1 Samuel 14 - Dios Iwene

Jonatan filisteo jojodönö ujuluwina jawa

¹ Ja̧danö, ju'wi möle Jonatanma iteda ömöayo̧, Jonatan itea ölakwabikwawa jawa kwebato̧nö yöa̧linobe, —Ötjökwö ichi, yai badeibö filisteo jojodö tjabakwemibe di̧'yaduwo, —jö̧ba̧lö. Jo̧kwajabetjö̧ Jonatanbi, ömöayo̧bi filisteo ölakwabikwawa jojodö tjö̧jobekwö tji̧'yinobe, jo̧kwaijayonö Jonatanma abe'do Saulnö yöawinokobe i̧'yakwa̧ma.

² Ja̧ möle, Saulma Guibea comunidad pjeanö ö̧jinobe, Migron ötjabobe towi granado ötjabi̧ wa̧jowi jȩna. Jowi teebe ö̧binobe Saulma, ja̧danö jo̧bakwö ju̧kwadöma, seiscientos jenanö ömadö ölakwabikwawa jojodö tjö̧jinobe,

³ ja̧danö ju'wibi Diostjö jojodötjö tjö'da̧de pjabato̧ Ahias mikwo̧ma jobadökwö ö̧jinobe, Dios öba a'otjö 'duawa̧do̧ 'dubawö. Jo̧ba Ahiasma, Ahitob mikwo̧ itji̧, ja̧danö Ahitobma Icabod mikwo̧ öpöe. Ja̧danö Icabodbi, Ahitobbi Finees mikwo̧ itji̧mu, ja̧danö Fineesma, ajayinö Silo comunidadtjö Diostjö jojodötjö tjö'da̧de pjabato̧ Eli mikwo̧ itji̧. Jo̧ba Ahias mikwo̧bi, ju'wedö ölakwabikwawa jojodöbi Saulkwö tjö̧jinobe, jo̧kwaijayonö wajwitjinobe Jonatan tjöjelö laebaja̧ma.

⁴ Jonatanma omukwatinobe, mösa'iju 'da̧alakaeminö ja'yuwemibenö 'ya̧nö filisteo tjabemibe i̧'yobö. Ja̧danö, jobe bakwachobe 'yu̧'yu̧kwiawa inawiya ji̧nobe, ja̧danö jelobekwöchobebi ju'wi 'yu̧'yu̧kwiawa inawiya ji̧nobe. Bakwachobe inawama, Boses jö̧ba̧lö mikwawa, ja̧danö jelobekwöchobe inawama, Sele jö̧ba̧lö mikwawa.

⁵ Ja̧danö, Boses mikwawama, u'dakwö Micmas badeibö jo̧be, ja̧danö Sele mikwawama, a̧li̧kwö Guibea badeibö jo̧be.

⁶ Ja̧danö, Jonatanma iteda ömöayo̧ ölakwabikwawa jawa kwebato̧nö yöa̧linobe, —Yai tupakwö idö Diosnö ösödöködö tjötade bajalesado̧ 'wibekwöködö tjöjobe di̧'yaduwo. Jobe di̧'yitjöma, Isabenö Jo̧ma ökwödönö pjaatena, isabenö juluwo̧obetjö̧. Du̧ju̧tajada tjö̧jitjö̧böbi, ba̧jekwadö tjö̧jitjö̧böbi bakwaiobe Diosnöma, jo̧bama isabenö juluwo̧, dö̧jibanö pjaatobö, —jö̧ba̧lö yöa̧linobe Jonatanma.

⁷ Yöa̧lökwe, Jonatan ömöayo̧ma atadinobe, —Okobe jwiinö kwomukwati̧danö ja̧bi, ötjöma jwaikwöda ökwönö pjabatö chö̧jakwo̧sa, okobe jwiinö kwomukwati̧ma, —jö̧ba̧lö.

⁸ Atadökwe, Jonatanma yöa̧linobe, —Baikwö ja̧dakobe, jobadö tjö̧jobekwö 'da̧alakaemi döbaledakobe, ja̧danö baledajadö, jo̧badönö döwawachakobe, ökwödönö tjedobö.

⁹ Ja̧danö, ökwödönö edö, –Jamataduwi, kwö̧jaduwobekwö yutudajakobe, –jö̧ba̧lö yötja̧litjö̧ma, jenada dö̧jakobe, nöchökönö.

