1 Samuel 15 - Dios Iwene

Saul amalecitas jojodönö ujuluwina jawa

¹ Ju'wi möle, Samuelma Saulnö yöawinobe baikwö: —Saul, Isabenö Jo̧ Diosda ötjönö webinama, ökwönö o̧te tobebö, israel jojodö la'aka tjuluwo̧ bakibanö chujunobö, ¿jö̧tö? Jo̧kwajabetjö̧, babe Isabenö Jo̧ ökwönö yöbawö wei̧ kwa̧ja̧kwobö jo̧be.

² Baikwö yöawobe Isabenö Jo̧ Okobe Jwiinö Juluwo̧ Diosma: –Damötjö israel jojodö egipto nijitjö labebö, baikwö tjichenama, amalecita jojodöma isabenö sulabenö ja̧tjinobe chömöledö israel jojodönö. Ja̧ sulabenö ja̧tjinama cho̧'wo jwibibö̧kö̧sa, ökwönötjö̧ jobadönö lȩtebocha.

³ Jo̧kwajabetjö̧ baikwö wetakwö, kwömöayedö ölakwabikwawa jojodökwö jobadö amalecita jojodönö kwabawö loköbaduwonö, jobadötjö bakwo̧bi ö̧ji̧bökönö. Okobe deinö amalecita jojodönö kwabö loköbo, ömadönöbi, ya̧dönöbi, tjemunöbi, i̧ya̧nö tjemajawö̧nöbi. Ja̧danö ju'wibi okobe deinö tjajwimunöbi kwabawö loköbo, pa̧ka̧yadönöbi, obejadönöbi, kameyudönöbi, bu̧lö̧dönöbi, jwaikwöda okobe deinö amalecita jojodönöbi tja̧jwi̧munöbi kwabawö loköbo, bakwo̧bi ö̧ji̧bökönö, —jö̧ba̧lö Dios wei̧ yöawinobe Samuelma Saulnö.

⁴ Weökwe, Saulma jojodö tjichobö weinobe, ja̧danö Talaim comunidadtjö, israel jojodö ölakwabikwawa jojodönö o̧ko̧kodinobe Saulma, doscientos mil jojodönö, ja̧danö ju'wibi Judasasotjö diez mil jojodönö.

⁵ Ikenama, jobadönö öbibö, Saulma Amalec comunidad ö'öbö, wabekoemi teada̧lö ö̧jinobö, juluwanö comunidad jojodönö mebibö tjujuluwakobetjö̧.

⁶ Jobe amalecita jojodö tjö̧'da̧de ju'wedöbi tjö̧jinobe, ceneo jojodöma. Jobadöma damötjö israel jojodönö sulabenö ja̧binöködö, jo̧kwajabetjö̧ amalecita jojodönö metjibakwa̧ abönö, Saulma jobadö ceneo jojodönö yöawinobe baikwö: —Juluwanö amalecita jojodö tjö̧'da̧detjö döbibajaduwi, jobadönö kwabö lobö, ökwödönöbi kwabö lodapji jö̧ba̧lö. Isabenö ökwödöma da'dödönö dösölö̧jinö pjakatinaduwobe, egipto nijitjö baikwö tjichenama, jo̧kwajabetjö ökwödönö kwabö lodoböma chomukwatökö, sule amalecita jojodönöda, —jö̧ba̧lö. Yöawawö̧, ceneo jojodöma amalecita jojodö tjö̧'da̧detjö labebö dötjibajinobe.

⁷ Ikenama Saulma amalecita jojodönö ujuluwinobe, Havila nijitjö, egipto nijitjö jawo̧ ichobekwö niji Shur mikwobe ichibenanö kabatö.

⁸ Ja̧danö, okobe deinö amalecita jojodönö kwabawö lotjinobe, amalecita jojodötjö sule la'aka tjuluwo̧ Agag mikwo̧nö kwabö lobökönö, ina 'yaba̧lo̧nö do̧atinobe.

⁹ Ju'wedö jojodönö kwabawö lotjinajayonö, Saulbi, ömöayedö ölakwabikwawa jojodöbi la'aka luwo̧ Agag mikwo̧nö kwabö lotjinokobe, ja̧danö ju'wibi, tjajwimutjö otiwadönö kwabawö lotjoböma tjöpöjödinobe. Amalecita jojodö tjajwimu 'dalukadönö, ja̧danö ju'wedö tjöpöjödawö̧nö kwabawö lotjinobe, jo̧kwaijayonö tjajwimutjö inesö otiwadö, obejadönöbi, pa̧kayadönöbi, o̧tewadö ja̧danö ju'wedö tjösödawö̧nöbi kwabawö lobökönö, idöda tjajwimu batjibanö tjeminobe.

