1 Samuel 1 - Dios Iwene

Samuelnö jemina jawa

¹ Bakwo̧ Elcana mikwo̧ ö̧jinobe, israel jojodötjö Efraínsaso jojodö tjitebonö, mösa'iju jena comunidad Ramánö. Jo̧ba Elcanama Jeroham mikwo̧ itji̧, ja̧danö Jerohamma Eliú mikwo̧ itji̧, ja̧danö Eliúma Tohu mikwo̧ itji̧, ja̧danö Tohuma Zuf mikwo̧ itji̧. Ju'wibi, efrateo jö̧ba̧lö ötjabawö̧tjö bi̧na jo̧ba Elcana mikwo̧ma.

² Jo̧ba Elcanama ilekwamu duju̧tajanö ujuna̧linobe, bakwuju Ana mikwujunöbi, jeluju Penina mikwujunöbi. Ja̧danö, Elcana ilekwo Penina mikwujuma jitji̧munö 'yabebuju jö̧jinobe, jo̧kwaijayonö Ana mikwujuma jitji̧mu debuju jö̧jinobe.

³ Ja̧ mölȩ Silo comunidadtjö Inesö Diostjö jojodötjö tjö̧'da̧de pjabato̧ Eli mikwo̧bi, itji̧mu Ofni mikwo̧bi, Finees mikwo̧bi Isabenö Jo̧, okobe jwiinö juluwo̧ Dios öba a'otjö pjabatö tjö̧jinobe. Ja̧danö, jejenö Silo comunidadtjö tjotidiökwe, o̧ba bakwabakwena, Elcanama, ilekwamunöbi itji̧munöbi öbibö Silo comunidadbe 'yi̧ainobe, jobetjö Diosnö ösödö juwö iyobö.

⁴ Ja̧danö, ba̧kwelöjatebö Diosnö juwö iyena, Elcanama ömöledökwö Dios öba a'o ukwo jö̧tja̧li̧ jawatjö 'da̧batö ba̧kwo̧nökwena iyinobe ilekwo Penina mikwujunöbi, jitji̧munöbi,

⁵ jo̧kwaijayonö jobadönö iyi̧tjö bajalekwönönö otiwanö iyinobe ilekwo Ana mikwujunö, nöinö jobujunö ile niebobetjö̧. Jobuju Anama ji̧tji̧mu debuju jö̧ji̧nobe, Isabenö Jo̧ Dios metu'wo jö̧jobö weokobetjö̧, jo̧kwaijayonö ji̧tji̧mu debuju jö̧jiökwe, jobujunö öpöjödinokobe Elcanama, yayonö jwiinö ile nibebö ösödinobe ilekwo Ananöma.

⁶ Ja̧danö, jejenö baledioko, Ana jöpöjojosuju Peninama sulabenö jo̧'wo sulinö ojinobe Ananö, chi̧tji̧munö 'yatebobö weijayonö, ökwö 'yakebobö webö̧kö̧ Isabenö Jo̧ma jö̧ba̧lö.

⁷ Jejenö bakwabakwena Diosnö ösödö Silobe tji̧'yenama, Peninama sulabenö obiajinobe Ananö. Ja̧danö jejenö baledioko, Anama jo̧'wo tjo̧achiainobe, ja̧danö o̧'wo tjo̧achö ja̧nö, kwökönö budekwiajinobe.

⁸ Ja̧danö, jejenö jubudekwiökwe, jilekwe Elcanama Ananö pjabatö yöba̧liainobe, —Ana, tajawedö kwökönö kwubudekwa, tajawedö kwo̧'wo tjo̧acha? Kwi̧tji̧mu deijayonö, ötjöma detokobe, ötjönö kwujuna̧lobe, ökwönö ile nibebo̧nö. Ötjö ökwönö ile nibebo̧nö kwujuna̧lobetjö̧, bakwuju jitji̧mu domulatajabedönö juna̧luju jo̧'wo ösöwi̧tjö bajalekwönönö kwo̧'wo ösöwanö kwö̧jobö jo̧be, kwo̧'wo tjo̧achoko, —jö̧ba̧lö yöba̧liainobe Elcanama ilekwo Ana mikwujunö.

