1 Samuel 13 - Dios Iwene

Saul treinta o̧bia junalo̧ la'aka luwo̧ baibajo̧, cuarenta y dos o̧bia baledibanö la'aka luwo̧ ö̧jina jawa

¹ Baikwö laebobe israel jojodö la'aka tjuluwo̧ Saul mikwo̧ ö̧jina wene.

² La'aka luwo̧ baibaja̧ ikena, ja'yubenö lekwajabetjö, Saulma israel jojodötjö ömadö tres mil jojodönö omudawö ujuninobe, iteda ömöayedö ölakwabikwawa jojodö batjibanö. Ja̧danö, jobadötjö, dos mil jojodöma Saulkwö kwetjachinobe Micmas comunidadtjöbi, Betel comunidad yö̧ne mösa'ijutjöbi. Ja̧danö, Saul itji̧ Jonatankwö ju'wedö milbedö Benjamin niji Guibea comunidadnö tjö̧jinobe. Jobadö Saulkwöbi, Jonatankwöbi tjö̧jonö, okobe deinö ju'wedönö tjejukwena tjȩwa̧jobö weinobe Saulma.

³ Jobe Guibeatjö, filisteo jojodö ölakabikwawa jojodö tjö̧jemi ji̧nobe, ja̧danö Jonatanma ömöayedö ölakwabikwawa jojodökwö jobadö filisteo jojodönö ölakwabikwawö ujuluwinobe, ja̧danö filisteo jojodöma ja̧ baledaja̧ wene tja̧ja̧kwinobe. Jejenö balediökwe, Saulma weinobe, israel niji ba̧kwemeachibanö yöbawadönö asabikwawi̧ jawa trompeta asabikwawö, jojodönö yötjawobö, —Ökwödö Hebreo jojodöma, filisteo jojodönö ölakwabikwawö kwichaduwo, —jö̧ba̧lö.

⁴ Okobe deinö israel jojodöma baledaja̧ wene tja̧ja̧kwinobe, —Saulma filisteo ölakwabikwawa jojodö tjö̧jemi ju̧kwadönö ujuluwajabe, ja̧danö jejenö ujuluwiawö̧, filisteo jojodöma jwiinö ökwödö israel jojodönö tjöpöjödobe, —jö̧ba̧lö. Ja̧danö, Saulma jojodönö weinobe, ko̧ko̧kwö, Saul ö̧jobe Gilgalbe tji̧'yobö, filisteo jojodökwö tjölakwabikwawobö.

⁵ Ja̧danö, filisteo jojodöma ko̧ko̧kwö tjö̧jinobe, israel jojodökwö tjölakwabikwawobö, yelösöda ba̧jȩkwadö tjo̧ko̧kokwinobe kolukiyama tres mil jenanö, ja̧danö kolukanö kwebachadö ölakwabikwawadöma seis mil jojodö, ja̧danö tjömasapanö kwebachö ölakwabikwawadöma jwaibalawa ö'öböso̧pja̧ ba̧jȩkwi̧danö yelösöda ba̧jȩkwadö tjö̧jinobe. Jobadöma, ko̧ko̧kwajadö, israel nijibe ölakwabikwawö tjichinobe, ja̧danö Micmastjö, Betaventjö jawo̧ ichobekwö tjabakwemi löwötebiya tjotidinobe, jobetjö labebö tjölakwabikwawobö.

⁶ Jejenö tjichiawö̧, israel jojodöma jwiinö yetjaibinobe, —Ökwödöwe, isabenö ökwödötjö bajalekwönönö juluwadö, —jö̧ba̧lö. Ja̧danö, israel jojodötjö ba̧jȩkwadö tju̧ju̧kwawinobe, ju'wedö inawa ötöla okwa, ju'wedö tebo towibiya 'da̧de, ju'wedö ojwe se'do okwa, ju'wedö o̧do okwa soawemi okwa, ju'wedö laju okwa tju̧ju̧kwawinobe.

