1 Samuel 12 - Dios Iwene

Samuel bajaleapo israel jojodönö yöawina jawa

¹ Jemi ikenama, jobe Gilgaltjö Samuelma okobe deinö israel jojodönö yöa̧linobe baikwö: —Chömöledö, okobe jwiinö akebinaduwa a̧ja̧kwö, akebinaduwadanö kwuluwo̧duwi inesö la'aka luwo̧nö omudawö chujunajabe.

² Edaduwi, omudawö chujunajökwenö, bite Saulda, kwöba a'oduwi ö̧ja kwuluwo̧duwima. Ötjöma ida̧ökö pöesa, chöwö'yebi ida̧ökö dewökwesa, ja̧danö ötjö chitji̧mu ömadöma kwö̧'da̧deduwi ja̧dö. Kwöwaisaduwa chömöledö, möayo̧ chö̧jayitjö baikwö bajalenö kwuluwo̧duwidanö ja̧nö ökwödönö jwebebö chö̧jajabe, ¿jö̧tö?

³ Babema kwöba a'oduwitjöbi, Isabenö Jo̧ öba a'otjöbi, Dios omudawö ujuninökwe Saul öba a'otjöbi abebö cha̧ja̧kwaduwakwö, ökwödötjö bakwo̧nöbi sulabenö ja̧tinaji̧? Isabenö jweinö yökawaduwobö jo̧be. Ökwödötjö bakwo̧ ajwi pakayaö̧kö̧, bulöö̧kö̧ chönaukwinaji̧? Bakwo̧tjöbi omapekwönö cheminaji̧? Bakwo̧nöbi usula emawinö ja̧tinaji̧? Bakwo̧bi imidajökwe, mido̧ ösödi̧danö jwetebinaji̧? Isabenö jejenö ja̧tinatjö̧ma, bai döba a'otjö yöbawaduwi, chemina tjetatakobetjö̧, —jö̧ba̧lö.

⁴ Samuel abebö a̧ja̧kwawö̧, okobe deinö jojodöma tjatadinobe, —Ja̧maökö, bakwötanöbi jelo̧ omapekönö emöbi, usula tjemawinö ja̧böbi, sulabenö jwekebobö tjimidi̧ emöbi ja̧binököja, —jö̧ba̧lö.

⁵ Israel jojodö tjatadökwe, Samuel yöa̧linobe, —Jau chömöledö, Isabenö Jo̧bi, omudawö ujuninökwe la'aka luwo̧ kwuluwo̧duwi Saulbi yöka̧laduwaja̧ a̧ja̧kwö waisadö, isabenö ökwödötjö sulabenö eminö̧kö̧sa jö̧ba̧lö, ¿jö̧tö? —Yöa̧lawö, —Jau, Isabenö Jo̧ma a̧ja̧kwö waiso̧, —jö̧ba̧lö tjatadinobe.

⁶ Ja̧danö, Samuelma jojodönö yöawinobe, —Jo̧ba yökawaduwaja̧ a̧ja̧kwö waiso̧ jö̧ka̧lajaduwökwe Isabenö Jo̧ Diosda Moisesnöbi, Aaronnöbi omudawö juninama da'dödönö öbibadö batjibanö. Ja̧danö jo̧bada egipto nijitjö da'dödönö baikwö ichejebinama.

⁷ Jo̧ba Isabenö Jo̧nöda kwomukwataduwo jö̧ka̧laduwökwe, Inesö La'aka Duluwo̧ jö̧ba̧lö, jojonö inesö la'aka luwo̧ baiboböma omukwatökönö. Jau chömöledö, Isabenö Jo̧ öba a'otjö 'wiinö ja̧nö kwa̧ja̧kwaduwo, ökwödönö i̧sebö yötawonö, –Jojonö akebinaduwama, isabenö sulabenö akebinaduwobe, –jö̧ba̧lö. Jau chömöledö, Isabenö Jo̧ma isabenö ba̧kwelöjatebö iteda ujulu i̧sȩbö otiwanö pjabataibo̧ ökwödö da'dödönöbi, ökwödönöbi, baikwö yötawa:

⁸ Da'dömine Jacob egipto nijibe ja̧nö i̧'yaja̧ ikena, egipto jojodöma usula tjemawinö ja̧tjinobe da'dödönö, ¿jö̧tö? Ja̧danö, jejenö usula emawö, da'dödöma Isabenö Jo̧nö tjubudekwinobe, ja̧danö tjubudekwiökwe, Moisesnöbi Aaronnöbi da'dödönö pjatjatobö weinobe, ¿jö̧tö? Jau, isabenö da'dödönö pjabatö Moisesnöbi Aaronnöbi weinobe Isabenö Jo̧ma, ja̧danö jobadöma egipto nijitjö da'dödönö öbibö tjichejebinobe baikwö, bai ditebonö otiwanö tjö̧jobö.

