1 Reyes 8 - Dios Iwene

Dios iteapjo weina wȩyukwaba döbalataja a̧ja̧pjo Salomon otidineju okwa tetjatina jawa

¹ Jemi ikenama, Dios eju otidö kabatajo̧, Salomonma okobe deinö israel jojodötjö luwedönö jwöinobe, sasokwena luwedönöbi, tjömöledösaso luwedönöbi Jerusalenbe ichö tjo̧ko̧ko̧kwobö. Jejenö jwöbö o̧ko̧ko̧dinobe jobadönö, tjedonö, tjöba a'otjö Isabenö Jo iteapjo, wei̧ wȩyukwa öbiya döbölataja a̧ja̧pjo, David itebo comunidad ötjabobe Ziontjö pjolatö, otidaja̧ Dios ejunö tetjatakwa̧ tjedakobetjö̧.

² Jejenö jwöiawö̧, jelemutjö du̧ju̧taja jawo̧, okobe deinö israel jojodötjö ömadö Etanim jö̧ba̧lö ötjabökwe jawo̧nö löwötenö ja̧kwawa ba'ali tjujunobö tjichibenama, okobe deinö la'aka luwo̧ Salomon öba a'o tjoko̧ko̧kwinobe.

³ Ja̧danö, okobe deinö israel jojodötjö luwedö tjichibenama, Diostjö jojodötjö ö'weje pjabatadöma Dios iteapjo katjebinobe, Dios eju 'yayejube tje'ewobö.

⁴ Kabebajadö, Isabenö Jo̧ iteapjobi, sabana'wotjö otikweju, Dios israel jojodö tjö̧'da̧de ö̧jejubi, okwa ji̧ Dios itea baibanö 'da̧batö tjujunina jawabi tje'ewinobe, Dios eju 'yayeju jo̧bekwö.

⁵ Ja̧danö, Dios iteapjo e'ewadö tjabönö, la'aka luwo̧ Salomonbi, ju'wedö jo̧bakwö ko̧ko̧kwadö israel jojodöbi, abönö 'ya̧nö ba̧jȩkwadö obejadönöbi, pakayadönöbi kwabö juwö tjiyinobe Diosnö. Yelösöda ba̧jȩkwadö obejadönöbi, pakayadönöbi kwabö juwö tjiyinobe, tjö̧ba̧ja̧dökenanö, Diosnö ösödö jwiinö ba̧jȩkwadönö kwabö juwö tjiyinobe.

⁶ Ja̧danö, Dios iteapjo, wei̧ wȩyukwa öbiya döbölataja a̧ja̧pjo e'ewajadö, jo̧ jö̧a̧lemi tjujuninobe, Dios ejutjö okwasȩko̧nö, inesö 'da̧batö junawȩko̧nö, querubines ötjabawö̧ angeledö tjöwa̧ja̧pa teebe.

⁷ Ja̧danö, jejenö tjujunobema, jobadö querubines ötjabawö̧ tjö̧wa̧jaöpiyama, Dios iteapjobi, iteapjo e'ewakwawö̧'a ö̧sö̧'abi tjumuchebinobe ichejekwa.

⁸ Ja̧danö, jejenö tjujunenama, jelȩko̧ nöȩko̧tjö Dios iteapjo öwawinököjayonö, ö̧sö̧'a ödöobetjö̧, nöȩko̧tjö ina öwawinobe ö̧sö'ama. Jo̧kwaijayonö tupakwösȩko̧, teachakwawȩko̧tjöbi, tupakwötjöbi öwawinokobe. Ja̧danö, jejenö tjujuninobema, ina babebi jobeda jo̧be Dios iteapjoma.

⁹ Dios iteapjo okwa, sule Dios wei̧ wȩyukwa öbiya döbölatajada okwa a̧ji̧nobe, damötjö Sinai mösa'otjö Moises anina öwiyama. Jau, Egipto nijitjö labebajadö, jobe Sinai mösa'otjö ko̧ko̧kwö tjö̧jenama, Isabenö Jo̧ma jobadönö iteda wei̧ weinobe, jadanö a̧ja̧kwajadö, —Jau, isabenö da̧ja̧kwakwedösa, —jö̧ba̧lö tjatadinobe. Ja̧ Sinaitjö Dios weina wȩyukwa öbiya döbölatajada Dios iteapjo okwa a̧ji̧nobe.