¹⁰ Jo̧kwaijayonö, –Baikwö nöchaduwi, –jö̧ba̧lö wetjitjö̧ma, jenada döwaisachibakobe, –Isabenö Jo̧ma dujuluwobö pjaatakobe,– jö̧ba̧lö, ja̧danö nöchö jobadönö mebibö dölakwabikwawakobe, —jö̧a̧linobe Jonatanma.

¹¹ Ikenama, Jonatanbi ömöayo̧bi filisteo ölakwabikwawa jojodö tjedobö tjöwawachinobe, ja̧danö filisteo jojodöma jobadönö tjedinobe, ja̧danö edö obö yötja̧lakwawinobe, —Edi, idö hebreo jojodöma laju okwa ju̧kwawajadö latjebobe, —jö̧ba̧lö.

¹² Ja̧danö, jobe ölakwabikwawa jojodö tjö̧jemitjö ju'wedö filisteo jojodöma Jonatannöbi, ömöayo̧nöbi jwötjinobe, —Baikwö nöchö ichaduwi, dujulu di̧sebakobetjö̧, —jö̧ba̧lö. Yötja̧lökwe, Jonatanma ömöayo̧nö yöa̧linobe, —Chökömanö ichi, tjö̧jobekwö dönöcho, Isabenö Jo̧ma isabenö ökwödö israel jojodö jobadönö dujuluwobö iyajabe, —jö̧ba̧lö.

¹³ Ja̧danö, yöba̧lajo̧, jobe möakwö nöchekwaobe ömamunöbi ömasapanöbi do̧bata̧lö (akwatalö) önöchinobe Jonatanma, ja̧danö ökömanö ömöayo̧bi önöchinobe. Ja̧danö, nöchajadö filisteo jojodönö metjibinobe, ja̧danö filisteo jojodö Jonatan öba a'o tjö̧jobö jwitjinobe. Jonatanma abönö 'ya̧nö kwabawö loinobe, ja̧danö ömöayo̧bi ökömanö ichö kwabawö loinobe.

¹⁴ Ja̧ ajayinö kwabawö lotjinama, juluwanö ja'yuwelö veintebedö ömadönö kwabawö lotjinobe.

¹⁵ Ja̧danö kwabawö lotjiawö̧, jemi filisteo tjabemi ju̧kwadöma tjö̧bawö yetjaibinobe, ja̧danö mejenö ju̧kwadöbi tjö̧tja̧winobe, ja̧danö okobe deinö filisteo jojodö yebaibö, tjö̧tja̧winobe. Filisteo tjabemi ju̧kwadöbi, tjabelö labebö Israel jojodönö tjujuluwobö 'ya̧jadöbi tjö̧bawö yetjaibinobe. Ja̧danö Diosma niji̧bi tjö̧awobö weinobe, okobe deinö filisteo jojodö jwiinö yetjaibanö, —Dakwö ja̧dakwajö, —jö̧ba̧lö.

¹⁶ Jejenö baledonö, Saul ömöayedötjö tjöbeba̧lö eda̧ladöma Benjamin niji̧ comunidad Guibeanö ja̧nö tjedinobe, ja̧danö filisteo jojodö wainökwena dötjibajobe tjedinobe.

¹⁷ Jejenö dötjibajiökwe, Saulma öwaisachibinobe, —Ökwödötjö ju'wedöma filisteo jojodönö metjibajena, —jö̧ba̧lö, jo̧kwajabetjö̧ ömöayedönö weinobe, —Bemi jojodönö ba̧ja̧daduwi, ökwödötjö ti deojobö döwaisakobetjö̧, —jö̧ba̧lö. Weawö̧, tjö̧ba̧ja̧dinobe, ja̧danö ba̧ja̧dö, tjöwaisachibinobe, —Jonatanbi, ömöayo̧ ölakwabikwawa jawa kwebato̧bi detjobe, —jö̧ba̧lö.

¹⁸ Ja̧ möle, Diostjö jojodötjö tjö'da̧de pjabato̧ma, israel jojodökwö kwebachö, Dios öba a'o 'duawa̧do̧ 'dubawö ö̧jinobe, jo̧kwajabetjö Saulma tjö'da̧de pjabato̧ Ahias mikwo̧nö weinobe, —Dios öba a'otjö 'dukawa̧do̧ 'dubawö, baikwö ichi, Diosnö abebö cha̧ja̧kwobö jö̧ta̧la, —jö̧ba̧lö.

