1 Samuel 10 - Dios Iwene

Samuel Saul uunö o̧te tobebö, Dios omudawö ujuninökweja jö̧ba̧lö yöawina jawa

¹ Ikenama Samuelma o̧tesayu̧ ja'yuayu̧ do̧batö, Saul uunö toebinobe, ja̧danö Saulnö du̧batö yöawinobe, —Isabenö Jo̧ma isabenö ökwönö omudawö ujunajabe, iteda ömöledö israel jojodö la'aka tjuluwo̧ bakibanö. Ja̧danö, baikwö baledakwa̧ yötawakwö, isabenö Dios ökwönö omudawö ujunaja̧ kwöwaisobö:

² Chöjelö lakebaja̧ ikena, Benjamin niji̧ comunidad Selsatjö, kwa'do̧mine Raquel jowobiako pjeanö ömadö du̧ju̧tajanö kwöbadekwajakwo̧ja. Ja̧danö badekwajo̧ma, jobadöma baikwö yötjawakobe ökwönö, –Ida̧ökö tjöbadekwajabe kwisakwajawö̧ bu̧lödönöma, ja̧danö babema kwabe'doma bu̧lödönö omukwatökönö, ökwönö o̧'wo tjo̧achobe, chitji̧we, dakwö jo̧banö chöbadekwakwajö, –jö̧ba̧lö ökwönö yötjawakwedö.

³ Ikenama, jobadönö edajo̧, tupakwö 'ya̧nö, towi nöowi Tabor comunidad ö'öbösowi jo̧be kwichibakobe, ja̧danö jobe ichibajo̧, wamedukwa ömadö ökwönö tjöbadekwakobe, Betelbe Diosnö tjösödobö 'ya̧döma. Jobadötjö bakwo̧ chivodönö wamedukwanö öbibo̧nö kwedakobe, ja̧danö jelo̧ pan öpji̧ya̧ wapöpja̧kwa e'ewo̧nö kwedakobe, jelo̧ ubasobu o̧'dobu̧sa'wo e'ewo̧nö kwedakobe.

⁴ Jobadöma ökwönö edö, dokwa jö̧ba̧lö atebakobe, ja̧danö ökwönö pan öpji̧ya̧ döpja̧lataja ökwönö tjiyakwedö, ja̧danö tjiyaja̧ma, do̧batö kwemakobe.

⁵ Ikenama, jobetjö labebajo̧, Guibea comunidad mösa'o Dios iteasa'o jö̧ba̧lö ötjaba'obe kwichibakwo̧ja, filisteo ölakwabikwawa jojodö tjöjena pjeasa'obe. Jobe comunidadbe kwichibenama, möemi Diosnö iyawemitjö yutubajadö Dios yöawi̧ yöbawadönö kwöbadekwajakobe, lo̧awa jawa arpabi, panderobi, flautabi, lirabi kwebatö, Dios yöawi̧ yöbawö kwebachadönö.

⁶ Ja̧danö jobadönö kwöbadekwajenama, Isabenö Jo̧ O̧'wo Luwo̧ma ökwökwö ichibö ö̧jakobe, ja̧danö jelo̧danö balewachibö, ökwöbi jobadökwö kwekachakwo̧ja, Dios yöawi̧ yöbawö.

⁷ Jejenö yötawaja̧danö baledaja̧ ikenama, otiwanö ja̧köbo jö̧ka̧li̧danö ja̧bi, ja̧danö isabenö Diosma ökwönö pjaatakobe.

⁸ Ja̧danö, Guilgal comunidadbe chi̧'yocha, jo̧kwaijayonö chi̧'yakwa̧ abönö jobe kwi̧'yo, ja̧danö jelemutjö dötölataja möle kwiteada̧lo, chichibenanö kabatö. Ja̧danö, jobe ökwökwö chichibenama, kwabö juwö Diosnö chiyocha, jwiinö ubinö Diosnö iyawabi, ju'wi bakobe Dioskwö ösökwö ja̧kwawa jawa iyawabi. Ja̧danö, jobetjö ökwönö yötawocha jemi tupakwö otiwanö ja̧bö kwö̧jakwa̧ma, —jö̧ba̧lö yöawinobe Samuelma Saulnö, tupakwö baledakwa̧ma.

⁹ Jejenö yöawajökwe, jalachibö Saulma Samuel ö̧jelö labebö ȩwa̧jinobe, ja̧danö Diosma Saul omajade balewachinö balewö loinobe, ajayitjö wainö jo̧ baibanö. Ja̧danö, okobe jwiinö Samuel yöawaja̧ma, ja̧ möle yöawaja̧danö baledinobe.