¹⁰ Ja̧pjo okwasȩko̧ okwa junajadö, ö'weje pjabatadö Dios ejutjö latjebenama, ojwiyo'wo Dios ö̧ji̧ i̧sȩkwa'woma Isabenö Jo̧ eju okwa teachinobe.

¹¹ Jejenö baledenama, Isabenö Jo̧ inesö dejatinö ujuluma, jobetjö jwiinö salöinobe, jadanö jejenö dewinö salöiawö̧, Diostjö jojodötjö ö'weje pjabatadöma, jobe Dios öba a'o ja̧nö tjotidobö jwiinobe o̧do okwama.

Salomon yöawina jawa

¹² Jemi ikenama, jejenö otidineju okwa Dios ö̧ji̧ i̧sekwa'wo ojwiyo'wo teachiökwe, Salomonma Isabenö Jo̧nö abebö yöa̧linobe: —Chuluwo̧ Isabenö Jo̧, yöka̧lajabe, –Ötjöma inesö yȩa'wonö jo̧sa, –jö̧ba̧lö.

¹³ Ja̧danö chuluwo̧ Isabenö Jo̧, ökwöda kweju baibanö, jwiinö otiweju chotidajabe, jobe ba̧kwelöjatebö kwö̧jobö chuluwo̧, —jö̧ba̧lö aebinobe Salomonma.

¹⁴ Ikenama, jejenö yöba̧lajo̧, la'aka luwo̧ Salomonma jalachibö okobe deinö jobe ju̧kwadö israel jojodönö aebinobe, Dios jobadönö paatobö.

¹⁵ Baikwö yöa̧linobe Salomonma: —Isabenö mikwawo̧ Isabenö Jo̧ israel jojodö dösödökwe Diosma, jo̧banö ösödö, –Otiwo̧ja, –jö̧ba̧lö dösödobö, isabenö chabe'do Davidminenö yöbawö ujuninadanö badekwachinö ja̧inobetjö̧.

¹⁶ Jau chömöledö, baikwö yöawinobe chabe'do Davidnö: –Chömöledö israel jojodönö Egipto nijitjö latebinemi baikwöma, la'akatjöda israel jojodö sasokwena jojodö tjitebo comunidadkwenatjö, ju'wi comunidadbi omudawö chujunijökötö, jobe chö̧jakweju baibanö o̧do tjotidoböma. Jo̧kwaijayonö, ökwö Davidnö omudawö chujunajabe, ökwöda chömöledö israel jojodönö öbibö jwekebobö, –jö̧ba̧lö chabe'donö yöawinobe.

¹⁷ —Jau chömöledö, chabe'do Davidma nöinö ösödinobe, israel jojodö dösödökwe Isabenö Jo̧ Diosnö otiwanö omukwatö, Dios eju baibanö otidoböma.

¹⁸ Ja̧danö, jejenö otidobö ösödiökwe, Isabenö Jo̧ma chabe'donö yöawinobe: –Ötjönö otiwanö omukwatö, cheju baibanö o̧do kwotidobö jö̧ka̧li̧ma, isabenö otiwanö ösödö omukwato̧ja.

¹⁹ Jo̧kwaijayonö, jejenö kwotidobö kwomukwati̧ otiwijayonö, cheju kwotidökakwo̧ja ökwöma, ökwö kwitji̧da otidakwo̧ma. Jau David, ökwö a̧dekwanö kwi̧tji̧da cheju baibanö o̧do otidakwo̧ma, jojodö ötjö Isabenö Jo̧nö otiwanö omukwatö tjösödakobetjö̧, –jö̧ba̧lö yöawinobe chabe'donö.