¹⁹ Jo̧kwaijayonö, Saul ina tjö'da̧de pjabato̧kwö yöa̧lakwawonö, ajayitjö bajalekwönönö ölakwabikwawa ökwöi̧ labinö ökwöinobe filisteo jojodö tjö̧jelö. Jo̧kwajabetjö̧, ina Diosnö abebö a̧ja̧kwapji, Saulma Ahiasnö yöa̧linobe, —Ina abebökönui, Dios atadakwa̧ diteada̧lobö jwia, —jö̧ba̧lö.

²⁰ Ja̧danö, Saulbi okobe deinö jo̧bakwö ju̧kwadö ölakwabikwawa jojodöbi ko̧ko̧kwibö, filisteo jojodö tjö̧jobekwö tji̧'yinobe jobadönö tjölakwabikwawobö. Ja̧danö, ichibö, tjedinobe, filisteo jojodö wajwibö omukwatökönö idöda tjömöledökwö tjölakwabikwawobe, isabenö wajwibö omukwatökönö tjölakwabikwawinobe filisteo jojodöma.

²¹ Ju'wibi baledinobe, ajayinö israel jojodötjö ju'wedöma bakobe filisteo jojodökwö babibö tjö̧jinobe, jo̧kwaijayonö baledi̧ edö, katjatakwawinobe. Ja̧danö, Saulkwö Jonatankwö ju'wedö israel jojodökwö babibö, jobadöbi filisteo jojodönö tjölakwabikwawinobe.

²² Ja̧danö, ju'wibi, ajayinö israel jojodötjö döbibajö Efrain niji mösa'ijutjö ju̧kwawinadöma, filisteo jojodö dötjibaji̧ wene tja̧ja̧kwinobe, ja̧danö a̧ja̧kwö, jobadöbi filisteo jojodönö ölakwabikwawö lutjinobe.

²³ Jobekwö laebobe Isabenö Jo̧ israel jojodönö tjö̧jibinö pjaatina wene, ja̧danö ja̧ möle israel jojodöma filisteo jojodönö lutjinobe, Betaven comunidad tupakwö.

Saul jojodönö weina jawa, ja'yubebi kwukwaduwoko, ölakwabikwawö kwadatenanö kabatö

²⁴ Ja̧ möle filisteo jojodönö ölakwabikwawö latjebakwa̧ abönö, Saulma jojodönö weinobe, —Okobe deinö döpöjojodönö kwabö lodenanö kabatö, bakwo̧bi kwakwawa ukwobö jwiobe, döpöjojodökwö ina dölakwabikwawonö ökwödötjö bakwo̧ kwakwawa ukwitjö̧ma, Dios lȩebakwo̧ kwo̧nöma, —jö̧ba̧lö weinobe. Ja̧danö, jejenö weajawö̧, israel jojodöma ja'yubebi kwakwawa tjukwinokobe ja̧ möle, ja̧danö jwiinö tjime'dawachibinobe, filisteo jojodönö lutjibonö.

²⁵ Ja̧danö, filisteo jojodönö lubö, tebo okwa tetjachinobe, ja̧danö jobetjö wa̧yo̧ma nijinö bi̧nobe.

²⁶ Israel jojodö tebo okwa tetjachenama, wa̧yo̧ma mötjö to̧bö nijinö bi̧nobe, jojodö otiwanö netjobö, jo̧kwaijayonö bakwo̧bi neobö do̧atinokobe, Saul jö̧a̧laja̧, —Dios lȩebakwo̧ kwo̧nöma, —jö̧ba̧lö jö̧a̧laja̧ omukwatö.

²⁷ Jo̧kwaijayonö, ju'wedö netjokonö, Jonatanda wayo̧ neinobe, abe'do juwedönö weenama, deinobetjö̧. Jonatanma abe'do weaja̧ wene a̧ja̧kwinokobe, jo̧kwajabetjö̧ otokwa'o wa̧yo̧ tjö̧bebiya tibatö, wa̧yo̧ eminobe, ja̧danö emajo̧ neinobe. Jejenö nebö, ujuluwachibinobe Jonatanma 'yajibajinö.

