1 Reyes 9 - Dios Iwene

Dios yemidanö Salomon i̧'wi̧dinö yöawina jawa

¹ Solomonma nöinö otidinobe, Isabenö Jo̧ ejubi, iteda eju comunidadbi, ju'wi otidobö omukwatö ujunina jawabi. Ja̧danö okobe jwiinö ja̧ o̧do jawa otidobö omukwatina, otidö kaataja̧ ikenama,

² Isabenö Jo̧ma yemidanö öwawachö yöawinobe Salomonnö i̧'wi̧dinö, ajayinö Gabaontjö jo̧banö öwawachö yöawinadanö.

³ Baikwö yöawinobe Isabenö Jo̧ma, Salomon i̧'wi̧dinö: —Salomon, chejutjö ötjönö akebina cha̧ja̧kwijatö, otiwanö pjatatobö akebina cha̧ja̧kwijatö Salomon. Ja̧danö, a̧ja̧kwajo̧, akebaja̧danö beju cheju baibanö kwotidinejuma 'da̧batö chujunajabe, ba̧kwelöjatebö chö̧jakweju baibanö. Kwotidineju ile nibebo̧sa Salomon, ja̧danö ba̧kwelöjatebö jeju jo̧bekwö cheda̧lakwo̧sa Salomon, akebinadanö.

⁴ —Ja̧danö, ökwönö weti̧ma, baikwö wetakwö Salomon: Kwabe'do David ötjö chömöayo̧ ja̧nö, omajadenö jwaikwöda otiwanö omukwatö, dötölatajanö omukwatökönö weti̧ a̧ja̧kwö ösödinadanö, ökwöbi ösödö kwö̧jobö jo̧be. Jau Salomon, okobe jwiinö weti̧ a̧ja̧kwö kwö̧jobö jo̧be, ja̧bö kwö̧jobö weti̧bi, ju'wi weti̧ jawabi.

⁵ Jejenö weti̧ a̧ja̧kwö kwö̧jitjö̧ma, kwabe'do Davidnö yöbawö chujunina badekwachinö wetakwo̧sa, jobanö yöta̧linadanö, ökwötjö tupadanö jojodöma ba̧kwelöjatebö israel jojodötjö inesö la'aka luwedö tjö̧jakwedö, ja̧danö kwitjimu tupadanö jojodötjö israel jojodö la'aka tjuluwo̧ iteakanö bo̧ma, la'akatjöda deökakobe, ba̧kwelöjatebö la'aka luwo̧ bo̧ ö̧jakobe.

⁶ —Jo̧kwaijayonö ökwöbi, kwitji̧mubi ötjönö kabatibö, ja̧bö kwö̧jaduwobö weti̧bi, ju'wi weti̧bi a̧ja̧kwökönö kwö̧jaduwitjö̧ma, jadanö a̧ja̧kwökönö ja̧nö, ju'wedö tjösödawö̧ diosbedö wetji̧da a̧ja̧kwö, jobadönö kwösödaduwitjö̧ma,

⁷ isabenö lȩtebakwo̧sa. Jau Salomon, israel jojodönö, jobadönö chiyinemi nijitjö a'dewö lotakwo̧sa, jadanö beju, ötjöda chö̧jakweju baibanö 'da̧batö chujuninejubi katatibakwo̧sa, beju jo̧bekwö edökönö. Ja̧danö, jejenö israel jojodönö jwiinö lȩtebiawö̧, ju'wedö bö̧jenö ju̧kwadöma israel jojodönö otjakwedö, –Idö israel jojodöma Dios lȩebawö̧ mikwawöködö, –jö̧ba̧lö.

⁸ Ja̧danö, beju otiwejuma, sule pjolö loawejuda ji̧bakobe, okobe deinö baledö edö, –Ayö, bemi israel nijibi, beju iteda ejubi, tajawedö jwiinö suli̧ öwaedinada Isabenö Jo̧ma? –jö̧ba̧lö tjöbajale jalaka baibanö abebö tja̧ja̧kwenanö baibanö.