⁹ Jo̧kwaijayonö, jejenö otiwanö pjaatinajayonö, tjuluwo̧ Isabenö Jo̧ Diosnö juluwanö tjo̧'wo jwibibö katjatibinobe da'dödöma, sulabenö. Jejenö katjatibiökwe, Diosma jobadönö iyö loinobe, Hazor jojodö ölakwabikwawa luwo̧ Sisara mikwo̧ jobadönö ujuluwobö, ja̧danö filisteo jojodö jobadönö tjujuluwobö, ja̧danö Moab niji la'aka luwo̧ jobadönö ujuluwobö, ja̧danö jobadöma da'dödönö tjölakwabikwawinobe.

¹⁰ Ikenama, da'dödöma Isabenö Jo̧nö budekwö atjebinobe, –Isabenö sulabenö ja̧dajabe, Isabenö Jo̧nö kabatibö, o̧'wo jawa Baal ötjabawö̧nöbi, o̧'wo jawa Astarot ötjabokonöbi sulabenö ösödö dö̧jajabe. Jo̧kwaijayonö, döpöjojodö tjujulutjö dö̧jibanö pjakatobö adeba, isabenö ökwö Isabenö Jo̧nöda ösödö, weköbi̧da ja̧bö dö̧jakobetjö̧, –jö̧ba̧lö atjebinobe.

¹¹ Jejenö atjebökwe, a̧ja̧kwiayinobe Isabenö Jo̧ma, ja̧danö Gedeónnöbi, Bedannöbi, Jeftenöbi, ötjö Samuelnöbi weinobe, ja̧danö kwöpöjojodöduwitjö kwö̧jibaduwanö pjaatinobe. Jau chömöledö, isabenö otiwanö pjaatinobe Isabenö Jo̧ma, kwöpöjojodöduwitjö ja'yubebi wene jwiinö kwiteboduwinö otiwanö kwö̧jaduwenanö baibanö.

¹² Jo̧kwaijayonö, jejenö otiwanö pjabatiainajayonö, babe amonitas jojodö tjuluwo̧ Nahas mikwo̧ baikwö ichobe edö, inesö la'aka luwo̧ kwuluwo̧duwi Isabenö Jo̧ Diosnö omukwatökönö, ötjönö yöka̧linaduwobe, Diosda duluwo̧ ö̧jobömaökö, jojonö inesö la'aka duluwo̧nö kwujuno jö̧ba̧lö. Kwuluwo̧duwi Isabenö Jo̧ Diosda kwuluwo̧ ö̧jinajayonö, jo̧banö öpöjödö jojonö akebinaduwobe.

¹³ Ja̧danö, babe bite omudawö kwujunaja̧duwökwenö edaduwi. Ökwödöma inesö la'aka luwo̧ kwuluwo̧duwinö jojonö akebinaduwobe, ja̧danö akebaduwi̧ a̧ja̧kwö, Isabenö Jo̧ma bite Saulnö omudawö ujunajabe, inesö la'aka luwo̧ baibanö.

¹⁴ Ja̧danö, baikwö yötawaduwakwö chömöledö, Kwuluwo̧duwi Isabenö Jo̧ Diosnö yebabinö ösödö, Dios wei̧ a̧ja̧kwö, wei̧ öpöjödökönö jwaikwöda wei̧danö ja̧bö kwö̧jaduwitjö̧ma, ökwödöbi, kwuluwo̧duwibi Dios wei̧danö ja̧bö kwö̧jaduwitjö̧ma, isabenö otiwakobe, Diosma isabenö ökwödönö pjaatakobe.

¹⁵ Jo̧kwaijayonö, ökwödöma Isabenö Jo̧ yöawi̧ a̧ja̧kwökönö, wei̧ öpöjödö weöködanö ja̧bö kwö̧jaduwitjö̧ma, isabenö ökwödönö lȩebena, ökwödönöbi, la'aka luwo̧ akebinaduwökwenöbi.

¹⁶ Babe 'wi̧inö Isabenö Jo̧ öba a'o janö edaduwi, Isabenö Jo̧ iteda ujulu i̧sebakwa̧ kwedaduwobö.