¹⁰ Samuel yöawaja̧danö, Saulbi ömöayo̧bi Guibeabe tjichibenama, Dios yöawi̧ yöbawadökwö tjöbadekwinobe, ja̧danö ju'wibi, Dios O̧'wo Luwo̧ma Saulkwö juluwanö ichibinobe, ja̧danö yöbawadökwö kwebachö, tjö̧'da̧de 'ya̧nö Saulbi Dios yöawi̧ yöbawö kweachinobe.

¹¹ Jejenö baledena, ajayinö Saulnö waisadöma Saul Dios yöawi̧ yöawobe tjedinobe, ja̧danö Dios yöawi̧ yöawiawö̧, yöba̧lakwawö abebö tja̧ja̧kwinobe, —Bite Cis itji Saulnö dakwö baledobeda, jo̧babi Dios yöawi̧ yöbawo̧ baibanö ö̧jobeji̧? —jö̧ba̧lö.

¹² Jejenö yötjawiökwe, jobe ju̧kwadötjö bakwo̧ abebö a̧ja̧kwinobe, —Idö yöbawadö tjuluwo̧ma tida? —jö̧ba̧lö. Ja̧danö, babe jojodö yötja̧li̧, —Saulbi Dios yöawi̧ yöbawo̧ baibanö ö̧jobeji̧, —jö̧ba̧lö yötja̧li̧ma, ja̧ möleda jamatö yötja̧linobe.

¹³ Ja̧danö, Dios yöawi̧ yöbawö kabatajo̧, Saulma möemi Diosnö iyawemibe ichibinobe.

¹⁴ Jemi ikenama, Saul ömöledöso̧, abe'do öjawo̧ma Saulnöbi, ömöayo̧nöbi abebö a̧ja̧kwinobe, —Detjö kwȩwa̧ja̧duwa̧da? —jö̧ba̧lö abebö a̧ja̧kwökwe, Saulma atadinobe, —Ökwödöma bu̧lö̧dönö isakwö di̧'yijatö, ja̧danö döbadekwajokobetjö̧, Samuelnö abebö a̧ja̧kwö di̧'yijatö, otiwanö döbadekwakwa̧ yöawojobö jö̧ba̧lö.

¹⁵ —Atadökwe, Saul ömöledöso̧ma abebö a̧ja̧kwinobe, —Dakwö yöawinada Samuelma, yöbawitjö, —jö̧ba̧lö.

¹⁶ Abebö a̧ja̧kwökwe, —Ökwödönö yöawijatö, bu̧lö̧dönö ida̧ökö tjöbadekwajabe, —jö̧ba̧lö atadinobe Saulma, ömöledöso̧ abe'do öjawo̧nö. Jo̧kwaijayonö, bu̧lö̧dönö Samuel jö̧a̧lina yöawijayonö, la'aka luwo̧ ö̧jakwa̧ jawa Samuel jö̧a̧linama yöawinokobe Saulma.

Saulnö omudawö tjujunina jawa, israel jojodötjö inesö la'aka luwo̧ baibanö

¹⁷ Jemi ikenama, Samuelma israel jojodönö jwöinobe, Mizpa comunidadtjö ko̧ko̧kwö Isabenö Jo̧ yöawi̧ tja̧ja̧kwobö.

¹⁸ Ja̧danö, ko̧ko̧kwö a̧ja̧kwadönö yöawinobe baikwö: —Baikwö yöawobe Isabenö Jo̧, ökwödö israel jojodö Duluwo̧ Diosma: –Ötjöma ökwödö israel jojodönö egipto nijitjö lakebaduwinö chichejebijatö, ja̧danö egipto jojodö tjujulutjöbi, okobe deinö ju'wedö usula kwemaduwinö tjitebokwena jojodö tjujulutjöbi kwö̧jibaduwinö pjatatijatö.

¹⁹ Jo̧kwaijayonö, jejenö pjatatinajayonö, ökwödöma kwuluwo̧duwi Diosnö, öpöjödadöja. Jau, okobe jwiinö wene kwujuna̧laduwitjöbi, usula emawö kwö̧jaduwitjöbi kwö̧jibaduwinö pjabato̧nö, öpöjödö kabatibadöja, –Jojonöda Inesö la'aka duluwo̧ baibanö dujunobö dösöda, –jö̧ba̧lö. Ja̧danö akebaduwi̧danö chiyocha, jo̧kwajabetjö̧ ötjö Isabenö Jo̧ chöba a'o jamataduwi ökwödö israel jojodöma. Wainökwena Israel itji̧musasokwena, ja̧danö jobadö tji̧tji̧musasokwena wainö jamataduwi, didösasotjö la'aka luwo̧ omudawö chujunajökwenö chi̧sebakobetjö̧, —jö̧ba̧lö Dios yöawi̧ yöawinobe Samuelma.