²⁰ —Ja̧danö chömöledö, yöbawö ujunina badekwachinö weajabe Isabenö Jo̧ma, baikwö yöta̧la: Ötjö David itji̧ma, Davidmine ö̧binaka inesö la'aka luwo̧ iteakanö chöbamatijatö, Isabenö Jo̧ yöbawö ujuninadanö. Ja̧danö, ju'wibi, David itji̧ otidakwo̧ jö̧ba̧lö yöawinadanö, beju Dios eju chotidajabe, ökwödö israel jojodö dösödökwe Isabenö Jo̧ Diosnö otiwanö tjomukwatakobetjö̧,

²¹ ja̧danö jejunö Dios iteapjo junawemi chotidajabe. Jau chömöledö, kwöwaisaduwa, damötjö̧ Isabenö Jo̧ma da'dödönö Egipto nijitjö laebinobe, ja̧danö labebajo̧, jobadönö weinobe. Ja̧, jobadönö wei̧ wȩyukwa öbiya döbölataja a̧ja̧pjo junawemi chotidajabe, Dios eju 'yayejutjö, Dios chabe'do Davidnö yöbawö ujunina jawa badekwachinö, —jö̧ba̧lö yöa̧linobe Salomonma, israel jojodönö.

Salomon Diosnö aebina jawa

²² Jemi ikenama, okobe deinö israel jojodö tjeda̧lonö, Isabenö Jo̧nö iyawöte öba a'o ja̧nö, ömamu mölejebekwö kabebö aebinobe Salomonma, baikwö:

²³ —Chuluwo̧ israel jojodö dösödökwe Isabenö Jo̧ Dios, mölejebetjöbi, bö̧jetjöbi bakwo̧bi ökwödajayo̧ma deobe la'akatjöda. Ökwöma isabenö jwaikwöda yöbawö kwujuni̧danö badekwachinö ja̧bo̧ja chuluwo̧. Ökwöma yöbawö kwujunijatö, –Weti̧ a̧ja̧kwö ju̧kwadönö ösödö pjatatakwo̧sa, –jö̧ba̧lö, ja̧danö yöbawö kwujuninadanö, weköbi̧ a̧ja̧kwö, jwaikwöda weköbi̧danö ja̧tjobö isakwadönö ile nibebö, otiwanö pjabato̧ja chuluwo̧.

²⁴ Ja̧danö, kwömöayo̧ chabe'domine Davidnö yöbawö kwujunina badekwachinö ja̧köbajabe chuluwo̧. Jau chuluwo̧, sule yöba̧lödamaökö, David itji̧ma kweju otidakwo̧ jö̧ba̧lö yöbawö kwujuninobe, jadanö ja̧ yöbawö kwujuninama, ökwöda kwujulunö babe möleda badekwachinö ja̧köbajabe chuluwo̧.

²⁵ —Ja̧danö, babema ju'wi yöbawö kwujuninabi badekwachinö pjakatobobö atebakwö chuluwo̧. Jau chuluwo̧ israel jojodö dösödökwe Isabenö Jo̧ Dios, kwömöayo̧ chabe'domine Davidnö yöbawö kwujunijatö, –Kwitji̧mu otiwanö tjö̧jakwa̧ omukwatö, ökwö weti̧ a̧ja̧kwö kwö̧jinadanö, jobadöbi weti̧ a̧jakwö tjö̧jitjö̧ma, ba̧kwelöjatebö israel jojodötjö la'aka luwedö tjö̧jakwedö, isabenö la'akatjöda kwitji̧mutjö inesö la'aka luwo̧ iteakanö bo̧ma deökakwo̧, –jö̧ba̧lö yöbawö kwujunijatö.

²⁶ Ja̧danö chuluwo̧ ökwödö israel jojodö dösödökwe Dios, weköbi̧ da̧ja̧kwiökwe, ja̧ yöbawö kwujuninabi badekwachinö pjakatobö atebakwö.

²⁷ —Chuluwo̧ Dios, ökwö kweju chotidajabe, jo̧kwaijayonö bö̧jȩnöda jö̧kö̧ja chuluwo̧. Jau chuluwo, inesö nöbo̧ja, mölejȩ inesö möjȩnöbi kwobiökenanö, jokwajabetjö̧ chöwaisa, beju bö̧jesejunö kwobioböma jwibo̧ja, jö̧balö.