⁹ Ja̧danö, jejenö abebö tja̧ja̧kwawö̧, tjatadakwedö: –Tjösödökwe Isabenö Jo̧ Diosnö katjatibinobetjö̧, baledajabetija. Jau, Diosma tja'dödönö Egipto nijitjö latjebinö pjaatinajayonö, jo̧banö katjatibinobe israel jojodöma, ja̧danö jo̧banö kabatibajadö, ju'wedö tjösödawö̧ diosbedönöda wo̧batö tjösödinobe, jobadö wetji̧da a̧ja̧kwö. Ja̧danö jejenö sulabenö kabatibö ja̧tji̧ökwe, bi̧ya inesö suli̧ waedakwawa jobadönö lȩbebö weajabetija Isabenö Jo̧ma, –jö̧ba̧lö tjatadakwedö, —jö̧ba̧lö Salomon i̧'wi̧dinö yöawinobe Isabenö Jo̧ma.

Ju'wi Salomon otidö ö̧jina jawa

¹⁰ Veinte o̧biya baledibanö, Isabenö Jo̧ ejubi, iteda eju comunidadbi otidö ö̧jinobe Salomonma.

¹¹ Ja̧danö, ja̧ jawa otidö ö̧jonö, Tiro comunidad la'aka luwo̧ Hiram mikwo̧ma Salomonnö pjabatö nöinö cedro towibiyabi, cipres towibiyabi, orobi iyinobe, okobe jwiinö Salomon ja̧ jawa ösödi̧ ba̧jȩkwachinö otiwanö iyinobe Hiramma. Jejenö pjaatiökwe, otidö kaatenama Salomonma balekwa mikwa Hiramnö iyinobe, Galilea nijitjö̧, veinte comunidadbiya Hiramnö iyinobe, itebo comunidad baibanö.

¹² Jo̧kwaijayonö, Salomon iyaja̧ comunidadbiya otiwojobö jö̧ba̧lö Hiram edö i̧'yenama, öpöjödinobe, mikwawökö ji̧ comunidadda iyajabe, jö̧ba̧lö.

¹³ Ja̧ comunidadbiya öpöjödö, Hiramma Salomonnö abebö a̧ja̧kwinobe, —Chömöledöso̧, tajawedö bemi mikwawökö ji̧ comunidad kwiyaja̧da? —jö̧ba̧lö. Ja̧danö, jejenö mikwawökö ji̧ comunidad kwiyajabe, jö̧ba̧lö yöa̧linobetjö̧, jemi tupakwö ja̧ niji Cabul jö̧ba̧lö ötjabinobe, Mikwawökemi, jö̧ba̧lö.

¹⁴ Hiram Salomonnö iyina oroma, isabenö nöinö oro iyinobe, cuatro mil kilo jenanö iyinobe.

¹⁵ Salomonma ba̧jȩkwadö jojodönö omudawö weinobe, iteda ömöayedö babibö, wei̧ jawa otidö tjö̧jobö. Ja̧danö, jobadö Salomon ömöayedö tjotidina jawama, baikwö laebobe: Salomon weawö̧, Isabenö Jo̧ ejubi, Salomon ejubi, Jerusalentjö Milo jö̧ba̧lö ötjabemibi, Jerusalen comunidad tjöekwemibi. Ja̧danö ju'wibi, pjolö lotjina comunidadbiya Jazor comunidadbi, Meguido comunidadbi, Guezer comunidadbi, yemidanö tjotidobö weinobe.

¹⁶ Ja̧ Guezer comunidad labebö loawama, baikwö laebobe: Ajayinö cananeo jojodöma Guezer comunidadnö tjö̧jinobe, jo̧kwaijayonö Egipto niji la'aka luwo̧ Faraonma, ja̧ comunidad mebibö ujuluwinobe, ja̧danö juluwajo̧ comunidad juwö, jobe ju̧kwadö cananeos jojodönö kwabawö loinobe. Ja̧danö, Faraon itjiju Salomonnö jemenama, Faraonma ujuluwajemi comunidad Guezerma itjijunö iyinobe, tjilekwamunö tjemena iyawa baibanö.

¹⁷ Ja̧danö, jejenö iyiökwe, yemidanö tjotidinobe Guezer comunidadma, ja̧danö ju'wibi wabeko ji̧ comundad Bet Joron comunidadbi,

¹⁸ jojodö deobe ji̧ comunidadbiya Balatbi, Tadmorbi yemidanö otidinobe.