²⁰ Weökwe, Samuelma bakwasokwena jojodönö yö̧ne tjichibobö weinobe, ja̧danö a̧li̧nösa̧mutjö dosolatajatjö, Benjaminsaso jojodönö i̧sebinobe Diosma, —Bidötjö bakwo̧nö omudawö chujunajabe, —jö̧ba̧lö.

²¹ Ikenama Samuel weinobe Benjaminsaso ajayinö jinadö tjömöledökwena yö̧ne tjichibobö, ja̧danö Matrimine i̧tji̧mu tupadanö jojodönö i̧sebinobe Diosma, —Bidötjö bakwo̧nö omudawö chujunajabe, —jö̧ba̧lö. Ja̧danö jemi ikenama, —Cis itji̧ Saul mikwo̧nö omudawö chujunajabe, —jö̧ba̧lö i̧sebinobe Diosma. Jo̧kwaijayonö, Saulnö tjisakwenama, tjöbadekwajinokobe.

²² Jo̧kwajabetjö̧ yemidanö Isabenö Jo̧nö abebö tja̧ja̧kwinobe, —Jo̧ba Saulja, ina bai deiji̧? —jö̧ba̧lö abebö tja̧ja̧kwökwe, Isabenö Jo̧ma yöawinobe, —Saulma jojodö tjitea tjutuda'wiju 'da̧de uju̧kwawajabe, —jö̧ba̧lö.

²³ Yöawawö̧, juluwanö Saulnö tjisakwinobe, ja̧danö badekwajadö, okobe deinö jojodö tjö̧'da̧de öjamatobö tjujuninobe. Ja̧danö jojodö tjö'da̧de ja̧nö, Saulma isabenö okobe deinö ju'wedö israel jojodötjö bajalekwönönö möbo̧ ö̧jinobe, ju'wedö jojodöma sule Saul öböbe'onönö tjichibanö.

²⁴ Ja̧danö Samuelma jojodönö yöawinobe, —Isabenö biteda Dios omudawö ujunajökwema, okobe deinö israel jojodötjö bakwo̧bi bitedanö jo̧ma deobe, —jö̧ba̧lö Samuel yöawawö̧, okobe deinö jojodöma Saulnö ösödö jwötjeba̧linobe, —Lekwe bite la'aka duluwo̧ ö̧jobö dösöda, —jö̧ba̧lö.

²⁵ Ikenama Samuelma okobe jwiinö la'aka luwo̧ ö̧ji̧ jawa yöawinobe jojodönö, inesö la'aka luwo̧ otiwanö ö̧jakwa̧ weawama, ja̧danö kwiyalu'yenö i̧wȩyudinobe. Ja̧danö wȩyudajo̧, kwiyalu'yema Isabenö Jo̧ ejunö ödinobe. Ikenama, jejenö yöbawöbi, wȩyudöbi kabatajo̧, okobe deinö tjȩwa̧jobö weinobe Samuelma.

²⁶ Ja̧danö, Saulbi iteda ejube Guibeabe ȩwa̧jinobe. Ja̧danö, Diosma ju'wedönö pjaatinobe, Saulkwö tji̧'yobö tjomukwatobö, isabenö juluwadö ölakwabikwawa waisadönö, ja̧danö jobadöma Saulkwö itebo Guibeabe tji̧'yinobe, ömöayedö batjibanö.

²⁷ Ja̧danö ba̧jekwadö Saulnö ösödö, —Isabenö kwömöayedösa, —jö̧ba̧lö iyawa tjiyinobe Saulnö, otiwanö tjuluwo̧nö tjiyo jö̧tja̧li̧danö. Jo̧kwaijayonö jobadö otiwanö Saulnö tjösödijayonö, ju'wedö sulabedö mikwawöködöma Saulnö öpöjödö, —Bitema la'akatjöda döpöjojodötjö dö̧jibanö pjaatökakwo̧, —jö̧ba̧lö, iyawama tjiyinokobe Saulnö. Jo̧kwaijayonö, jo̧banö tjöpöjödijayonö, Saulma jobadönö lȩebinokobe.