¹⁷ Kwöwaisaduwa, babema imiame, ojwioma o̧bajiokobe babema, o̧bokobetjö batjo waji̧ emajitjobe babe, ¿jö̧tö? Jo̧kwaijayonö, babe o̧bajiököjayonö, Isabenö Jo̧nö atebocha, iteda ujulu i̧sȩbö, böbabi, ojwiyo o̧boböbi weobö. Ja̧danö, jejenö iteda ujulu i̧sebi̧ edö, kwöwaisachibaduwakwedöja, Isabenö Jo̧ öba a'otjö sulabenö ja̧badöja, inesö la'aka luwo̧ jojonö abeböma, isabenö jwiinö sulabenö abebinadöja, —jö̧ba̧lö.

¹⁸ Jejenö yöbawajo̧, Samuelma Isabenö Jo̧nö aebinobe, ja̧danö aebaja̧danö böbabi, o̧jwiyobi weinobe. Jejenö balediawö̧, jwiinö yetjaibinobe israel jojodöma, Isabenö Jo̧nöbi, ömöayo̧ Samuelnöbi yetjaibanö.

¹⁹ Ja̧danö, yebabinö israel jojodöma Samuelnö atjebinobe, —Ökwödö kwömöayedönö akebo kwuluwo̧ Isabenö Jo̧ Diosnö, debö di̧'yapji jö̧ba̧lö. Isabenö sulabenö ja̧dajabetija, okobe jwiinö ju'wi sulabenö ja̧daja̧ ikena, jemi tupakwö ju'wibi inesö la'aka luwo̧ jojonö sulabenö abebinadösa. Diosnö akebo Samuel, ökwödönö lȩbebö söbebö loapji jö̧ba̧lö, —atjebinobe.

²⁰ Atjebökwö, Samuelma atadinobe, —Yebabökönaduwi chömöledö, isabenö jwiinö sulabenö kwuluwo̧duwinö akebaduwajayonö, ökwödönö kabatibö̧kö̧ Diosma. Baikwö yötawaduwakwö otiwanö ja̧bö kwö̧jaduwobö Isabenö Jo̧ ösödi̧ma: Jwaikwöda Isabenö Jo̧ ösödi̧danö ja̧bö kwö̧jaduwo, jelobekwö jalachibökönö. Jalachibökönö, jwaikwöda Isabenö Jo̧ wei̧da ja̧bö kwö̧jaduwo.

²¹ Jau chömöledö, jalachibö, mikwa jwii̧ jawa o̧'wo jawa kwösödaduwoko, jobadöma isabenö o̧'wo jawada, isabenö jo̧ma deobe, ökwödönö otiwanö tjiyoböbi, kwö̧jibaduwanö pjatjatoböbi.

²² Isabenö Jo̧nö kakatibaduwoko chömöledö, jo̧bama isabenö ökwödönö kabatibö̧kö̧. Jau chömöledö, kwuluwo̧duwi imima Isabenö Jo̧ jö̧ba̧lö mikwo̧, jo̧bada Inesö Isabenö Jo̧obetjö̧. Ja̧danö, iteda ösödi̧danö, ökwödö israel jojodönö omudawö ujuninobe, Isabenö Jo̧ ömöledö bakibaduwanö. Jo̧kwajabetjö̧, ja̧ wene omukwatö, ökwödönö kabatibö̧kö̧ Isabenö Jo̧ma chömöledö, —jö̧ba̧lö yöawinobe Samuelma.

²³ Tupakwö yöawinobe Samuelma, —Ja̧danö ötjöbi chömöledö, isabenö ökwödönö abebö katatoböma jwiobe, ökwödönö Diosnö abebö katatitjöma, isabenö sulabenö Isabenö Jo̧ öpöjödi̧nö katatena. Jo̧kwajabetjö̧ isabenö jwaikwöda Diosnö atebocha ökwödönö, ja̧danö ju'wibi kabatökönö ökwödönö ba̧ja̧dö chö̧jakwo̧sa, otiwanö jweinö ja̧kwawama.

²⁴ Isabenö jwaikwöda Isabenö Jo̧nö yebabinö ösödö, wei̧danö ja̧bö kwö̧jaduwobö jo̧be chömöledö, isabenö ökwödönö inesö otiwanö pjaatina wene omukwatö, jo̧banöda kwösödaduwobö jo̧be.

²⁵ Isabenö jo̧banö ösödö kwö̧jaduwitjö̧ma, otiwakobe chömöledö, jo̧kwaijayonö Diosnö omukwatökönö, sulabenö ja̧bö kwö̧jaduwitjö̧ma, ökwödönö lȩebakobe, wanedö yötawa, ökwödönöbi kwuluwo̧duwinöbi jwodatö loakobe, —jö̧ba̧lö yöawinobe Samuelma.