²⁸ Jo̧kwaijayonö bejunöda kwö̧jököjayonö, yayonö ötjö kwömöayo̧ atebi̧ kwa̧ja̧kwobö atebakwö. Jau chuluwo̧, kwömöayo̧sa ötjöma, ja̧danö beju ökwö kweju badeibö ja̧nö, ökwönö budekwö atebakwö, jadanö atebi̧ a̧ja̧kwö pjakatobö atebakwö chuluwo̧.

²⁹ Yötebi, mölebi beju, chö̧jakweju jö̧ba̧lö jö̧ka̧linemi edö kwiteada̧lobö atebakwö chuluwo̧, beju jo̧bekwö kwömöayedö atjebi̧ otiwanö a̧ja̧kwö pjakatobö.

³⁰ Jau chuluwo̧, beju jo̧bekwö, ötjö kwömöayo̧bi, ju'wedö kwömöledö israel jojodöbi ökwönö adebenama, inesö mölejebe kwö̧jemi ja̧nö kwa̧ja̧kwobö atebakwö, ja̧danö a̧ja̧kwajo̧, sulabenö ja̧daja̧ omukwatökönö, otiwanö pjakatobö atebakwö.

³¹ —Ja̧danö ju'wibi bejutjö jweinö lȩekwa yökawobö atebakwö chuluwo̧, baikwö yöta̧la: Bakwo̧nö, –Bitema ömöledöso̧nö sulabenö ja̧ajabe, –jö̧ba̧lö wanedö yötja̧lenama, jobanö öbibö tjichena, ökwönö iyawöte, bejunö jö̧te badeibö ja̧nö, –Isabenö chömöledöso̧nö sulabenö ja̧binö̧kö̧sa, –jö̧ba̧lö yöbawö ujunobö.

³² Jobekwö baledenama, otiwanö kwa̧ja̧kwobö atebakwö chuluwo̧, ja̧danö jweinö lȩekwa kwi̧sȩbobö atebakwö. Jau chuluwo̧, bakwo̧nökwena ja̧tja̧ja̧ mikwa tjemo jö̧tja̧lidanö weköbobö atebakwö, sulabenö ja̧bajo̧nö, sulabenö ja̧aja̧ mikwa baibanö, jo̧banö lȩkebobö atebakwö, ja̧danö sulabenö ja̧bö̧kö̧ wene jwibo̧nö, –Bitema otiwanö weti̧ a̧ja̧kwo̧, –jö̧ba̧lö, otiwanö pjakatobö atebakwö.

³³ —Ja̧danö ju'wibi atebakwö chuluwo̧, ju'winö kwömöledö israel jojodöma, kwöba a'otjö sulabenö jabinadö, tjöpöjojodö tjujuluwaja̧wö̧ tjö̧jakwedö. Jejenö balediawö̧, tjebachajö, yemidanö ökwönö ösödö, –Isabenö Jo̧ wei̧da da̧ja̧kwobö jo̧be, –jö̧ba̧lö sulabenö tjomukwatina balewachajadö, bejutjö pjakatobö atjebitjö̧ma,

³⁴ mölejȩbetjö otiwanö kwa̧ja̧kwobö atebakwö chuluwo̧, ja̧danö a̧ja̧kwajo̧, kwömöledö israel jojodö sulabenö jatjaja̧ omukwatökönö, jobadönö kwösödobö atebakwö chuluwo̧, jadanö jobadönö ösödö, bemi niji tja'dödönö kwiyinemibe tjetjachajinö kwichejebobö atebakwö.

³⁵ —Ja̧danö ju'wibi atebakwö chuluwo̧, ju'winö kwömöledö israel jojodöma weköbi̧ a̧ja̧kwökönö, sulabenö ja̧tja̧kwedö, jadanö sulabenö ja̧tjiökwe, jobadönö lȩbebö, ojwiyo o̧bökönö, mölȩjȩ pje'datö loköbakwo̧ja. Jejenö lȩkebiawö̧, sulabenö tjomukwataja̧ kabatibö, tjebachajö yemidanö ökwönö ösödö, beju jo̧bekwö edö ökwönö atjebenama,

³⁶ mölejebetjö kwa̧ja̧kwobö atebakwö chuluwo̧. Jau chuluwo̧, kwömöayedö sulabenö ja̧tjina omukwatökönö kwömöledö israel jojodönö kwösödobö atebakwö, jadanö jobadönö ösödö, otiwanö ja̧bö tjö̧jakwa̧ kwö̧ba̧ja̧dobö atebakwö, jadanö ojwiyo weköbobö atebakwö. Bemi nijima, ökwöda kwitebo niji chuluwo̧, jadanö ökwöda kwömöledönö kwiyinemi, bemi israel nijinö otiwanö tjö̧jobö, jadanö yemidanö ökwönö ösödö, beju jo̧bekwö ökwönö atjebenama, jejenö tjitebo otiwachibanö pjakatobö atebakwö.