²⁸ Jejenö neiökwe, jojodötjö bakwo̧ Jonatannö yöawinobe, —Kwabe'doma labinö jojodönö weajabe, babe möle kwo̧nöma isabenö lȩebakwo̧ Diosma jö̧ba̧lö. Jo̧kwajabetjö̧ ja̧ weaja̧ ömukwatö, dukwokobe, ja̧danö kwökönö ja̧nö dime'dawobe, —jö̧ba̧lö.

²⁹ Yöawökwe, Jonatanma yöa̧linobe, —Chabe'doma sulabenö webö ökwödönö suli̧ öwaedajabe. Kwedaduwajabe, ja'yubeda bi̧ya wa̧yo̧ netenama, chujuluwachibaja̧ma.

³⁰ Ja̧danö wene jwiinö döpöjojodö tju̧kwa̧ demaja̧ wene jwiinö dukwatjö̧ma, isabenö otiwo jö̧a̧lajena, babe kwabö lodaja̧tjö̧ bajalekwönönö jwiinö döpöjojodönö dujulowo jö̧da̧lajena, —jö̧ba̧lö yöa̧linobe Jonatanma.

³¹ Ja̧ möle, israel jojodöma filisteo jojodönö ba̧jȩkwadönö kwabö lotjinobe, Micmastjö jamatö, Ajalonbe baibanö, ja̧danö möle baledibanö kwökönö kwabö lotjajabema, jwiinö tjime'dawinobe.

³² Ja̧danö, tjöpöjojodönö kwabawö lobö katjatenama, jwiinö a̧wi̧chi̧ lö̧jawö̧, jojodöma juluwanö metjibinobe filisteo jojodötjö tjeminawö̧ ajwikwawedönöma, ja̧danö obejadönöbi, pakayadönöbi, pakayadö tji̧tji̧munöbi nijinö kwabö tjukwinobe, ja̧danö tjukwösobukwöda itebia sulabenö tjukwinobe.

³³ Jejenö sulabenö tjukwiawö̧, ju'wedö Saulnö yötjawinobe, —Edi, jojodöma sulabenö Isabenö Jo̧ weöködanö tjökwösobu a̧jayi itebia tjukwobe, —jö̧ba̧lö. Yötjawökwe, Saulma atadinobe, —Isabenö sulabenö Isabenö Jo̧ wei̧ a̧ja̧kwökönö sulabenö tjukwobe, —jö̧ba̧lö. Jemi ikenama Saulma weinobe, inawa nöawa bö̧lȩdö tjichejebobö.

³⁴ Jemi ikenama, inawa tjichejebaja̧ ikena, weinobe ömöayedönö: —Jojodö tjöba a'o 'ya̧nö, jojodönö yökawaduwo, bakwo̧nökwena tjajwikwena baikwö inawabe tjichejebobö. Ja̧danö, ichejebajadö, otiwanö kwabö tjukwo jö̧tja̧li̧danö, biwatjö kwabö, tjökwösobö to̧bö kaatajena otiwanö tjukwobö, —jö̧ba̧lö weinobe Saulma. Weawö̧, okobe deinö tjajwimunö ichejebö, tjukwo jö̧tja̧lidanö jawa inawatjö kwabö tjukwinobe.

³⁵ Ja̧danö, jobetjö Saulma Isabenö Jo̧nö iyawöte mesasöte ujuninobe, Diosnö ösödö. Ja̧danö, jötema, ajayinö Saul otidö ujuninöte.

Israel jojodö Jonatanö ö̧jibinö pjatjatina jawa

³⁶ Jemi ikenama, Saulma yöa̧linobe, —Tupakwö filisteo jojodönö kwabawö lododönö, yöte baledibanö jobadönö kwabawö lodo, jobadötjö bakwo̧bi ö̧ji̧bökönö, —jö̧ba̧lö. Yöa̧lawö̧, ömöayedö ölakwabikwawa jojodö tjatadinobe, —Ökwöda kwomukwati̧danö ja̧dakwedösa, —jö̧ba̧lö. Jo̧kwaijayonö, Diostjö jojodötjö tjö'da̧de pjabato̧ma yöa̧linobe, —Di̧'yakwa̧ abönö, Dios öba a'otjö abebö da̧ja̧kwaduwo, dakwö weojobö, —jö̧ba̧lö.