⁹ Ja̧danö, ju'wi o̧ba jejenö Diosnö tjiyenama, owöbi kwanöbi katjataja̧ ikenama, Anama a̧laibö Diosnö ajebinobe. Diosnö ajebonö, jipjeanö Diostjö jojodötjö tjö̧'da̧de pjabato̧ Eli mikwo̧ma iteakanö ö̧binobe, Isabenö Jo̧ eju apjude ö'öbösakanö.

¹⁰ Jobe, Eli öba a'o ja̧nö, Anama jwiinö jo̧'wo tjo̧achinobe, ja̧danö Isabenö Jo̧nö abebö o̧'wo tjo̧achö jubudekwinobe.

¹¹ Ja̧danö Diosnö abebö isabenö ja̧jakwa̧ wene yöbawö jujuninobe, baikwö: —Chuluwo̧ Isabenö Jo̧ okobe jwiinö juluwo̧ Dios, usula chemawi̧ kwedobö atebakwö, ja̧danö usula chemawi̧ omukwatö, chitji̧nö 'yatebobö atebakwö. Isabenö yöbawö chujunakwö, jejenö chitji̧nö 'yatebobö weköbitjö̧ma, kwiyajökwenö 'da̧batö chujunocha, ba̧kwȩlöjatebö ina 'ya̧alayi ökwö weköbi̧da otido̧ baibanö, ja̧danö ökwöda weköbi̧ otido̧ ö̧jakobetjö̧, öwö'ye la'akatjöda 'witjökakwo̧, —jö̧ba̧lö ajebinobe Anama Isabenö Jo̧nö .

^12-13 Jejenö Isabenö Jo̧nö ajebonö, Elima Ananö edinobe. Anama Diosnö ajebenama, jomajadenöda ajebinobe, jiwene ökwöökönö, ja̧danö jaa yöja̧lobedanö ichejekwijayonö, ökwöi̧ jwiinö ajebinobe. Jejenö jiwene ökwöi̧ ökwöiökökwe, Elima edö omukwatinobe, bisuma 'dukwachoko jö̧ba̧lö.

¹⁴ Jejenö omukwatö, Elima Ananö yöa̧linobe: —Sulabenö 'dukwachokoja, ¿dokwa lekwe kwo̧wa̧lakwa̧da? Dokwa lekwe 'dukwachö o̧wa̧lö 'dukwachoko kwö̧jakwa̧da? ¡Sula! Uba sobu o̧'do̧bu owawa kabatibi, —jö̧ba̧lö.

¹⁵ Jejenö yöa̧loko, Anama jatadinobe: —Ja̧maökö chuluwo̧, 'dukwachokokosa, ubasobu o̧'dobubi, ju'wi nio ojwiobi owa̧löma chö̧jokobe. Cho̧'wo luwo̧nö o̧'wo tjo̧tekwujusa, ja̧danö baledaja̧ kwedaja̧ma, cho̧'wo tjo̧tekwi̧ Isabenö Jo̧ chuluwo̧ öba a'otjö yöba̧lö atebajabe.

¹⁶ Ötjö kwömöayujunö omukwatökönui, sulabuju mikwawökuju jö̧ba̧lö. Isabenö yötawakwö, kwedaja̧ma, jwiinö usula chemawi̧tjö Diosnö o̧'wo tjobekwö atebaja̧ kwedajabe, —jö̧ba̧lö jatadinobe Anama.

¹⁷ Jatadökwe, Elima yöa̧linobe, —Otiwa, wene jwiinö otiwanö kwȩwa̧jo, ja̧danö ökwödö israel jojodö dösödökwe Diosma akebaja̧danö iyobö chösöda, —jö̧ba̧lö.

¹⁸ Yöa̧loko, Anama jatadinobe, —Otiwa chuluwo̧, otiwanö lelö̧inö ötjönö kwömöayujunö kwedobö chösöda, —jö̧ba̧lö. Jemi ikenama, Anama jömöledö tjö̧jobekwö jȩwabijinobe, ja̧danö kwakwawa jukwinobe, ja̧danö tupakwö jo̧'wo tjo̧achinokobe.

