1 Samuel 11 - Dios Iwene

Saul Amonita jojodönö ujuluwina jawa

¹ Jemi ikenama, ja'yubenö lekwajabetjö, amonita jojodö la'aka luwo̧ Nahas mikwo̧ma iteda ömöayedö ölakwabikwawa jojodökwö israel niji̧be ichö, israel niji comunidad Jabes de Galaad jojodönö ujuluwobö ichinobe. Ichibö, comunidad tjötjösawibö tjö̧jinobe, ja̧danö tjötjösawiawö̧, Jabes jojodöma Nahasnö atjebinobe, —Isabenö ökwökwö wene jwiinö dö̧jakwa̧ wene yöbawö kwujunitjö̧ma, kwömöayedö badibanö weköbi̧ ja̧bö dö̧jakwedösa, —jö̧ba̧lö.

² Atjebökwe, Nahasma atadinobe, —Sule kwöbajaleduwi, bakwo̧kwena öwaisobekwöchobesale kelebö lotobö weköbitjö̧da, jejenö chömöayedö bakibaduwanö wetocha. Jejenö öwaetjöda öwawinö israel jojodötjö bajalekwönönö chujuluwi̧ wene kwi̧sȩkwaduwakwedöja, isabenö israel jojodöma ja'yubebi juluwöködö, chujulutjö kwö̧jibaduwinö pjatjatobö, —jöba̧lö.

³ Atadawö, Jabes comunidad luwedöma jo̧banö yötja̧linobe, —Ina jelemutjö dötölataja möle teada̧li̧, okobe jwiinö ditebo israel niji bakwemeachibanö yöbawadönö wedobö. Ja̧danö, jelemutjö dötölataja möle baledibajenama, ina ökwödönö pjaatakwo̧ deitjö̧ma, ökwönö diyawena, kwösödi̧danö döbajalebiya kelebö loköbobö, —jö̧ba̧lö.

⁴ Jejenö yöba̧lajadö, israel niji ba̧kwemeachibanö wetjinobe yöbawadönö, wene tjujuna̧li̧ yötjawakwedönö, ja̧danö Saul itebo Guibeabe ichibö, jemi ju̧kwadö tjöba a'o yötjawinobe Nahas mikwo̧ jobadönö yöa̧li̧ma, ja̧danö yötjawawö̧, okobe deinö jojodöma labinö tjubudekwinobe, —Jabesnö ju̧kwadö dömöledöwe, —jö̧ba̧lö.

⁵ Jejene baledonö, Saulma pa̧ka̧yadökwö batjo sobö otidinobe, ja̧danö batjotjö ȩwa̧jenama, jojodö tjubudekwi̧ a̧ja̧kwinobe. A̧ja̧kwö, Saulma abebö a̧ja̧kwinobe, —Taji waekwa, jojodö tajawedö tjubudekwobeda? —jö̧ba̧lö. Abebö a̧ja̧kwawö Jabes jojodö yötjawaja̧ yötjawinobe Saulnö.

⁶ Yötjawökwe, Dios O̧'wo Luwo̧ma juluwanö Saulkwö ichibinobe, ja̧danö Nahas sulabenö yöa̧lina a̧ja̧kwö, jwiinö ödameakwinobe Saulma.

⁷ Ja̧danö, Saulma du̧ju̧taja pa̧ka̧yadö batjo otidadönö do̧batö, kwabö lobö ubulatinobe, ja̧danö ubulabija̧ tje'ewakwedönö weinobe, israel niji̧ ba̧kwemeachibanö e'ewö tji̧sȩbobö baikwö: —Okobe deinö la'aka luwo̧ Saulkwöbi, Samuelkwöbi amonita jojodönö ölakwabikwawö kwichaduwobö jo̧be. Ja̧danö ökwödötjö bakwo̧ ichobö öpöjöditjö̧ma, bejenö bidönö ubulabinadanö tjubulatakobe ichö̧kö̧ ajwimunö pa̧ka̧yadönö, —jö̧ba̧lö. Yöbawadö jejenö i̧sebö yötjawawö̧, okobe deinö jojodöma a̧ja̧kwö yetjabinobe, —Da̧ja̧kwökötjö̧ma Isabenö Jo̧ Diosma lȩebena, —jö̧ba̧lö. Jo̧kwajabetjö̧ Saul weaja̧ tja̧ja̧kwinobe, ja̧danö bakwo̧bi ö̧ji̧bökönö, okobe deinö bakobe latjebinobe Saul ö̧jobekwö Bezec nijibe.