¹⁹ Ju'wibi kwakwawa ko̧ko̧dö lödawemi comunidadbiyabi otidinobe, ja̧danö kolukiyabi, kabayudönö teada̧lakwawemi comunidadbiyabi otidinobe. Jerusalentjöbi, Libanotjöbi, weemi ba̧kwemeachibanöbi, okobe jwiinö otidobö ösödi̧danö, otidinobe Salomonma.

²⁰ Salomon iteda ömöayedö batjibanö 'diinö tjotidobö weinawö̧nö labebö loawama, baikwö laebobe: Damötjö̧ Dios israel jojodönö, okobe deinö canaan nijinö ju̧kwinadönö söbebö lotjobö weinajayonö, waekwinobe, söbebö lotjinokobe jwiinöma. Ba̧jȩkwadönö söbebö lotjinajayonö, amorreos jojodötjöbi, hititas jojodötjöbi, ferezeos jojodötjöbi, heveos jojodötjöbi, jebuseos jojodötjöbi, ju'wedöma ina israel nijinö tjö̧jinobe.

²¹ Ja̧danö, jobadö tji̧tji̧mu tupadanö jojodönöda iteda wei̧ 'dii̧nö otidadö batjibanö omudawö ujuninobe Salomonma, jadanö babe mölebi baibanö, ina jejenö israel jojodö tjömöayedö ju̧kwadö.

²² Jobadö 'dii̧nö tjotidobö wei̧danöma weinokobe, a̧dekwanö israel jojodönöma, Isabenö bidöma chömöledö otiwadö, jö̧ba̧lö. Israel jojodötjö Salomon ömöayedö tjotidinama, bi̧ya: Ju'wedöma ölakwabikwawa jojodö tjö̧jinobe, ju'wedöma ölakwabikwawa jawa luwedö tjö̧jinobe, ju'wedöma kolukanö kwebachö ölakwabikwawadö tjö̧jinobe, ju'wedöma kabayudönö wa̧nö ölakwabikwawadö tjö̧jinobe, ju'wedöma la'aka luwedö tjö̧jinobe,

²³ ja̧danö ju'wedöma Salomon otidobö jö̧a̧li̧ jawa webawedö ja̧nö, 'dii̧nö otidadö tjotidawa webö tjö̧jinobe. Israel jojodötjö quinientos cincuentabedöma, ja jawa webawedö tjö̧jinobe, ja̧danö jobadöma Salomon ömöyedö 'dii̧nö otidadö tjotidawatenia webö tjö̧jinobe.

²⁴ Ja̧danö, ju'wi Salomon otidinama, baikwö laebobe. Ilekwo bajibanö eminoko Faraon itjiju jö̧jakweju otidinobe Salomonma, ja̧danö otidö kaatenama, ajayinö jö̧jinelö, David itebo comunidad ötjabelö labebö, yayeju jejube jopjolachinobe. Jemi ikenama, Milo ötjabemibi otidinobe Salomonma.

²⁵ Isabenö Jo̧ eju otidö kaataja̧ ikenama, jobetjö kwabö juwö Diosnö iyiainobe Salomonma. O̧bakwena, wapötakwanö Isabenö Jo̧ ejube ichibö, otidinöte Isabenö Jo̧nö iyawötebe ichibö, jwiinö ubinö iyawabi, Dioskwö ösökwö ja̧kwawa iyawabi kwabö juwö iyiainobe Salomonma, ja̧danö ja̧ iyenama, omewi̧ jawa juwöbi iyinobe.

²⁶ Ju'wibi otidinobe la'aka luwo̧ Salomonma. Jwaibalawa Duwobutjö, Edom niji comunidad Elat yöneawemi Ezion Gueber tjolatjö isowibiya owiyawi̧ otidinobe, tea emö kwetjachobö.

²⁷ Ja̧danö, Tiro comunidad la'aka luwo̧ Hiramma, Salomonnö pjabatö iteda ömöayedötjö jwaibalawanö kweachakwawa waisadönö weinobe, bakobe Salomon ömöayedökwö kwebachö pjatjatobö.

²⁸ Ja̧danö, Salomon weawö̧, jwaibalawanö 'ya̧nö ödö kwetjachinobe, inesö otiwi̧ oro jȩmi Ofir nijibe, ja̧danö jobetjö nöinö oro tjeminobe. Jobe Ofirtjö catorce mil kilo oro tjeminobe, ja̧danö emajadö, tjebachajö tjuluwo̧ Salomon ö̧jobekwö tjichejebinobe.