Dios Saul la'aka luwo̧ ö̧jobö öpöjödina jawa

¹⁰ Jejenö Dios weinöködanö Saul ja̧iökwe, Isabenö Jo̧ma Samuelnö yöawinobe:

¹¹ —Saulnö israel jojodö tjuluwo̧ baibanö omudawö chujunina omukwatö, cho̧'wo tjo̧achobe Samuel. Ajayinö Saulma otiwanö weti̧ a̧ja̧kwinobe, jo̧kwaijayonö ja̧ a̧ja̧kwö ö̧ji̧ kabatibö, weti̧ a̧ja̧kwökönö ja̧bö ö̧jobe, jo̧kwajabetjö̧ jo̧banö omudawö chujunina omukwatö cho̧'wo tjo̧achobe, —jö̧ba̧lö. Yöawökwe, Samuelma jwiinö o̧'wo tjo̧ekwinobe, ja̧danö yö̧te baledibanö budekwö aebinobe Isabenö Jo̧nö.

¹² Jemi ikena, yȩayi a̧la̧ibö, Saul ö̧jobekwö i̧'yinobe Samuelma. Ja̧danö, Saulnö edö i̧'yemi ja'ö, jelo̧ yöawinobe Samuelnö, —Saulma ida̧ökö Carmel comunidadbe ichibajo̧, inawiya ujunajabe, isabenö juluwajo̧sa jö̧ba̧lö, ja̧danö junajo̧, Carmeltjö labebö, Gilgal comunidadbe i̧'yajabe, —jö̧ba̧lö.

¹³ Yöawökwe, Samuelma Gilgalbe 'ya̧nö Saulnö öbadekwajinobe. Ja̧danö, Saul Samuelnö edö, yöa̧linobe, —Isabenö Jo̧ ökwönö pjaatobö chösöda, —jö̧ba̧lö, ja̧danö ju'wibi yöa̧linobe, —Otiwanö Isabenö Jo̧ ötjönö weina a̧ja̧kwö kwabawö lotajabe, —jö̧ba̧lö yöa̧linobe Saulma Samuelnö.

¹⁴ Yöa̧lökwe, Samuelma atadinobe, —Isabenö Dios wei̧ a̧ja̧kwö kwabawö loköbatjö̧ma, tajawedö pa̧ka̧yadö tjiwenebi, obejadö tjiwenebi ökwöobeda? Isabenö Dios wei̧danö kwabö loköbatjö̧ma, ja̧ cha̧ja̧kwoko jö̧ta̧lajabe, —jö̧ba̧lö.

¹⁵ Aebökwe, —Aaa, jobadö jwöbadöma jojodö kwabö juwö Diosnö tjiyakwawö̧. Jojodöma jobadönö amalecita jojodötjö 'döbebö tjichejebajabe. Obejadötjöbi, pa̧kayadötjöbi sule inesö otiwadönöda 'dötjebajabe, Kwösödökwe Isabenö Jo̧ Diosnö ösödö, kwabö juwö tjiyakobetjö̧. Ja̧danö ju'wedö Diosnö tjiyobö mikwawöködönö okobe deinö kwabawö lodajabe, —jö̧ba̧lö atadinobe Saulma.

¹⁶ Atadökwe, —Yöba̧lökönui, jo̧da yöte Isabenö Jo̧ ötjönö yöawaja̧ yötawakwö, —jö̧ba̧lö yöa̧linobe Samuelma. Yöa̧lökwe, —Jau, yöbawitjö, —jö̧ba̧lö atadinobe Saulma.

¹⁷ Ikenama Samuelma Saulnö yöawinobe Isabenö Jo̧ Saulnö yöa̧li̧ma: —Ajayinö kwomukwatinobe, ökwödada, ju'wedö israel jojodötjö baikwönönöbo̧sa jö̧ba̧lö. Jo̧kwaijayonö israel jojodö bakwasokwena jojodö la'aka tjuluwo̧ babibinaja, ¿jö̧tö? Jau, Isabenö Jo̧ma ökwönö omudawö ujuninobe, Israel jojodötjö inesö la'aka luwo̧ bakibanö.

¹⁸ Ja̧danö, ökwönö omudawö junajo̧, Isabenö Jo̧ma ökwönö weinobe, 'Ya̧wi, okobe deinö sulabenö ja̧bö ju̧kwadö amalecita jojodönö kwabawö lobaji, ja̧danö jobadönö kwabawö lobö kwö̧jo, bakwo̧bi ö̧ji̧bökönö okobe deinö jobadönö kwabö loköbenanö baibanö, jö̧ba̧lö weinobe, ¿jö̧tö?