⁷ Ja̧danö ju'wibi, jobadötjö ju'wedö döbibajö, Jordan ojwe lȩ'dakwemi pebibö, Gad nijibebi, Galaad nijibebi dötjibajinobe. Jobadö dötjibajonö, Saulma Gilgal comunidadnö ö̧ji̧binobe, ja̧danö ju'wedö döbibajöködö jojodöma Saulkwö tjö̧bawö tjö̧jinobe, yebabinö.

Saul sulabenö Dios weöködanö Diosnö iyina jawa

⁸ Ajayinö Samuelma Saulnö weinobe, —Gilgaltjö teada̧li̧, jelemutjö dötölataja möle baledibanö, jobe ichö, kwabö juwö Diosnö chiyobö, —jö̧ba̧lö. Ja̧danö, Samuel weaja̧danö Saulma jobe iteada̧linobe, jo̧kwaijayonö jelemutjö dötölataja möle baledibajena, Samuelma ina deinobe, ja̧danö ju'wibi jojodötjö ba̧jȩkwadö bakwo̧nökwena ju̧kwawö labebö dötjibajinobe.

⁹ Jejenö balediökwe, Diosnö juwö iyobö jwiinajayonö, Saulma weinobe, —Diosnö iyawa jwiinö ubinö iyawabi, ju'wi Dioskwö ösökwö ja̧kwawa iyawabi baikwö ichejebaduwi, ötjöda kwabö juwö chiyobö, —jö̧ba̧lö. Weawö̧, tjichejebinobe, ja̧danö Saulda jwiinö ubinö iyawa kwabö juwö Diosnö iyinobe.

¹⁰ Ja̧danö, ja̧ iyawa iyö kaatakwawena, jenada ichibinobe Samuelma. Jejenö ichibiökwe, Saulma Samuelnö edö, dokwa aebobö laebinobe.

¹¹ Samuelma Saul Diosnö kwabö juwö iyaja̧ edinobe, ja̧danö Saulnö abebö a̧ja̧kwinobe, —Ökwöma Diosnö kwabö juwö kwiyoböma Dios weökökweja, tajawedö jejenö sulabenö Dios weökö jawa ja̧köbaja̧da? —jö̧ba̧lö aebökwe, Saulma atadinobe, —Chömöayedö israel jojodö dötjibajobe chedatö, ja̧danö kwicho jö̧ka̧lina möle baledibobe chedatö, ja̧danö filisteo jojodö Micmastjö ko̧ko̧kwö tjö̧jobe chedatö.

¹² Jejenö baledi̧tjö̧, chomukwatatö, –Filisteo jojodöma ida̧ökö baikwö Gilgalbe ichibö, ökwödönö metjibakwedö, ina Isabenö Jo̧nö pjaatobö atebapji metjibena, –jö̧ba̧lö chomukwatatö. Jo̧kwajabetjö̧, Diosnö atebakwa̧ abönö metjibapji jö̧ba̧lö, isabenö teada̧lökönö ötjöda ösödö kwabö juwö Isabenö Jo̧nö chiyo jö̧ba̧lö omukwatö jejenö ja̧tajabe, —jö̧ba̧lö atadinobe Saulma.

¹³ Jejenö atadökwe, Samuelma yöawinobe, —Isabenö omukwatö̧kö̧ omukwati̧danö sulabenö ja̧köbajabe Saul, Kwuluwo̧ Isabenö Jo̧ Dios weöködanö, a̧ja̧kwökönö sulabenö ja̧köbajabe. Ökwönö jweinö wei̧jayonö, a̧ja̧kwökönö ja̧köbajabe. Isabenö yötawakwö, isabenö jo̧ba wei̧ kwa̧ja̧kwatjö̧ma, ökwöda kwitji̧mu tupadanö jojodöma ba̧kwelöjatebö israel jojodö tjuluwedö tjö̧jobö weo jö̧a̧linobe Isabenö Jo̧ma.

¹⁴ Jo̧kwaijayonö, a̧ja̧kwökönö kwö̧jiökwe, israel jojodö la'aka luwo̧ kwö̧ji̧ma, lekwema kwö̧jö̧kakobe. Isabenö Jo̧ma iteda omukwati̧danö omukwato̧nö isakwajabe, ja̧danö jo̧banö weajabe, ökwö kwö̧jo jö̧ka̧lemi jo̧bada iteda ömöledö israel jojodö tjuluwo̧ ö̧jobö. Ökwöma Dios wei̧ a̧ja̧kwökönö kwö̧jiökwe, Isabenö Jo̧ma balekwo̧nö kwö̧jemi ö̧jobö weobe, —jö̧ba̧lö yöawinobe Samuelma, Saulnö.