³⁷ —Ja̧danö ju'wibi atebakwö chuluwo̧, ju'winö bemi niji israel nijima suli̧ waekwena, baikwö yöta̧la: Ju'winö bemi nijitjö a̧wi̧chi̧ tjöena. Jadanö ju'winö pokwi̧ woabobedanö ichejekwena, otiwanö wa̧jö̧könö. Ja̧danö ju'winö ma̧la̧kayu ichö suli̧ tjöwaedena. Ja̧danö ju'winö tjöpöjojodö bemi niji comunidad tjösawö, niji suli̧ tjöwaedena. Ja̧danö ju'winö ju'wi ja̧ jaye baledi̧ baledena, niji suli̧ waekinö.

³⁸ Jejenö balediawö̧, kwömöledö israel jojodötjö bakwoö̧kö̧, okobe deinöö̧kö̧, –Usula emawadösa, –jö̧ba̧lö, beju jo̧bekwö tjömamu kabebö atjebitjö̧ma,

³⁹ mölȩjȩbe kwö̧jelö otiwanö kwa̧jakwobö atebakwö chuluwo̧. Atjebi̧ a̧ja̧kwö, jobadö sulabenö ja̧tjina omukwatökönö, kwösödodönö chuluwo̧. Jau chuluwo̧, jojodö tjomajadenö tjomukwati̧ edö waiso̧ja, isabenö ökwönö tjösödojobö, omöna yötja̧lojobö jö̧ba̧lö, jo̧kwajabetjö̧ bakwonökwena kwöwaisi̧danö kwatadobö atebakwö. Jau chuluwo, ökwöda okobe deinö bö̧jȩnö ju̧kwadö tjomajadenö tjomukwati̧ waiso̧ja, jelo̧ waiso̧ma deobe, jo̧kwajabetjö̧, jejenö bakwo̧nökwena tjemo jö̧tja̧lidanö kwiyobö atebakwö.

⁴⁰ Ja̧danö chuluwo̧, jejenö ja̧köbiyawö̧, otiwanö weköbi̧ tja̧ja̧kwakwedö israel jojodöma, ina tja'dödönö kwiyinemi nijinö tjö̧jayi ba̧kwelöjatebö otiwanö weköbi̧ tja̧ja̧kwakwedö.

⁴¹ —Ja̧danö ju'wibi atebakwö chuluwo̧, ju'winö ökwönö a̧ja̧kwajadö, kwömöledö israel jojodöböködöma ödötjö tjichakwedö.

⁴² –Israel jojodö tjösödökwe Diosma otiwo̧, isabenö juluwi̧ ji̧ jawa otidobö juluwo̧, –jö̧ba̧lö a̧ja̧kwajadö, bejutjö ökwönö atjebobö tjichakwedö.

⁴³ Jejenö abebö tjichenama, mölejebe kwö̧jelö ja̧nö jobadö atjebi̧bi kwa̧ja̧kwobö atebakwö chuluwo̧. Jau chuluwo̧, okobe deinö jelobetjö ichajadö ökwönö atjebi̧ a̧ja̧kwö kwatadobö atebakwö, jejenö kwatadiawö̧ okobe deinö tjitebotenia jojodöma ökwönö tjöwaisakobetjö̧, –Isabenö juluwo̧ Isabenö Jo̧ma, –jö̧balö, ja̧danö ökwönö waisachibajadö, ökwönö yebabinö ösödö, weköbi̧ a̧ja̧kwö tjö̧jakobetjö̧. Jau chuluwo̧, jejenö jobadö atjebi̧bi kwatadiawö̧, ökwö kwömöledö israel jojodö ökwönö yebabinö tjösödi̧danö tjösödakwedö, ja̧danö tjöwaisakwedö, –Dios eju baibanö Salomon otidinejuma, isabenö Dios ö̧jeju, isabenö jobe Diosnö dösödobö jo̧be, –jö̧ba̧lö.