¹⁹ Jo̧kwajabetjö̧, tajawedö Isabenö Jo̧ wei̧ a̧ja̧kwökönö, weökö jawa ja̧köbaja̧da? Tajawedö mebibö, tjujuna̧li̧ do̧kataja̧da, tajawedö Dios weökö jawa sulabenö ja̧köbaja̧da? —jö̧ba̧lö Samuel yöawinobe Dios Saulnö yöa̧li̧ma.

²⁰ Yöa̧lökwe, Saul atadinobe, —Isabenö otiwanö Isabenö Jo̧ wei̧ cha̧ja̧kwajabe. Jo̧ba weaja̧danö isabenö amalecita jojodönö söbebö lobö chȩwa̧jabe. Amalecita jojodö la'aka tjuluwo̧ Agag mikwo̧nö do̧batajo̧ baikwö öbibö chichejebajabe, ja̧danö okobe deinö jojodönö kwabawö lotajabe, Isabenö Jo̧ weaja̧danö.

²¹ Ja̧danö tja̧jwi̧mu kwabawö lodo jö̧da̧lawö̧ma, obejadöbi pa̧ka̧yadöbi sule inesö otiwadönöda do̧tjatajabe jojodöma, baikwö ichejebö, Gilgaltjö kwuluwo̧ Isabenö Jo̧ Diosnö kwabö juwö tjiyakobetjö̧, isabenö otiwanö Dios ösödo jö̧a̧li̧danö kwabawö lotajabe, —jö̧ba̧lö atadinobe Saulma.

²² Atadökwe, Samuelma Saulnö yöa̧linobe, —Isabenö Jo̧ inesö ösödi̧ma di̧ya̧da, tja̧jwi̧munö kwabö juwö, jwiinö ubinö iyawabi, ju'wi iyawabi tjiyoböö̧kö̧, Isabenö Jo̧ wei̧ a̧ja̧kwö, weaja̧danö ja̧tjoböö̧kö̧? Isabenö yötawakwö, iyawa tjiyi̧tjö bajalekwönönö Dios ösödi̧ma, Dios wei̧ tja̧ja̧kwobö. Jau, inesö otiwadö o̧tewadö obejadönö kwabö juwö tjiyi̧tjö bajalekwönönö ösödo̧ Isabenö Jo̧ma, wei̧ jojodö tja̧ja̧kwobö.

²³ Jau Saul, Dios edemi Dios wei̧ öpöjödakwawama, mea boawadanö bakwaiobe, ja̧danö Dios edemi, Dios wei̧ a̧ja̧kwökönö ja̧awama, sulabenö o̧'wo jawa ösödakwawadanö bakwaiobe. Jo̧kwajabetjö̧ baikwö yötawakwö Saul, Isabenö Jo̧ wei̧ kwa̧ja̧kwobö kwöpöjödiökwe, israel jojodö la'aka tjuluwo̧ kwö̧joböbi öpöjödachibajabe Isabenö Jo̧ma, —jö̧ba̧lö yöawinobe Samuelma Saulnö.

²⁴ Jejenö yöawökwe, Saulma Samuelnö yöa̧linobe, —Isabenö sulabenö ja̧tajabe, Isabenö Jo̧ wei̧bi, ökwö weköbi̧bi isabenö a̧ja̧kwökönö ja̧tajabe, jojodönö yetabobetjö̧. Jau Samuel, jojodöma Dios wei̧tjö wainö tjösödinobe tja̧jwimunö do̧tja̧tobö tjösödinobe, ja̧danö jejenö tjösödi̧tjö, yebabinö yötja̧li̧da cha̧ja̧kwijatö, Dios wei̧ a̧ja̧kwökönö.

²⁵ Jo̧kwaijayonö, sulabenö ja̧tajayonö, ökwönö budekwödanö atebakwö, sulabenö ja̧taja̧ söbebö lobö, jojodö tjö̧jobekwö ötjökwö kwichobö, Isabenö Jo̧nö bȩbachibö chösödakobetjö̧, —jö̧ba̧lö.

²⁶ Aebökwe, Samuelma atadinobe, —Ökwökwö chichökö, ökwöma Isabenö Jo̧ wei̧ a̧ja̧kwökönö kwöpöjödajobetjö̧, ja̧danö Isabenö Jo̧ma israel jojodö la'aka tjuluwo̧ kwö̧jobö öpöjödajobetjö̧, —jö̧ba̧lö.