¹⁹ Jemi ikena möle, Elcanabi ömöledöbi yȩayi ala̧ibö yemidanö Isabenö Jo̧ öba a'otjö bȩbachibö tjösödinobe, ja̧danö ösödajadö, tjitebo Ramabe tjȩwa̧jinobe. Ja̧danö, Elcanama ilekwo Anakwö ö̧jinobe, ja̧danö Isabenö Jo̧ma Ana ajebina omukwatö metu'wo jö̧jobö weinobe,

²⁰ ja̧danö jemakwa̧ mölȩ badekwachenama, jitji̧ iso̧nö jeminobe. Emaju, Samuel jö̧ba̧lö jimidinobe jitji̧nö, —Chitji̧nö atebiökwe, Isabenö Jo̧ma a̧ja̧kwö bitenö iyajabe, —jö̧ba̧lö.

Yöbawö jujuninadanö Ana Samuelnö 'da̧batö jujunina jawa

²¹ Jemi ikenama, o̧bakwena Isabenö Jo̧nö tjiyakwa̧ möle badekwachenama, ba̧kwelöjatebö 'yi̧atji̧danö ömöledönö öbibö Elcanama yemidanö Silobe i̧'yinobe, o̧bakwena Diosnö iyawa iyoböbi, isabenö chiyocha jö̧ba̧lö yöbawö ujunina iyawa iyoböbi.

²² Jo̧kwaijayonö, ju'wedö tji̧'yonö, Anama ji̧'yinokobe. Jilekwenö baikwö yöja̧linobe: —Ina chitji̧nö öbibö chi̧'yökö, ina tjemu o̧do̧'bi̧ owobetjö̧. Tupakwöda, o̧do̧'bi 'dötebaja̧ ikenada chi̧'yocha. Jemi ikenama, o̧do̧'bi̧ 'dötebaja̧ ikena, chitji̧nö öbibö chi̧'yocha, Isabenö Jo̧ öba a'otjö yötawinadanö chujunobö, ja̧danö jobe ja̧nö, ba̧kwelöjatebö Dios öba a'o ö̧jobö.

²³ Yöja̧lökwe, jilekwe Elcanama atadinobe, —Jao, Otiwa, kwomukwati̧danö ja̧bi. Ja'yuwo̧kwö ji̧bi, o̧do̧'bi̧ 'dökebenanö kabatö, inesö chösödi̧ma bi̧ya, Isabenö Jo̧nö yöbawö kwujuninadanö badekwachinö ja̧köbobö Dios pjaatobö, —jö̧ba̧lö. Ja̧danö, Anama okobe jitji̧nö o̧do̧'mi ojwö jö̧jibinobe, 'döjebenanö kabatö.

²⁴ Ja̧danö, o̧do̧'bi̧ 'döjebaja̧ ikena, yemidanö Diosnö iyö tji̧'yena, yöja̧linadanö Anama jitji̧ ina ja'yuwo̧nö öbibö ji̧'yinobe Isabenö Jo̧ ejube Silo Comunidadbe. Ju'wibi pakayaso̧ wapötakwa o̧ba junalo̧nöbi öbibö, tuda'wo nueve kilo harinaso̧pjasa'wobi e'ewö, ubasobu o̧'do̧busapja̧bi e'ewö tji̧'yinobe.

²⁵ Ja̧danö, pakayaso̧nö kwabö juwö Isabenö Jo̧nö iyajadö, tjemunö öbibö tji̧'yinobe Eli ö̧jobekwö.

²⁶ Ichibajadö, Anama Elinö yöja̧linobe: —Chuluwo̧, belö kwöba a'otjö Isabenö Jo̧ Diosnö abebinanö kwomukwatiji̧? Isabenö yötawakwö, ötjöma damötjö kwöba a'otjö Isabenö Jo̧nö abebinujusa.

²⁷ Isabenö Jo̧nö atebenama, bite chitji̧nö atebijatö, ja̧danö isabenö atebi̧ a̧ja̧kwö iyinobe Diosma.

²⁸ Jo̧kwajabetjö̧, bitenö 'da̧batö chujunajabe ina 'ya̧alayi ba̧kwelöjatebö Isabenö Jo̧ wei̧ otidö ö̧jobö, —jö̧ba̧lö yöja̧linobe Anama Elinö. Ja̧danö, jobe ja̧nö bȩbachibö Diosnö tjösödinobe.