⁸ Jejenö Bezecbe ichibajadönö ö̧ba̧jadinobe Saulma, ja̧danö israel jojodötjö ömadöma treciento mil jenanö tjichinobe, ja̧danö israel jojodötjö Judasaso jojodöma treinta mil jenanö ömadö tjichinobe.

⁹ Ja̧danö, Jabestjö ichö yöbawajadönö wetjinobe, ȩwa̧jö Jabes jojodönö yötjawobö, —Itekwai ina tiyuwayi, möle ja'ö baibakwa̧ abönö, kwöjibaduwinö ichö pjadatakobe, —jö̧ba̧lö. Yötjawawö̧, Jabes jojodöma tjo̧'wo ösöwachibinobe.

¹⁰ Jemi ikenama Jabes jojodöma amonitas la'aka luwo̧ Nahasnö omöna yötja̧linobe, —Itekwai kwö̧jobekwö dichakwedösa, diyawobö, okobe jwiinö ökwöda kwösödi̧danö ökwödönö ja̧köbobö, —jö̧ba̧lö.

¹¹ Ikenama, ikena möle yȩayi ina dewachapji, Saulma jojodönö wapösokwanö 'da̧batö ujuninobe, ja̧danö amonitas jojodö tjabakwemi tebachö, jobadönö kwabawö lotjinobe, möle ja'ö tubenanö kabatö. Jwiinö jobadö amonita jojodönö tjujuluwinobe, ji̧badö jwiinö tjipjelekwachinö. Isabenö jwiinö jobadönö tjipjelekwachinö tjujuluwinobe, ji̧badötjö du̧ju̧tajabi bakobe tjö̧jökenanö baibanö.

Yemidanö Saulnö Bitema duluwo̧ jö̧ba̧lö israel jojodö tji̧sebina jawa

¹² Jemi ikenama jojodöma Samuelnö abebö tja̧ja̧kwinobe, —Ajayinö Saul la'aka luwo̧ baibobö öpöjödinadöma, didö? Jobadönö ichejebö, kwabö lododönö, sulabenö öpöjödinadönö, —jö̧ba̧lö.

¹³ Yötja̧liökwe, Saulma atadinobe, —Ja̧maökö, babe möle dömöledötjö bakwo̧nöbi kwabö lodökakobe, Isabenö Jo̧ma isabenö babe möle otiwanö ökwödönö pjaatajabetjö̧, —jö̧ba̧lö.

¹⁴ Jemi ikenama, Samuelma yöa̧linobe jojodönö, —Chömöledö, okobe deinö Gilgalbe di̧'yaduwo, jobetjö yemidanö Dios öba a'otjö bite Saulnö duluwo̧ inesö la'aka luwo̧ baibanö dujunobö, —jö̧ba̧lö.

¹⁵ Yöa̧lawö̧, okobe deinö israel jojodöma Gilgalbe 'ya̧nö, Isabenö Jo̧ öba a'otjö Saulnö yötjawinobe, —Isabenö Dios omudawö ujuninökwe Saulma okobe deinö israel jojodötjö inesö la'aka luwo̧ ö̧jobe, —jö̧ba̧lö. Ja̧danö jobe Gilgaltjö Diosnö iyawa, Dioskwö ösökwö ja̧kwawa iyawama Diosnö iyö tjukwinobe. Ja̧danö, jobe Gilgaltjö, Saulbi, okobe deinö Israel jojodöbi tjo̧'wo ösödachibanö tjö̧jinobe.