö junö̧kö̧ Isabenö Jo̧ma , —jö̧ba̧lö yöawinobe.

⁹ Ikenama itji̧ Sama mikwo̧ öbaledobö weinobe, jo̧kwaijayonö jo̧banöbi, —Isabenö Jo̧ omudawö ujunökökwe, —jö̧ba̧lö yöawinobe.

¹⁰ Jejenö okobe deinö jelemutjö du̧ju̧taja baibanö Samuel öba a'o tjöbaledobö weinobe Isaima, jo̧kwaijayonö Samuel yöawinobe, —Dios omudawö ujuninökwema bidötjö deobe, —jö̧ba̧lö.

¹¹ Ikenama Samuelma Isainö abebö a̧ja̧kwinobe, —Jelo̧bi deobeji̧? okobe deinö kwitji̧mu ömadöma bai tjö̧jobeji̧? —jö̧ba̧lö. Aebökwe, —Ina bajaliya jojo deobe, jo̧bama obejadönö teada̧lö ö̧jobe, —jö̧ba̧lö atadinobe Isaima. Yöa̧lökwe, —Jo̧banö tjichejebobö webi, bamatö dukwökakobe, jo̧babi bai ichibenanö kabatö, —jö̧ba̧lö weinobe Samuelma.

¹² Weökwe, itji̧ bajalia jojonö öbibö tji̧'yobö weinobe Isaima, ja̧danö Isai itji̧ bajalia jojo David mikwo̧nö tjichejebinobe. Jo̧banö edö, Samuelma ö'wöchö̧kö̧ otiwanö duwo̧nö edinobe, öbajalebi, itebiabi otiwo̧nö. Ja̧danö, Isabenö Jo̧ma Samuelnö weinobe, —Biteda omudawö chujunökwema, a̧la̧ibi, uunö o̧tesobu tobebi, omudawö chujunaja̧ wene i̧sebö.

¹³ —Weökwe, Samuelma David öpöedö tjöba a'otjö o̧tesa̧yunö o̧tesobu toebinobe David uu wamenö. Ja̧danö, jejenö o̧te toebenama, Isabenö Jo̧ O̧'wo Luwo̧ma juluwanö Davidkwö ichibinobe, ja̧danö ja̧ möletjö baikwö bajalenö Davidkwö ö̧jinobe Dios O̧'wo Luwo̧ma. Ikenama, Davidnö o̧te tobebajo̧, Samuelma a̧laibö, itebo comunidad Ramabe ȩwa̧jinobe.

David Saul ömöayo̧ baibanö ö̧jina jawa

¹⁴ Ja̧danö, Isabenö Jo̧ O̧'wo Luwo̧ma Saultjö laebinobe, ja̧danö o̧'wo luwo̧ sulabo̧ Saulnö usula emawinö ja̧obö weinobe Diosma.

¹⁵ Jejenö usula emawö ö̧jiawö̧, Saul ömöayedöma jo̧banö yötja̧linobe, —Duluwo̧, dedemi usula emawö kwö̧ji̧ma, o̧'wo luwo̧ sulabo̧ usula kwemawinö ja̧obö weajena Diosma.

¹⁶ Jo̧kwajabetjö̧ baikwö weköbobö domukwata, ökwödö kwömöayedönö weköbo, arpa pjeawa waiso̧nö disakwobö. Ja̧danö, Dios weökwe o̧'wo luwo̧ sulabo̧ usula kwemawinö ja̧enama, arpa waiso̧ma kwöba a'o pjeena, ja̧danö musika ökwöi̧ a̧ja̧kwö otiwanö usula kwemawi̧tjö kwö̧bibajena, —jö̧ba̧lö.

¹⁷ Yötja̧lökwe, —Jau, yöka̧laja̧duwadanö arpa waiso̧nö kwisakwaduwo, ja̧danö badekwajadö kwichejebaduwo, chöba a'otjö arpa pjeobö.

¹⁸ —Weiökwe, ömöayedötjö bakwo̧ yöawinobe, —Chuluwo̧, bakwo̧nö chedijatö, Belen jojo Isai itji̧mutjö bakwo̧ arpa waiso̧nö. Jo̧bama arpabi waiso̧, ja̧danö yebabö̧kö̧. Isabenö ölakwabikwawa jawa waiso̧, ja̧danö yöa̧li̧ma, waisanö omukwatö yöba̧lo̧. Jo̧bama jwiinö otiwo̧, ja̧danö ju'wibi Isabenö Jo̧ otiwanö pjaatökwe, —jö̧ba̧lö yöawinobe.

¹⁹ Yöawökwe, Saulma ömöayedönö weinobe, Isainö yötja̧lobö baikwö: —Isai, kwuluwo̧ Saulma weobe, kwitji̧ obejadönö teada̧lo̧ David mikwo̧nö, weköbobö Saul ö̧jobekwö, —jö̧ba̧lö.

²⁰ Weawö̧, Isainö yötja̧linobe, ja̧danö yötja̧lökwe, Saul wei̧ a̧ja̧kwinobe. Ju'wibi, Isaima bulonö emö, pan ö̧pji̧ya öwaninobe, ja̧danö ubasobu o̧'do̧busa'wobi öwaninobe, ja̧danö wanajo̧, David ja̧bi, chivo ja'yuwo̧nöbi i̧'yejebö Saulnö iyobö weinobe, la'aka chuluwo̧köbobetjö̧ bi̧ya chiyakwö jö̧ba̧lö.

²¹ Jejenö Davidma Saul ömöayo̧ baibinobe, ja̧danö Saulma nöinö ile niebinobe Davidnö, ja̧danö jo̧banö ösödö, Davidnö ujuninobe, yönö ömöayo̧, Saul itea ölakwabikwawa jawa kwebato̧ baibanö.

²² Ja̧danö, Davidnö ösödö, Saulma Isainö yötja̧lobö weinobe, —Isabenö kwitji̧ Davidnö chösöda, jo̧kwajabetjö̧ ötjökwö ja̧nö chömöayo̧ ö̧jobö weköbobö atebakwö, —jö̧ba̧lö.

²³ Ja̧danö, Dios weökwe o̧'wo luwo̧ sulabo̧ Saulnö usula emawinö ja̧enama, Davidma arpa pjeinobe Saul a̧ja̧kwonö. Ja̧danö jejenö pjeenama, Saul o̧'wo ösöwachinobe, ja̧danö o̧'wo luwo̧ sulabo̧ma laebinobe.