⁴⁴ —Ja̧danö ju'wibi atebakwö chuluwo̧, ju'winö kwömöledö israel jojodönö weköbakwo̧ja, jelobe 'ya̧nö, tjöpöjojodökwö tjölakwabikwawobö. Ja̧danö, jejenö tjölakwabikwawobö labebajadö, tjölakwabikwawakwa̧ abönö, bemi comunidad ökwöda omudawö kwujunina comunidad jo̧bekwö, jadanö beju ökwönö otiwanö omukwatö chotidineju jo̧bekwö edö, ökwö Isabenö Jo̧nö atjebenama,

⁴⁵ mölejȩbe kwö̧jelö otiwanö kwa̧ja̧kwobö atebakwö chuluwo̧. Jau chuluwo̧, jejenö pjakatobö atjebiökwe, a̧jakwö otiwanö pjakatobö atebakwö, tjöpöjojodönö tjujuluwakobetjö̧.

⁴⁶ —Isabenö bö̧jȩnö ju̧kwadötjö bakwo̧bi deobe chuluwo̧, bakwainö ja'yubebi sulabenö jabökönö jo̧ma, ja̧danö ju'winö kwömöledö israel jojodöma isabenö kwöpöjödi̧ jawa sulabenö ja̧tjakwedö chuluwo̧. Ja̧danö, sulabenö ja̧tjiökwe, isabenö jobadönö kwödameakwakwo̧ja chuluwo̧, jadanö tjöpöjojodö jobadönö tjujuluwobö kwiyakwo̧ja. Ja̧danö, juluwajadö, tjitebobe öbibö tjȩwa̧jakwedö israel jojodönö, ödö tjitebobeö̧kö̧, yö̧ne tjitebobeö̧kö̧.

⁴⁷ Jemi ikenama, tjöpöjojodö tjitebonö tjö̧jemi ja'ötjö, kwömöledö israel jojodöma sulabenö tjomukwataja̧ kabatibö, jweinö tjomukwatakwedö, ja̧danö jobe ju'wedö tjitebonö ja̧nö, ökwönö atjebakwedö. Jau chuluwo̧, sulabenö tjomutaja̧ kabatibö, tjöbalewachakwedö, jadanö lȩlöinö kwedobö budekwö atjebakwedö, –Isabenö weköbi̧ kabatibö, jelema mananö sulabenö di̧'yajabetija, isabenö sulabenö jabinadösa, –jö̧ba̧lö ökwönö atjebakwedö.

⁴⁸ Isabenö tjomajadenö otiwanö ökwönö ösödö, tjöpöjojodö jobadönö juluwinadö tjitebonö ja̧nö, bemi niji tja'dödönö kwiyinemi jo̧bekwö, ökwöda omudawö kwujuninemi comunidad jo̧bekwö, beju ökwönö otiwanö omukwatö chotidineju jo̧bekwö edö atjebenama,

⁴⁹ otiwanö atjebi̧ kwa̧ja̧kwobö atebakwö chuluwo̧. Inesö mölejȩbe kwö̧jemi janö, –Pjakatobö adebakwö, –jö̧ba̧lö ökwönö atjebi̧ kwa̧ja̧kwobö atebakwö chuluwo̧, ja̧danö tjöpöjojodötjö tjö̧jibinö pjakatobö atebakwö.

⁵⁰ Jau chuluwo̧, kwömöledö israel jojodöma sulabenö ja̧badö tjö̧jijayonö, jejenö atjebiökwe, okobe jwiinö sulabenö ja̧tji̧tenia omukwatökönö jobadönö kwösödobö atebakwö, ja̧danö jobadönö pjabatö, jobadönö juluwinadönö weköbobö atebakwö, kwömöledö israel jojodönö lȩlö̧jinö tjedobö.