³⁷ Yöa̧lökwe, Saulma Diosnö abebö a̧ja̧kwinobe, —Filisteo jojodönö lubö kwabö lodobö jo̧beji̧? Isabenö jobadönö dujuluwobö ökwödö israel jojodönö pjakatakwaji̧, —jö̧ba̧lö. Jo̧kwaijayonö, jejenö abebö a̧ja̧kwijayonö, Saul abebö a̧ja̧kwaja̧ma atadinokobe Diosma ja̧ mölema.

³⁸ Jejenö atadiökökwe, Saul öwaisachibinobe, —Wene dujuna̧lakwawobetjö̧ atadö̧kö̧ Diosma, —jö̧ba̧lö, jo̧kwajabetjö̧ weinobe baikwö: —Chedemi sulabenö ja̧diökwe, Diosma abebö da̧ja̧kwaja̧ atadö̧kö̧, jo̧kwajabetjö̧ okobe deinö ökwödö jojodö tjuluwedö baikwö kwichaduwo, sulabenö ja̧daja̧ma di̧ya̧jö jö̧ba̧lö döwaisachibakobetjö̧.

³⁹ Jau chömöledö, baikwö isabenö yötawaduwakwö, Ökwödö israel jojodönö dö̧jibinö pjabato̧ Isabenö Jo̧ Dios yaba̧lo̧ ö̧ji̧ wenedanö, ju'wibi isabenö yötawaduwakwö, isabenö Dios öba a'otjö wene dujuna̧lobö suli̧ waedajo̧ma, ö'wö baibobö jo̧be, chitji̧ Jonatanda wene dujuna̧lobö suli̧ öwaedatjö̧ma, isabenö ö'wö baibobö jo̧be, —jö̧ba̧lö yöa̧linobe Saulma. Ja̧danö, jojodöma wene tjujuna̧lobö baibaja̧ tjöwaisinobe, Jonatan wayo̧ neaja̧ tjedajobetjö̧, jo̧kwaijayonö bakwo̧bi Saulnö yöawinokobe.

⁴⁰ Jemi ikenama Saulma okobe deinö israel jojodönö yöa̧linobe, —Okobe deinö ökwödöma bakwachobe kwö̧jaduwo, ja̧da ötjöma chitji̧ Jonatankwö jelobekwöchobe dö̧jakobe, ökwödötjö tijö wene ichejebajo̧ma jö̧ba̧lö Dios i̧sebakobetjö̧, —jö̧ba̧lö. Yöa̧lawö̧, jojodöma tjatadinobe, —Otiwa, kwomukwati̧danö ja̧bi, —jö̧ba̧lö.

⁴¹ Ikenama, Saulma Diosnö abebö a̧ja̧kwinobe: —Ökwödö israel jojodö Duluwo̧ Isabenö Jo̧ Dios, jo̧da abebö cha̧ja̧kwenama, tajawedö kwatadajököda? Kwöba a'otjö wene juna̧lo̧nö kwi̧sebobö atebakwö Israel Duluwo̧ Isabenö Jo̧ Diosnö, baikwö: Tjö̧'da̧de pjabato̧ inawiya döwalataja ja'yuwawa ikwawö alewena, kwi̧sebo, kwöba a'otjö wene dujuna̧lakwawi̧ma, ju'wedö israel jojodötjö ichojobö, ötjötjöbi chitji̧tjöbi ichojobö, —jöba̧lö. Ja̧danö, inawiya ikwawö alewena, i̧sebinobe, wenema ju'wedö jojodö jawaokobe, wene juna̧lo̧ma, Saulö̧kö̧, Jo̧natanö̧kö̧ jö̧ba̧lö i̧sȩbinobe.

⁴² Jejenö i̧sebiökwe, Saulma weinobe: —Yemidanö ikwi, ötjötjö chitji̧ Jonatantjö dite wene ichejebajo̧ma jö̧ba̧lö döwaisakobetjö̧, —jö̧ba̧lö. Ja̧danö, jejenö ikwena, i̧sebinobe, Jonatantjö wene ichobe, jö̧ba̧lö.

⁴³ Jejenö i̧sȩbiökwe, Saulma Jonatannö weinobe, —Sulabenö ja̧köbaja̧ma yöbawitjö chitji̧, —jö̧ba̧lö. Weökwe, Jonatan yöawinobe, —Chotokwa'onö ja'yubeda bajalenö dobebö, wa̧yo̧ netatö, ja̧danö jejenö netajabetjö̧, debö chi̧'yobö jo̧be, —jö̧ba̧lö.