¹⁵ Ikenama, jejenö yöbawajo̧, Samuelma a̧la̧ibö, Gilgaltjö laebinobe. Ja̧danö, ju'wedö jojodöma Saulkwö tji̧'yinobe, ölakwabikwawa jojodö tjö̧jobekwö, Benjamin niji̧ comunidad Guibeabe. Ja̧danö, Saulma ömöayedö ölakwabikwawa jojodönö ö̧ba̧jadinobe, ja̧danö jo̧bakwö sule seiscientos jenanö ömadö döbibajöködö tjö̧jinobe.

¹⁶ Ja̧danö, Saulbi, itji̧ Jonatanbi, tjömöayedö ölakwabikwawa jojodöbi Benjamin niji comunidad Guibeanö tjabekwinobe, ja̧danö filisteo jojodöma Micmasnö tjabekwinobe.

¹⁷ Ja̧danö, jobe Micmastjö, filisteo jojodö ölakwabikwawa jojodöma labebö, israel jojodönö tjujuluwotö jö̧ba̧lö latjebinobe. Wapösokwa latjebinobe, bakwaso jakwölakwö Sual niji comunidad Ofrabe 'ya̧kwawamabenö tji̧'yinobe,

¹⁸ jeleso jawo̧ meajobekwö Betsoronbe 'ya̧kwawamabenö tji̧'yinobe, ja̧danö jeleso ja̧wo̧ ichobekwö israel niji bakwachobe, Zeboim wabeko ötjabobe, jojodö deobekwö 'ya̧kwawamabenö tji̧'yinobe.

¹⁹ Ja̧ möle, okobe jwiinö israel nijitjö bakwo̧bi 'dii jawa otido̧ma deinobe. Ja̧ mölȩ filisteo jojodöma israel jojodönö webö tjö̧jinobe, ja̧danö israel jojodönö 'dii jawa tjotidobö wetjinokobe, —Dii jawa tjotidobö weditjö̧ma, israel jojodö tjitea ölakwabikwawa jawa kwölöte'ijubi, tokwötebiyabi tjotidena, ökwödönö tjölakwabikwawobö, —jö̧ba̧lö.

²⁰ Jo̧kwajabetjö̧, israel jojodötjö bakwo̧ batjo jawa otikwa jawa sȩebobö jȩnama, filisteo jojodötjö 'dii jawa otido̧nöda aebobö ji̧nobe. Niji̧ soawakabi, o̧tomo'abi, picobi, trigo 'wiakabi sȩebobö jȩnama, filisteo jojodötjö 'dii jawa otido̧nöda aebobö ji̧nobe.

²¹ Ja̧danö ja̧ jawa sȩekwa mikwawi̧ma, baikwö ji̧nobe, niji̧ soawakabi, picobi sȩekwa mikwawi̧ma, baladasa̧pi̧ döpi̧lataja mikwawinobe, ja̧danö o̧tomo'abi, trigo 'wiakabi sȩekwa mikwawi̧ma, baladasa̧pi̧ bakwapi̧ mikwawinobe.

²² Ja̧danö, jejenö ji̧nobetjö̧, ja̧ möle israel jojodöma kwölöte'ijubi tokwötebiyabi jwitjinobe, filisteo jojodönö kwakwatjakwawobö, sule la'aka luwo̧ Saulda, ja̧danö itji̧ Jonatanda kwölöte'obi tokwötebi tjujuna̧linobe.

²³ Ja̧danö, jobe Micmas pjeanö, mösa'iju 'da̧alakaemi ja'yuwemi ji̧nobe, ja̧danö filisteo jojodö ölakwabikwawa jojodöma jobe 'ya̧nö 'da̧alakaemi tjöbeba̧lö tjö̧jinobe, israel jojojodötjö ölakwabikwawa jojodö jobe tjöbaledapji jö̧ba̧lö.