⁵¹ Jau chuluwo̧, israel jojodöma ökwöda kwömöledö, ökwöda kwömöledö batjibanö kweminawö̧. Damötjö jobadöma, 'dii jawa otidadö tubi̧tjö usula tjemawi̧danö, Egipto nijinö janö jwiinö usula tjemawinobe, jo̧kwaijayonö usula emawö tjö̧jemi ja'ötjö, ökwöda kwömöledö batjibanö kweminawö̧ chuluwo̧, jo̧kwajabetjö̧ ökwöda kwömöledö tjö̧jobetjö, atebaja̧danö dösö̧löjinö pjakatobö atebakwö.

⁵² —Jau chuluwo̧, ötjö kwömöayo̧bi, ju'wedö kwömöledö israel jojodöbi pjakatobö adebenama, otiwanö kwa̧ja̧kwobö atebakwö, okobe jwiinö ökwönö adebi̧ a̧ja̧kwö kwatadobö atebakwö.

⁵³ Jau chuluwo̧ okobe jwiinö juluwo̧ Isabenö Jo̧, damötjö da'dödönö Egipto nijitjö latjebi̧nö kwichejebinenama, Moisesnötjö̧ yökawijatö, –Okobe deinö bö̧jȩnö ju̧kwadö tjitebokwena jojodötjö, sule israel jojodönöda omudawö chujunajabe, ötjöda chömöledö batjibanö tjö̧jobö, –jö̧ba̧lö. Ja̧danö, kwömöledö badibanö ökwödö israel jojodönö omudawö kwujuninobetjö̧, atebaja̧danö bejutjö ökwönö adebenama, otiwanö kwa̧ja̧kwobö atebakwö, —jö̧ba̧lö aebinobe Salomonma.

⁵⁴ Jobekwö abebö, okobe jwiinö ja̧ Isabenö Jo̧nö aekwa aebinobe Salomonma. Jejenö aebonö, Isabenö Jo̧nö iyawöte öba a'o, u̧yu̧kiju̧kunö ja̧nö, ömamu mölȩjȩbekwö kabebö aebinobe, ja̧danö abebö kabatajo̧, jobetjö a̧la̧ibinobe.

⁵⁵ Ja̧danö a̧la̧ibajo̧, okobe deinö jobe ju̧kwadönö Dios pjaatobö aebinobe, jadanö labinö yöa̧linobe baikwö:

⁵⁶ —Chömöledö, isabenö mikwawo̧ Isabenö Jo̧ma, otiwo̧ja jö̧ba̧lö jo̧banö dösödobö. Jau chömöledö, yöbawö ujuninadanö, iteda ömöledö israel jojodö 'diinö ja̧nö, wene jwiinö dö̧jobö pjaatajabe. Damötjö̧ Moisesnötjö̧ da'dödönö yöbawö ujunina jawama, bakwöta jawabi waekwökönö, okobe jwiinö badekwachinö pjaatajabe chömöledö, isabenö jo̧banö dösödobö jo̧be.

⁵⁷ Duluwo̧ Isabenö Jo̧ Dios da'dödöminekwö ö̧ji̧nadanö, bakwainö ökwödökwöbi ö̧jobö chösöda, la'akatjöda ökwödönö le'dedö lobökönö, ba̧kwelöjatebö ökwödökwö ö̧jobö chösöda.

⁵⁸ Ja̧danö ökwödönö pjaatobö chösöda, jo̧ba ömöayedö ja̧nö, otiwanö wei̧ a̧ja̧kwö dö̧jakobetjö̧, da'dödönö weina, ja̧bö dö̧jobö weinabi, ju'wi weina jawabi otiwanö a̧ja̧kwö dö̧jakobetjö̧.

⁵⁹ Ja̧danö dösödökwe Isabenö Jo̧ Dios ba̧kwelöjatebö jo̧banö atebaja̧ jawa omukwatibobö chösöda, babe öba a'otjö atebaja̧ma. Ja̧ omukwatibobö chösöda, wene baledö, jo̧banö pjaatobö adebiökwe, ötjö jo̧ba ömöayo̧nöbi, ju'wedö ömöledö israel jojodönöbi otiwanö pjaatakobetjö̧.