²⁷ Yöba̧lajo̧, Samuelma öjalachibinobe, ejube ȩwa̧jobö. Ja̧danö jejenö ȩwa̧jobö öjalachibiökwe, Saulma Samuel ökamiji̧do̧ wamesado̧nö do̧atinobe, ja̧danö do̧atajabema, kȩachajinobe.

²⁸ Kȩachajiökwe, Samuelma Saulnö yöawinobe, —Babe bi̧do̧ kȩebö loköbaja̧danö, Isabenö Jo̧ma israel jojodö la'aka tjuluwo̧ kwö̧ji̧ma ökwötjö kȩebö loajabe, kwömöledö israel jojodötjö jelo̧nöda iyobö, ökwötjö bajalekwönönö otiwo̧nö.

²⁹ Ja̧ yötawaja̧ma, isabenö baledakwa̧ wene, Diosma ida̧ökö ja̧ wene yöawajabetjö̧. Jau Saul, Dejatinö Juluwo̧ ökwödö israel jojodö Duluwo̧ Diosma, isabenö jö̧a̧lidanö ja̧bo̧, jö̧a̧li̧ma balewö lobö̧kö̧obetjö. Jau, bö̧je jojodöma isabenö omukwatö tjujuni̧ balewabinö lobadö, jo̧kwaijayonö Diosma jojobö̧kö̧, ja̧danö jojodö balewabinö lobajitjadanöma balewabinöma lobö̧kö̧, —jö̧ba̧lö yöawinobe Samuelma Saulnö.

³⁰ Yöawökwe, Saulma atadinobe, —Jau, isabenö sulabenö ja̧tajabe, jo̧kwaijayonö atebakwö, jojodö tjöba a'otjö tabakwö chö̧joböma ja̧bökönui jö̧ba̧lö. Jau Samuel, ötjökwö ichi, ökwökwö Kwuluwo̧ Isabenö Jo̧ Dios öba a'o bȩbachibö chösödobö, chömöledö israel jojodö tjuluwedö tjöba a'otjöbi, ju'wedö israel jojodö tjöba a'otjöbi tabakwö chö̧japji jö̧ba̧lö.

³¹ Aebökwe, Samuelma Saulkwö jojodö tjö̧jobekwö i̧'yinobe, ja̧danö Saulma Isabenö Jo̧ öba a'otjö bȩbachibö ösödinobe.

Samuel amalecita jojodö la'aka tjuluwo̧ Agag mikwo̧nö kwabö loina jawa

³² Ikenama, Samuel weinobe: —Amalecita jojodö la'aka tjuluwo̧bajo̧ Agag mikwo̧nö baikwö ichejebinö chö̧jobekwö, —jö̧ba̧lö. Jejenö tjichejebiökwe, Agagma o̧'wo ösöwanö ichinobe, —Ötjönö kwabö lotjökena, ötjönö kwabö lotjobö tjomukwatitjö̧ma, ida̧ökö kwabö lotjo jö̧tja̧linobe belö, —jö̧ba̧lö.

³³ Jo̧kwaijayonö, Agag jejenö omukwatijayonö, Samuelma Agagnö yöa̧linobe: —Isabenö ökwöma ba̧jȩkwadönö kwölöte'onö kwabö lobinaja̧, tjojo'dodöma tjitji̧mu debadö batjibanö, ja̧danö ökwö ja̧köbinadanö baledakobe ökwö kwojo'donö, jobujubi jitji̧mu debuju jö̧jakwuju, —jö̧ba̧lö yöa̧linobe. Ja̧danö, yöba̧lajo̧, jobe Gilgal comunidadtjö, Samuelma Isabenö Jo̧ öba a'otjö, kwölöte'onö bulabinö kwabö loinobe Agag mikwo̧nö.

³⁴ Ikenama, Samuelma itebobe ȩwa̧jinobe, Rama comunidadbe, ja̧danö Saulbi itebobe ȩwa̧jinobe, Guibea comunidadbe, Saul itebo Guibea jö̧ba̧lö ötjabobe comunidadbe.

³⁵ Ja̧danö, jemi tupakwö Samuelma Saulnö edinokobe, ö'wö baibenanö kabatö. Ja̧danö, Saulnö edököjayonö, Saulnö omukwatö o̧'wo tjoachö ubudekwinobe Samuelma. Ja̧danö Isabenö Jo̧ma o̧'wo tjo̧achinobe, israel jojodö la'aka tjuluwo̧ baibanö Saulnö omudawö ujunina omukwatö.