⁴⁴ Yöawökwe, Saul yöa̧linobe, —Jau Jonatan, isabenö debö kwi̧'yobö jo̧be, jo̧kwajabetjö̧ isabenö ökwönö kwabö lotocha. Isabenö ökwönö kwabö lotökötjö̧ma, Dios ötjönö lȩebobö jȩna, —jö̧ba̧lö.

⁴⁵ Yöa̧liawö̧, jojodöma tjöpöjödinobe, ja̧danö öpöjödö Saulnö yötja̧linobe: —Ja̧maökö, Jonatan debö i̧'yoböma jwiobe. Jo̧bada babe filisteo jojodötjö dö̧jibobö pjabatajo̧ma. Isabenö babe möle Jonatanma Dioskwö bakobe otidö, ökwödö israel jojodönö dö̧jibinö pjaatajabe, jo̧kwajabetjö̧ ja'yubebi jo̧banö kwaköbökakobe, öwö'yetjö bakwa'yebi tjoduwökönö. Jau, Isabenö Jo̧ yaba̧lo̧ ö̧ji̧ wenedanö, ju'wibi isabenö yödawakwö, Jonatannö kwabö lököbökakobe, —jö̧ba̧lö yötja̧linobe israel jojodöma, Jonatannö tjöbeba̧lö. Jejenö Israel jojodöma Jonatannö ö̧jibinö pjatjatinobe, debö i̧'yapji jö̧ba̧lö.

⁴⁶ Ja̧danö, Saulma filisteo jojodönö lubö kaatinobe, ja̧danö filisteo jojodöma tjitebobe tjȩwa̧jinobe.

Saul israel jojodö tjöpöjojodönö ölakwabikwawö ö̧jina jawa

⁴⁷ Saul israel jojodö la'aka tjuluwo̧ baibaja̧ ikena, okobe deinö israel jojodö tjöpöjojodönö ölakwabikwawö ö̧jinobe, bakwachobebi, jelobekwöchobebi tjitebokwena jojodönö. Moab jojodönöbi ölakwabikwawö, ja̧danö Amon jojodönöbi ölakwabikwawö, Edom jojodönöbi ölakwabikwawö, Soba niji la'aka luwedönöbi ölakwabikwawö, filisteo jojodönöbi ölakwabikwawö ö̧jinobe. Ja̧danö, okobe jwiinö ölakwabikwawö ö̧jinama, israel jojodö tjöpöjojodönö ujuluwinobe.

⁴⁸ Ja̧danö, ju'wibi, isabenö juluwo̧ ja̧nö, amalecitas jojodönö ölakwabikwawö ujuluwinobe. Jejenö ölakwabikwawö ja̧nö, israel jojodö tjö̧jibanö pjaatinobe Saulma, israel jojodönö usula tjemawinö ja̧badötjö tjö̧jibanö.

⁴⁹ Saul i̧tji̧muma bidö: I̧tji̧mu ömadöma Jonatan mikwo̧bi, Isui mikwo̧bi, Malquisua mikwo̧bi. Ja̧danö itji̧mu ya̧döma bidö: Abönö pöoma Merab mikwuju, ja̧danö jöjawujuma, Mical mikwuju.

⁵⁰ Ja̧danö Saul ilekwoma Ahinoam mikwuju, Ahimaas mikwo̧ itjiju. Ja̧danö Saul ömöayedö ölakwabikwawa jojodö la'aka tjuluwo̧ma Abner mikwo̧, Saul abe'do öjawo̧ Ner miwko̧ itji̧.

⁵¹ Ja̧danö Saul abe'do Cis mikwo̧bi, Abner abe'do Ner mikwo̧bi, Abiel mikwo̧ itji̧mutjinobe.

⁵² Ja̧danö, Saul yaba̧lo̧ ö̧jayi, ba̧kwelöjatebö ölakwabikwawö tjö̧jinobe israel jojodöbi, filisteo jojodöbi. Ja̧danö Saulma kabatökönö isakwinobe, itebo jojodötjö ölakwabikwawa juluwadönöma, ömöayedö ölakwabikwawa jojodö batjibanö tjö̧jobö. Ja̧danö itebo jojodötjö juluwadö yebaböködönö öbadekwajenama, ju'wedö ömöayedö ölakwabikwawa jojodökwö batjibobö öibinobe.