⁶⁰ Ja̧danö, jejenö ökwödönö pjaatiawö̧, okobe deinö bö̧jȩnö ju̧kwadö tjitebotenia jojodöma jo̧banö tjöwaisachibakwedö, –Isabenö Jo̧da Diosbo̧ma, jelo̧ma deobe, –jö̧ba̧lö.

⁶¹ Ja̧danö ökwödö israel jojodöma ba̧kwelöjatebö kwomajadeduwinö jwaikwöda otiwanö omukwatö, ba̧kwelöjatebö dösödökwe Isabenö Jo̧ Dios wei̧ a̧ja̧kwö kwö̧jaduwobö chösöda. Jau chömöledö, babe a̧ja̧kwö kwö̧jaduwi̧danö, ba̧kwelöjatebö ja̧bö kwö̧jaduwobö Dios wei̧bi, ju'wi wei̧bi kwa̧ja̧kwaduwobö chösöda, —jö̧ba̧lö yöa̧linobe Salomonma.

⁶² Jemi ikenama, la'aka luwo̧ Salomonbi, ju'wedö israel jojodö jobe ko̧ko̧kwadöbi, jobe Isabenö Jo̧ öba a'o, kwabö juwö Diosnö tjiyinobe.

⁶³ Jwiinö ba̧jȩkwadö ajikwakwawedönö kwabö juwö tjiyinobe, Dioskwö ösökwö ja̧kwawa iyawa baibanö, pakayadötjö veintidos milbedönö kwabö juwö tjiyinobe, ja̧danö obejadötjö ciento y veinte milbedönö kwabö juwö, Dios öba a'o ba'ali tjukwinobe. Jobekwö laebobe Salomonbi, okobe deinö ju'wedö israel jojodöbi, ajayinö Salomon otidineju Isabenö Jo̧ ejutjö, ajayinö tjösödinama. Ja̧ möleda Isabenö Jo̧ eju baibanö, 'da̧batö tjujuninobe, Salomon otidinejuma.

⁶⁴ Ja̧danö, ja̧ möle jwiinö ba̧jȩkwadö ajikwawedönö kwabö juwö tjiyobetjö̧, okobe deinö Isabenö Jo̧ eju badeibö ja̧pjo broncetjö otikwapjotjö tjiyobö jwiinobe. Jo̧kwajabetjö̧, ja̧ möle Isabenö Jo̧ eju badeibö a̧petubi 'da̧batö ujuninobe Salomonma, jobebi Diosnö iyawemi baibanö. Ja̧danö Isabenö Jo̧nö iyawemi baibanö 'da̧batö junajo̧, jobetjö jwiinö ubinö iyawabi, trigojaye iyawabi, Dioskwö ösökwö ja̧kwawa iyawedötjö o̧tebi, jobe a̧petutjö kwabö juwö tjiyinobe, Diosnö ösödö.

⁶⁵ Ja̧ mölema, Salomonbi, ju'wedö israel jojodöbi dötölataja semana baledibanö, jobe duluwo̧ Isabenö Jo̧ öba a'o ba'ali tjujuninobe. Israel jojodötjö isabenö ba̧jȩkwadö ja̧ ba'ali tjujuninobe, okobe jwiinö israel niji ba̧kwemeachibanö ju̧kwadö ichö tjujuninobe, u'da ji̧ comunidad Lebo Jamattjö, a̧li̧kwösödö, Egipto niji ö'öbösödö ojwebe ichibanö.

⁶⁶ Ja̧danö a̧li̧nösamutjö ö'wejemu jawa möle ba'ali junajadö, a̧li̧nösa̧mutjö bakwamu jawa möle baibenama, jojodönö webö loinobe la'aka luwo̧ Salomonma, —Tjo̧wita. Otiwanö kwȩwa̧jaduwo, —jö̧ba̧lö. Webö loiawö̧, Diosnö atjebinobe Salomonnö, jadanö tjo'wo ösöwanö tjejukwena tjȩwa̧jinobe. Isabenö Jo̧ma isabenö otiwanö pjaatinobe ömöayo̧mine Davidnöbi, ju'wedö ömöledö israel jojodönöbi, ja̧danö jejenö otiwanö pjaatiawö̧, tjo'wo ösöwachibanö tjȩwa̧jinobe.